Galatia 1
1
1Amo Pɔɔl wolo na ye Yezu Krista totoŋa nakwe to mo popone tɔnɔ konto. Ko dae nabiina mo toŋe-ne, ye ko dae nabiina ŋwaane mo Wɛ tiŋi-ne se a taa ye konto. Ko nam ye Yezu Krista tete mo kuri-ne, dedaane dé Kwo Wɛ wolo na bi‑o toone wone to.
2Dé nu-bia balo maama na wo amo tei ne to de jɔɔne abam balo na ye Yezu kɔgɔ kom wo nɔɔna ye á zoore Galatia wone to.#Kikia 18:23
3Dé Kwo Wɛ, de dé Teiru Yezu Krista wó pa abam zaane de yazura.
4Yezu Krista nam mo dɛ dé Kwo Wɛ boboŋa na lage tei to maama, ye o sɛ se o te debam wɛleera ŋwaane, se o ma wane o vere debam leile logo baŋa wo-lwanno tem dam wone.
5Baŋa Wɛ maŋe de zula maŋa maama se ko taa vei wuu. Ameena.
Wɛ kwor-ywoŋa kam
6Abam na ke tei to nam mo pɛ se amo yera sɔɔre. Wɛ dɛ Yezu Krista zaane dem ŋwaane mo o kuri abam se á ta‑á ye o nyem, ye á laam zaŋe á ma á kwaga á ya wonto, se á daare á sɛ kwor-ywoŋa kadwoŋi.#1 Tim 1:3 7Ko na ye chega to, kwor-ywoŋa kadwoŋi maŋe ka tera. Nɔɔna badaara nam tu á tei ye ba pa á boboŋa vugimi de ba na kwaana se ba pipiri Yezu Krista kwor-ywoŋa kam tei to. 8Nɔɔno nam ná tu á tei ye o bere abam kwora kadwoŋi, ye ka dae kwor-ywoŋa kalo dé na maŋe dé bere abam to, se á yé sɛ konto tu. Ko ná maŋe ko ye debam tete wo nɔɔno dedoa, naa ko ná ye Wɛ telaao maleka, ye o ná bere abam kwor-ywoŋa kadwoŋi, Wɛ wó yaale konto tu o yiga ne. 9Amo nam ta wó jwoori a fɔge a ta, nenɛɛne debam na maŋe dé ta kolo de abam to. Nɔɔno ná tɔɔle kwora kadwoŋi o bere abam, ye ko dae kwor-ywoŋa kalo á na maŋe á sɛ to, Wɛ wó yaale konto tu o yiga ne.
10Amo na tɛ tei to wó pa se á lɔre we, a lage a na zula mo Wɛ tei ne, ye ko dae nabiina tei ne. Amo daa ta ba boŋe se a pa nabiina mo me de amo. A ya ná boŋe konto, a daa bá taa ye Yezu Krista kabaa.
Ko na ke tei ye Pɔɔl ji Yezu nɔɔno to
11A nu-bia bam, a lage se á lɔre we, kwor-ywoŋa kalo amo déem na tɔɔle a bere abam to wo tɔge nabiina dam ŋwaane. 12Ko dae nabiinu mo kwei-ka o pa-ne se a tɔɔle. Nɔɔn-nɔɔno nam wo kwei-ka o ma o zamese-ne. Yezu Krista tete mo le-ka o bere-ne.
13Abam maŋe á ni amo déem na tɔge chwoŋa kalo ye a sɛ Juu tiina chullu tem to. Amo déem tiini a bɛɛse Wɛ kɔgɔ kom maama. A ya kwaana se a chɔge-ba de ba dwi maama. #Kikia 8:3; 22:3-5 14Ko ná ye amo yuudwonna bam, a déem dwoi ba dedɛ de a na tɔge Juu tiina chullu tem tei to. Amo chɛ lanyerane de a na sɛ dé nabaara bam chwei sem tei to. 15De konto maama, Wɛ maŋe o kuri-ne faŋa faŋa mo ye ba ta wo loge-ne. O laam ma duri a ŋwaŋa ye o bwoŋi-ne se a taa tɔge‑o. 16Maŋa kalo o boboŋa na lage to mo o veere o Bu wom o bere-ne. O ma daare o pa-ne chwoŋa se a kwei wonto kwor-ywoŋa kam a vo a bere dwi-gɛ tiina. Maŋa kam konto ne a wo vei nɔɔn-nɔɔno tei se dé ŋɔɔne daane, se ko ye amo de Wɛ yerane mo. 17Amo daa ta wo vei Jerusalem se a na balo na maŋe ba ye Yezu totoŋa nakwa to. Amo nam na ke kolo to, a yɔɔre a vo Arabia seeni mo a wora. A daa ma jwoori a vo Damasika.
18Bena yatɔ na kɛ to, a laam ma zaŋe a vo Jerusalem se a na Piita se dé lɔre daane. A ma ke bakwa yalei o tei ne. 19Amo daa wo nɛ Yezu totoŋa nakwe wodwoŋi a woli da, se dé Teiru Yezu nyaane Jemsi yerane mo a nɛa.
20Amo na popone wonnu telo to maama ye chega mo. Wɛ yei amo wo. Ko nam dae vwa mo a fɔe.
21Ko kwaga ne a laam ma zaŋe a tole a vo Siria de Kilikia jei sem. 22Ko nam ná ye Yezu Krista tɔgena balo na tigisi daane Judea te-nia yam ne to, banto yi déem ta wo nɛ amo. 23Ba nam nigi nɔɔna badaara na tɛ amo taane ba we, “Nɔɔno wolo déem na bɛɛse debam to laam zage o kikia, ye o wora o tɔɔle Wɛ kwor-ywoŋa kam se o pa nɔɔna ba ba sɛ Yezu Krista. Ko nam ye Yezu chwoŋa kam konto mo o déem kwaana se o ya chɔge-ka.” 24Ba na nigi amo taane konto to, ko ma pa ba zuli Wɛ lanyerane.
Currently Selected:
Galatia 1: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
