Rò̌mǎphû̌ 3
3
Cǒmara ma̤pwǐ a hî̌nu pṳ̂̌꤮ taplǎ
1Dè hî̌ hǐnudě, htû Yṳ̌daphû̌ tapwa̤nu abwǐsîrî ǒhî̌tè? Yṳ̌daphû̌ a ta̤dǔtṳphě htǒonumî̌ abwǐsîrî ǒtacǎcǎ ya? 2Htû Yṳ̌daphû̌ tapwa̤ numî̌ abwǐsîrî ǒplṳ̂ mè̤mè̤̌. Ta̤htě abwǐasîrî ǒkhlo tacǎ numî̌ mî̌pwǎ Cǒmara yṳǎ pa Yṳ̌daphû̌ toǒ akhû̌akhî, a pwe̤ǐlṳ bǎ pa ta̤hî̌bǎ htě a sò̌yṳ pwe̤ǐ bǎ kònu toǒ hǒ.
3Yṳ̌daphû̌ toǒǒ dè cǒtè̤pe ata̤hî̌bǎ ta Cǒmara tò̤ hî̌dě, Cǒmara a ta̤olò̤ toǒ phèbòkè pě ya? 4A phèkè nǒ dî̌kî̌꤮ tò̤. Kòyòhǎkhû̌phû̌ lǒ̤꤮ bò htûbò kòyò lòhǎlòho bǎbǎ, Cǒmara cǒtè̤ sadape ta ayo̤ pwǎ. Lî̤cahtǐkû hî̌,
“Kòyòhǎkhû̌phû̌ glè hî̌ na ta na hî̌bǎ bò̌khòtè꤮ bǎbǎ atoabǎbò pwǎ, kò kè̌lǎnè̌ na ta̤sǔ htě na ma̤ta̤totò̤ bò̌khòtè꤮ bǎbǎnu, kò lò̤jûkèpwǎ na gûla̤.”#Ta̤htû̌sò̌ǐ 51:4
5Pwǎ̤tadě pa Yṳ̌daphû̌ a ta̤cǒta̤tè̤ tò̤ toǒnu a dè dǔlṳ lîphlo Cǒmara a ta̤cǒta̤tè̤ dèhî̌dě pa glè hî̌ yǎ hî̌tè? Cǒmara sò̌phlǒdû̌ dě a cèrò pahtǒo numî̌ asǔ pwǎ, pa glè hî̌ hǐnu ya? (He hî̌bǎpwǎ pwǐ kòyòhǎkhû̌phû̌ la̤klo hî̌nu.) 6Dè hî̌hǐnumî̌ a totò̤. Cǒmara ma̤ta̤htǒo a dè totò̤ hî̌dě a cèròto cèròbǎjò kòyòhǎkhû̌phû̌ hî̌tè pě? 7Kòyò toǒǒ gègoshǔ ta, “He ma̤ ta̤cǒta̤tè̤ tò̤ toǒnu, aglè dǔlṳhtò̌ Cǒmara a ta̤te̤ta̤mǎ, htohǒtò̤ a ma̤ dû̌htò̌po̤ Cǒmara a sîrîdû̌sîrîhtû dèhî̌dě, mî̌ma̤tè̤dě a cû̌ cèròtǒ̤ ta̤ma̤sǔphû̌, pwǐ hehè̌o ma̤tè?” 8Asî hî̌hè̌o a dè to hî̌dě, pa lo̤bǎhî̌dǒ ta, “Ma̤pûhǐ kò htû̌sò̌ǐ Cǒmara ta a ma̤ta̤nu a topwǎ ayanu, tûrû̌ ma̤ lǒkho ta̤sǔnu,” lo̤bǎhî̌dǒpwǎ pwǐhè̌o kò̌. Kòyò htě a hî̌ hǐnu toǒmî̌ Cǒmara cèrò nû̌ûnu a topwǎ. Pwǎ̤tadě kòyò toǒǒnu a dǒbò heyo̤ ta he sû̌ǐ kò hǐnu. Pwǎ̤ta he sû̌ǐ kò hǐnu mè̤tò̤.
Kòyòhǎkhû̌phû̌ cǒtè̤ dǐpwǎ̤꤮ tò̤
9Hǐnudě, pa glè hî̌ hî̌tè? Pa Yṳ̌daphû̌ toǒ mî̌ pa wǒkhlo ta Yṳ̌daphû̌ mè̤tò̤ toǒ ya? Pa wǒkhlo nǒ dî̌kî̌꤮ tò̤. Pa dǔlṳhto ta Yṳ̌daphû̌ bǎbǎ, Yṳ̌daphû̌ mè̤tò̤ bǎbǎ asî ǒbò pwǎ dě ta̤sǔta̤plě a ta̤shû̌ta̤sho akla pwǎ. 10Lî̤cahtǐkû hî̌,
“Kòyòcǒkòyòtè̤ ǒ dǐpwǎ̤꤮ tò̤.#Ta̤htû̌sò̌ǐ 14:1-3, 53:1-3 11Kòyò htě a ǒ ta ta̤sî̌ta̤jò toǒ bǎbǎ, kòyò htě a kè̌lǎ Cǒmara toǒ bǎbǎ, a ǒ dǐpwǎ̤꤮ tò̤. 12Kòyò pṳ̂̌꤮ tapwa̤ cû̌ tephekèbò ta Cǒmara. Asî htûbò kòyò nòdû̌ pṳ̂̌꤮ tapwa̤ hǒ. Kòyò htě a ma̤ ta̤wǒnu a ǒpe dǐpwǎ̤꤮ tò̤, toǒtapwa̤ pwǎnu, a ǒ tò̤.#Ta̤htû̌sò̌ǐ 14:1-3, 53:1-3 13Asî ta̤hî̌bǎ toǒnu, a wi̤japhǎkò lò̤kèta na ma̤mo lṳkû dě a nṳso htò̌lṳnu hǒ. Asî cû̌ lǒǎplò̤ǎ kò ta a ta̤hî̌bǎhî̌sho toǒ.#Ta̤htû̌sò̌ǐ 5:9 Asǒsǒta wṳ̂sa pè̌ kò dě awè̤nu, asî ma̤pî̌ma̤lṳ̂bò kò ta a ta̤hî̌bǎ toǒ.#Ta̤htû̌sò̌ǐ 140:3 14Asî ta̤hî̌bǎhî̌sho toǒnu, a lǒbe ta ta̤ǐshoǐbě. Asî hî̌bǎ còcè̌ ta̤hî̌bǎ htě cè̌klè gana̤de yǎnu toǒ.#Ta̤htû̌sò̌ǐ 10:7 15Ma̤si kòyò hò꤮ dèhî̌dě asî cû̌ tṳplṳtî̤wî̤.#Isaǐa 59:7-8 16Asî cû̌ bǎtè꤮ tò̤glò bǎbǎ, a cû̌ ma̤pî̌ma̤lṳ̂kè kò, a cû̌ma̤ sǎpla̤sǎyṳ kò. 17To ǒhtûpwa̤ mo̤kla ma̤pè̤ma̤dû kû̌ta kò hî̌tènu, asî sî̌ya kû̌kò tò̤.#Isaǐa 59:7-8 18Tobǎ ǐsha Cǒmaranu asî gènè̤ to̤kû̌kò dǐcǎ꤮ tò̤.”#Ta̤htû̌sò̌ǐ 36:1
19Pa sî̌ya ta bò ta̤sû̌ta̤tòwò pwe̤ǐ toǒnu, a hî̌ bǎ kòyò htě a nî̤bǎ ta̤sû̌ta̤tòwònu toǒ ayapwǎ. Ma̤pûhǐ pa hî̌bǎ lû̌htò̌jòpe pû pana̤ ta pa ma̤ ta̤sǔ akhû̌akhîhtǒo tò̤ nudě, Cǒmara ǐlò̤ bǎ pa ta̤sû̌ta̤tòwò htǒonu pwǎ. Htohǒtò̤ ma̤pûhǐ Cǒmara cèrò bò꤮ kòyò ǒ dě hǎkhû̌bǎotebě pṳ̂̌꤮ tapwa̤ pě nudě, a ǐlò̤ pwǎ. 20Ma̤tè̤hî̌dě, kò ǒhtûpwa̤ gûma̤kû̌ ta̤sû̌ta̤tòwò akhû̌akhî, kò htûhtò̌jò kòyòcǒkòyòtè̤ dě Cǒmara a lo̤mo̤nu a ǒ dǐpwǎ̤꤮ tò̤. Ma̤pûhǐ pa sî̌ya hè pa ta̤sǔ dě Cǒmara ǐlò̤pwǎ pa.#Ta̤htû̌sò̌ǐ 143:2; Galatǐaphû̌ 2:16
Cǒmara ma̤cǒma̤tè̤ kòyò toǒ ta asî ata̤yṳta̤nǎ akò
21Pwǎ̤tadě khònò̤htǒo, ma̤pûhǐ kòyòhǎkhû̌phû̌ htûhtò̌ kòyòcǒkòyòtè̤ dě Cǒmara a lo̤mo̤nu, a ma̤ khǒtû̌ klè̌ ahǔwa̤ tabo ta ana̤. Cǒmara aklè̌htǒo numî̌ pa jûle̤phî̌yo̤ ta̤sû̌ta̤tòwò akhû̌akhînu mè̤tò̤. Mǒ̤jè ta pwa̤po̤ toǒ khwè̌nǎhto bǎ꤮ lî̤cahtǐkû dě꤮ wǐnukha pe. 22Kòyò htě a yṳǎ ta Ye̤shǔkhrî̌stu ma̤hto bǎ nû̌ûya toǒnu, Cǒmara bè̌ nû̌û pwǐ kòyòcǒkòyòtè̤nu hǒ. Htǒomî̌ klè̌ htě Cǒmara ma̤ bǎ kòyò lǒ̤꤮ bò htě a yṳǎ Ye̤shǔkhrî̌stunu toǒ aya hǒ. Dě Cǒmara a lo̤mo̤nu akhǒ nǒ nû̌û dǐpwǎ̤꤮ tò̤.#Galatǐaphû̌ 2:16 23Ma̤tè̤hî̌dě kòyò pṳ̂̌꤮ tapwa̤ ma̤ ta̤sǔta̤plě. A lṳhtò̌bò̌to̤ Cǒmara bè̌mě a sîrîdû̌sîrîhtû htǒonu dǐpwǎ̤꤮ tò̤. 24Cǒmara gwèbǎǐ pa akhû̌akhî, a bè̌cǒbè̌tè̤ kopwǎ pa. Dě Ye̤shǔkhrî̌stu wû̌lǎ pa akhû̌akhî, pacǒpatè̤ pwǎ. 25Ma̤tè̤hî̌dě Cǒmara dǔlṳ lîphlo ta Khrî̌stu hèlò̤ phî̌kè bǎ pa ta̤sǔta̤plě htě Cǒmara glèbǎ cèrò pahtǒonu hǒ. Dě pa yṳǎ Ye̤shǔkhrî̌stu khòsi asò̌ nò̌dòhtǔlo̤ dě asǐlò̤ ta paya akhû̌akhî, Cǒmara bè̌cǒbè̌tè̤ pa. Ma̤pûhǐ Cǒmara ǐ htò̌lṳ ta a ma̤cǒma̤tè̤ ta̤ ayanu, a nohè Ye̤shǔkhrî̌stu hǒ. Dě nukha mî̌, a khòsò̌do bǎ hǎkhû̌phû̌ toǒ a ta̤sǔ. A kè̌ tûlû̌kè asî ma̤ ta̤sǔnu toǒ dě a cèrò asî tò̤. 26Pwǎ̤tadě khònò̤htǒo a dǔlṳ ta a ma̤ ta̤htǒo atopwǎ ayanu, a nohè Ye̤shǔ ta a hè khòsi kò pṳ̂̌꤮ tapwa̤ aya. Hǐnu akhû̌akhî, Cǒmara sana̤nu a dǔlṳ ta a ma̤cǒma̤tè̤ pwǎ, dě a bè̌cǒbè̌tè̤ kòyò htě a yṳǎ Ye̤shǔnu toǒ ta ana̤.
27Dèhî̌hǐnudě, pa la̤phî̌htò̌yî̤ pana̤nu aǒ dǐcǎ꤮ tò̤. Ma̤tè̤hî̌dě Cǒmara bè̌cǒbè̌tè̤ kòyòhǎkhû̌phû̌ ta a gana̤de jûle̤phî̌yo̤ ta̤sû̌ta̤tòwò khû̌khînu mè̤tò̤. Mî̌tanu, kòyòhǎkhû̌phû̌ yṳǎ Khrî̌stu si ta asîya akhû̌akhî, Cǒmara bè̌cǒbè̌tè̤pwǎ asî. 28Ma̤tè̤hî̌dě kòyòhǎkhû̌phû̌ gûma̤kû̌ ta̤sû̌ta̤tòwò akò dě Cǒmara bè̌cǒbè̌tè̤ asî hǐnu mè̤tò̤. Asî yṳǎna̤ǎta̤ khû̌khî, a bè̌cǒbè̌tè̤pwǎ nû̌û. 29Cǒmara numî̌ Yṳ̌daphû̌ a Cǒmara tû̌pwǎ ya? Mî̌ Yṳ̌daphû̌ mè̤tò̤ toǒ a Cǒmara mè̤dǒ tò̤ ya? Cǒmara htǒonumî̌ Yṳ̌daphû̌ mè̤tò̤ toǒ aya mî̌ amè̤mè̤. 30Ma̤tè̤hî̌dě Cǒmara ǒpwǎ tapwǎ̤꤮ pa pwǎ. Bǎ Yṳ̌daphû̌ yṳǎ Khrî̌stu akhanu, a bè̌cǒbè̌tè̤ nû̌û pě. Htohǒtò̤, bǎ Yṳ̌daphû̌ mè̤tò̤ toǒ yṳǎdǒ Khrî̌stu akhapěnumî̌꤮, a bè̌cǒbè̌tè̤ dǒ asî pěpě.#Ta̤dǒhtû̌ǐ 6:4; Galatǐaphû̌ 3:20 31Cǒmara dè bè̌cǒbè̌tè̤ pa ta pa ta̤yṳta̤nǎ khû̌khî pwǎ dèhî̌dě ta̤sû̌ta̤tòwò htǒotoǒ numî̌ a phèkèbò kò̌? A phèkè tò̤. Sî hî̌ pû ta a phèkè ma̤, a tǐ̤ ma̤ shû̌htò̌shohtò̌khlope ta̤pǎ̤, ma̤tè̤hî̌dě pa dè yṳǎ Ye̤shǔ hî̌nu pa tǐ̤ gana̤de wǒhè khlopo̤po̤ ta̤sû̌ta̤tòwò.
Currently Selected:
Rò̌mǎphû̌ 3: KRC
Highlight
Copy
Compare
Share
Want to have your highlights saved across all your devices? Sign up or sign in
Wycliffe USA
