1 Piita 1
1
1Amo Piita wolo na ye Yezu Krista totoŋa nakwe to mo popone tɔnɔ konto se a pa abam balo Wɛ na kuri se á ta‑á ye o nyem ye á ba jege kugu jei logo baŋa ne to. Abam ma jage á vo á zoore Pontusi, de Galatia, de Kapadokia, de Asia, de Bitunia kateira yam teene wone. 2Dé Kwo Wɛ ma wuuri o ke o boboŋa ne se o kuri abam konto, ye o tɔge o Sin-laao kom ŋwaane mo o pa se á ji o nyem. Wɛ nam ke konto se ko pa á ta‑á sɛ á pa Yezu Krista, ye á bochare fɔge ya kwɛ o toone jana bam ŋwaane.
Wɛ wó pa abam zaane de yazura se ko gaale.
Dé na jege teena Wɛ tei ne tei to
3Baŋa Wɛ wolo na ye dé Teiru Yezu Krista Kwo to maŋe de teem. Wonto na tiini o ye ŋwaŋa tu to, o ma pa se dé jege ŋwe-doŋa, ye dé ta jege teena o tei ne maŋa maama, o na pɛ se Yezu Krista bi toone wone to ŋwaane. 4Konto mo dé yei we, dé wó ba dé jwoŋi wo-laaro telo Wɛ na tiŋi se o pa o nɔɔna to. Wonnu tem konto nam ba pɔe, ye te ba chɔga, te nam ba leere de. Wɛ tiŋi tento mo telaao ne se o pa abam. 5Á na sɛ‑o de wo-dedoa to, o maa mae o dam dem o cho abam se ko vo ko yi logo baŋa kweelim da yam, se o laam fɔge o jwoŋi abam fase, ne o boboŋa na jaane se o ke tei nɔɔna maama yiga ne to.
6Konto maa pae á jege wopwolo lanyerane. Ko daare leile konto, cham dwi dwi wae ya tui ya maŋe abam maŋa fenfee yerane, ye ko pa se á wo chɔge. 7Ko ná ye cham dem konto, de ye se de maŋe abam de nii á na jege wo-dedoa de Wɛ tei to mo.#Jemsi 1:3 Abam wo-dedoa kam á na jege to tiini ka dwoi sabu-seŋa na lana tei to. Sabu-seŋa nam wae ka chɔga, ye ba mae mini mo ba ma maŋe-ka se ba lɔre ka na lana tei to. Konto to, cham ná maŋe á wo-dedoa kam, ye ka ta ná lana, ko wó pa se á na zula de teem Wɛ tei ne, maŋa kalo Yezu Krista na wó jwoori o ba se o veere o tete nabiina yiga ne to. 8Abam yi nam ta wo nɛ‑o, ye á ta jege o swono. Á ta maa ba na‑o, ye á ke á wo-dedoa ded‑o, pa se á tiini á jege ywoni de wopwolo kolo na ye wo-kenkagele ye ko taane bá wane ko ta to. 9Abam jege wopwolo konto dwoŋi kolo ŋwaane á wora á nae nyɔɔre á wo-dedoa kam baŋa ne, de Wɛ na wora o jwoŋi abam ŋwea tei to.
10Faŋa faŋa Wɛ sampwori sem déem kwaane ba tɔge ko nɛ lanyerane se ba lɔre Wɛ na wó jwoŋi o nɔɔna ŋwea tei to. Ba déem maŋe ba wuuri ba ta Wɛ na wó ke abam zaane tei to. 11Yezu Krista Sin-laao kom maa wo ba tei ne ye ko pa ba wuuri ba lɔre we, Yezu wó ba o na yaara se o laam daare o na paare Wɛ tei ne. Ba maa tiini ba kwaane se ba lɔre maŋa kam konto, de ko na wó ke tei to.#Matiyu 13:17 12Wɛ ma guri o chega kam o pa o sampwori sem konto lɔre we, ko dae ba tete ŋwaane mo ba toŋa, se ko ye abam ŋwaane mo. Ba déem na bere chega kalo to ye bedwe mo de kwor-ywoŋa kalo Wɛ tontoŋena badwonna zem na tɔɔle ba bere abam to. Baŋa Wɛ mo pɛ se o Sin-laao kom nwoŋi telaao ne ko ba banto tei, ye ba wane ba bere abam o kwora kam konto. Wɛ malese sem tete maŋe se lage se se lɔre chega kam konto kuri na ye tei to.
Wɛ lage se dé taa jege wo-pwoŋo
13Abam nam fɔge á ja á tete de boboŋ-dɛɛra. Peene-na á tete se á tiini á ta‑á jege teena de Wɛ na wó ke zaane delo abam yuu ne maŋa kalo Yezu Krista na wó jwoori o ba se o veere o tete nabiina yiga ne to. 14Ta‑á sɛ-na á Kwo Wɛ ni. Ko nam ná ye á déem ta na wo lɔre Wɛ chega kam ye á fera zo wo-yɔɔro telo to, se á daa yé pa te taa tei á boboŋa. 15Wɛ nam mo bwoŋi abam se á ta‑á ye o nyem, ye wonto yɔɔre o ye wo-pwoŋo tu. Mo kokuri á jege se á ta‑á jege wo-pwoŋo á ŋwea maama wone. 16Ko nam maŋe ko popone Wɛ tɔnɔ kom ne ko we,
“Pɔɔre-na á tete se á ta‑á ye wose,
se amo mo ye wose.” #Chullu 11:44-45; 19:2
17Abam na lwoori Wɛ tei to, á yeini á bwoi‑o we á Kwo, ye o nam mo ye wolo na wó di nabiina maama taane to. O maa yeini o tɔge nɔɔna maama kikia na ye tei to o ma di ba taane, ye o ba kuri nɔɔna daane de o na ke-ba tei to. Konto to, á ta ná zoore logo baŋa ne, se á ta‑á kɔre Wɛ de á na tɔge chwei selo to. 18Kokuri á yei we, Wɛ jwoŋi abam se á daa yé ta‑á tɔge chullu telo na nwoŋi á nabaara jeŋa ne to. Wɛ na le abam wo-yɔɔro tem konto wone to, ko dae logo baŋa sabu kolo na wae ko chɔge to mo o mɛ o ŋwe o jwoŋi abam o yage.#Titusi 2:14 19O nam mɛ Yezu Krista toone jana bam mo o ma jwoŋi abam, ye banto tiini ba ye lonne nyem. Yezu na jigi wo-kaanem konto to, o maa nye de pipeila kalo na tiini ka lana fase ye kolokolo wo taŋe ka yera ne to mo. 20Boboa ne ye logo baŋa ta tera to, Wɛ maŋe o kuri wonto mo se o ma jwoŋi o nɔɔna ba wɛleera wone. Ko daare logo baŋa kweelim maŋa kam laam yia, ye Wɛ le‑o o bere nabiina abam zeinim ŋwaane mo. 21Á nam dɛ Yezu ŋwaane mo á ke á wo-dedoa de Wɛ. Ko maa ye Wɛ mo bi wonto toone wone, ye o daare o pa o di paare Wɛ telaao ne. Konto ma pa á seene á jege wo-dedoa de teena Wɛ tei ne.
22Abam laam na sɛ Wɛ chega kam to mo pɛ á bochara fɔge ya kwɛ, pa se á jege swono chekke de á nu-bia balo de na ye Wɛ nyem to. Konto to, yɔɔre á ta‑á jege da-swono de á bochara maama. 23Abam na jege Wɛ ŋwe-doŋa kam to, ka kuri wo nwoŋi nabiina dwi wone, balo toone na wae-ba to. Ka nwoŋi Wɛ tei mo ye ka ba chɔga. Á tɔge Wɛ kwora kalo na jege ŋwea ye ka wora taa taa to baŋa ne mo á na o ŋwe-doŋa kam konto. 24Ko nam popone Wɛ tɔnɔ kom ne we:
“Ko ná ye nabiina,
ba maama nye de gaaro mo.
Ba nenɔŋa maa nye de gaao wo punnu.
Ba ba dáana ye ba toa.
Gaao kom maa yeini ko kwaare,
ye ko punnu tem de siiri.
25Ko nam ná ye Wɛ kwora kam,
kanto wó taa wora mo taa wuu.”#Izaya 40:6-8
Kwora kam konto mo ye kwor-ywoŋa kalo ba na tɔɔle ba bere abam to.
Currently Selected:
1 Piita 1: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
