Efesia 5

Da-swono taane

1Abam na maŋe á ye Wɛ bu-swonnu to, se á ta‑á lwoni o kikia. 2Ta‑á tɔge-na swono chwoŋa, ne Yezu Krista na jege debam swono tei to. Wonto déem ma sɛ se o leiri debam yuu ne o te dé wɛleera ŋwaane. O ma kwei o tete o ke Wɛ jeŋa ne se o ji kaanem delo lwom na ywomma de pa Wɛ to.#Nwoŋim 29:18

3Á nam yé pa kikia yalo maama na tɔge ka-laga to, naa wo-zɔɔna dwi maama taa wo á tei ne. Á yé pa á yi taa sui á dwonna wonnu. Nam yé pa se wonnu tem konto taane taa wo á wone. Ko maŋe se Wɛ tete nɔɔna mo yage kikia yanto dwoŋi. 4Ko ná ye vɛɛsa taane, de wo-jworru dwi maama taane, tento wo maŋe de abam, se á nam ta‑á ke Wɛ lei. 5Ta‑á yei-na lanyerane we, nɔɔno wolo maama ná tɔge wo-zɔɔna keim, naa ka-laga kikia, naa wolo ná ye nɔn-kwolo, konto tu bá fɔge o na kolokolo Yezu Krista de Baŋa Wɛ paare dem seeni.#1 Korinti 6:9-10 Nɔɔno ná pae o yi su wonnu, ko bere we o pa tento mo zula ne jwona tei to.

6Nam yé pa-na se nɔɔn-nɔɔno na chwoŋa o gane abam de ta-yɔɔro. Keim-balwaaro tem konto dwoŋi mo lage te pa se Wɛ ban-lom dem zaŋe de balo na ve o ni to. 7Konto ŋwaane lɔŋe-na balo na ke konto dwoŋi to. 8Abam déem ya yeiri Wɛ pa se á wo lim wone. Abam nam na tu á me de dé Teiru Yezu Krista to, ko pɛ se pwooni laam wo á tei ne. Ta‑á tɔge-na chwoŋa se ko maŋe de balo na ye pwooni dem nyem tei. 9Ko ná ye kikia yalo maama na tɔge pwooni dem chwoŋa to, yanto mo ye wo-laaro telo maama na jege chega to. 10Á na maa tɔge chwo-laao konto to, se á kwaane á lɔre kolo na pwoli dé Teiru Yezu wo to. 11Ja-na á tete se á lɔŋe wo-yɔɔro telo na ye lim dem nyem to, se á daare á pa nɔɔna lɔre jaja we, wonnu tem konto ba lana. 12Kokuri wonnu telo Wɛ-lwɛɛna bam na yeini ba seigi ba ke to tiini te jege chaveera se dé ŋɔɔne te taane. 13Á nam ná pɛ se Wɛ pwooni dem ba de bere wonnu tem konto maama kuri jaja, nɔɔna wó lɔre te na seene te ye tei to. 14Kokuri woŋo kolo maama kuri na lɔre jaja to laam wo pwooni yiga ne mo. Konto ŋwaane mo ba yeini ba tɛ ba we:

“Dondɔɔno, zaŋe wɛɛne,

se n bi toone wone,

se Yezu Krista mo nye pwooni n baŋa ne.”

15Ta‑á yei-na á tete de á totoŋ-naga na ye tei to, se á ta‑á jege boboŋ-dɛɛra, ye ko dae nenɛɛne balo na wo lɔre Wɛ chega kam to. 16Zem da yanto jege keim-balwaaro dedɛ. Konto ŋwaane, Wɛ ná pɛ abam chwoŋa se á toŋe kolo, se á pa ko ja kuri lanyerane. 17Yé ta‑á tɔge-na jworim chwoŋa, se á nam kwaane á lɔre kolo dé Teiru Yezu na lage se á ta‑á ke to.

18Yé ta‑á ye balo na nyɔ sana ba su ba bugi to, se konto pae kachaare yerane mo. Nam pa-na se Wɛ Sin-laao kom su á bochara lanyerane. 19Ta‑á ŋɔɔne-na Wɛ seinim lei, de Yezu kɔgɔ kom lei sem, de Wɛ Sin-laao kom na pɛ abam lei selo to á bere daane. Ta‑á leeni-na Wɛ tia lei sem konto á pa dé Teiru Yezu Krista de á wo maama, 20se á ta‑á tɔge o ŋwaane á ke dé Kwo Wɛ lei maŋa maama, de woŋo kolo maama o na pɛ abam to.

Baara de ba kaana na wó ta nege daane tei to

21Á na kɔre Yezu Krista to, se á ta‑á sɛ á pa daane.

22Kaana jege se ba taa sɛ ba pa ba banna, ne ba na sɛ dé Teiru Yezu tei to.#1 Piita 3:1 23Kolo ŋwaane kaane baro mo ye o yuu tu, ne Yezu Krista de na ye o kɔgɔ kom yuu tu tei to. O kɔgɔ kom maa nye de o yera yam mo, ye o ye ba fɔgeno. 24Yezu kɔgɔ kom nɔɔna bam na sɛ ba pa‑o konto to, ko maŋe se kaana de sɛ ba pa ba banna mo wonnu maama baŋa ne.

25Ko nam ná ye kan-banna, se á ta‑á swoi á kaana, ne Yezu Krista de na jege o nɔn-kɔgɔ kom swono ye o sɛ se o leiri ba yuu ne o te tei to.#1 Piita 3:7 26O na tege ba ŋwaane konto to, ko ye se o saare ba bochara wo-digiru mo, se ba taa ye wose Wɛ ŋwaane. O tɔge Wɛ botare sem ŋwaane mo o zare-ba de na. 27O fɔge o kwɛ-ba konto se o kɔgɔ kom laam wane ko ba ko zege o yiga ne de nenɔŋ-fɔrɔ. Ko wó taa jege lam, ye digiru de chɔgem tera ko tei ne de fenfee de. Konto to, o nɔɔna bam wó taa ye wose o yiga ne ye tusim tera.

28Ko ná maŋe ko ye kan-banna, ba jege se ba taa swoi ba kaana, nenɛɛne ba na lage ba tete yera yam tei to. Nɔɔno wolo nam na swoi o kaane to bere we o swoi o tete mo. 29Kokuri nɔɔno tera o na vae o yera kwɛɛm. O nam wó nii ya baŋa ne, ye o di wodiu o ma kɔne-ya. Ko ye bedwe mo de Yezu Krista na nii debam balo na ye o nɔn-kɔgɔ kom to baŋa ne, 30dé na tɔge dé nye de o yera yam to ŋwaane. 31Wɛ tɔnɔ kom nam bere debam we, “Baaro ná di kaane, o boboŋa daa ba tɔge o kwo de o nu boboŋa. O laam yeini o me de o kaane wom mo, ye ba balei bam ji yera dedoa.”#Pulim 2:24 32Taane dem konto bere wo-lilirru mo. Amo laam kwei-de a ma ŋɔɔne Yezu Krista de o kɔgɔ kom taane mo. 33Ko ta ye chega mo we, abam kan-baro maama jege se o taa swoi o kaane, ne o na swoi o tete tei to. Kaane maama de jege se o taa nege o baro mo.

Currently Selected:

Efesia 5: KBG

Highlight

Copy

Compare