Nwoŋim 39

Wɛ kaanem tiina gwaaro tem

1Gwaro tem déem ma kwei gare-ŋone selo nyenyero na ye nazwon-pupwia, de nasoŋ-pupwia, de nasoŋo chwɛ-chwɛ to ba ma sɔ nenɔŋa gwaaro se Aron de kaanem tiina bam maama taa zoora, ko maŋe de ba ná yeini ba zo Wɛ wara-jei sem di-yuu kom wone se ba toŋe. Ko maama déem ke ko tɔge nenɛɛne Baŋa Wɛ ya na bere Moses tei to mo.

Gare-wogo kom

2Gwaro tem ma kwei gare-fefale selo na ye chekke to, ye ba laam woli de gare-ŋone selo nyenyero na ye nazwon-pupwia, de nasoŋ-pupwia, de nasoŋo chwɛ-chwɛ to ba ma sɔ gare-wogo kom. 3Ba ma tiini ba mage sabu-seŋa pa se ka chaane ka ji ŋon-memene. Ba ma kwei-se ba gɔgere nyenyero ba woli de gare-fefale sem de gare-ŋone selo nyenyero na ye nazwon-pupwia, de nasoŋ-pupwia, de nasoŋo chwɛ-chwɛ to. 4Ba déem ta ke vovwe selei mo ba pa se tɔge gare-wogo kom vɔna yam seeni se ko pa gɔrɔ kom yiga de kwaga twoŋi daane. 5Ba ta ma ke teiŋa vovoa se ka de taa ye bedwe de gare-wogo kom. Ba déem kwei wonnu telo ba na mɛ ba sɔ gare-wogo kom to mo ba ma ke vovoa kam. Konto maama déem ke ko tɔge de Baŋa Wɛ ya na bere Moses tei to mo.

6Ba ma kwei Onika kandwa-nyenno tem ye ba sare Isarele dwi maama yere ba ke ya baŋa ne. Ba ta ma kwei sabu-seŋa ba tɔge ya nia yam maama. 7Ba laam ma meeli kandwa-nyenno tem ba lei gare-wogo kom vɔna vovwe sem yera ne. Ya ye kandwa-gula mo se ya guli Isarele tiina bam ba dwia yam yera. Konto déem ke ko tɔge de Baŋa Wɛ ya na bere Moses tei to mo.

Nyɔɔne gare-pale dem

8Ba ta ma kwei gare-fefale selo na ye chekke to ba ma ke gare-yi delo na wó pale Aron nyɔɔne ne to. Ba déem mɛ gare-ŋone selo nyenyero na ye sabu-seŋa, de nazwon-pupwia, de nasoŋ-pupwia, de nasoŋo chwɛ-chwɛ to ba gɔgere-de nenɛɛne gare-wogo kom de na ye tei to mo. 9Ba déem maŋe da-yiga noa maŋem mo ba ke gare-pale dem pa se de nia yana yam maama taa mae daane, ye ba daare ba piri-de kuni belei. 10Ba ma daare ba tigisi kandwa-nyenno dwi dwi se ya peini gene sena de kandwa-nyenno tetɔ. Boboa gena kam kandwa-nyenno tem ye Rubi, de Topazi, dedaane Berili. 11Gena balei tu kandwa-nyenno tem maa ye Tukwazi, de Safira, dedaane Emeraleda. 12Gena batɔ tu wom maa jege kandwa-nyenno tento: Jakinfa, de Agate, dedaane Ametisita. 13Se gena bana tu wom kandwa-nyenno tem maa ye Berili, de Onika dedaane Jasipa. Ba ta ma kwei sabu-seŋa ba tɔge kandwa yam konto maama nia yam. 14Ba ma sare Isarele dwi maama yera fuga-yalei yam kandwa yam baŋa ne. Kandwɛ maama déem bere yere dedwe se de taa ye maana.

15Ba déem ma kwei sabu-seŋa na ye chekke to ba jujugi ba ma ke chaponno nenɛɛne ŋona dwoŋi, se ko twoŋi de gare-pale dem. 16Ba ta ma ke sabu-seŋa kuna yalei de sabu-seŋa kwana yalei, ye ba kwei-ya ba lei gare-pale dem baŋa seeni gugworru telei tem ne. 17Ba laam ma kwei sabu-seŋa chaponno tem ba tore kwana yalo na leigi gare-pale dem yera ne to wone. 18Ba ta ma ja chaponno tem nia yadwonna yam ba vo ba kuni dedaane kuna yalei yam se te ja gare-wogo kom vɔna vovwe sem. 19Ba maa ke sabu-seŋa kwana yalei se ya meeli gare-pale dem kuri dem seeni. Ya maa wo de kwaga seeni na sale de gare-wogo kom to mo. 20Ba ta maa ke sabu-seŋa kwana yalei yayam ba meeli-ya gare-wogo kom yera ne se ya taa bwola de ko vɔna vovwe sem kuri seeni. Ya maa wo ko teiŋa vovoa kam baŋa seeni, gare-yia yam na twoŋi daane mɛ to. 21Ba laam maa kwei gare-ŋona kalo nyenyego na ye nazwon-pupwia to, ba ma vɔ kwana yalei yam na wo gare-pale dem kuri ne to de yalo na wo gare-wogo kom vɔna yam seeni to ba ke daane. Ko ma pa se gare-pale dem yé taa bibiga. Ko maama déem ke ko tɔge Baŋa Wɛ ya na bere Moses se o ke tei to.

Kaanem tiina gwaaro tedwonna

22Ba déem ma kwei gare-ŋone selo nyenyego na ye nazwon-pupwia to yerane mo ba ma sɔ gare-bwora kalo kaanem tu wom na wó zo ye o daare o zo gare-wogo kom o daŋe ka baŋa ne to. 23Ba ma bɔɔre bɔɔne ko tetare ne se nɔɔno yuu wane ko tɔge da ko zo. Ba laam ma bɛɛre ba dem seeni maama se ko yé kaare. 24Ba ma kwei gare-ŋone selo nyenyero na ye nazwon-pupwia, de nasoŋ-pupwia, de nasoŋo chwɛ-chwɛ to ba gɔgere Pomegara tio-bia nyenyero pa se te kaare gɔrɔ kom kuri nia yam maama te pu. 25Ba laam ma kwei sabu-seŋa kalo na ye chekke to ba ma ke lwoŋina balwa se ba meeli-ya ba ke da. 26Lwoŋini dedoa wora Pomegara tio-bia balei maama tetare ne mo pa se ba saŋe daane. Ba ma ke konto mo ba kaare gɔrɔ kom kuri seeni nia yam maama. Gɔrɔ kom maa ye se kaanem tiina bam zo-ko se ba taa toŋe ba pa Baŋa Wɛ. Ko maama déem ke ko tɔge nenɛɛne Baŋa Wɛ ya na bere Moses tei to.

27Ba laam ma kwei gare-fefale ba ma sɔ Aron gare-dedwaaro se Aron de o bia bam taa zoora. 28Ba ta ma ke Aron yuu gare-yi dem dedaane o bia bam yipwi sem. Ba ma kwei gare-fefale ba ma ke gare-kuri-kukwi sem. 29Ba ma ke Aron teiŋa vovoa kam de gare-fefale ye ba gɔgere-ka de gare-ŋone selo nyenyero na ye nazwon-pupwia, de nasoŋ-pupwia, de nasoŋo chwɛ-chwɛ to. Ko maama déem ke ko tɔge nenɛɛne Baŋa Wɛ na bere Moses tei to.

30Ba laam ma kwei sabu-seŋa na ye chekke to ba mage-ka ba ke wo-pelɔgɔ se ko taa dɔge Aron yuu ne. Ba ma sare ko baŋa ne we: ‘Wose mo Baŋa Wɛ ŋwaane’. 31Ba ta ma kwei gare-ŋona kalo nyenyego na ye nazwon-pupwia to ba ma vɔ-ko ba meeli Aron yuu gare-yi dem yiga seeni. Ko maama déem ke ko tɔge nenɛɛne Baŋa Wɛ ya na bere Moses tei to.

Moses kaare wara-jei sem o nii

32 Baŋa Wɛ wara-jei sem ma ke se ti. Isarele tiina bam déem ke kolo maama Baŋa Wɛ na bere Moses se o ke to mo. 33Ba laam ma ja vwei dem tete de de wo zela yam maama ba vo ba bere Moses. Ko maa ye tento:

Gwaaro tem, de sabu-seŋa gwoli sem, de ywoa yam, de dagare sem, de da-dɛɛro tem, dedaane vwei dem kuri luuru tem maama,

34de wonnu telo ba na mɛ ba kwoli wara-vwei dem baŋa kam: pi-bea twanno telo ba na seini to, de twan-nyenno,

de gare-jale delo na wó che Wɛ di-yun-gala kam to,

35de Wɛ ni-gwonim dakaa kam, de dɛ selo na wó taa maa zeŋe-ka to, dedaane ka ni-pugu kom,

36de tabolo kom, dedaane ko yera zela yam maama,

de bworobworo kolo na wó taa tigi Baŋa Wɛ yiga ne to,

37de sabu-seŋa min-zwon-zego kom, de ko yera wonnu tem maama,

ko woli de min-zwonnu terepɛ tem, de nuga kam na wó ke-da to,

38de talwoŋ-ywoŋa zwɛɛm dakaa kam sabu-seŋa na kwoli ka maama to,

de Wɛ swolim nuga kam, de talwoŋ-ywoŋa kam,

de gare-jale delo na wo wara-vwei dem ni dem ne to,

39de channa kaanem dakaa kam, de luu kolo na meeli ka yera ne to, de ka yera zela yam maama, ko ta woli de dɛ selo na wó taa zeŋe-ka to,

de ware-zoŋa kam, dedaane ka na wó taa zege woŋo kolo baŋa ne to,

40de konkɔlɔ kom gare-jala yam, de dɛ selo baŋa ne ya na wó pale to, de se luuru tem,

ko ta woli de gare-jale delo na wó che konkɔlɔ kom manchwoŋo ni dem to,

de ŋone sem, de paara yalo na wó chwi ya ja vwei dem to,

dedaane wara-jei sem zela yam maama,

41dedaane nenɔŋa gwaaro telo Wɛ kaanem tu Aron de o bia bam na wó taa zoore se ba yeini ba zo Wɛ diga kam wone ba ke kaanem ba pa‑o to.

42Isarele tiina bam déem seene ba ke kolo maama Baŋa Wɛ na bere Moses se ba ke to lanyerane. 43Moses na nii ba totoŋa yam to, mo o maane we ba ke se ko tɔge tei maama Baŋa Wɛ na bere se ba ke to chekke. O ma sɔɔle Wɛ swolim o ke ba yuu ne.

Currently Selected:

Nwoŋim 39: KBG

Highlight

Copy

Compare