Nwoŋim 20

Wɛ ni-kaana fuga kam

Nia Gulim 5:6-21

1Wɛ déem mo ŋɔɔne taane dento maama:

2“Amo mo ye abam Tu Baŋa Wɛ wom. Amo maa ye wolo na jaane abam a ja nwoŋi Ejipti teo kom ne pa se a vere abam á kabɛɛne dem ne a yage to. 3Daa á yé zuli-na wɛ dedwoŋi á woli amo wone.

4Yé zaŋe-na á mɔ kamɔgɔ se ko taa ye jwoni ko pa abam. Á yé mɔ woŋo se ko lwoni wɛyuu wonnu, naa tega baŋa wonnu, naa tega kuri na bam wo wonnu.#Nia Gulim 4:16-18 5Abam ba jege se á tiiri te yiga ne naa á zuli-te. Kokuri to, amo mo ye abam Tu Baŋa Wɛ. Amo yi page abam baŋa ne mo. Ko ná ye balo na ve amo to, a yeini a waare-ba de ba bia maama se ko vo ko yi ba dwi dem kuni betɔ naa bena laŋa ne mo. 6Ko nam ná ye balo na swoi-ne ye ba sɛ a nia yam to, a maa yeini a jege ba swono taa, se ko yi ba dwi dem kuni moro laŋa ne.

7Yé zaŋe-na á bwoŋi á Tu Baŋa Wɛ yere kafɛ yerane, se Baŋa Wɛ wó waare wolo maama na ke konto to.

8Ta‑á guli-na Wɛ siu dɛ dem se á pɔɔre-de da yam maama wone á pa Wɛ. 9Da yarepɛ maama wone, abam jege da yaredo mo se á ma á toŋe totoŋa dwi maama. 10Ko nam ná ye da yarepɛ dɛ dem, abam Tu Baŋa Wɛ pɔɔre-de mo o pa o tete, se de taa ye siu dɛ. De dɛ ne, nɔɔn-nɔɔno ba jege se o toŋe kolokolo. Ko maa ye abam, de á bia, de á bukwa, de á kabɛ, de á ka-nyaana maama mo bá taa toŋa. Ko woli da, abam vara bam, de veira balo na zoore á teo wone to de bá taa toŋe totoŋa dɛ dem konto ne.#Ezekeli 20:12 11Kokuri to, Baŋa Wɛ déem kwei da yaredo mo o naane wɛyuu de tega baŋa, de naneero tem, dedaane wonnu telo na wo tento maama wone to. O laam ma sii da yarepɛ dɛ dem ne.#Pulim 2:2-3 Baŋa Wɛ ma ke zaane o ke siu dɛ dem baŋa ne o pa de ye de yera.#Nwoŋim 31:12-17; Chullu 23:3; Nia Gulim 5:12-15; Maake 2:28

12Ta‑á nege-na á kwoa de á niina, se ko pa á ta‑á jege momwɛ-dɛɛre maŋa kalo á na wó ta‑á zoore tega kalo abam Tu Baŋa Wɛ na lage o pa abam to wone.#Matiyu 15:4-6; Efesia 6:1-3

13Yé zaŋe-na á go nɔɔno.

14Yé ke-na kabwoŋa de nɔɔno wodwoŋi kaane.#Matiyu 5:27-28

15Yé ŋɔ-na kolokolo.

16Yé zaŋe-na á bore vwa bora á ma á vane á dwonna.#Rom 13:9

17Yé kwei-na á boboŋa á daŋe á dwonna sam baŋa ne. Nam yé pa-na se á boboŋa taa wo ba kaana baŋa ne. Yé pa-na se á fera zo ba kabɛ naa ba ka-nyaana wone. Yé pa-na se á yi su á dwonna nabɛ, naa ba bonɛ, naa woŋo kolo maama na ye ba nyem to.”

18Nɔɔna bam maama déem ma na doa kam na tiini ka bage ye ka ta pepele tei maama to. Ba ta ma ni nabɔna kam kwori, ye ba daare ba na peo kom maama na kwoli dedaane nyoa tei maama to. Ba yera maa sae ye foone tiini de jege-ba. Ba déem ma fɔɔre ba kɛ dáa. 19Ba ma ta de Moses ba we, “Jan ja! Nmo ná ŋɔɔne taane n bere debam, dé wó cheigi. Nam yé pa se Wɛ tete ŋɔɔne dedaane debam, se dé wó te.” 20Moses ma leiri nɔɔna bam o we, “Yé ta‑á kɔre-na foone. Kokuri to, Wɛ tu abam tei se o faŋe abam mo o nii, se á ta‑á kɔre‑o ye á yé tusi o chwoŋa kam ne.” 21Nɔɔna bam déem zege yiga yiga mo, ye Moses fɔɔre o twɛ kunkwon-liliru kom mɛ Wɛ na wora to.

Chullu tedwonna

22 Baŋa Wɛ ma ta de Moses o we, “Ta tento de Isarele tiina bam:

‘Abam tete yia nɛ we amo Baŋa Wɛ mo zege wɛyuu ne a ŋɔɔne de abam. 23Abam nam ba jege se á zuli wo-gaa á woli amo ne. Á yé zaŋe á kwei sabu-seŋa naa lu-nyenno á ma á ke jwoni.’ ”

24 Baŋa Wɛ daa ta ma ta de Moses o we, “Kwei tega kam teero n ma‑n lɔ kaanem bimbini n pa-ne. Abam ná lage á ke zwɛɛm kaanem naa yazura kaanem, á laam wó yeini á ja á pei, de á bone, dedaane á naane á ba á kaane de baŋa ne á pa-ne. Jei selo maama amo na wó pa se á zuli amo yere konto dwoŋi to, amo tete wó ba abam tei se a swɛ abam swolim. 25Nmo nam ná boŋe se n kwei kandwa se n seene bimbini n pa-ne, se n yé ma kolokolo n ma‑n sare kandwa yam naa n lɔ-ya. Nmo ná ke konto dwoŋi, ko wó pa se bimbini dem ji kafɛ mo amo yiga ne. 26Yé kwei nateini n yeiri bimbini dem yera ne, se n dɔɔle-de n di. Ko dae se nɔɔn-nɔɔno na nmo yera yam bwori, nenɛɛne n ná lage n ke kaanem n pa-ne.”

Currently Selected:

Nwoŋim 20: KBG

Highlight

Copy

Compare