1 Korinti 4

Yezu Krista tontoŋena taane

1Abam na boŋe tei to, á jege se á ta‑á yei we debam ye Yezu Krista tontoŋena mo. Wɛ nam kwei o chega kalo ya na seigi nabiina yiga ne to o ke debam jeŋa ne se dé taa nii ka baŋa ne. 2Nmo nam ná kwei n wonnu n ke nɔɔno jeŋa ne se o taa nii te baŋa ne, ko maŋe se konto tu taa ye jawala tu mo. 3-4Ko ná ye amo, abam naa nabiina maama ná di amo taane tei de tei, a yiga tera. Amo boboŋa ne, kolokolo tera a na ke a chɔge. De konto de, a bá wane a ta we a yɔɔre a jege chega, a na bá wane a bore a tete bora to ŋwaane. Wolo yerane na wó bore amo bora to mo ye dé Teiru wom. 5Konto ŋwaane, cheigi-na dé Teiru wom, se nɔɔn-nɔɔno yé wuuri o di o dwoŋi taane. O ná tua, o wó ja pwooni o ba o pa woŋo kolo maama na seigi lim wone to taa nae jaja. Wonto wó pa nɔɔna boboŋ-lilirru tem lɔre jaja. Maŋa kam konto ne mo nɔɔno maama wó na zula yalo na maŋe se o na Wɛ tei ne to.

6A nu-bia bam, ko ye abam ŋwaane mo a kwei a tete dedaane Apolo a ma maŋe a bere abam, se á wane á nii debam á ma lɔre á na wó ta‑á tɔge tei to, se á yé sa chwoŋa de kolo na popone Wɛ tɔnɔ kom wone to. Konto to, nam yé bere-na á tete kamunim se á zuli nɔɔno ye á daare á gwooni o dwoŋi. 7Ko ná ye nmo, wɔ mo pɛ‑m kanto zega kam jei? Bɛ mo n jega ye n wo jwoŋi-ko Wɛ tei ne? Nmo nam na jwoŋi to, bɛ mo kea ye n mage n nyɔɔne ko baŋa ne, ne nmo tete mo mɛ n dam de n swa n ma n na-ko tei?

8Abam boŋe we, á maŋe á jege kolo maama á na lage to, á kwori á ye naduna, ye á ta boŋe we abam di paare á daare debam. Ko ya maŋe se á seene á di paare, se debam de taa tɔge dé ye pwa. 9Amo na boŋe tei to, ko nye de Wɛ kwei debam balo na ye o totoŋa nakwa to o zege kwaga kwaga mo, nenɛɛne ba na jaane balo ba vei se ba go to mo. Debam ye balo na jigi nɔn-mwanno to mo woŋo maama tei ne, de nabiina de malese de tei ne. 10Debam jigi nɔn-jworru mo Yezu Krista ŋwaane, ye abam pa á ye swa tiina mo o tei ne. Debam maa bwomma, ye abam pae á dana. Nɔɔna zuli abam, ye ba daare ba ba nege debam. 11De zem de, kana de na-nyɔm jege debam, ye dé zo gare-zenzwanno. Nɔɔna maa bɛɛse debam, ye dé ba jege dé tete diga se dé peini da. 12Dé mae dé tete jea mo dé toŋa pa dé yera nyɔna. Nɔɔna ná jege debam ba twea, dé yeini dé kwei Wɛ zaane mo dé ma swɛ ba swolim. Nɔɔna ná bɛɛse debam, dé yeini dé vɔ pu-dɛa mo.#1 Piita 3:9 13Nɔɔna ná yaale debam, dé yeini dé jwoori dé tɛ wo-ŋonno mo de-ba. Dé jigi logo baŋa weero mo. De zem maama, dé ye wo-yɔɔro mo nɔɔno maama tei ne.

14Amo na popone kolo to, a popone se ko woli abam se á tɔge chwo-laao mo, á na ye amo bu-swonnu to ŋwaane, se ko dae we a lage se chaveera mo ja abam. 15A yei we nɔɔna morro dedɛ mo wó taa wora ba na nii abam baŋa ne se ba kale abam ba de Yezu Krista chwoŋa kam ne. De ko de, á kwoa nam ba daga. Amo yerane mo ye á kwo, de amo na tɔge Wɛ kwor-ywoŋa kam baŋa ne a pa á na ŋwe-doŋa Yezu Krista ŋwaane to. 16Mo kokuri, a lwoori abam se á ta‑á lwoni amo totoŋ-naga kam.#1 Korinti 11:1 17Konto ŋwaane mo a lage a toŋe Timoti á tei ne. Wonto ye a bu-swono, ye o jege jawala de o na tɔge dé Teiru Yezu tei to. Wonto wó guli o bere abam amo na yeini a tɔge Yezu Krista chwoŋa kam tei to, ne ko na maŋe de chega kalo amo na bere Yezu kɔgɔ kom jei maama ne tei to.

18Abam badaara pae á tete kamunni mo, ye á daa ba teene we amo wó jwoori abam tei. 19Wɛ ná sɛ, a nam wó ba abam tei leile. A ná tua, a laam wó wane a lɔre dam delo kamun-nyena bam na seene ba jega, ye ko dae ba ŋɔŋa yerane to. 20Wɛ paare dem pae dam mo, se ko dae ni-ŋɔŋa yerane. 21Ko daare abam tei ne mo se á bwɛ á nii, a ba a vaŋe á zwɛ, naa a bere swono se a fɔge a ke abam lanyerane?

Currently Selected:

1 Korinti 4: KBG

Highlight

Copy

Compare