Nwoŋim 29

Kaanem tiina de ba totoŋa yam taane

Chullu 8:1-36

1“Nmo na wó ke tei se n kwɛ Aron de o bia bam amo ŋwaane pa se ba taa ye amo kaanem tiina to mo tento:

Lage-na nabea dedaane pi-bɛ selei selo na ba jege gɛɛ se yera ne to. 2Nam ta lage-na mun-bwei se á ma á ke bworobworo kolo sabɔle na wo woli ko wone to. Pwori-na muni dem se á viiri dedwoŋi de nuga á bibili á ma á ke bworobworo kamuna, se á daare á fɔge bworobworo balwa de. Muni delo na daare to se á bibili-de memene ye á laam ma nuga á taare-te. 3Nmo laam ma‑n wó kwei te maama n ke tetɔgɔ wone, n ja-te n woli de nabea kam, de pi-bɛ sem n jeeri amo tei ne.

4Pa se Aron de o bia bam maama ba ba zege wara-vwei dem ni ne, ye n pa ba swɛ ba yera ba kwɛ ba tete amo ŋwaane. 5Ko kwaga ne se n pa Aron zo kaanem tiina gwaaro tem: gare-dedɔrɔ kom, de gare-bwora kam, de gare-wogo kom, dedaane nyɔɔne gare-pale dem. Ta kwei vovoa kam n vɔ o teiŋa ne. 6Laam kwei yuu gare-yi dem n pu o yuu ne, se n daare n kwei sabu-seŋa wo-polɔgɔ kom n meeli ka yera ne. 7Lwo Wɛ swolim nuga o yuu ne se n ma n tiŋi‑o o totoŋa ŋwaane n pa amo. 8Ja Aron bu-baara bam maama n jeeri se ba de zo ba gare-dedwaaro tem. 9Nam ta kwei teiŋa vovwe sem n vɔ ba tei ne, se n daare n kwei ba yipwi sem n pu ba yuni ne. N jege se n ke konto maama mo n tiŋi Aron de o bia bam ba kaanem totoŋa yam ŋwaane. Banto de ba dwi dem wó taa ye amo kaanem tiina se ko taa vei wuu.

10Ja nabea kam n vo n zege wara-jei sem manchwo-peena ne. Pa se Aron de o bia bam kwei ba je ba daŋe ka yuu ne. 11Laam go nabea kam wara-jei sem manchwo-peena ni dem ne se ko taa bwola de amo kaanem dakaa kam. 12Le n noa n laŋe jana bam badwonna n taare dakaa kam nyea yam ne. Jana balo na daare to, se n lwo-ba n yage tega ne, dakaa kam teiŋa ne. 13Nmo laam ma‑n wó kwei varem wom wo-zela yera lara de o chwɛ dem kuri seeni, de o tapwale-bia yalei yam, de ya lara kam maama n zwɛ-te kaanem dakaa kam baŋa ne se te nyoa di wɛyuu. 14Se ko ná ye nabea kam nɔna yam, de ka tankɔlɔ kom, de ka puga wodiu kom maama, ja-na-te á nwoŋi dáa dáa á zwɛ-te. Ko ye wɛleera saarem kaanem mo ko pa-ba.#Hiburu 13:11-12

15Daa‑n ja pi-bea dedoa n nwoŋi, se Aron de o bia bam kwei ba je ba daŋe ka yuu ne, 16se n laam go-ka n daare n kwei ka jana bam n zezage kaanem dakaa kam sɛ sena sem maama ne. 17Nam gwoni pia kam nɔna yam yera yera, se n daare n zare ka wo-zela yam de ka nɛ sem. Laam kwei wonnu tem konto maama de ka yuu kom n daŋe dakaa kam baŋa ne. 18Nmo ma‑n wó zwɛ te maama se te taa ye zwɛɛm kaanem te pa-ne. Te nyoa kam lwom wó taa ywona de pa amo, ye de pwoli amo wo.#Efesia 5:2

19Nam ja pi-bea kadwoŋi kam n nwoŋi, se Aron de o bia bam laam kwei ba je ba daŋe ka yuu ne. 20Ko kwaga ne se n go-ka. Laam ke ka jana bam n taŋe Aron de o bia bam jazem zwa ne, de ba jazem no-kweero tem, dedaane ba jazem namimbi-kweero tem maama. Jana balo na daare to, se n zezage-ba dakaa kam sɛ sena sem ne. 21Kwei jana balo na wo dakaa kam baŋa ne to badwonna, de Wɛ swolim nuga kam, n viiri-te daane n laam ma n zezage Aron yera ne, se n ta zezage-te o gwaaro tem ne. Ta zezage-te n ke o bia bam yera ne, se n daare n zezage-te ba gwaaro tem ne. Keim dento wó pa se Aron de o bia bam de ba gwaaro tem maama mo pwɛ ba yera amo ŋwaane.

22Pi-bea kam konto tɔge ka toŋe pwɛɛm totoŋe dem mo. Konto ŋwaane, le ka jazem chwei dem, de ka nabili-bwogo kom mɛ na jege lara to, de ka wo-zela yam lara kam, de chwɛ dem kuri seeni, dedaane tapwale-bia yalei yam, de ya lara kam maama. 23Nii tetɔgɔ kom wone mɛ ba na ke bworobworo kolo na ba jege sabɔle to, se n le bworobworo ko dwi ko dwi, 24se n kwei-te n pa Aron de o bia bam, ko woli de pi-bea kam nɔna yam. Banto wó zeiŋi-te wɛɛne ba yaare-te amo yiga ne se ko bere we ba kwei-te ba pa amo mo. 25Konto kwaga ne, se n jwoŋi nɔna yam de bworobworo kom maama n daŋe zwɛɛm kaanem dem baŋa ne se n zwɛ-te kaanem dakaa kam baŋa ne. Te nyoa kam lwom wó taa ywona de pa amo, ye de pwoli amo wo. 26Ko ná ye pwɛɛm totoŋe pi-bea kam, kwei ka nyɔɔne seeni nɔna yam, se n zeiŋi-ya wɛɛne n yaare amo yiga ne, se n laam daare n wane-ya n di.

27Á ná yeini á pwɛ kaanem tiina amo ŋwaane, á wó kwei pi-bia kam nyɔɔne dem de ka chwei dem á na zeiŋi amo yiga ne to á pɔɔre-ya se ya taa ye amo nyem. Aron de o bia bam mo wó taa tei-ya. 28Isarele tiina bam ná yeini ba ja yazura kaanem ba ba se ba zwɛ amo ŋwaane, varem wom nyɔɔne dem dedaane o chwei dem nɔna yam wó taa ye pɛɛre delo ba na jege se ba pa-ne to. Ko maa ye kaanem tiina bam nyem mo se ba wane ba di. Amo ni dem mo konto se ko taa vei wuu.

29Aron nam ná tega, se á tiŋi o kaanem gwaaro tem se te taa cheigi o bu wolo na wó leiri o yuu ne o ji kaanem nakwe tu to. Ba ná lage ba tiŋi kotu, o jege se o zo gwaaro tem konto mo. 30Wolo na wó leiri Aron yuu ne to, ye se ba kwei da yarepɛ mo ba pwɛ‑o ba zege o totoŋe dem ŋwaane. O wó zo gwaaro tem mo da yarepɛ yam maama wone ye o zo amo di-yuu kom wone o toŋe o pa-ne.

31Kwei pwɛɛm totoŋe pi-bea kam nɔna yam n vo wara-jei selo na ye se yera to ne, n saŋe-ya. 32Aron de o bia bam yerane mo wó kwei nɔna yam konto de bworobworo kolo na wo tetɔgɔ kom wone to ba di wara-jei sem manchwo-peena ni ne. 33Wodiu kom konto ye kolo amo na tɔge ko ŋwaane a ma saare ba wɛleera pa se ba ji amo kaanem tiina to mo. Nɔɔn-nɔɔno ba jege chwoŋa se o di-ko, ko ná dae kaanem tiina bam yerane, ko na ye a nyem to ŋwaane. 34Nɔna yam de bworobworo kom ná zege te poore tega, se á zwɛ-te. Á daa yé di-te, te na ye a nyem to ŋwaane.

35Kwei da yarepɛ se n ma n tiŋi Aron de o bia bam amo kaanem totoŋa yam ŋwaane. Yɔɔre n ke se ko maŋe de a na bere‑m tei to. 36Dɛ maama wone se n go nabea n ma n kaane n pa-ne wɛleera saarem ŋwaane.#Hiburu 10:11-12 Ko ta wó pa se kaanem dakaa kam fɔge ka kwɛ. Nmo nam ta wó kwei swolim nuga mo n ma n turi dakaa kam yera ne se ko pa se ka taa ye wose. 37Nmo ná ke konto dakaa kam baŋa ne se ko yi da yarepɛ, ka wó yɔɔre ka taa ye wose mo amo ŋwaane. Nɔɔno wolo de woŋo kolo maama na dwei-ka to de nam pwɛ mo amo ŋwaane.

Dɛ maama pɛɛra yam

38Dɛ maama wone nmo jege se n pa ba kaane tento mo ba pa-ne dakaa kam baŋa ne:

Kwei-na pi-bale selei na jege bene dedoa to á ma á ke kaanem á pa-ne. 39Dedoa wó kwei ka kaane zezeŋa ne mo, se kadwoŋi kam kaane dedaan-ni maŋa ne. 40Á ná kwei zezeŋa pi-bala kam á toŋe, se á kwei mun-bwei bwɛ selei á viiri de Olivi nuga kalo na ye chekke to bɔŋa dedoa ye á woli-ya kaanem dem wone á pa-ne. Ta kwei-na sa-sona bɔŋa dedoa á ke se ka taa ye wo-nyɔɔro pɛɛre. 41Ko ná ye dedaan-ni pi-bala kam, ta kwei-na muni, de nuga, de sa-sona konto dwoŋi á woli da á ke kaanem á pa-ne. Ko wó taa ye wodiu pɛɛre ko pa-ne. Ko nyoa kam lwom wó taa ywona ko pa-ne ye ko pwoli amo wo.

42Abam de á bia wó taa ke zwɛɛm pɛɛre dem konto wara-jei sem manchwo-peena yam ni ne mo á pa-ne. Nam ta‑á zwɛ-ya dɛ maama, ye amo de wó jeeri abam dáane se dé ŋɔɔne daane. 43Chega to, amo wó ba a jeeri Isarele tiina bam dáane, ye a nenɔŋ-fɔrɔ kom mo wó tiini ko nyeene jei sem konto ne se se taa ye wose.

44A maa wó pwɛ wara-vwei dem de de kaanem dakaa kam maama se te taa ye wose. A nam ta wó pɔɔre Aron de o bu-baara bam se ba ji amo kaanem tiina. 45A maa wó taa zoore de Isarele tiina bam, se a taa ye ba Wɛ. 46Banto de maa wó lɔre we amo mo ye ba Tu Baŋa Wɛ wom. A nam jaane-ba mo a nwoŋi Ejipti ne a ba ywo-seeni se a taa zoore de-ba. Chega to, amo mo ye ba Tu Baŋa Wɛ wom.”

Currently Selected:

Nwoŋim 29: KBG

Highlight

Copy

Compare