Efesia 6

Bia de ba tiina taane

1Ko nam ná ye bia, á na sɛ dé Teiru Yezu to, ko maŋe se á ta‑á sɛ á tiina ni. Konto nam mo tɔge chega chwoŋa.

2“Ta‑á nege-na á kwoa de á niina.”

Wɛ ni-kaana yam maama wone, dento mo ye boboa ni delo Wɛ na pwooli kampwola o woli de wone to. 3O na pwooli o we tei to mo ye:

“Nmo ná nege n kwo de n nu,

Wɛ wó pa se n na ywoni de momwɛ-dɛɛre tega kam baŋa ne.”#Nwoŋim 20:12; Nia Gulim 5:16

4Ko daare ko ná ye bia kwoa, se á yé ta‑á tiini á chana á bia baŋa ne se ko chuchugi ba bane. Nam ta‑á kɔne-na á bia lanyerane, se á pa ba lɔre dé Teiru Yezu chega kam, se ba taa tɔge-ka.#Memaŋa 22:6

Yuu tiina de ba kabɛ taane

5Ko ná ye balo na ye kabɛ to, se á ta‑á toŋe á tɔge á yuu tiina boboŋa. Ta‑á kɔre-na-ba ye á toŋe de jawala, nenɛɛne á na wó toŋe á pa dé Teiru Yezu tei to. 6Ko nam dae ba na zege ba nii abam maŋa kalo to yerane mo á wó ta‑á toŋe konto se á jwoŋi zula ba tei ne. Maŋa maama ta‑á toŋe-na de á wo maama, se á ta‑á tɔge Wɛ boboŋa na lage tei to, nenɛɛne á ye Yezu Krista tete kabɛ mo tei. 7Ta‑á toŋe-na de wopwolo ye á pa se ko taa ye dé Teiru wom ŋwaane, ye ko dae nabiina yerane ŋwaane. 8Kokuri á yei we, nɔɔno maama wó na nyɔɔre dé Teiru wom tei ne de keim-laaro telo maama o na ke to, ko ná ye kabaa mo naa nɔɔno de nɔɔno de.

9Ko daare ko ná ye yuu tiina balo na tei kabɛ to, se abam de ta‑á ke á kabɛ lanyerane konto dwoŋi, se á yé ta‑á fugi-ba, kolo ŋwaane á yei we á jege á Teiru wom telaao ne, ye wonto mo tei abam de á kabɛ sem de. Wonto nam tɔge chega de o na ke nɔɔna maama tei to ye o ba kuri-ba daane.

Zega zegem taane

10Amo na lage a ta kolo a kweeli to mo ye se á ta‑á jege baare de á na me de dé Teiru Yezu tei to. Pa-na se o dam-fɔrɔ kom taa wo abam tei ne lanyerane. 11Kwaane-na á jwoŋi Wɛ zeinim dem maama, se á wane á fɔge á che á tete ne á na lage á mage jara tei to, se setaana pɛ swa kikia maama yé wane abam. 12Jara yam konto nam dae debam de dé dwonna nabiina jara yam dwoŋi. Dé nam jege se dé kwaane dé ke dé jara yam dedaane chichiri-lwanno telo maama na jege dam wɛ-baŋa jei sem ne to. Banto mo ye setaana pɛ jeŋa dedɛɛra, ye ba jege dam logo baŋa lim jei sem ne. 13Konto ŋwaane, jwoŋi-na Wɛ jara zela dwi maama á ma á fɔge á che á tete, se lɛɛro maŋa kam ná yia, se á wane á chichei á fɔge á zege de baare, ye ko maama ná ti, á ta wó ta‑á zega á zega kam jei ne.

14Nam fɔge-na á zege de baare, se á ta‑á jege Wɛ chega kam, ne á na vɔge á gwaaro de tankila tei to, se á daare á ta‑á zege á nɔn-ŋonne ne, nenɛɛne á na kwei nantana á ma á kwoli á nyɔɔne jara wone tei to.#1 Piita 1:13 15Ta ta‑á cho-na á tete nenɛɛne á zo natera yalo na woli á veiŋa to, se á wane á vo jei maama á bere nɔɔna kwor-ywoŋa kalo na pae ba de Wɛ fɔge daane to. 16Ko woli da, ta‑á jege-na wo-dedoa de Wɛ se ko taa nye de nantana kalo á na zei á je ne se á ma che á tete de wo-lwanno tu wom che-tɛɛra na jege mini to. 17Wɛ na jwoŋi abam o yage tei to, se á pa ko taa nye de jara yu-gwoŋo mo á puga á yuu ne. Ma-na Wɛ kwora kam á woli á tete, se kanto nye de se-zɔɔ kolo Wɛ Sin-laao kom na ke abam jeŋa ne to mo.#Izaya 59:17; 1 Tɛsaloni 5:8; Hiburu 4:12 18Á na zege de baare konto to, se á ta‑á ware Wɛ ye á lwoori zeinim o tei ne. Á na ware Wɛ maŋa maama to, se á pa ko taa ye o Sin-laao kom dam ŋwaane. Ta‑á jege-na á tete se á vɔ á wo lanyerane ye á lwoori Wɛ á pa o nɔɔna bam maama. 19Ta‑á lwoori-na Wɛ á pa amo de se, a ná nɛ chwoŋa se a ta taane, se o pa-ne o ni taane delo a na wó ŋɔɔne to, se a daare a na baare a bere nɔɔna o kwor-ywoŋa kam, pa se ba lɔre o chega kalo ya na seigi ba yia ne to. 20Ko ye kwor-ywoŋa kam konto ŋwaane mo Wɛ tiŋi-ne se a leiri Yezu yuu ne a taa bere nɔɔna. Ba laam ke-ne peena diga ne a na bere-ka to ŋwaane. Nam ta‑á lwoori-na Wɛ se o zeini-ne se a taa wae a tɔɔle-ka de baare, ne ko na maŋe se a taa ke tei to.

21Amo nam lage se abam lɔre amo ni ne de a na wora a ke kolo to. Konto ŋwaane a lage a toŋe dé nu-bu-swono Tichika se o ba abam tei, se o fɔge o ta amo taane maama de abam. Wonto toŋe o pa dé Teiru Yezu de jawala. 22Amo lage se o pa abam lɔre kolo na wora ko ke debam to, se ko pa á bochara peini tega ne.

23Dé Kwo Wɛ de dé Teiru Yezu Krista wó pa dé nu-bia bam maama yazura, se ba taa jege da-swono de boboŋ-dɛɛra. 24Ko ná ye balo na yɔɔre ba jege dé Teiru Yezu Krista swono ba ba yaga to, Wɛ zaane dem taa wo ba maama tei ne.

Currently Selected:

Efesia 6: KBG

Highlight

Copy

Compare