ရောမ 5

ကျုံခြင်းတရားကနီရို့ ငြိမ်းချမ်းခြင်းကို ရခြင်း

1ငါရို့စာ ကျုံခြင်းတရား အကြောင်းန သူတော်ကောင်းအဖြစ် လက်ခံခြင်းကို ရကတ်ပျာ။ ယင်းအတွက်န အသျှင်ယေရှုခရစ်တော်ကနီရို့ ထာဝရဘုရားန ငါရို့အထဲမာ ငြိမ်းချမ်းဗျာ။ 2ငါရို့စာ ခရစ်တော်၏ အကြောင်းန ကျုံခြင်းတရားကနီရို့ ထာဝရဘုရား၏ ကျေးဇူးတော်ကို ခံရကတ်ပျာ အရာ ငါရို့ ဒေဂု ထိုကျေးဇူးတော်အောက်မာ ဟိကတ်တေ။ အရာ ထာဝရဘုရား၏ ဘုန်းတန်ခိုးကို အဝီငဖို့စာ မျှော်လင်းချက်န ငါရို့ ပျော်နီကတ်တေ။ 3ယင်းထက်မက ဒုက္ခ-ဝေဒနာကို ခံရကတ်တေခါလည်း ငါရို့ ပျော်နီကတ်တေ၊ အကြောင်းကား ငါရို့ သိရေ၊ ဒုက္ခ-ဝေဒနာစာ သည်းခံခြင်းကို ပီးရေ၊ 4သည်းခံခြင်းစာ စင်ကြယ်စာ အကျင့်သီလကို ပီးရေ၊ စင်ကြယ်စာ အကျင့်သီလစာ မျှော်လင်းချက်ကို ပီးရေ။ 5ဒေ မျှော်လင်းချက်စာ ငါရို့ကို အရှက်ချလိမည် မဟုတ်၊ အကြောင်းကား ထာဝရဘုရားစာ သန့်ရှင်းသောဝိညာဉ်တော်ကနီရို့ ကိုယ့်ချစ်ခြင်းမေတ္တာကို ငါရို့ စိတ်နှလုံးမာ သွန်ပီးလီရေ။ ငါရို့စာ ထိုသန့်ရှင်းသောဝိညာဉ်တော်ကို ထာဝရဘုရားက လက်ဆောင်အဖြစ် ရကတ်လီရေ။

6ငါရို့မာ အားနည်းခြင်း ဟိလီရေခါ ခရစ်တော်စာ ငါရို့အတွက် ကိုယ့်အသက်ကို စွန့်လီရေ။ ခရစ်တော်စာ ထိုက်တန်ရေအချိန်မာ ငါရို့ပိုင် ဆိုးယုတ်စာ လူရို့အတွက် ကိုယ့်အသက်ကို စွန့်လီရေ။ 7ပညှတ်တရားကို လိုက်နာသူအတွက် ကိုယ့်အသက်ကို စွန့်ဖို့သူတစ်ယောက်လည်း မဟိ ဟို့ ပြောနိုင်ရေ။ ယေကေလည်း ပညှတ်တရားမာဟိစာထက် ပိုရို့ ကောင်းမြတ်စာ အလုပ်ကို လုပ်သူအတွက် ကိုယ့်အသက်ကို စွန့်ဝံ့ဖို့သူ ဟိကေလည်း ဟိနိုင်ရေ။ 8ယေကေလည်း ငါရို့ အပြစ်လုပ်နီတုံးမာ ခရစ်တော်စာ ငါရို့အတွက် ကိုယ့်အသက်ကို စွန့်လီရေ။ ခရစ်တော်၏ သီခြင်းကနီရို့ ထာဝရဘုရားစာ ကိုယ့်ချစ်ခြင်းမေတ္တာကို ငါရို့ဘားမာ ဖေါ်ပြလီရေ။

9ထာဝရဘုရားစာ ခရစ်တော်၏ သွီးအကြောင်းန ငါရို့ကို သူတော်ကောင်းအဖြစ် လက်ခံလီရေ။ ယင်းအတွက်န ငါရို့စာ ခရစ်တော်ကနီရို့ ထာဝရဘုရား၏ အပြစ်ဒါဏ်က ရွတ်ကတ်ဖို့ဆိုစာကို စိတ်ချရို့ ရကတ်ပျာ။ 10ငါရို့စာ ထာဝရဘုရား၏ ရန်သူဖြစ်ရို့ ဟိလီရေခါ ထာဝရဘုရားစာ ကိုယ့်သားတော်ကို အသီခံစီလီရေ။ ထိုသားတော် သီခြင်းကနီရို့ ထာဝရဘုရားစာ ငါရို့ကို ကိုယ်န ပေါင်းပီးလီရေ။ ထိုသားတော်၏ အသက်ရှင်ခြင်းကနီရို့ ငါရို့စာ ကယ်တင်ခြင်းကို ရကတ်ဖို့ဆိုစာကို ငါရို့ စိတ်ချရို့ ရကတ်ပျာ။ 11သက်သက် ကယ်တင်ခြင်းကို ရကတ်ဖို့စာ မဟုတ်သိ။ ယင်းထက်ပင် ထိုယေရှုခရစ်တော်ကနီရို့ ငါရို့စာ ထာဝရဘုရားန အသစ်ပျင်ရို့ ပေါင်းကျကတ်ပျာ။ ယင်းအတွက်န ငါရို့စာ ပျော်နီကတ်တေ။

အာဒံန ခရစ်တော်ကို နှိုင်းယှဉ်ခြင်း

12လူတစ်ယောက်ကနီရို့ ဒေ လောကမာ အပြစ် ရောက်လာလီရေ အရာ ထိုအပြစ်ကနီရို့ သီခြင်းတရားလည်း ရောက်လာလီရေ။ ဟိသမျ လူရို့ အပြစ် လုပ်ကတ်လီရေအတွက်န အားကုံးသူဘားမာ သီခြင်းတရား ရောက်လာလီရေ။ 13မောရှေ၏ ပညှတ်တရား မရောက်ခင်အယင်ကပင် ဒေ လောကမာ အပြစ် ဟိလီရေ၊ ယေကေလည်း ပညှတ်တရား မဟိလီရေအတွက်န ထာဝရဘုရားစာ အပြစ်ကို မှတ်ရို့ မထားလီ။ 14ယေကေလည်း အာဒံလက်ထက်ကပင် စရို့ မောရှေလက်ထက် တိုင်အောင် သီခြင်းတရားစာ ဟိသမျ လူရို့ကို အုပ်ချုပ်ရို့ ထားလီရေ။ ယင်းထက်မက အာဒံပိုင် ထာဝရဘုရား၏ ပညှတ်ချက်ကို ငြင်းပယ်ရို့ အပြစ် မလုပ်သူရို့ကိုလည်း သီခြင်းတရားစာ အုပ်ချုပ်ရို့ ထားလီရေ။

အာဒံစာ နောက်အနာဂါတ်မာ ကြွလာဖို့စာ ယေရှုခရစ်တော်၏ ပုံသဏ္ဍာန် ဖြစ်တေ။ 15ယေကေလည်း ထာဝရဘုရား၏ အခမဲ့ လက်ဆောင်စာ အာဒံ၏ အပြစ်နမတူ၊ အကြောင်းကား ထိုလူတစ်ယောက် အပြစ်အကြောင်းန လူအများကြီး သီရကတ်လီရေ။ ယေကေလည်း ထာဝရဘုရား၏ သနားကြင်နာခြင်း အကြောင်းန အရာ အခြားတစ်ယောက် သနားကြင်နာခြင်း အကြောင်းန လူအများကြီး အသက်ရှင်ကတ်လီရေ။ ထိုအခြားတစ်ယောက်စာ ယေရှုခရစ်တော် ဖြစ်တေ။ 16ထာဝရဘုရား၏ အခမဲ့ လက်ဆောင်စာ အာဒံ၏ အပြစ်အကျိုးနမတူ၊ အကြောင်းကား လူတစ်ယောက် အပြစ်အကြောင်းန လူအများကြီးဘားမာ တရားစစ်ဆေးခြင်းန အပြစ်ဒါဏ် ကျရောက်လီရေ။ ယေကေလည်း ထာဝရဘုရား၏ အခမဲ့ လက်ဆောင်အကြောင်းန ငါရို့ပိုင် အပြစ်များသူရို့လည်း ထာဝရဘုရားန ပေါင်းကျကတ်လီရေ။ 17အကြောင်းကား အာဒံ အပြစ်အကြောင်းန သီခြင်းတရားစာ သူ့ကနီရို့ အုပ်ချုပ်ဖို့ စလီရေ။ ယေကေလည်း ထာဝရဘုရား၏ ကြွယ်ဝချမ်းသာစာ ကျေးဇူးတော်န သူတော်ကောင်းအဖြစ် လက်ခံထိုက်စာ အခမဲ့ လက်ဆောင်ကို ရသူရို့စာ ယေရှုခရစ်တော်ကနီရို့ ပြည့်စုံစာအသက်န အုပ်ချုပ်ဖို့ ရကတ်ဖို့ဆိုစာကို ငါရို့ စိတ်ချရို့ ရကတ်ပျာ။

18ယင်းအတွက်န အာဒံ၏ အပြစ်တစ်ခုအကြောင်းန ဟိသမျ လူရို့ဘားမာ အပြစ်ဒါဏ် ရောက်လာလီရေ။ ယင်းပိုင်တထန် ခရစ်တော်၏ ကောင်းမြတ်စာ အလုပ်တစ်ခုအကြောင်းန ဟိသမျ လူရို့စာ သူတော်ကောင်းအဖြစ် လက်ခံခြင်းကို ရကတ်လီရေ အရာ သူတော်ကောင်းအဖြစ် လက်ခံခြင်းကို ရခြင်းအကျိုးစာ ထာဝရအသက် ဖြစ်တေ၊ 19အကြောင်းကား အာဒံ၏ မနာခံခြင်းအကြောင်းန လူအများကြီး အပြစ် သင့်ကတ်လီရေ။ ယင်းပိုင်တထန် ခရစ်တော်၏ နာခံခြင်းအကြောင်းန လူအများကြီး သူတော်ကောင်းအဖြစ် လက်ခံခြင်းကို ရကတ်လိမည်။ 20အပြစ် ပွါးလတ်အောင်အတွက် ထာဝရဘုရားစာ ပညှတ်တရားကို ပီးလီရေ၊ ယေကေလည်း လူရို့ အပြစ် အများကြီး လုပ်ကတ်တေခါ ထာဝရဘုရား၏ သနားကြင်နာခြင်းလည်း အများကြီး ပွါးလာလီရေ။ 21ယင်းအတွက်န တစ်ချိန်ခါ အပြစ်စာ လူရို့ကို အုပ်ချုပ်ရို့ ထားလီရေ အရာ သူရို့တို့ သီခြင်းတရား ယူလာလီရေ။ ယင်းပိုင်တထန် ဒေဂု လူရို့ကို သူတော်ကောင်းအဖြစ် လက်ခံခြင်းကနီရို့ ထာဝရဘုရားစာ ကိုယ့်သနားကြင်နာခြင်းကို အုပ်ချုပ်စီချင်ရေ။ ယင်းပိုင်ဆိုကေ လူရို့စာ ငါရို့မာ အသျှင်ယေရှုခရစ်တော်ကနီရို့ ထာဝရအသက်ကို ရကတ်လိမည်။

Currently Selected:

ရောမ 5: RMZ

Highlight

Copy