1 Piita 2
2
Debam tɔge de Yezu dé ye Wɛ bia
1Mo kokuri, ja-na á tete de lwarem kikia dwi maama. Á daa yé ta‑á gane á dwonna, naa á jege ni-zɛ ni-zɛ, naa wo-goo. Yé ta‑á twe-na daane. 2Pa-na se á fera taa zoore Wɛ chega kam se ka taa fɔge á boboŋa lanyerane, ne bu-seseŋa fera na zoore o nu yele tei to. Konto mo wó pa á boboŋa ba ya kweere Wɛ chega kam seeni, se o laam fɔge o jwoŋi abam fase. 3Abam nam maŋe á maane á nii dé Teiru wom na tiini o lana tei to.#Lei 34:8
4Dé Teiru Yezu maa ye wolo nabiina na ve, ye o ta ye ŋwea tu to mo. Wɛ nam maŋe o tiŋi wonto se o tiini o taa jege fera o pa‑o, ne o ye kandwɛ delo o na lage o ma-de o lɔ o sɔŋɔ kom to. 5Á na ke á tete Yezu jeŋa ne to maa pae se abam de tɔge á ji ne kandwa yalo Wɛ na jege-ya o maa lɔ o sɔŋɔ kom to, ye á ye balo na jege o ŋwe-doŋa kam to. Ko ta maa pae se á ji Wɛ tete nɔɔna balo na ke kaanem ba pa‑o to, ye pɛɛra yalo á na ma á kaane‑o to ye wo-laaro telo o Sin-laao kom na ke á bochara ne to. Á pɛɛra yam konto su Wɛ yi, á na me de Yezu Krista to ŋwaane.#Nwoŋim 19:6
6Ko popone Wɛ tɔnɔ kom ne we:
“Nii-na amo Wɛ na lage a chwi kandwɛ delo na tiini de lana to,
se a ma lɔ sɔŋɔ Zion ne.
Amo kuri kandwɛ-zane dem konto
se de taa ye kandwɛ delo na pae diga kam zega lana to mo.
Wolo nam ná sale wonto yera ne,
chaveera bá fɔge ya ja konto tu.”#Izaya 28:16
7Ko ná ye abam balo na jege wo-dedoa ded‑o to, o jege lonne mo á tei ne. Ko daare, ko ná ye balo bam na ve‑o to,
“O maa nye de kandwɛ delo lɔra bam na ve,
ye de laam jwoori de ba de ji kandwɛ delo na pae diga kam dana to mo.”#Lei 118:22
8Ko woli da, balo na ve‑o to tei ne,
“O daa ta maa nye de pelɔrɔ kolo na cheili
pa nɔɔna gare-ko ba chɔɔle ba to tega ne to.”#Izaya 8:14
Ko ye ba na wo sɛ Wɛ kwora kam to ŋwaane mo ba chɔɔle ba to. Ko maa jege se ko ke-ba konto mo.
9Ko daare ko ná ye abam,
Wɛ mo kuri á dwi dem se á ta‑á ye á yera.
O maa pae á ye o kaanem tiina
balo na toŋe o paare yerane ŋwaane to.
Á maa kwori á ye o tete kɔgɔ kom nɔɔna
balo o na le se á ta‑á ye o nyem to.#Nwoŋim 19:5-6; Nia Gulim 7:6
Wɛ tiŋi abam konto se á pa nɔɔna lɔre o na tiini o maŋe de zula tei to, de o na le abam lim wone ye o daare o pa á na jeiŋa jei o tete nenɔŋa pwooni dem wone to. 10Abam déem ya ye nɔɔna mo yɔɔ yerane, ye á laam ba á ji Wɛ tete nɔɔna. Abam déem ya dae balo Wɛ na jege á ŋwaŋa to, ye o laam ba o duri á ŋwaŋa.#Hosea 2:23
11A badwoŋ-swonnu bam, abam na ye veira logo baŋa ne ye á ba jege kugu jei to, a lwoori abam se á ja á tete de á fera na zoore logo baŋa wo-zɔɔna yalo to. Tento mo kwaane se te chɔge á ŋwea de Wɛ. 12Abam na jege á tete tei to, se á pa á kikia taa lana balo na dae Wɛ nɔɔna to yiga ne. Konto mo, ba ná yaale abam ba we, á ye wo-lwan-keira, ba laam wó ba ba lɔre á keim-laaro na ye tei to mo, ye ba daare ba pa Wɛ zula maŋa kalo o na lage o ba o nwoŋi nabiina yiga ne to.
Dé wó sɛ dé pa dedɛɛra
13Ko ná ye nabiina balo maama na di dam ba dwonna baŋa ne to, se á ta‑á sɛ á pa-ba, á na tɔge dé Teiru wom to ŋwaane. Ko ná ye Pa-faro wolo na tei teo kom maama to, 14de o dedɛɛra balo o na pɛ-ba dam to, se á ta‑á nege ba maama. O tiŋi banto se ba taa waare balo kikia na ba lana to mo, se ba daare ba taa tei balo kikia na lana to. 15Wɛ boboŋa na lage tei to mo ye se á pa á kikia taa lana, se ko wane ko pa nɔn-jworru pu ba nia de ba ta-yɔɔro telo ba na ŋɔɔne abam baŋa ne to.
16Abam ye balo na tei á tete to mo. Pa-na á ŋwea taa ye konto dwoŋi, se á nam yé tɔge konto ŋwaane á boŋe we, á jege chwoŋa se á ke keim-balwaaro. Pa-na se á kikia taa lana, á na ye Wɛ kabɛ to ŋwaane.
17Á ta‑á pae nɔɔna maama zula.
Á ta‑á swoi á nu-bia bam.
Ta‑á kɔre-na Wɛ.
Ta‑á zuli-na Pa-faro wom.
18Abam balo na ye tontoŋena to jege se á ta‑á sɛ á pa á yuu tiina, ye á tiini á nege-ba lanyerane. Ba ná jege á ŋwaŋa ye ba ke abam lanyerane, naa ba ná chana de abam, se á ta sɛ á pa-ba. 19Kokuri nɔɔno ná sɛ se o tɔge Wɛ boboŋa, ye o vɔ o wo de waarem delo o na nɛ kafɛ ŋwaane to, Wɛ yi wó su kotu keim dem konto. 20Abam nam ná ke á tusi, ye ko pa ba vaŋe á zwɛ lanyerane, á ná vɔge á wo de yaara yam konto, ko jege taane na? Á nam ná nɛ yaara á keim-laaro baŋa ne, ye á vɔ á wo, Wɛ yi wó su á keim dem konto. 21Wɛ na bwoŋi abam se á ba á ji o nyem to, ko ye se á vɔ á wo de yaara mo. Yezu Krista tete déem maŋe o yaare abam ŋwaane se ko pa á ta‑á tɔge o nɛ-bwora mo de cham delo dwi maama o na nɛ to.
22Wonto nam bere o wo ke kolokolo o tusi,#Luka 23:4; Hiburu 4:15
ye o ni taane ba jege ganem.#Izaya 53:5-9
23Nɔɔna déem maa jege‑o ba twea,
ye o wo tɔge o twe-ba.
Ba ma kwori ba bɛɛse‑o,
ye o wo jwoori o chiŋi-ba.
O nam ke o tete mo Wɛ jeŋa ne, wonto na ye wolo na tɔge chega o ma di nɔɔna bora to ŋwaane. 24Yezu Krista na tege dagara kam yuu ne to, o ma pa se debam wɛleera daŋe o yuu ne, ye o ŋwe ya jene debam ŋwaane. O ke konto se ko pa dé wɛleera daa yé taa wae debam, nenɛɛne dé tege mo ya tei ne, se dé ŋwea daare ka taa tɔge chega Wɛ yiga ne. Yezu yera yam na nɛ zonne tei to mo pɛ se abam yɔɔre á na fɔgem. 25Abam ya nye de pei selo na beeri se jei to mo. Á laam ma pipiri se á jwoori á ke á tete Yezu jeŋa ne. Wonto mo nye de abam nayero ye o nii á baŋa ne.#Lei 119:176
Currently Selected:
1 Piita 2: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
