Si do Aposela ki kera ilidaki 19

1Ma lalae mai, si maṉa eri na tha Apolosi ka to i Korinitha, tha Polo e liufia sui bomai la tolo liu ki, ka fula i Efesasi, ka fulatoona tei toa na tha Jesus e toleda: 2Ma nia soree isada, Mulu ṉalia tha Spirit Abu si maṉa na mulu fitoo? Ma kera soree isana, E ai, roṉo laṉa mena e ai misi roṉoa na tha Spirit Abu e fula. 3Ma nia soree isada, Sui kera babataesi kamulua ana ta? Ma kera sorea, Ana babataesi la tha Jone. 4Ma tha Polo ka sorea, Tha Jone e babataesi ana babataesi la ana manata akele la, ka soree isana toa eki, keki fitoona Wane na toto kai lae mai iburiana, tha Christ Jesus neri. 5Ma si maṉa na kera roṉoa si do eri, keki bii babataesida ana thatana tha Lord Jesus. 6Ma buriana na tha Polo e alua ro aba nia ki fafia toa eki, tha Spirit Abu ka sifo fafida; ma kera ṉata ana ṉata la eeta ki, keka ṉata mala porofeta. 7Ma fuliṉana tee akwala ma ro nonii wane.

8Ma nia kotho i la biu ni ofu la, ma ka ṉata seeraa sulia ulu madami, ka kwaifamanatai ma ka thathamii bulasia ruruuda uria si do sulia tooa tha God ki. 9Ma si maṉa ruruuna tei toa iada ka sadi ma kera fitala, keka ṉata taa uria ṉa Tala inaofana malului wane eri, nia lae faisida, ma ka alu eeta ana toa na tha Jesus e toleda, ka kwaifamanatai sulia boṉi ana biu ni ofu la tee nonii wane thatana tha Tiranasi. 10Ma nia ade una eri sulia ro fa ṉali; adedea toa nai Asia sui boo kera roṉoa bae lana tha Lord Jesus, Ju ki ma toa i Girisi ki lau boo. 11Ma tha God ka ilia ra inoto baita na ta wane si ilidaki i abana tha Polo: 12Adedea kera ṉalia kasi maku faekwa ki mado maku ni ra la ki ne toto ana seena isana toa matai ki, ma mataia eki ka ai faisida, ma spirit taa eki keka lae faisida. 13Ma sui tei Ju na kera liu keketo ana ṉata sukwai la isana spirit taa nai seena imole ki, keki seeraraa fasi keki sorea thatana tha Lord Jesus fafia toa eki na spirit taa ni ani kera, keka una eri, Miki ṉata fifi isamulua atha Jesus, Wane na tha Polo ka ṉata suli nia. 14Ma fiu kaluwane tha Sekefa, tee Ju, ana wane inoto ni foa ki, kera ade una eri. 15Ma spirit taa eri ka luuda, ka sorea, Tha Jesus ku thaitoomana, ma tha Polo ku thaitoomana; ma ni kamulua ni tei? 16Ma wane eri na spirit taa eri ni ani nia ka lofoida, si nia ka tatha iada, ma ka sukwai ka tatha ani kera, adedea keka thaka faisia biu eri, keka talu bada ma keka mala. 17Ma si ade la eri e fula i aliṉana toa nai Efesasi ki sui bana, Ju ki ma toa i Girisi ki lau boo; ma mau la e toe kera sui, ma kera faainotoa thatana tha Lord Jesus. 18Ma toa oro ana toa na kera fitoo sui naa keka lae mai, keka faaroṉo lalaa ana abula taa lada, ma keka fatai nia. 19Ma toa oro ana toa na kilu rara ana sukwaia spirit taa ki kiku ofua buka kilua ki, kiku naarea, toa na fanua keki rikia: ma kera teemai nia malefo na kera usi ana buka eki, ka fula ana lima tafulu tooni malefo ana silifa. 20Si do na kai fatai nia tae la na bae lana ṉa Lord ka tae sukwai ania ma ka sukwai alaa neri.

21Ma buriana na kera ilia si do eki e sui, manatana tha Polo na nia kai tatha totonao i Masedonia ma i Akaia, sui kai tae uri Jerusalema, ma nia una eri, Lalae ku fula i kula eri e sui, e ai si ei boo kwai rikia lau boo Roma. 22Mania e arasia ro wane ana toa na kera ra ifana, tha Timothiasi ma tha Erasitasi, keko lae uria Masedonia, sui ni nia ka makafa to fasi i Asia.

23Ma fuliṉana si maṉa eri ṉataṉata baita e tae mai fafia ṉa Tala. 24Uria tee nonii wane, thatana tha Demetiriasi, wane ni ra la ana silifa, ne thauwai nia kali biu faekwa ki ana silifa fani Diana, e falea si ra oro ifana toa na kera thaitoomana maalutana; 25Me ofua wane eki, ma toa ni ra la na ra kera e ’uria si ra eri, ma ka sorea, Thaa wane ae, mulu thaitoomana inotoa kulu ni ana ra nai. 26Ma mulu rikia ma mulu roṉoa, na talitoona i Efesasi e ai, ana karaṉia fanua i Asia ni sui bana, wane eri tha Polo e bulasia ruruuna toa oro keki akele eeta, uria ne sorea god na kera thauwanidaki ana abee imole na god mamana ki e ai: 27Ma karaṉia sa kera adea talitoona bana na keki fare faekwa ana ra la kulu e ai; keki alaṉia lau boo biu god baita eri ni Diana ana tonee do, ma keki ligisia inotoa baita nia faisia kini eri, na toa na fanua i Asia ma fanua nei iano ni sui bana kera faabaita. 28Ma si maṉa na kera roṉoa si do eri, kera rakeiri faamau, keka ’ai faamau, keka una eri, Ni Diana ana toa i Efesasi e baita. 29Ma kera faaseesula i la toaa susu eri sui boo: ma keka rau atha Gaiasi ma tha Arisitakasi, ro wane i Masedonia ki na kero liliu ofu bia tha Polo, keka fita ana tee si lio uria si kula ana ofu la baita ki. 30Ma si maṉa na manatana tha Polo sa nia kai kotho isana toa eki, toa na tha Jesus e toleda kesi alamatania. 31Ma tei wane ana wane gwauwai i Asia ki, na kera ado bi nia, keka kwaiarasi isana, keka ṉata kwaitakoi sa kai to faisia lae seeraraa la uria si kula eri ana ofu la baita ki. 32Mania tei toa keka ’ai, keka sorea tai si do, ma tei toa lau keka ’ai, keka sorea tai si do eeta lau nana: sulaania ofu la eri e ṉaluṉalu; ma oroṉana toa keka dora asi do na kera ofu mai fafia. 33Ma kera talaia mai tha Alikisada faisia maalutana malului wane eri, uria na Ju ki keki eeri nia uria. Ma tha Alikisada sa kai faabona kera ana abana, uria ne thathamii ṉata isana toa eki, kai talumatania si do eri faisia toa nia ki. 34Ma sui si maṉa na keka thaitoomana nia Ju, kera sui keka ’ai faamau ana tee si ṉata la sulia fuliṉana ro kadee thato, keka una eri, Ni Diana ana toa i Efesasi e baita. 35Ma buriana na wane ni kekeda e faabona toa eki, nia sorea, Kamulua wane i Efesasi ki, ni tei wane ne ai si thaitoomana maalutana toaa susu i Efesasi ne fono toi kakalia biu god baita eri ni Diana, ma nunui do eri ne toto isatha Jupita ma ka asia mai? 36Mania uria na kera dora ania oli susuu la fafia si do eki, e kokoto na muki seeeno, ma musi seeraraa ana ili lana ta si do. 37Sulaania mulu talaia mai wane nai ki, ne ai kesi bilia ta si do ana biu god ki ma kesi ṉata ana faretoliṉi lana kini eri ne god kamulua. 38Mania mada sa tha Demetiriasi, ma wane ni ra la na kera to bi nia ki, manatada ka teo ana ta si do uria ta wane, si kula ana kotu e laa bana si maṉa eri, ma ro wane inoto ba ki kekoi to: keki alaṉi kera kwailiu asi do eki. 39Ma mada sa muki rofea ta si do sulia tei si do eeta ki lau, keki alu kokoto ania i la ofu la na kera alamatania. 40Uria e mamana karaṉia sa keki alaṉi kulu ana ṉalu la na kulu ṉaluṉalu ania ibare, uria na kulu tonee ilia: ma sulia si kula eri e ai kusi thaitoomana faaroṉo la ana maalutana ofu la eri. 41Ma buriana ne ṉata una eri e sui, nia sorea ofu la eri kai sui.

Currently Selected:

Si do Aposela ki kera ilidaki 19: MLU1949

Highlight

Copy