Roma 8
8
Keriso voa ereita sapatai roi
1Faitora Keriso Iesu voa roroaita lea karu vei kaiae tava erero miarai kasirau. 2Ipi Keriso Iesu vei ereitaro lei makuri leita Arahoha sa leita lea mai voa araro iri kaiae aeata opai sa leita lea mai voa araro felaukea paraea mea. 3Sarōva sa tivutivu leitita lea vei, ukōpe Safu Mai etau leiti vei rofo usoso kasirau; a—, lea etau Ualare sa leipe. Are areve elore Atute la itapi, lea Atute sa kaiae leita sarōva foromai ve ove feare lei, are kaiae ve tava lei, are sarōva ve iri voa eaeita kaiae la seseōvi kaiae o ōpe. 4Lea mai la Ualare sa leipe ipi ukōpe Safu sa haikaeaita lea haura etau ereita voa lei foromai kekese leiti vei, sarōva ve mai la kiripi, Arahoha ve mai voa roroaita ereita lōfeare karu. 5Ipi sarōva sa haikaeaita mai feare lei vovo roroaita lea karu ere sarōva ve etau la haria haiiri sa kaeaitore. Arahoha sa haikaeaita mai feare lei vovo roroaita lea karu ere Arahoha ve etau la haria haiiri sa kaeaitore. 6Sarōva sa haikaeaita lea mai ve eite opai reha; a—, Arahoha sa haikaeaita lea mai ve eite makuri aea tairu ita reha. 7Ipi sarōva sa haikaeaita lea haiiri ita karu are Ualare sa haiarara lei sukavuteaitore; are Ualare ve safu mai la kakeva leiti sore; okofa, are kakeva leitita ore kasirau. 8Sarōva sa haikaeaita lea haiiri ita karu are Ualare la lei hailareva leitita ore kasirau.
9Soka Ualare ve Arahoha e voa etakofa peit’ oria, e sarōva sa haikaeaita lea mai voa roroaia kasirau; a—, e Ualare ve Arahoha voa la roroa. Keriso ve Arahoha are voa pei auke leita lea karu, are Keriso ve karu kasirau. 10A—, Keriso e voa peit’ oria, eve maea opaia ipi iri kaiae vei, a—, Arahoha e vei makuri reha, ipi ero lei Ualare ita haura lei roroaita lea vei. 11Iesu opi arero lei itoipe lea Ualare ve Arahoha eve iri voa peit’ oria, Keriso Iesu opi arero lei itoipe lea Ualare ta eve opaita maea la eve iri voa peita areve lea Arahoha sa lei makuri leiti roi.#1 Kor 3:16
12Lōfeare vei, arave paumarehari e, ereita maeasarōva ve abitorea karu kao, sarōva sa haikaeaita mai voa roroai vei. 13Ipi e sarōva sa haikaeaita lea mai feare lei vovo roroait’ oria, e opi kaleiti roi; a—, e Arahoha sa lei eve mai kaiae la paea opait’ oria, e makuri leiti roi. 14Ualare ve Arahoha sa lariōvaita lea karu foromai ere Ualare ve atutemori. 15Ipi Ualare sa ero miaraita lea Arahoha sa ero lei fasaita sarufa leiti kasirau, ero lei tore ata leiti vei; a—, areve Arahoha sa lei ero atute rare a’, ereita mō isa vovea, Aba e, Oa e.#Mak 14:36; Gal 4:6 #Gal 4:5–7 16Ualare ve Arahoha ereitave arahoha ita topiari okofa o mō ō vovea, Ereita Ualare ve atutemori. 17Ereita areve atutemori leitita, a—, ereita ta hasu, Ualare ve hasu Keriso ita farehoria maravaita karu; ipi ereita are ita fareho hehea leitita, a—, ereita are ita fareho sosorusosoru lōri leiti roi.
18Arave seseōvaita haiiri meha, mea faitora soa ve haisora aea Ualare sa ereitaro muiai vei leita lea sosorusosoru ita farehoria topiari seseōvaita usoso kakaeite. 19Ipi Ualare sa pisosiape etau foromai Ualare ve atutemori la pisiri voa muiaita soa vei haihahari ita fofoisa tai vovea. 20Ipi Ualare sa pisosiape etau foromai la opai ve siahu ve ora voa vipi seseiape; ereve elore haiiri vei kasirau, a—, ipi Ualare sa haikaeōpe eavia. A—, areve haikaea taita haiiri mōfeare,#Gen 3:17–19 21are sa pisosiape etau foromai puruta mai ita fasi sisea, a—, aite sare voa erero paraea, Ualare ve atutemori ve sosorusosoru aea pisiri lei roroaita mai ita farehoria soa ovai vei. 22Ipi ereita ore, Ualare sa pisosiape etau foromai farehoria haieae lei, aea usoso avasa pataita hehea feare lei lei itiiti faitora ta la leipea. 23Lea haria kao, a—, ereita ta reha, Arahoha ve fare toare la maravaia karu, ereita ta haiiri voa haieae lei, maea la felaukea paraea atutemori rare a’ maravai vei, au tai vovo roroa vovea.#2 Kor 5:2–4 24Ipi ereitaro lei makuri leitita mai meha, ereita sa au tai vovo roroaita lea vei. Soka karu sa eavaita lea etau are levi tai vovo meava roi, ipi are eavaita lea etau vei leisa ata tai roi? 25A—, ereita ofae eavai auke leitita lea etau la tait’ oria, a—, ereita lea etau la haisukafori tai vovo roroava roi.
26Lōfeare Arahoha ta ereitave maeapatoita la toara vovea; ipi ereita Ualare la loki leita mai haura ore leiti sore; a—, Arahoha sa omoita ore auke leita haisusuru ita Ualare la ereita vei loki taupa vovea. 27Aea haiiri ve eite elita lea Ualare are Arahoha sa haikaeaita etau ore, ipi Ualare sa haikaeaita lōfeare are Ualare ve karu vei loki taupa vovea.
28Ereita mōfeare ore, Ualare la haikakare leita karu, are haikaea isa maravaita lea karu vei, are etau foromai tivi farehoria leititore lareva la lei forerai vei. 29Are omopa soa voa ore leipe lea karu la are haikaea maravōpe, ere areve Atute ve soso feare leiti vei, are mariosu rauapo voa ereve paua leiti veia. 30Ualare sa haikaea maravōpe lea karu la are isōpe. Erero isa are erero are ita lei haura leipe; aea are haura leipe lea karu la lei, ere are ita fareho sosorusosoru leiti vei.
31Aita! ereita mea etau vei o leafeare moi roi? Ualare sa ereitaro toari peita, a—, ereitaro mare leisa haukaita ore? 32Are areve elore Atute la totōpo auke lei a—, ereita foromai vei arero au miarōpe. Are ereitaro etau foromai la lea Atute ita fareho levi miarai roi ei? 33Ualare sa haikaea maravaita lea karu la havara leisa paraeai roi ei? Erero seseōvi haura o moita vita are Ualare reha. 34Kaiae o leisa arita ore ei? Keriso Iesu reha, opōpe lea vita, a—, arero opai voa moravi, are Ualare ve mai toare voa avi, aea are Ualare la ereita vei loki serea ita la leipea. 35Ereitaro Keriso ve haikakare voa leisa tofaea fareovai roi? Haisora ei, a—, haieae ei, a—, ereitaro hasiōvi aitetaita soasoa ei, a—, eroa ei, a—, merava soasoa ei, a—, ereitaro irori ita leita mai ei, a—, opai ei? 36Usoso mō uka siseita o fefeare,
Elaro a vei sare ve soa foromai voa paea vovea;
usoso savaita mamoe fefeare elaro ta lōri la leipea.#Sal 44:22 37A—, lea etau foromai voa ereitaro haikakare leipe lea vita vei, ereita ovi aieri foromai sapataita karu lei la roroa. 38Ipi arave haiiri kekese loita meha, aea opai ei, a—, makuri ei, a—, sarea ve siahu ei, a—, kauri ve siahu etau etau ei, a—, faitora foreraita etau ei, a—, aite voa forerai etau ei, a—, 39koa ve siahu ei, a—, toru ve siahu ei, a—, pisosiape etau hariaharia foromai ei, a—, lea etau foromai sa ereitaro Ualare ve haikakare voa pepeita, tofaea fareovai vei ore kakaeite, ereitave Papuvita Keriso Iesu voa.
Currently Selected:
Roma 8: TQO1983
Highlight
Share
Compare
Copy
Want to have your highlights saved across all your devices? Sign up or sign in
Published by the Bible Society of Papua New Guinea in 1983.
