Roma 9
9
Ualare aea Iuda toruipi karu
1Ara Keriso voa okofa la moi, ara apeva o ari kao, Safu Arahoha ta ore arave haiiri kofa sa moita o meha, 2ara haiiri eae foromai rovaea kofa, aea haiiri voa ara hehea lei vovea, kaleiti sore ipi arave toruipi karu veia. 3Arave paumarehari aea arave toruipi karu la lei lareva leitit’ oria, a—, araro Ualare sa o maealolo a’, araro Keriso voa pea mutapai vei, ara hai lōri kaeai lare. 4Ere Israela karu, Ualare sa erero maravōpe areve atutemori leiti vei; Ualare ve sosorusosoru ta ereve, areve otoare hariaharia ta ereve, areve Safu ta ereve; maso toaita mai kofa ereve; aeata erero lei lareva leita otoare ta ereve.#Eso 9:4 5Papa metameta rauapo ta ereve; Keriso ta maeasarōva lei ereve toruipi voa forerōpe. Etau foromai ve arori voa peita Ualare la maeati peava! Amene.
6Arave o mōfeare kao, Ualare ve otoare are merava; ipi Iakobo voa forerōpe lea karu foromai voa, karu hea ere Israela karu kofa kasirau. 7Aeata Abrahama ve meavumōla hea ere lea vei areve atutemori kofa leiti kasirau; a—, Ualare mō ōpe, Isako voa ave meavumōla rare la aravai roi.#Gen 21:12 8Lea o vei eite meha, Maeasarōva voa forerōpe lea atutemori, ere Ualare ve atutemori kasirau; a—, Ualare sa ōpe otoare voa forerōpe lea atutemori sa haria. 9Ipi Ualare ve otoare o mōfeare moipe, Soa kofa voa ara ata koti, aea Sara atute la epai roi.#Gen 18:10
10Lōfeare haria kasirau, a—, Rebeka ta vita farakeka sa ére ovōpe, ereitave papa Isako reha. 11Popōta oraka la epai auke soa, ereuka etau lareva varo maealolo varo leiti auke soa, Ualare sa haikaeaita haiiri haria la lei forerai vei, ereuka sa leipe lea mai lea vei kao, a—, ipi Ualare sa haikaeōpe lea vei, 12are mea o Rebeka la mō ōpe, Atute toare sa atute kokoe ve sarufa karu leiti roi.#Gen 25:23 13Usoso Safu Buka voa uka siseita mea o fefeare, Ara Iakobo la haikakare araiape, a—, ara Esau la kaifa leiape.#Mala 1:2–3
14Soka ereita o leafeare moi roi ei? Ualare haura auke ita meitore ei? Kakaeite! 15Ipi are Mose la moipe o meha, Ara haikaea maeaforoe leita lea karu la ara maeaforoe leiti roi, aea ara haikaea haimafu erero muiaita lea karu la ara haimafu muiai roi.#Eso 33:19 16Soka lea ve ipi karu sa haikaeaita varo, ō leitita varo, lea vei kasirau, a—, Ualare ve maeaforoe sa haria. 17Ipi Safu Buka voa Ualare are Faro la mō ōpe, Ara mea etau voa aro lei soi laipea, ipi arave siahu la aro muiai vei, aeata ipi arave rare la lei mearovaeka foromai voa fafarapi itoro ari vei.#Eso 9:16 18Soka are maeaforoe leiti haikaeaita lea karu la, are maeaforoe leiti roi, aea are ōvafae kere leiti vei haikaeaita lea karu la are lei ōvafae kere leiti roi.
19Soka a araro mō arita varo, Lōfeare oria, Ualare karu la kaiae o arita ipi levea? Ualare sa haikaeaita haiiri la sukavuteai vei leisa ore? 20A—, karu e, a ita leisa, tava o serea ita Ualare la ari vei? Elōela aea arero pisosita karu la o mō moi sore, A araro mōfeare pisosipeta ipi levea?#Isa 29:16; 45:9 21Elōela la pisosita karu are siahu ia sauka koru farakeka la ovi, elōela aea maea foa ita la pisosi vei, aea elōela aea la pisosi tivi merava vei.
22Ualare sa leipe mai ta lōfeare. Are areve kitou, aea areve siahu ita la pisiri muiai vei haikaeōpe. Lea vei are erero kitou lei, saroroapai vei kekese leipe lea etau ita la au morariape. 23Are ta areve sosorusosoru voa siseita etau lareva rauapo, are maeaforoe lei lea sosorusosoru la ovai vei everori kekese leipe lea etau la pisiri muiai haikaeōpe.
24Lea etau fefeare eite ereita meha; are ereitaro isa maravi la roroa, Iuda karu voa haria kasirau, a—, toru hariaharia voa ta reha. 25Are Hosea ve buka voa mō uka siseita o fefeare,
Ara sa Arave‐toruipi‐kao o la arita lea karu la
mōri moi roi, E arave toruipi karu.
Ara haikakare auke leipe lea karu la ara Haikakare rare erero aravai roi.#Hose 2:23
26Aea erero o mōri moipe, E arave toruipi karu kasirau,
lea oti kofa voa erero mōri moi roi,
Makuri lei peita Ualare ve susumori e reha.#Hose 1:10
27Isaia ta Israela vei mō isa moipe, Israela karu usoso makaikara miri‐folo ve rauapo feare leitita, a—, erero karu hohoi farafarapo haria la lei makuri leiti roi;#Isa 10:22–23 28ipi Papuvita are sa moipe tava foromai la mearovaeka foromai voa utohoa miarai roi. 29Usoso Isaia sa omopa moipe mea o feare, Sitavu sitavu ve Iehova sa meavusu hea ereita vei makuri ita kiripai auke leitita, a—, ereita usoso Sodoma feare lei, aeata usoso Gomora feare leiti lare.#Isa 1:9
Israela karu aea Ovoro Lareva
30Soka ereita o leafeare moi roi? O meha, toru hariaharia karu, Ualare ita mai haura lei roroai vei eli auke leita lea karu, ere are ita haura lei la roroa ere sa arero sukaerereōpe lea vei. 31A—, Israela karu ere ukōpe safu mai ve haura la ovai vei eliape, a—, ere lea haura la sukaeai kasirau. 32Aea lea ve ipi lekōru? Ipi ere sesearaita haiiri ereve elore leita mai voa, a—, ere Ualare la sukaerereai kao. Ere safosafoaita fave voa safosafoa putoipe. 33O mō uka siseita o fefeare,
Ofae eavaia, ara Siona voa karu la lei safosafoaita fave la miavaipea,
erero lei putoita lea fave.
A—, arero sukaerereaita lea karu maeamariti levi leiti roi.#Isa 28:16
Currently Selected:
Roma 9: TQO1983
Highlight
Share
Compare
Copy
Want to have your highlights saved across all your devices? Sign up or sign in
Published by the Bible Society of Papua New Guinea in 1983.
