Roma 1
1
1Arao Paulo, Iesu Keriso ve ovi fasaita sarufa, Ualare sa araro haikaea isa ovōpe areve aposetolo lei mea, areve Ovoro Lareva la itoro ari vei.
2Ualare sa lei areve peroveta karu ve ape voa lea Ovoro Lareva la everori miarai vei otoare ape, Safu Buka voa uka sisea. 3Lea Ovoro ve ipi areve Atute, ereitave Papuvita Iesu Keriso vei; areve sarōva maea la arero Davida ve meavumōla sa epōpe, 4a—, areve safu ita taivotaita mai lareva voa, are opi ata itoipe lea sa arero siahu rovaea ita muia pisiri leipe, are Ualare ve Atute. 5Are voa Ualare sa araro maeaforoe lei ara aposetolo lei mei vei, ara areve rare vei toruipi‐ipi foromai voa karu la lei haiiri kerori sukaerereai kofa leiti vei. 6Lōfeare karu sitavu voa, e Roma voa pepeita karu ta Iesu Keriso ve karu leiti vei isa isa laepepea meha.
7Ualare sa haikakare leita aea safu karu leiti vei isōpe Roma karikara voa pepeipeta karu e, e foforoe lareva. Ualare, ereitave Oa aeata Papuvita Iesu Keriso voa foreraita maeaforoe ve meru aea tairu ita e ita lei pepeava.
Lei lareva leita o
8Omopa o meha: Ara Iesu Keriso voa arave Ualare la maeati vovea, ipi eve sukaerereaita mai ve fari mearovaeka foromai voa la fafarapaipea. 9Araro ore lei okofa moita Ualare, areve Atute ve Ovoro Lareva voa ara arave haiiri foromai ita areve tivi lei vovo meita lea Ualare, are ore ara arero veveu toaita soasoa voa ara loki o e vei poitapai sore, 10aea ara loki o ta moi vovea Ualare sa haikaeaita soa sariva otiharo la ara vei fapi, ara ero tai lōri forerai vei. 11Ipi arave haiiri rovaea ero ofae eavai vei, ara Arahoha ve meru hea la ero miōri, ero topiari lei rofo leiti vei. 12Lea o ve eite meha, ereitave sukaerereaita haiiri sa, eve aeata arave, elore elore lei haihahari leiti vei. 13Paumarehari e, arave haikaeai meha, e sa ore leiti vei ara ero tai forerai vei haelarehaelare haikaeai vovea, a—, itiiti faitora etau hea sa araro sasauka vovea. Lōfeare ara tivi ve eite e voa sukaeai roi, usoso toruipi‐ipi hariaharia voa ara sukaeaiape lōfefeare.#Apos 19:21 14Ara Helene karu aeata toru hariaharia karu voa, haiore karu aeata haiivavu karu voa usoso abitorea feare ta ia. 15Lea vei ara haiiri rovaea ia, e Roma voa pepeita karu ve omopa voa Ovoro Lareva ta itoro ari vei.
16Ipi ara Ovoro Lareva vei maea karōva lei vovea; are Ualare ve siahu, sukaerereaita karu foromai la fareōvi lei makuri leiti vei, Iuda karu omopa, aea aite Helene karu ta reha.#Mak 8:38 17Ipi lea Ovoro Lareva voa Ualare sa karu la lei haura leita mai la pisiri muia vovea, lea mai ve oarehōva aeata sisa etau sukaerereaita haiiri reha; usoso Safu Buka voa mōri uka siseita o feare, Sukaerereaita haiiri sa Ualare ita lei haura leita lea karu ere makuri leiti roi.#Hab 2:4
Karu foromai kaiae Ualare ve omopa voa
18Ualare ve kitou kauri voa fauka pisiri muia vovea, karu sa leita kaiae aea Ualare la sukavuteaita lea mai foromai vei. Ere ereve kaiae sa okofa la sasauka vovea. 19Ipi karu sa Ualare vei ore leita lea etau, ereve omopa voa pisiri lei laisisea, Ualare sa lea la erero muia vovea. 20Mearovaeka la pisosipe soa itiiti faitora, ofae sa eavai auke leitita lea Ualare ve peita siahu aea areve leita mai ita la are sa leita etau etau voa pisiri muia vovea. Lōfeare vei ere ereve kaiae la sasaukaita o omoita ore kasirau. 21Ere Ualare la ore, a—, ere arero Ualare feare taivotai sore, arero maeati sore; ere haiiri voa maeakakare lei aea ipi ere haiivavu eavia, ere haiiri murumuru lei roroaiape.#Efes 4:17–18 22Ere elore maea haiore o ape, eite ere maeakakare. 23Ere peita Ualare ve sosorusosoru la toarōrisa, opaita etau ve ove, aea karu ve, aea ori ve, aea animala ve aea titita roroaita etau etau ita ve ove etau ita la pisosi maso lōri toaiape.#Deut 4:16–18
24Lea vei Ualare sa erero paraea, ere haikaeaita herei mai leiti vei erero kiripōpe, ere elore elore maea la maeamariti mai leiti vei. 25Ere Ualare ve okofa la toarōrisa apeva la haikaea, aea pisosiape lea etau la taivotei maso toa, etau foromai la pisosiape Ualare la sukavuteaiape. Arero haria taivotai peava. Amene.
26Lea vei Ualare erero paraea ere haikaeaita mai maealolo voa kiripōpe. Ereve uamori ere uamori heavita ita leita mai kofa la kiripi mai haria lei kaiae leiape. 27Heavita ta lōfeare, ere ua la leita mai kofa kiripi, elore elore maea la heoruka haihahari lei, heavita aea heavita aea ita maeamariti mai leiape; lea vei ere ereve mai kaiae ve tava ere ereve maea voa maravaiape reha.
28Ere Ualare la ereve haiiri sa seseōvi ore leiti vei haikaeai kasirau. Lōfeare vei Ualare erero paraea, ere haiiri mu eokere lei ere mai kaiae leiape; 29lei lei ereve haiiri maealolo hariaharia sa soōpe; karu haria ve etau la maravai vei haikaeaita haiiri, kaifa aea hilisi, karu la paeai, sosori oita mai, maeahahauhahau, aea ivara eokere. Ere fari la hasiavaita karu, 30havara apeva paraeaita karu, Ualare la kaifa leita karu, karōva eokere, maea ruapōpe karu, haiarori o oita karu, mai kaiae la lei foreraita karu, oalou‐ita la kaeava arita karu; 31ere haiivavu karu, otoare apeva arita karu, haimafu auke lei, maeaforoe ta haveva. 32Ere ore Ualare sa moipe otoare meha, Lōfeare mai la leitita karu opai roi; etau farakeka ere ereve elore mai sa lōfeare lei vovea, aea lōfeare mai la leitia lea karu la ere maeati vovea.
Currently Selected:
Roma 1: TQO1983
Highlight
Share
Compare
Copy
Want to have your highlights saved across all your devices? Sign up or sign in
Published by the Bible Society of Papua New Guinea in 1983.
