Nwoŋim 28

Kaanem tiina gwaaro tem

Nwoŋim 39:1-7

1“Pa se n zembaaro Aron de o bia, Nadab, de Abihu, de Eleaza, de Itamara ba nmo tei se n pɔɔre-ba se ba taa ye ba yera de nɔɔna bam maama. Banto mo wó taa ye amo kaanem tiina se ba taa toŋe ba pa-ne. 2Nam ke-na zula gwaaro se te maŋe de n zembaaro Aron de o kaanem totoŋe dem á pa‑o. Pa-na se te taa jege nenɔŋa lanyerane. 3Abam na wó pɔɔre Aron se o taa ye amo kaanem tu to ŋwaane, nam kuri-na gwaro se amo pa-ba swa se ba sɔ o gwaaro tem. 4Nam pa se ba sɔ zula gwaaro tento dwi: Nyɔɔne gare-pale, de gare-wogo, de gare-bwora, de gare-dedɔrɔ kolo ba na mɛ nyenyero dedɛ ba ma gɔgere-ko to, de teiŋa vovoa, dedaane yuu gare-yi. Ba maa wó ke gwaaro tento dwoŋi, se ba pa n zembaaro Aron de o bia bam se ba yeini ba zo-te ba taa toŋe kaanem totoŋa ba pa-ne. 5Pa se gwaro tem kwei gare-fefale selo na ye chekke to, ye ba laam woli de gare-ŋone selo nyenyero na ye sabu-seŋa, de nazwon-pupwia, de nasoŋ-pupwia de nasoŋo chwɛ-chwɛ to ba ma sɔ-te.

Gare-wogo kom

6Pa se ba kwei gare-fefale selo na ye chekke to ba ma sɔ gare-wogo kom, se ba daare ba ma gare-ŋone selo nyenyero na ye sabu-seŋa, de nazwon-pupwia, de nasoŋ-pupwia de nasoŋo chwɛ-chwɛ to ba ma gɔgere-ko lanyerane. 7Ba wó pa se vovwe selei mo tɔge vɔna yam seeni se ko pa gɔrɔ kom yiga de kwaga twoŋi daane. 8Ba ta wó ke teiŋa vovoa se ka de taa ye bedwe de gare-wogo kom. Ba wó kwei gare-yi delo ba na mɛ ba ke gare-wogo kom to mo ba ma ke vovoa kam.

9Laam beeri-na Onika kandwa-nyenno telei se á sare Isarele dwi maama yere á ke te baŋa ne. 10Sare-na nabaara bam yera yaredo á ke kandwɛ maama baŋa ne, se ko maŋe de ba lora kam déem na vei tei to. 11Pa-na se gɔgɔ kwaane o sare yera yam kandwa yam baŋa ne, se o laam kwei sabu-seŋa o tɔge kandwa yam nia. 12Laam meeli-na kandwa yalei yam á lei gare-wogo kom vɔna vovwe sem yera ne. Ya ye kandwa-gula mo se ya guli Isarele tiina bam ba dwia yam yera. Aron ná yeini o tui amo Baŋa Wɛ yiga ne, o wó taa yeini o zeŋe ba yera yam konto mo, se o yé swei ba swia maŋa de maŋa. 13Abam ta wó kwei sabu-seŋa mo á mɔ kuna yalei á woli da. 14Nam ta kwei-na sabu-seŋa na ye chekke to á ke chaponno telei nenɛɛne ŋone dwoŋi to. Vɔ-na chaponno tem kuna yalei yam yera ne se te ja gare-wogo kom yiga de kwaga.

Nyɔɔne gare-pale dem

15Abam ta wó beeri gare-fefale selo na ye chekke to á ma ke gare-yi delo na wó pale Aron nyɔɔne ne to. O nam wó ma gare-pale dem konto mo o maane se o lɔre amo boboŋa na ye tei to. Á wó ma gare-ŋone selo nyenyero na ye sabu-seŋa, de nazwon-pupwia, de nasoŋ-pupwia de nasoŋo chwɛ-chwɛ to á gɔgere-de, nenɛɛne gare-wogo kom de na ye tei to mo. 16Maŋe-na da-yiga noa maŋem á ma á ke-de. Nam pa-na se de nia yana yam maama taa mae daane, se á piri-de kuni belei. 17Abam laam wó tigisi kandwa-nyenno dwi dwi se ya peini gene sena de kandwa-nyenno tetɔ. Boboa gena kam kandwa-nyenno tem wó taa ye Rubi, de Topazi, dedaane Berili. 18Gena belei tu kandwa-nyenno tem maa wó taa ye Tukwazi, de Safira, dedaane Emeraleda. 19Gena betɔ tu wom maa wó taa jege kandwa-nyenno tento: Jakinfa, de Agate, dedaane Ametisita. 20Se gena bena tu wom kandwa-nyenno tem taa ye Berili, de Onika dedaane Jasipa.#28:17-20 Dé bá wane dé lɔre kandwa-nyenno tem maama yera yam chekke. Abam maa wó kwei sabu-seŋa á tɔge kandwa yam konto maama nia yam. 21Nam ta sare-na Isarele dwi maama yera fuga-yalei yam kandwa yam baŋa ne. Kandwɛ maama wó bere yere dedwe se de taa ye maana.

22Á ta wó ma sabu-seŋa kam na ye chekke to á jujugi á ma á ke chaponno nenɛɛne ŋona dwoŋi, se te twoŋi de gare-pale dem, 23se á daare á ke sabu-seŋa kwana yalei na wó lei gare-pale dem baŋa seeni gugworru telei tem ne. 24Laam tore-na chaponno tem kwana yalo na leigi gare-pale dem yera ne to, 25se á ta ja chaponno tem nia yadwonna yam á vo á kuni dedaane kuna yalei yam se te ja gare-wogo kom vɔna vovwe sem. 26Nam ta ke-na sabu-seŋa kwana yalei se ya meeli gare-pale dem kuri dem seeni. Ya wó taa wo de kwaga seeni na sale de gare-wogo kom to mo. 27Nam ta ke-na kwana yalei yayam á meeli-ya gare-wogo kom yera ne se ya taa bwola de ko vɔna vovwe sem kuri seeni. Ya wó taa wo ko teiŋa vovoa kam baŋa seeni, gare-yia yam na twoŋi daane mɛ to. 28Ko kwaga ne, se á kwei gare-ŋona kalo nyenyego na ye nazwon-pupwia to á ma‑á vɔ kwana yalei yam na wo gare-pale dem kuri ne to, de yalo na wo gare-wogo kom vɔna yam seeni to á ke daane. Konto wó pa se gare-pale dem yé taa bibiga.

29Á ná ke gare-pale dem konto dwoŋi, Aron de wó yeini o zeŋe Isarele tiina bam dwi maama de de yere o bochare ne, ye o zo Wɛ di-yuu kom. Ko maa wó pa se amo Baŋa Wɛ taa guli ba gula maŋa maama. 30Á wó bɔɔre gare-fɛɛle mo gare-pale dem wone, se á kwei Yurim dedaane Tumim#28:30 Yurim dedaane Tumim: kandwa yalo ba na wó ma ba lɔre Wɛ boboŋa to á ke de wone.#Jeelim 27:21; Nia Gulim 33:8 Aron wó yeini o ja-te mo o zo o zege amo yiga ne se o taa ma-te o lɔre amo Baŋa Wɛ boboŋa Isarele tiina bam ŋwaane. Konto ŋwaane o jege se o zo gare-pale dem maŋa kalo maama o na wó zo amo tei ne to mo.”

Kaanem tiina gwaaro tedwonna tem

31“Á ta wó kwei gare-ŋone selo nyenyego na ye nazwon-pupwia to yerane mo á ma‑á sɔ gare-bwora kalo kaanem tu wom na wó zo ye o daare o zo gare-wogo kom o daŋe ka baŋa ne to. 32Nam bɔɔre-na ko tetare dem, se nɔɔno yuu wane ko tɔge da ko zo. Bɛɛre-na ba dem seeni maama se ko yé kaare. 33-34Kwei-na gare-ŋone selo nyenyero na ye nazwon-pupwia, de nasoŋ-pupwia, de nasoŋo chwɛ-chwɛ to á gɔgere Pomegara tio-bia nyenyero pa se te kaare gɔrɔ kom kuri nia yam maama te pu. Á ta wó daare á lage sabu-seŋa lwoŋina balwa se á meeli-ya á ke da. Lwoŋini dedoa wó taa wora Pomegara tio-bia balei maama tetare ne mo se ba taa saŋe daane. 35Aron ná yeini o lage o toŋe kaanem totoŋa, se o zo gare-bwora kam konto. O ná lage o zo amo di-yuu kom naa o ná nwoŋi da, lwoŋina yam sɔɔ kwori wó taa ni, se o yé te.

36Nam kwei-na sabu-seŋa na ye chekke to á ke wo-pelɔgɔ. Laam sare-na ko baŋa ne we, ‘Wose mo Baŋa Wɛ ŋwaane’. 37Á ta wó kwei gare-ŋona kalo nyenyego na ye nazwon-pupwia to á ma‑á meeli wo-pelɔgɔ kom o yuu gare-yi dem yiga seeni. 38Ko wó maŋe Aron tiri ne mo maŋa maama. Isarele tiina bam ná yeini ba ja pɛɛra ba jeeri se ba pa-ne, ye tusim ná wora ba totoŋa yam ne, amo wó da Aron ŋwaane a yage a ma chɛ-ba, pa se a sɛ a jwoŋi ba pɛɛra yam konto.

39Abam wó kwei gare-fefale mo á ma ke Aron gare-dedɔrɔ kom de o yuu gare-yi dem. Nam ta pa-na se ba tiini ba gɔgere o teiŋa vovoa kam lanyerane. 40Ko ná ye Aron bia bam, sɔ-na nenɔŋa gwaaro, de yipwi, dedaane teiŋa vovwe á pa-ba. Konto mo wó zuli ba kaanem totoŋe dem.

41Pa se Aron de o bia bam zo ba gwaaro tem, se n daare n kwei swolim nuga n lwo ba yuni ne amo ŋwaane n ma n pwɛ-ba se ba taa ye a kaanem tiina. 42Ta kwei-na gare-fefale á sɔ gare-kuri-kukwi á pa-ba se ba yeini ba zo. Se maa wó zege ba teiŋa ne se yi ba chwoa mo. Konto wó pa se ba yé taa ye bwori. 43Maŋa kalo maama Aron de o bia bam ná yeini ba zo amo wara-jei sem, naa ba ná lage ba yi amo kaanem dakaa kam ba toŋe ba pa-ne, ba jege se ba zo gare-kuri-kukwi sem konto mo. Ko ná dae konto, ba wó na ba chaveera ye ba te ko ŋwaane. Aron de o dwi dem maama jege se ba taa tɔge a ni dem konto mo se ko taa vei wuu.”

Currently Selected:

Nwoŋim 28: KBG

Highlight

Copy

Compare