ဂါလာတိ 1
1
နှုတ်ဆက်ခြင်း
သို့၊ ဂါလာတိပြည်နယ် အသင်းတော်။
1ငါ ပေါလု၊ ငါစာ ခရစ်တော်၏ တမန်တော် တစ်ယောက် ဖြစ်တေ။ ငါ ဒေ တမန်တော်အရာကို လူရို့က မဟုတ်ကေ လူရို့ အခွင့်အာဏာန ရလီစာ မဟုတ်။ ယေကေလည်း ယေရှုခရစ်တော်န အဖထာဝရဘုရားရာ ငါ့ကို တမန်တော်အဖြစ် ခန့်ထားလီစာ ဖြစ်တေ။ ထာဝရဘုရားစာ ယေရှုခရစ်တော်ကို သီရာက ပြန်ရှင်ထမြောင့်စီလီရေ။ 2ငါ့ကပင်စရို့ ငါနအတူ ဟိကတ်စာ ဟိသမျ ကျုံသူညီအစ်ကိုမောင်နမှရို့စာ ဂါလာတိပြည်နယ်မာ ဟိကတ်စာ နင်ရို့တို့ ဒေ စာစောင်ကို ပို့လိုက်တေ။
3ငါရို့မာ အဖထာဝရဘုရားန အသျှင်ယေရှုခရစ်တော်စာ နင်ရို့ကို ကျေးဇူးတော်န ငြိမ်းချမ်းခြင်း ပီးပါစီ။ 4ထာဝရဘုရား ငါရို့ကို ဒေ ဆိုးယုတ်စာ လောကအထဲက ကယ်ဆယ်ချင်ရေ။ ယင်းအတွက်န ငါရို့မာ အဖထာဝရဘုရား၏ အလိုတော်အတိုင်း ယေရှုခရစ်တော်စာ ငါရို့ အပြစ်အတွက် ကိုယ့်အသက်ကို စွန့်လီရေ။ 5ကမ္ဘာအဆက်ဆက် ထာဝရဘုရား၏ ဘုန်းကြီးပါစီ။ အာမန်။
မှန်ကန်စာ သတင်းကောင်း တစ်ခုတည်း ဟိခြင်း
6ထာဝရဘုရားစာ ခရစ်တော်၏ ကျေးဇူးတော်အကြောင်းန ကိုယ့်လူဖြစ်ဖို့အတွက် နင်ရို့ကို ခေါ်လီရေ။ နင်ရို့ အများမကြာခင် သူ့ကို စွန့်ဘိုက်ခရို့ အခြားသတင်းကောင်း တစ်ခုကို လက်ခံကတ်စာကို မြင်ရို့ ငါ ကောင်းကောင်း အံ့ဩရေ။ 7ထိုသတင်းကောင်းစာ မှန်ကန်စာ သတင်းကောင်း မဟုတ်။ ယေကေလည်း တစ်ချိုးလူရို့စာ နင်ရို့ကို အငြီနီဖို့ မပီးကတ် အရာ သူရို့စာ ခရစ်တော်၏ သတင်းကောင်းကို ပြောင်းလှဲဖို့ ကြည့်နီကတ်တေ။ 8ယေကေလည်း ငါရို့စာ မှန်ကန်စာ သတင်းကောင်းကို နင်ရို့ဘားမာ ဟောပြောလီကတ်တေ။ ယင်းအတွက်န ငါရို့ ကိုယ်တိုင် ဖြစ်စီ၊ မဟုတ်ကေ ဂေါင်းခင်နတ်သားရို့ ဖြစ်စီ၊ ထိုသတင်းကောင်းကို ပယ်ရို့ အခြားသတင်းကောင်းကို နင်ရို့ဘားမာ ဟောပြောရေဆိုကေ သူစာ ကျိန်ဆဲထည့်ခြင်းကို ခံရစီ။ 9ငါ အယင် ပြောလီစာပိုင်တထန် ဒေဂုလည်း အရာတစ်ပြန် ပြောရေ၊ နင်ရို့ လက်ခံလီကတ်စာ သတင်းကောင်းကို ပယ်ရို့ အသူမဆို အခြားသတင်းကောင်းကို ဟောပြောရေဆိုကေ သူစာ ကျိန်ဆဲထည့်ခြင်းကို ခံရစီ။
10ငါ လူရို့ကို နှစ်သက်အောင် လုပ်ဖို့ ကြိုးစားနီရေ ဟို့ နင်ရို့ ထင်ကတ်စာလော? ငါ ယင်းပိုင် ကြိုးစားနီစာ မဟုတ်၊ ယေကေလည်း ထာဝရဘုရား တစ်ပါးကိုရာ ငါ နှစ်သက်အောင် လုပ်ဖို့ ကြိုးစားနီရေ။ ငါစာ လူရို့ကို နှစ်သက်အောင် လုပ်ဖို့ ကြိုးစားနီရေဆိုကေ ငါ ဒေဂုလည်း ခရစ်တော်၏ ကျွန် မဖြစ်သိ။
ပေါလု တမန်တော် ဖြစ်လာခြင်း
11ညီအစ်ကိုမောင်နမှရို့၊ နင်ရို့ဘားမာ ငါ ဟောပြောလီစာ သတင်းကောင်းစာ လူရို့ စီထားစာ သတင်းကောင်း မဟုတ်ဆိုစာကို ငါ နင်ရို့ကို သိစီချင်ရေ။ 12ထိုသတင်းကောင်းကို ငါ တစ်ယောက်ကလည်း ရလီစာ မဟုတ် အရာ တစ်ယောက်လည်း ငါ့ကို သွန်သင် ပီးလီစာ မဟုတ်၊ ယေကေလည်း ထိုသတင်းကောင်းကို ယေရှုခရစ်တော် ကိုယ်တိုင် ငါ့ဘားမာ ဖေါ်ပြလီစာ ဖြစ်တေ။
13ယုဒဘာသာတရားကို လိုက်နာရေခါ ငါ ဇာပိုင် နီထိုင်လီရေလည်းဆိုစာကို နင်ရို့ ကြားဖူးကတ်တေ။ ထာဝရဘုရား၏ အသင်းတော်တိကို ငါ ကောင်းကောင်း ညှဉ်းဆဲလီရေ အရာ အသင်းတော်တိကို ဖျက်စီးဖို့တိုင်အောင် ကြိုးစားလီရေဆိုစာကိုလည်း နင်ရို့ ကြားဖူးကတ်တေ။ 14ငါ ကိုယ်နအရွှယ်တူစာ ယုဒလူမျိုးရို့ထက်လည်း ပိုရို့ ယုဒဘာသာတရားကို လိုက်နာလီရေ။ ငါရို့ အဖိုးအဖီးအစိုင်လာရို့က ဆင်းလာစာ ဟိသမျ ထုံးစဉ်တိကိုလည်း ငါ ကြိုးစားအားထုတ်ရို့ လိုက်နာလီရေ။ 15ယေကေလည်း ထာဝရဘုရားစာ ငါ မမွီးဖွားခင် အယင်ကပင် ငါ့ကို ရွီးကောက်ရို့ ထားလီရေ အရာ သူစာ ငါ့ကို သနားကြင်နာရို့ တမန်တော်အဖြစ် ခေါ်လီရေ။ 16ထာဝရဘုရားစာ ငါ့ကို ကိုယ့်သားတော်၏ အကြောင်း သတင်းကောင်းကို ယုဒမဟုတ်သူရို့ဘားမာ ဟောပြောစီချင်လီရေ။ ယင်းအတွက်န ထာဝရဘုရားစာ ကိုယ့်သားတော်ကို ငါ့ဘားမာ ဖေါ်ပြလီရေ။ အရာ ထာဝရဘုရား ငါ့ကို ခေါ်လီရေခါ ငါ တစ်ယောက်ဘားမာလည်း အကြံမခံလီ။ 17ယင်းထက်မက ငါ့ထက် အယင် ရွီးကောက်ခြင်းကို ခံရလီကတ်စာ ယေရုရှလင်မြို့မာဟိစာ တမန်တော်ရို့တို့လည်း ငါ မလားလီ။ ယေကေလည်း ငါစာ အကြာမနီဘိုင်းန အာရပ်ပြည်တို့ လားခလီရေ။ ယင်းနောက် ငါ ဒမာသက်မြို့တို့ ပြန်လာလီရေ။
18သုံးနှစ်ရွန်ရေခါ ငါ ပထမခေါက် ပေတရုန အတွိခံဖို့အတွက် ယေရုရှလင်မြို့တို့ လားလီရေ အရာ ငါ သူနအတူ တစ်ဆယ့်ငါးရက် နီခလီရေ။ 19ယေကေလည်း တမန်တော်ရို့အထဲက အသျှင်၏ ညီ ယာကုပ်တစ်ယောက်တည်းကို ပယ်ရို့ ငါ အခြားတစ်ယောက်နလည်း မတွိခလီ။ 20ငါ နင်ရို့တို့ ရွီးလိုက်စာ စကားတိ တစ်ခွန်းလည်း မုတ်သားစကား မဟုတ်ဆိုစာကို ထာဝရဘုရား ကိုယ်တိုင် သိရေ။
21ယင်းနောက် ငါ ရှုရိပြည်နယ်န ကိလိကိပြည်နယ်မာဟိစာ အမျိုးမျိုး နေရာတို့ လားလီရေ။ 22ယင်းခါ ယုဒပြည်နယ်မာဟိစာ ခရစ်တော်၏ အသင်းတော်တိစာ ငါ့ကို မသိကတ်သိ။ 23သူရို့ သက်သက် ငါ့အကြောင်းကို ဒေပိုင် ကြားရကတ်လီရေ၊ “အယင်ခါ ငါရို့ကို ညှဉ်းဆဲသူစာ ဒေဂု ခရစ်တော်၏ ကျုံခြင်းတရားကို လူရို့ဘားမာ ဟောပြောနီရေ၊ ယေကေလည်း သူစာ တစ်ချိန်ခါ ထိုကျုံခြင်းတရားကို ဖျက်စီးဖို့ ကြည့်လီရေ။” 24အရာ သူရို့စာ ငါ့အကြောင်းန ထာဝရဘုရားကို ချီမွမ်းကတ်လီရေ။
Currently Selected:
ဂါလာတိ 1: RMZ
Highlight
Copy
Compare
Share
Want to have your highlights saved across all your devices? Sign up or sign in
©2023 Wycliffe Bible Translators, Inc.
