Roma 5
5
Ualare ita haura lei roroaita mai
1Lōfeare vei ereita sukaerereaita haiiri sa lei, Ualare ita haura lei, aea ereita Ualare ita totoea tairu ovi la roroa meha, Papuvita Iesu Keriso voa. 2Are ta ereitave sukaerereaita haiiri sa lei, ereitaro lei Ualare ve maeaforoe ve soa la sukaea laepepea; ereita ta Ualare ve sosorusosoru voa soa ovai vei hailareva ita la taipea. 3Lea haria kao, a—, heafo ve soasoa voa ereita hailareva leititore, ipi ereita ore heafo ve soasoa voa karu lula auke haiiri rofo ovaita ore, 4aea ipi ereita haiiri rofo la ovaita lei vei, ereitaro Ualare sa seseōvi usoso lei, aea lōfeare vei ereita soa lareva vei tai vovea. 5Ereita tai vo roroaita maeamariti auke ita lei vovea, ipi ereitaro miarōpe lea Safu Arahoha Lareva sa Ualare ve haikakare rovaea ereitave haiiri voa sisōvaita lea vei.
6Ereita rofo auke leiape lea soa kofa voa, Keriso sa Ualare la sukavuteaita lea karu vei opōpe. 7Haura karu vei leisa opai roi? Karu farafarapo mai lōfeare leitita varo. 8A—, Ualare are ereitaro haikakare rovaea la mōfeare muia, ereita kaiae lei vovo roroaiape lea soa kofa voa Keriso ereita vei opōpe. 9Areve ovo sa ereitaro lei, ereita Ualare ita haura lei la roroa; etau aeata meha, are sa Ualare ve kitou voa ereitaro fareōvi lei makuri leiti roi. 10Omopa soa ereita Ualare ve ote karu lei roroaiape, a—, are areve Atute ve opai sa ereita ita lei totoeōpe. Faitora soa ereita are ita totoea roroka lei, ereita makuri ta ovai roi Keriso ve lea makuri voa. 11Etau aeata meha, Ualare ereitaro lei hailareva leititore ereitave Papuvita Iesu Keriso voa, ereitaro Ualare ita lei totoeōpe lea vita.
Adamu aea Keriso
12Soka iri kaiae, karu farakeka sa leipe lea vei, mearovaeka voa forerōpe, aeata opai ta iri kaiae sa lei forerōpe. Lōfeare vei opai karu foromai voa fafarapaiape, ipi karu foromai mai kaiae leiape eavia.#Gen 3:6 13Safu la ukōpe soa ve omopa voa mearovaeka karu mai kaiae leiape. Eite Safu Mai miōri auke leitita, a—, karu ve kaiae la seseōvaita ore kofa kao. 14A—, opai ve siahu sa karu foromai la sapataiape, soa Adamu ve soa itiiti Mose ve soa voa; eite karu hea Adamu ve kaiae feare, Ualare ve o la kaeava ari kao, a—, erero ta opai sa sapataiape.
Ereuka sa leiape mai voa forererōpe eite voa, Adamu are koti vei leipe lea vita ve maea ve ove feare la leipe. 15A—, etau aea voa ereuka usoso kakaeite kofa, ipi Ualare sa au miaraita meru ta haria aea Adamu sa leipe kaiae ta foromai haria kofa. Okofa karu sitavu sitavu opaiape ipi lea karu farakeka sa leipe kaiae vei. A—, lea kaiae voa forerōpe eite la Ualare sa sapataipe areve au muiaita maeaforoe voa, aea lea maeaforoe voa lei forerōpe meru Iesu Keriso reha.
16Ualare sa karu la lōfoa lōfoa lei miaraita mai ta haria, aea karu farakeka sa leipe lea kaiae ve mai ta foromai haria. Ipi lea kaiae farakeka la Ualare sa seseōvi kaiae o a’ tava ta miarōpe; a—, karu sitavu sa leiape kaiae vei Ualare areve maeaforoe erero muia kaiae auke o erero moi vovea. 17Karu farakeka sa leipe kaiae vei opai sa harofave siahu ovōpe reha, ipi lea karu farakeka vei. A—, lōfeare mai ve arori voa Ualare ve maeaforoe aea areve meru vei haura mai ita la ovi roroaita karu, ere lea vita farakeka Iesu Keriso vei ovi aieraita siahu ita makuri leiti roi.
18Soka usoso karu farakeka sa leipe kaiae vei karu foromai la kaiae o ōpe, lōfeare karu farakeka sa leipe mai haura farakeka vei karu foromai la haura o a’ paraea erero lei makuri leititore. 19Ipi usoso karu farakeka ve kaeava sa karu rauapo la lei iri kaiae karu leipe, lōfeare lea karu farakeka ve kakeva sa karu rauapo la lei Ualare ita haura leititore.
20Soka ukōpe Safu Mai la muia forerōpe aeata kaiae rauapo lea sa lei forerōpe; a—, eite kaiae rauapo leiape lea otioti voa, Ualare ve maeaforoe ve meru foromai rovaea ta leipe reha. 21Usoso iri kaiae sa opai voa harofave vita leiape, lōfeare Ualare ve maeaforoe sa ereitaro lei are ita haura lei, harofave siahu ovi ereitaro peita makuri soa voa lariōvaitore Iesu Keriso ereitave Papuvita vei.
Currently Selected:
Roma 5: TQO1983
Highlight
Share
Compare
Copy
Want to have your highlights saved across all your devices? Sign up or sign in
Published by the Bible Society of Papua New Guinea in 1983.
