1 Korinti 5

Wɛ kɔgɔ kom wone wo-zɔɔna taane

1Amo nam nigi abam labaare we, abam wone nɔɔno dedoa kare o ke bwoŋa mo. Baaro mo tigi de o kwo kaane. Balo na yeiri Wɛ to de maŋe ba ba sɛ ba ke wo-zɔɔna yanto dwoŋi. 2O na ke konto to, bɛ mo ye á pae á tete kamunni? Ko ya maŋe se á wo chɔge ko ŋwaane, se á daare á le nɔɔno wom konto á wone. 3Amo tete mo tera abam tei ne, ye á boboŋa tiini ya wo amo yuu ne. Konto to, amo maŋe a ve baaro wonto bora o chɔgem dem ŋwaane, ne a wo abam tei ne mo tei. 4-5Mo kokuri a tɛ abam dé Teiru Yezu Krista yere ŋwaane we, á ná tigisi daane á ti, se á ma amo boboŋa yam dedaane de Teiru Yezu dam dem na wora de abam konto to á ma á kwei nɔɔno wom á ke setaana pɛ jeŋa ne. Konto baŋa ne, setaana pɛ ná chɔge nɔɔno wom yera o wo-zɔɔna fera yalo o na jege to ŋwaane, konto tu jworo kom laam wó wane ko na verem dé Teiru Yezu dɛ-kamunu kom ne.

6Abam teera yam ba lana. Á yei we sabɔle fenfee ná wora bworobworo mun-lɛɛre wone, ko laam wó pa te maama fole mo. Keim-lɔŋɔ de ye konto mo. 7Konto ŋwaane, le-na sabɔl-dwoori dem á wone, se de yé lɔgese á maama. Konto mo wo-digiru bá taa wo á wone, ye á laam wó ta‑á ye nenɛɛne bworobworo mun-lɛɛre delo ba na wo ke sabɔle de wone to. Á seene á ye wose mo, kolo ŋwaane Yezu Krista kwei o tete o kaane Wɛ á wɛleera saarem ŋwaane, pa o nye de pipeila kalo ba déem na yeini ba goe Atɔgebabaŋa kuri dem ŋwaane to.#Nwoŋim 12:1-20; 13:7; Nia Gulim 16:3 8Pa-na dé ke ne banto na ke tei ye ba le sabɔl-dwoori maama ba sam ne ba dole ba yage to. Ko ná ye debam, pa-na dé le lwarem kikia dedaane totoŋ-balwaaro maama dé wone, ye dé daare dé taa jege wo-pwoŋo de chega, ye wo-digiru daa bá taa wo dé wone. Konto nye de ba déem na yeini ba kwei bworobworo kolo na ba jege sabɔle ko wone to mo ba ma ba di Bworobworo-memene kuri dem.

9Amo déem na dɛ yiga a popone tɔnɔ kolo a pa abam to, a tage de abam se á yé ta‑á tɔge dedaane balo na kare ba ke kabwoŋa to. 10Amo na kaane abam konto to, ko dae balo na yeiri Wɛ ye ba ye ka-lagena, naa nɔn-kwollu, naa venverena, naa jwo-kaana to taane mo a tɛa. Abam bá wane á pwɛ á tete de logo baŋa nɔɔna bam konto dwoŋi. 11Amo nam na popone kolo to kuri mo ye se á yé ta‑á tɔge de wolo maama na bere we o ye á nu-bu ye o ye ka-lageno, naa nɔn-kwolo, naa jwo-kaano, naa nɔn-tweeno, naa sa-nyɔro, naa venvereno to. Ko ná ye nɔɔno wonto dwoŋi, se á pwɛ á tete de kotu, se á bere á yé di wodiu dedaane‑o de.

12-13Ko ná ye balo na dae dé nu-bia Yezu ŋwaane to, amo bá wane a di banto taane. Ko ye Wɛ mo wó di ba taane. Abam nam jege se á di balo na wo á kɔgɔ kom wone to taane. Konto ŋwaane, zeili-na wo-lwan-keiru wom á wone.#Nia Gulim 22:21-24

Currently Selected:

1 Korinti 5: KBG

Highlight

Copy

Compare