Roma 4
4
Abrahama ve fari
1Iuda karu ve maeasarōva papa Abrahama vei ereita o leafeare moi roi ei? 2Abrahama areve leita mai sa Ualare ita haura leipe lōfeare oria, are hiva arita ore. A—, are Ualare ve omopa voa hiva arita ore kasirau. 3Safu Buka ve o meha, Abrahama Ualare la sukaerereōpe, aea Ualare haura o are vei lea vei ōpe.#Gen 15:6; Gal 3:6 4Soka tivi leitita karu la tava miaraita soa, areve moni la rare meru rare ari sore, a—, tava rare la aritore. 5A—, are tivi leiti auke voa, kaiae karu la lei haura leiti o moita lea Ualare la sukaerereait’ oria, areve lea sukaerereaita haiiri sa lei haura o arita reha. 6Leita mai sesearai auke ita, a—, Ualare sa arero haura o arita lea karu vei Davida ta maeati o mei mō ōpe,
7Mai maealolo sasaukōpe aeata mai kaiae la aierōpe lea karu lareva ia.#Sal 32:1–2
8Papuvita sa kaiae o omoi auke ita meita lea karu.
9Soka Davida sa moipe lea lareva, peritome karu vei haria ei? Kasirau, lea lareva peritome leiti auke karu vei ta reha. Ereitave o meha, Abrahama Ualare la sukaerereōpe, aea Ualare haura o are vei lea vei ōpe. 10O lōri ōpe soa leasauka? Are sa peritome lei meiape soa voa ei, ō are sa peritome leiti auke lei meiape soa voa ei? Are sa peritome lei meiape soa voa kao, a—, are peritome leiti auke lei meiape lea soa voa. 11Are sa peritome lei mei auke soa voa, are sa sukaerereōpe lea vei are Ualare ita haura lei meiape. Are peritome aite voa leipe, aea lea peritome are sukaerereaiape lea vei areve haura ve serare peise leipe. Lōfeare voa peritome ovai auke lei, a—, Ualare la sukaererea aea lea vei haura lei roroaita karu foromai ve oa are reha.#Gen 17:10 12Peritome ovaita karu ve oa ta areo, ipi ereve peritome mai vei kasirau, a—, ipi ere sa sukaererea vovo roroaita lea vei, usoso ereitave oa Abrahama ve mai feare, are peritome leiti auke lei meiape lea soa.
13Ualare sa Abrahama la otoare ōpe are aea areve meavumōla ita sa mearovaeka la aite ovai roi. Lea otoare ukōpe Safu sa lei ari kasirau, a—, ipi Abrahama sa Ualare la sukaererea are ita haura lōfeare leipe eavia.#Gen 17:4–6; 22:17–18; Gal 3:29 14Ipi ukōpe Safu ve Mai la sesearaita karu ere Ualare sa ōpe otoare etau la ovait’ oria, sukaerereaita karu ve sukaerereai eite auke loita reha, aea Ualare ve otoare ta eite kao.#Gal 3:18 15Ipi Ualare ve kitou ukōpe Safu sa lei forera vovea; a—, Safu auke leitit’ oria, Safu la miroapaita mai ta kasirau.
16Ualare ve otoare ve ipi Abrahama sa arero sukaerereaiape eavia. Lea vei lea otoare au miaraita meru feare, ukōpe Safu la sesearaita lea karu vei haria kasirau, a—, Abrahama feare sukaerereaita lea karu vei ta reha.#Gal 3:7 17Usoso Safu Buka voa ukōpe o feare, Ara toruipi‐ipi sitavu sitavu ve papa oa aro lei la mea. Lea otoare Ualare ve soso voa eite ia, ipi Abrahama sa Ualare la sukaerereaiape, opōpe karu la lei makuri lei, aea are o sa mei pei auke etau la lōri lei foreraita lea Ualare.#Gen 17:5 18Abrahama atute ovai soa veverapi kaleipe, a—, are otoare la sukaererea aea toruipi‐ipi sitavu sitavu ve papa oa lōri leipe; usoso Safu Buka voa ukōpe o feare, Ave meavumōla turitovi puarosari roi.#Gen 15:5 19Are sisoro one hundred haekao leipe, aea areve maea ta opai feare, Sara ve karōvu ta are seseōvai auke lei, areve sukaerereaita haiiri ta oai auke leipe.#Gen 17:17 20Are Ualare ve otoare la haifarisea, areve haiiri rofo lei, are sukaererea, Ualare la maeatiape, 21ipi are ore kofa Ualare areve otoare etau la lei foreraita ore. 22Lōfeare vei Abrahama areve sukaerereai voa Ualare sa haura o are vei lea vei ōpe.
23Haura o are vei lea vei ōpe, lea o are haria vei ukai kao. 24A—, ereita vei ta reha. Iesu ereitave Papuvita la opai voa moravōpe lea Ualare la ereita sa sukaerereaita lea vei, haura o ereita vei ta lōri ari roi. 25Arero ereitave iri kaiae vei Ualare sa opai voa miōri, aea ereitaro lei are ita haura leiti vei arero makuri voa moravōpe.#Isa 53:4–5
Currently Selected:
Roma 4: TQO1983
Highlight
Share
Compare
Copy
Want to have your highlights saved across all your devices? Sign up or sign in
Published by the Bible Society of Papua New Guinea in 1983.
