Nwoŋim 21

1 Baŋa Wɛ déem ma ta o nia yanto taane o bere Moses se o lwoni o bere Isarele tiina bam:

Isarele tiina de ba kabɛ taane

Nia Gulim 15:12-18

2Wolo ná yeigi Hiburu tu se o ma o ji o kabaa, kabaa kam wó toŋe ka pa‑o bena yaredo mo. Bena yarepɛ bene dem wone, se kotu yage‑o se o viiri zɛɛra, ye kabaa kam bá ŋwe kolokolo.#Nia Gulim 15:12-13 3Nɔɔno wom ná ye badeim ye o ba o toŋe o pa‑m, ye o ná lage o viiri, ko ye wonto yerane mo wó viiri. O ya nam ná maŋe o jege kaane mo ye o ba n tei, o jege se o ja o kaane wom mo o woli da o viiri. 4O na toŋe o pae wolo to ná pɛ‑o kaane, ye o de kaane wom lo bia daane, nɔɔno wom yerane mo wó viiri. Kaane wom de o bia ye o tu wom nyem mo.

5Kabaa kam nam wó wane o ta we, “Amo swoi a tu wom, ko woli de a kaane de a bia bam. A nam bá viiri a daare-ba.” 6O tu wom maa wó ja‑o o vo Wɛ wara-jei sem ni dem seeni#21:6 naa o vo nakwa bam yiga ne o pa o sale bworo kom. Dáane mo o wó kwei se-lwei o puri kabaa kam zwɛ dedoa. Konto bere we kabaa kam ŋwea maama wone, o ye o tu wom nyem mo.

7Nɔɔno ná kwei o bukɔ o yeigi o pa se o ji kabaa, ko dae se ka maŋa ná yia, se ba yage‑o se o viiri nenɛɛne ba na ke baara bam tei to. 8Kaba-kana kam ná chɔge wolo na yeigi‑o to yiga, o tu wom wó wane o jwoori o yeigi‑o o pa. O nam ba jege chwoŋa se o yeigi‑o o pa dwi-gɛ tiina. O tu wom ná ke konto, ko bere we o lɔge ba ni-sɛɛm dem kwaga ne mo. 9Nɔɔno wom nam ya ná yeigi‑o se o bu mo di o ma o ke kaane, ko jege se o taa nii kabaa kam baŋa ne nenɛɛne ko ye o tete bukɔ mo. 10Nɔɔno wom ná tu o swo kaane wodwoŋi o woli o wone, ko dae se o ve boboa kaane wom o ni-wodiu, naa gwaaro. O nam dae se o ve‑o sare-peiga. 11Nɔɔno wom ná ve se o ke wonnu tento maama o pa kaane wom, kaane wom wó wane o viiri zɛɛra, ye o bá ŋwe kolokolo.

Keim-lwanno telo na maŋe de toone to

12Wolo ná mage o dwoŋi pa se o te, ba wó go kotu de mo.#Chullu 24:21 13Kotu nam ná wo paale o go nɔɔno wom, ye ko ye Wɛ mo jaane o ba, nɔɔno wom konto nam jege se o duri mo o vo jei selo amo na wó kuri to, se o seigi da.#Jeelim 35:11 14Ko daare, nɔɔno ná paale o dwoŋi mo o tiŋi, ye o seene o go‑o, ko dae se o lu kɔtaa! O ná maŋe o vo o ja amo kaanem bimbini dem, se á vaŋe‑o á ja á nwoŋi pwooni á go.

15Wolo maama ná mage o kwo naa o nu, se ba go konto tu.

16Wolo ná zi nabiinu o ja se o yeigi, ye kotu ná maŋe o yeigi‑o mo de, naa nɔɔno wom ta ná wo o tei ne ye ba ja‑o, se ba go kotu.

17Wolo maama ná sɔɔle lwarem o yage o kwo naa o nu yuu ne, se ba go kotu de.

18Ni-kantɔgɔ ná tu nɔɔna balei tetare ne, ye ba dedoa ma kwei kandwɛ naa o jaguli o ma o ke wodwoŋi wom zonne ye o wo tege. 19Wolo ba na ke‑o zonne dem to ná wori ye o daare o zaŋe wɛɛne o zi nacheiga o via, ba daa ba jege se ba ke wolo na ke‑o zonne dem to kolokolo. Kotu wó ŋwe nɔɔno wom de o na chɔge o totoŋa to. O ta wó taa nii o baŋa ne mo se o na yazura lanyerane.

20Nɔɔno ná jege kaba-baaro naa kaba-kana, ye o mage‑o pa se o te ko nɛ sem ni ne, se ba waare kotu. 21Kabaa kam nam ná zaŋe ye ka yi da yalei naa yatɔ wɛɛne, ba daa bá ke ka tu wom kolokolo, kabaa kam na ye o nyem to ŋwaane.

22Baara balei jara baŋa ne, ba ná mage kapua pa se o puga kam chɔge, wo-gaa ná wo daane kapua kam, o baro wó gwoni jene mo o pa wolo na pɛ o kaane wom puga kam chɔge to, nenɛɛne nakwa bam na sɛ we ko maŋe tei to. 23Ko nam ná tiini ko chamma ko pa kaane wom, waarem dem de wó taa chamma: ŋwea mo ba wó chɔge ba ma ba leiri ŋwea, 24yi mo ba wó le ba ma leiri yi, yeili mo ba wó guri ba ma leiri yeili, jeŋa mo ba wó le ba ma leiri jeŋa, naa naga mo ba ma leiri naga.#Matiyu 5:38-42 25Kaane wom yera na nɛ zonne delo to, se ba de ke nɔɔno wom konto dwoŋi, ne ko ná ye zwɛɛm naa fufwollu.

26Wolo ná mage o kabaa kam yi pa se de chɔge, se kotu pa kabaa kam chwoŋa se ka viiri zɛɛra ka yi dem chɔgem ŋwaane. 27O nam ná mage kabaa kam yeili mo o guri, se o pa ka viiri zɛɛra, ka yeili dem na guri to ŋwaane.

28Nabea ná chugi nɔɔno ka go, ba jege se ba dole-ka de kandwa ba go mo. Nɔɔn-nɔɔno bá done ka nɔna yam. Ka tu wom de nam bá na waarem. 29Nabea kam nam ná maŋe ka kare ka chu nɔɔna mo, se ba kaane ka tu wom se o lei-ka. O ná ve ye ka chu nɔɔno ka go, se ba dole nabea kam de ka tu wom maama ba go. 30Too wom yera nɔɔna nam ná sɛ, nabea kam tu wom wó wane o kwei sabu o leiri o ŋwea kam se ko maŋe de ba na lage tei to. 31Ko nam ta ye bedwe mo de nabea ná chugi nɔɔno wodwoŋi bu-baaro naa o bukɔ de. 32Nɔɔno nabea nam ná go o dwoŋi kabaa, ba wó kwei kandwa ba dole nabea kam ba go mo. Nabea kam tu wó jeeli lu-nyenno sabu-dala fintɔ mo o pa wolo na tei kabaa kam to.

33Nɔɔno maa ná gwaare gwoŋo naa o koge bɔɔne ye o wo jwoori o seere-ko, pa se o dwoŋi nabea naa o bonaga to ko wone ka te, 34gwoŋo kom tu wó ŋwe varem wom jene mo o pa varem wom tu. O ná ŋwe o ti, se o laam taa tei varem wom na tege to.

35Nɔɔno nabea nam ná chugi o dwoŋi nabea ka go, se ba kwei nabea kalo ta na ŋwe to ba yeigi ba daare ba pɔɔre ka sabu kom ba pa daane. Ba ta wó maŋe kalo na tege to nɔna yam mo ba pa daane, se sabu kom de nɔna yam taa mae daane. 36Ko daare nabea kam ná maŋe ka kare ka chu mo ye ka tu wo leigi-ka, ka ná go nɔɔno nabea, ka tu wom jege se o ŋwe nabea kam jene maama mo o pa nɔɔno wom. Nabe-teka kam laam wó taa ye o nyem.

Currently Selected:

Nwoŋim 21: KBG

Highlight

Copy

Compare