Si do Aposela ki kera ilidaki 20

1Ma buriana na ṉataṉata eri e sui, tha Polo e kwaiarasi uria toa na tha Jesus e toledaki, ma ka alulu iada, sui ka lae faisida fasi kai lae uri Masedonia. 2Ma buriana ne liufia fanua eki, me kwaifamanatai faamau isada, nia bii fula i Girisi. 3Ma nia to i fanua eri sulia ulu madami. Ma uria na Ju ki kera oloa omea uri nia, si maṉa karaṉia sa kai lae i la faka uri Siria, manatana na nia kai tatha i Masedonia fasi kai oli kau. 4Ma tei wane kera lae bi nia uri Asia, tha Sopata, wane i Berea; ma ana toa nai Thesalonika, tha Arisitakasi ma tha Sikadasi; ma tha Gaiasi, wane i Debe, ma tha Timothiasi; ma ro wane i Asia, tha Tikikasi ma tha Tofimasi. 5Toa eki kera lae totonao, keka maakwali kamilia i Toroasi. 6Ma mili lae i la faka faisia Filifae buriana fa boṉi eki ana berede e ai ta lefena iei, mili lae sulia lima fa boṉi, mika fula isada i Toroasi; ma mili to iei sulia fiu fa boṉi.

7Ma afa boṉi totonao ana uiki, si maṉa na toa na tha Jesus e toleda kera figu mai fasi keki nia berede, tha Polo e kwaifamanatai isada, manatana na nia kai lae afa boṉi iburiana; ma nia ṉa ṉata ka initoona rodo naa. 8Ma laeta oro ki ni ana kadee biu laṉi eri, na kera figu mai iei. 9Ma tee wane bii baita, thatana tha Iutikasi, ka ono i maana olofolo, maane fafokulu asia boo, ka biṉa liu; ma si maṉa na tha Polo e kwaifamanatai ka tau u, si biṉa eri e faasifo nia iano faisia biu ne to susui mai ia ana ulu biu eki, ma kera tafoa e mae naa. 10Ma tha Polo e sifo, ka asi nia i fafona, ma ka ofia, sui ka sorea, Musi aṉisia; uria na maṉona ni ani nia. 11Me tae lau, ma ka nia berede eri, ka ania, ma ka ṉaṉata bida fanua ka dani, sui ka lae. 12Ma kera talaia mai wela wane eri ne maruki, ma si do eri ka faainamaruki kera faamau.

13Ma ni kamilia mili lae inao uri la faka, mika lae uri Asoso, manatamilia na miki ṉalia tha Polo iei: uria si do ne sorea neri, manatana na nia kai lae tala i tolo. 14Ma si maṉa ne toda iamilia i Asoso, mili ṉalia, lae mika fula i Mitilene. 15Ma mili lae i la faka faisia si kula eri, ma afa boṉi iburiana mili fula otofana Kiosi; ma afa boṉi iburiana mili olo i Samosi, ma mili to i Togiliama; ma afa boṉi iburiana mili fula i Miletasi. 16Sulaania manatana tha Polo na nia kai tatha ana faka faisia i Efesasi, fasi e ai kesi suuwai nia kai to suka tau i Asia; uria ne lae lakwalakwa, sa mado e ai nia kai fula i Jerusalema ana Taṉafula‐limana‐tafulu fa boṉi eri.

17Ma nia to i Miletasi ka kwaiarasi uri Efesasi, ka ailia mai ulunao ki ana figua eri isana. 18Ma lalae kera fula isana, nia soree isada,

Ni kamulua mulu tala thaitoomana, ita mai afa boṉi totonao na nau ku uri si theegano i Asia na ba, to la na nau ku toto ofu ania bi kamulua ta fa boṉi si ei, 19Na nau ku ra ifana ṉa Lord asi lio ana abula seseka la, ma ana kafona maaku ne oro, ma ana ilitooa ba ki na kera ilitooku ania ana omea ba Ju ki kera oloa uri nau: 20Ma nau e ai kwasi mau ana faaroṉo lamulua la asi do ki sui boo ne kwaiadomi, ma ana kwaifamanatai la isamulua ana ofu la ki, ma i maafera kamulua ki ta maafera si ei, 21Ku faamamanea isana Ju ki ma toa i Girisi lau boo si do nau ku thaitoomana sulia manata akele la uria tha God, ma fitooa uria Lord kulu tha Jesus Christ. 22Ma rikia fasi, si maṉa eri kera suuwai nia spirit nau kwai lae, e ai si ei boo, uri Jerusalema, ma kwasi thaitoomana si do na kai fulatooku iei: 23Talitoona si do eri, tha Spirit Abu ka faamamanea si do ne thaitoomana isaku i la toaa susu ki sui bana, ka ṉata sulia nailii thalo ki ma to la ana taa la ki na kai maakwali nau. 24Ma nau ku doanita asi do eki sui boo, ma kwasi ogoni ana maṉoku, ’uria si do nau ku liothau ania, fasi kwai fita lea ana fita la nau, ma kwai ilia si ra eri na nau ku ṉalia atha Lord Jesus, faamamane lana si do nau ku thaitoomana sulia si faaroṉoa lea ana lea la tha God. 25Ma rikia fasi, si maṉa eri ku thaitoomana ni kamulua sui boo, toa na nau ku liliu i maalutamulua, ku ṉata sulia tooa tha God, e ai musi rikia lau maaku. 26Mania itaraena nau ku faamamanea si do nau ku thaitoomana neri, na nau ku ai ania abuna wane ki sui boo. 27Sulaania e ai kwasi mau ana faaroṉo lamulua la sulia si do eki sui bana na tha God e manataia. 28Mania muki beta suli kamulua, ma sulia aini sifi eki sui boo, na tha Spirit Abu e alu kamulua muka nanao ania, muki tharea figua tha God, ne usia ana abuna i talaana. 29Uria nau ku thaitoomana si kula eri, buriana na nau ku lae naa koito kwasi ki ne aala keki kotho i maalutamulua, ma kesi suusia taa la faisia aini sifi ki; 30Ma faisia i maalutamulua tei wane keki tae mai, keki ṉata garo, sa keki bulasi garo ana toa na tha Jesus e toleda keki lae iburiada. 31Mania muki tharai, muki onotoona na sulia ulu fa ṉali nau ku fafaamanatai kamulua sui, ta si maṉa si ei, afa rodo mafa thato ana kafona maaku. 32Ma sui si maṉa eri, doora kera, ku takofale kamulua atha God, ma asi baea ana lea la nia, ne sukwai fasi kai faasukwai kamulua, ma kai falea si do eri na muki fulatoona i maalutana toa eki sui boo na kera faaabuda. 33Nau e ai kwasi thathamia silifa ta wane, mado goloda nia, mado si maku nia. 34Iu, ni kamulua muki thaitoomana ni nau ku ra ana ro aba nau ki nania ana fale lana si do mili rofedaki, nau bia toa na kera lae bi nau. 35Asi do ki sui bana abula laku e dodoloa, fasi muki lio sulia, muki thaitoomana e kokoto na muki ulafu una eri, muki rausualia toa na kera feda ki, ma muki onotoona bae lana tha Lord Jesus, na talani nia e sorea, Imole na kai faledo, kai lea iana ka tatha ana imole na kai ṉalia.

36Ma buriana ne ṉata una eri e sui, nia boururu, ka foa bia toa eki sui boo. 37Ma kera sui kera aṉi faamau, keka kalilua atha Polo, keka nonoia, 38Kera liodila ka tatha uria si baea eri ne sorea, ne ai kesi rikia lau maana. Ma keka adomi nia ana lae lana kau uria faka eri.

Currently Selected:

Si do Aposela ki kera ilidaki 20: MLU1949

Highlight

Copy