Nwoŋim 38

Zwɛɛm kaanem dakaa kam

1Bezaleli déem kwei golesaa dɛ mo o ke dakaa se ba taa zwɛ kaanem de baŋa ne. O ma ke-ka pa se ka sɛ sena sem taa mae daane, jatwogo de noa ni maŋem kuni benu. Ko daare ka wɛ-baŋa maŋem dem maa ye jatwogo de noa ni maŋem kuni betɔ. 2O ma sare wonnu tena na nye de nyea o ke dakaa kam gugworru tena tem ne. Tento de dakaa kam maama déem ye woŋo dedoa mo, ye o ma channa o taare ka dedaane ka nyea yam maama. 3O ta ma kwei channa o ke dakaa kam yera totoŋa zela maama. O ma mɔ zwe selo ba na wó taa mae ba pɛ tentwarem to, de sɛbullu, de na-zwe, de mini zon-tanlɛ, dedaane wonnu telo na wó taa mae te chu nɔna to. 4O ma maŋe dakaa kam tetare ne o ke wo-daŋɔ o meeli ka yera ne. O laam ma kwei channa luuru o sɔ o lɛɛne daane, ye o daare o ke woŋo kom konto se ko yi wo-daŋɔ kom kuri ne. 5O ta ma ke channa kwana yana mo o meeli dakaa kam sɛ sena sem ne se ya maŋe de channa lɛɛna yam, se dɛ wane se taa tore da. 6O ma sare golesaa dɛ selo ba na wó taa mae ba zeŋe dakaa kam to, ye o daare o taare-se de channa. 7O ma kwei-se o tore kwana yana yam na wo dakaa kam sɛ sem ne to. O déem na ke dakaa kam to mo o twoŋi dɛ sem daane se ka taa ye wo-wogo.

Channa ware-zoŋa kam

8Kaana badwonna déem yeini ba wo wara-jei sem manchwo-peena yam ni ne ba zeini totoŋa. Bezaleli ma jwoŋi channa niiru ba tei ne ye o kwei-te o ma mɔ ware-zoŋa kam de ka na wó taa zege woŋo kolo baŋa ne to.

Wara-jei sem konkɔlɔ kom

9Bezaleli déem chege wara-jei sem konkɔlɔ kom mo. O ma sɔ gare-fefale se se kaare-ko. Ko tega-kuri seeni maŋem ye jatwogo de noa ni maŋem kuni bi mo dedɔrɔ baŋa ne, 10ye gare-jala yam pale da-dɛɛro finlei baŋa ne mo, te na zege channa luuru finlei baŋa ne to. O déem mɛ lu-nyenno o mɔ gwoli o meeli dɛ sem yera ne ye o ke se lu-vɔɔro tem. 11Konkɔlɔ kom baŋa seeni saŋa kam déem ye bedwe de tega-kuri seeni saŋa kam mo. 12Se ko ná ye saŋa kalo na jeeri wɛ-zoore seeni to, ka maŋem ye jatwogo de noa ni maŋem kuni finnu mo dedɔrɔ baŋa ne. Ba ma daŋe gwaaro tem da-dɛɛro fuga de te luuru fuga kam baŋa ne se ba ma kwoli saŋa kam konto. Ba ma meeli lu-nyenno gwoli dɛ sem yera ne ye ba ke se lu-vɔɔro tem. 13Konkɔlɔ kom wɛ-puli seeni saŋa kam maŋem de déem ye jatwogo de noa ni maŋem kuni finnu mo dedɔrɔ baŋa ne.

14Wara-jei sem manchwoŋo ni dem maa wo wɛ-puli seeni saŋa kam ne mo. Ni dem jazem seeni mo ba leigi gwaaro telo dedɔrem na ye jatwogo de noa ni maŋem kuni fuga-benu ye te daŋe da-dɛɛro tetɔ de te luuru tetɔ tem baŋa ne to. 15Ni dem jagwia seeni de maa ye konto mo. 16Ba déem kwei gare-fefale selo na ye chekke to ba ma sɔ gwaaro telo na wó che wara-jei sem konkɔlɔ kom to. 17Ba déem mɛ channa mo ba ke luuru telo na teili da-dɛɛro tem to. Se ko ná ye gwoli sem de lu-vɔɔro tem, lu-nyenno mo ba mɛ ba ke-te se te meeli da-dɛɛro tem maama yera ne. Ba ma kwoli da-dɛɛro tete yuni tem de sabu-seŋa.

18Ko nam ná ye manchwoŋo ni dem gare-jale dem tete, ba déem mɛ gare-fefale de gare-ŋone selo nyenyero na ye nazwon-pupwia, de nasoŋ-pupwia, de nasoŋo chwɛ-chwɛ to mo ba sɔ-de. Ba ta ma gɔgere-de de nyenyero lanyerane. Gare-jale dem konto ye jatwogo de noa ni maŋem kuni finlei mo dedɔrɔ baŋa ne, ye de ye jatwogo de noa ni maŋem kuni benu wɛ-baŋa seeni, nenɛɛne konkɔlɔ kom gwaaro tem na mae tei to. 19Gare-jale dem pale da-dɛɛro tena na chwi channa luuru tena baŋa ne to mo. Ba mɛ lu-nyenno mo ba ke se gwoli sem de se lu-vɔɔro tem ye ba kwoli se yuni tem. 20Ba ta ma kwei channa ba ma ke paara yalo na wó taa jaane vwei dem de konkɔlɔ kom gwaaro tem dedaane dɛ sem maama to.

Zela yalo ba na mɛ ba ke wara-jei sem to

21Zela yalo maama ba déem na mɛ ba ke wara-jei sem mɛ Wɛ ni-gwonim kandwa yam na tigi to dum na mae tei to mo tento. Vwei dem dedaane de zela yam maama mo konto. Moses ma pa se Levi dwi tiina bam popone-te ba tiŋi. Wɛ kaanem tu Aron bu Itamara déem nam mo nii jeelim dem baŋa ne. 22Yuri bu Bezaleli ya nwoŋi Judah dwi dem wone mo. O maa nii totoŋe dem maama baŋa ne, nenɛɛne Baŋa Wɛ déem na maŋe o bere we ba ke tei to. 23Ahisamaki bu Oholiaba de ya nwoŋi Dan dwi dem wone mo. O maa tiini o woli Bezaleli pa se ba ke woŋo maama. Oholiaba déem ye gɔgɔ mo chekke, ye o wae o mae gare-fefale, de gare-ŋone selo nyenyero na ye nazwon-pupwia, de nasoŋ-pupwia, de nasoŋo chwɛ-chwɛ to o gɔgere wo-laaro.

24Ko ná ye sabu-seŋa kalo nɔɔna bam na jaane ba ba ba pa Baŋa Wɛ wara-jei sem totoŋa ŋwaane to, ka dum maŋem dem déem maa ye kilo moro dedoa (1000) mo, se ko tɔge wara-jei sem maŋem chekke na ye tei to.

25Lu-nyenno tem Moses déem na jwoŋi nɔɔna bam jeelim dem baŋa ne to maŋem dem de maa ye kilo morro tetɔ de bia yana de fintɔ (3,430) mo. 26Nɔɔno wolo maama na yi bena finlei ye o tɔge o wo jeelim dem wone to ya ŋwe sɛkɛle chichworo mo, se ko dunni tɔge wara-jei sem maŋem chekke.#Nwoŋim 30:13-15 Ba na jeeli nɔɔna bam ni to, ba nɛ we baara moro kuni bia yaredo de yatɔ, dedaane bia yanu de finnu (603,550) mo wora, ye ba jwoŋi lu-nyenno tem konto ba tei ne ba ma toŋe. 27Ba ma kwei lu-nyenno kilo morro tetɔ de bia yana (3,400) ba ma ke luuru bi (100) se te teili wara-vwei dem de de gare-jale dem. Luu maama maa ye lu-nyenno kilo fintɔ-tena (34) mo ba mɛ ba ke. 28Lu-nyenno kilo fintɔ (30) telo na daare to mo ba mɛ ba ke gwoli sem dedaane lu-vɔɔro tem, ye ba ta ma-te ba kwoli da-dɛɛro yuni tem.

29Ko nam ná ye channa kalo nɔɔna bam na kwei ba pa Baŋa Wɛ to, ka maŋem dem ye kilo morro telei de bia yana de finlei-tenu (2,425) mo. 30Channa kam konto mo ba mɛ ba ke luuru telo na teili wara-vwei dem ni dɛ sem de de gwaaro tem. Ba ta ma kwei-ka ba ke zwɛɛm kaanem dakaa kam, de ka tetare luu kom, de ka yera zela yam maama. 31Ba déem ta mɛ channa kam ba ke luuru telo na teili konkɔlɔ kom dɛ sem de ko gwaaro tem, dedaane manchwoŋo ni dem dɛ sem de de gare-jale dem, ko woli de paara yalo na wó taa jaane wara-vwei dem de de konkɔlɔ kom gwaaro tem de te dɛ sem maama mo.

Currently Selected:

Nwoŋim 38: KBG

Highlight

Copy

Compare