Roma 14
14
1Wane na fitooa nia e feda muka thathagonia isamulua, una ena mena, e ai kesi olili susuu fafia si do na kesi thaitoomana lea. 2Tee wane fitooa ni isana fasi kai ania si do ki sui bana: ma wane ne feda kai ania kala lolo ni ania ki. 3Kera lufia wane ne ania si fare faekwa ana wane ne ai si ania; ma wane eri ne ai si ania kera lufi nia e ai si ṉata mala wane ni kotu sulia wane eri ne ania: sulaania tha God e thathagoni nia mai. 4Oe ni tei fasi oki ṉata mala wane ni kotu sulia wane ni ra ata wane eeta lau bana? inaofana wane inoto nia i talaana kai takwe ṉado mado kai asi nia. Iu, keki faatakwelaṉania; uria na tha God e talaana faatakwelaṉai lana la. 5Tee nonii wane manatane baita ka tatha ana tee fa boṉi ana fa boṉi eki: ta wane lau manatana na fa boṉi eki sui e totoo boo. Kamulua sui, ta wane u boo i talaana ma ta wane u boo i talaana, kai thaitoomana mamana i manatana. 6Wane na kai faaabua fa boṉi eri, kai faaabua ifana ṉa Lord; ma wane ne ai si faaabua fa boṉi eri, ifana ṉa Lord ne ai si faaabua: wane na kai ania si do eki, kai ania ifana ṉa Lord, uria ne sore lea talea tha God; ma wane eri ne ai si ania, ifana ṉa Lord ne ai si ania, ma ka sore lea talea tha God. 7Sulaania e ai ta wane iakulua si maruki ifana i talaana, me ai ta wane si mae ifana i talaana. 8Sulaania mada sa kuki maruki, kuki maruki ifana ṉa Lord; ma mada sa kuki mae, kuki mae ifana ṉa Lord: mania mada sa kuki maruki, mado kuki mae, kulu do ṉa Lord ki. 9Sulaania tha Christ e mae, ma ka tatae, ma ka maruki lau bana, uria si kula eri neri, fasi nia kai Lord ana toa mae ki ma toa maruki ni lau boo. 10Ma ni oe, uria ta no ṉata mala wane ni kotu sulia dooramu? mado ni oe lau boo, uria ta no fare faekwa ana dooramu? uria ni kulu sui kuki takwe inaona do ni ono la tha Christ na Wane ni Kotu. 11Sulaania kera keda,
E mamana ’uria na ku maruki, tha Lord e sorea, toa ni sui bana keki boururu isaku,
Ma keki faamamanea tha God ana meada.
12Mania kulu sui, ta wane si ei boo, toto kuki faaroṉoa tha God asi do na kulu ilidaki.
13Mania kusi ṉata lau kwailiu suli kulu mala wane ni kotu: si do muki sorea mala wane ni kotu neri, muki lufia wane si alua ta do ana faataofai lana imole ania, mado ta do ana lakwadora la ania, kai to sula tale maakwalia doorana. 14Nau ku thaitoomana, ku thaitoomana boo atha Lord Jesus, e ai ta do si tona faasua imole: talitoona boo wane na ka sorea kai faasua nia, kai faasua nia boo. 15Uria mada sa dooramu kai liodila uria faṉa oe, abula lamu do ana liothau la e ai lau naa. Osi lalabatania ana faṉa oe wane eri na tha Christ e mae uri nia. 16Mania musi alamatanida keki ṉata taa sulia si do lea kamulua: 17Sulaania tooa tha God e ai si ni ana faṉa la ma kuu la, ana kokoto la ma enenoa ma seethathala la atha Spirit Abu. 18Uria wane na kai ra ifatha Christ asi do eki kai faalea tha God, ma wane ki keki ala fafi nia. 19Mania kuki tari buriana si do ana enenoa ki, ma si do na kuki faasukwai kulu kwailiu ania. 20Musi lalabatania ṉa ra tha God uria si do ni ani lana. Si do ki sui bana e falu mamana boo; una ena mena, e taa ana wane eri na kai ania ma kai faataofai nia imole. 21Lea noki to fasia ani lana sina see ta do, mado kuufi lana waene, mado ili lana atona bana ta si do na dooramu kai lakwadora ania, mado kai taofai nia ania, mado kai feda sulia. 22Fitooa ni ani oe? kai to ani oe i talaamu inaofatha God. Wane eri ne ai si sorea kwae lana i talaana uria si do ne ala fafia, kai seethathala. 23Ma wane na ka fitala, keka sorea kwae lana mada sa nia kai ania, sulaania si do ana fitooa e ai neri; ma atona bana ta si do na do ana fitooa e ai, abula taa la neri.
Currently Selected:
Roma 14: MLU1949
Highlight
Share
Compare
Copy
Want to have your highlights saved across all your devices? Sign up or sign in
British and Foreign Bible Society 1949, 1951
