ᤛᤣ᤺ᤰᤕᤢᤰᤔᤡᤒᤠᤜᤠ᤹ 14

ᤀᤠᤀᤡᤁᤥᤏᤡᤕᤶᤔᤥ ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴ

1ᤀᤠᤸᤗ ᤀᤣᤴᤋᤡᤀᤥᤰᤁᤥ ᤁᤢᤀᤡᤛᤡᤰ ᤀᤠᤀᤡᤁᤥᤏᤡᤕᤶᤔᤥᤀᤠᤱ ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣᤛᤡᤀᤠᤱ ᤛᤠ᤹ᤖᤡᤰ ᤛᤡᤰᤁᤢᤶ ᤏᤡᤱᤘᤠ᤹ ᤗᤛ᤻ᤛᤢᤖ ᤐᤠᤖᤧᤳᤇᤡᤸᤗᤧ ᤂᤧᤵᤔᤥ ᤕᤖᤡᤰ ᤕᤜᤢᤍᤡᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤛᤢᤏᤠᤀᤡᤱᤅᤡᤴ ᤏᤛᤠᤴ ᤔᤧᤈᤥᤃᤢᤖᤥ॥ 2ᤁᤖ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠ ᤕᤜᤢᤍᤡᤜᤠ᤹ᤖᤧ ᤂᤧᤵᤔᤥᤒᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤔᤧᤜᤢᤛᤢᤛᤡᤀᤠᤱ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤏᤡᤱᤘᤠ᤹ ᤔᤧᤗᤧᤰᤂᤢ ᤔᤧᤒᤡᤖᤢᤛᤡᤖᤥ॥ 3ᤜᤧᤰᤁᤣ᤺ᤸᤗᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤂᤧᤵᤔᤥ ᤕᤖᤡᤰ ᤕᤧᤶ ᤌᤠᤖᤡᤰ ᤘᤕᤧᤳᤇᤡᤸᤗᤧ ᤂᤧᤱᤜᤠ᤹ ᤍᤠᤱᤒᤠᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤱᤃᤡᤀᤣ ᤐᤠᤖᤧᤳᤇᤡᤖᤥ॥ ᤍᤠᤱᤒᤠᤸᤗᤧ ᤂᤧᤱᤜᤠ᤹ ᤔᤡᤰᤛᤣᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠ ᤔᤢᤰᤛᤠᤶ ᤐᤡᤖᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤡᤱᤓᤴ ᤆᤥᤃᤧᤳᤇᤢᤒᤠ ᤁᤢᤗᤢᤱᤃᤢᤶᤔᤡᤴ ᤛᤧᤰᤂᤠᤀᤣ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤋᤢᤛᤡᤖᤥ॥ 4ᤂᤧᤴ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ ᤁᤢᤓᤠ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤗᤧᤵᤔᤠᤱ ᤏᤢ ᤁᤢᤓᤠ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠ ᤕᤜᤢᤍᤡᤜᤠ᤹ ᤗᤧᤵᤔᤠᤱ ᤔᤧᤛᤧᤴᤇᤡᤱᤗᤥ॥ 5ᤂᤧᤵᤔᤥ ᤕᤜᤢᤍᤡᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤜᤧᤰᤁᤩᤠᤱ ᤂᤢᤏᤡ᤹ ᤗᤠᤶᤗᤥᤒᤠᤜᤠ᤹ ᤔᤧᤍᤱᤛᤡᤱᤅᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤐᤥ᤺ᤰᤔᤠᤀᤠᤱ ᤗᤢᤱᤅᤡᤸᤗᤧ ᤗᤧᤵᤔᤠ ᤛᤧᤵᤔᤠᤛᤡ ᤑᤠ᤹ᤀᤠᤱ ᤀᤡᤱᤔᤧᤍᤱᤄᤢᤖᤥ. 6ᤁᤖ ᤁᤴ ᤆᤧᤶᤑᤴᤏᤡᤴ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤀᤠᤱ ᤂᤧᤵᤔᤥᤏᤢ ᤗᤢᤁᤥᤏᤡᤕᤠ ᤌᤢᤶᤔᤥᤒᤠ ᤗᤢᤛ᤻ᤋᤪᤠ ᤏᤢ ᤍᤷᤒᤡ ᤔᤧᤵᤔᤏᤠᤒᤠ ᤕᤧᤰᤕᤰᤜᤠ᤹ ᤏᤢ ᤂᤧᤴ ᤂᤡᤖᤡᤒᤠ ᤋᤧᤴᤏᤥ ᤔᤧᤄᤧᤳᤇᤡᤱ ᤔᤧᤒᤣᤀᤠᤱ 7ᤂᤧᤵᤔᤥᤀᤠᤱ ᤂᤧᤱᤜᤠ᤹ᤖᤧ ᤛᤢᤏᤠᤀᤡᤱᤅᤡᤴ ᤀᤡᤱᤓᤴ ᤔᤧᤈᤥᤃᤢᤖᤥ॥

ᤗᤢᤛ᤻ᤋᤪᤠ ᤏᤢ ᤍᤷᤒᤡᤀᤥ ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴ

8ᤗᤢᤛ᤻ᤋᤪᤠᤀᤥ ᤛᤠᤘᤠ᤺ᤴᤇᤡᤱᤅᤠᤱᤎᤥᤀᤣ ᤗᤠᤱᤄᤣ᤺ᤰᤔᤠ ᤔᤧᤴᤇᤢᤰᤔᤏᤠᤒᤠ ᤗᤠᤱᤛᤰᤐᤠᤎᤡᤰ ᤘᤕᤧᤖᤥ॥ ᤂᤧᤴ ᤀᤠᤵᤑᤠᤸᤗᤧᤀᤠᤱ ᤗᤠᤱᤔᤧᤱᤄᤣ᤺ᤰᤁᤣ ᤘᤕᤧ॥ 9ᤂᤧᤵᤔᤥ ᤂᤧᤸᤗᤧ ᤐᤠᤘᤗᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤏᤢᤖᤡᤰᤁᤠᤱ ᤂᤧᤵᤛᤢᤖ ᤕᤢᤅᤧ॥ ᤐᤠᤘᤗᤖᤧ ᤂᤧᤸᤗᤧ ᤘᤣ᤺ᤵᤔᤠ ᤁᤧᤛᤢᤰᤐᤠ ᤁᤢᤏᤛᤠ᤺ᤴᤏᤡᤴ ᤏᤡᤛᤢᤀᤠᤱ ᤀᤍᤰᤋᤰᤁᤠᤱ ᤀᤥᤔᤧᤳᤋᤢᤖ 10ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤕᤧᤒᤧ᤹᥄” ᤂᤧᤴ ᤔᤏᤠ᤺ᤴᤏᤠᤱ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤗᤠᤱᤄᤣ᤺ᤰᤔᤠ ᤜᤣ᤺ᤰᤋᤧᤖᤥ॥

11ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤐᤠᤘᤗᤖᤧ ᤆᤥᤃᤢᤒᤠ ᤂᤧᤴ ᤕᤠ᤺ᤶᤒᤰᤁᤡᤴ ᤔᤧᤏᤡᤛᤢᤀᤠᤱ ᤂᤧᤱᤜᤠ᤹ᤖᤧ ᤗᤢᤁᤥᤏᤡᤕᤠᤛᤔᤠ ᤐᤠ᤺ᤴᤏᤥ ᤀᤰᤂᤣᤗ᤹ᤖᤡᤰ ᤔᤧᤒᤠ᤺ᤳᤋᤢᤖ ᤔᤧᤀ᤺ᤰᤋᤧ. “ᤔᤠᤱᤜᤠ᤹ ᤔᤏᤠ ᤗᤧᤱᤏᤧᤳᤇᤡᤀᤠᤱ ᤀᤠᤏᤡ᤹ᤀᤥ ᤋᤩᤧᤇᤡᤀᤠᤱ ᤘᤠ᤹ᤛᤡᤖᤥ॥” 12ᤂᤧᤱᤜᤠ᤹ᤖᤧ ᤒᤖᤏᤠᤒᤠᤛᤧᤴ ᤈᤡᤀᤢᤛ ᤏᤢ ᤐᤠᤘᤗᤧᤴ ᤜᤷᤔᤣᤛ ᤔᤧᤔᤧᤳᤋᤢᤛᤡ. ᤌᤣᤀᤠᤱᤓᤧᤸᤗᤧ ᤐᤠᤘᤗᤧᤴ ᤁᤧᤒᤠ᤺ᤵᤐᤠ ᤆᤥᤃᤧᤖᤥ॥ (ᤃᤪᤡᤁᤣᤗᤡᤜᤠ᤹ᤖᤧᤴ ᤈᤡᤀᤢᤛ ᤔᤧᤵᤔᤏᤠᤒᤠᤴ ᤋᤢᤶ ᤔᤠᤱ ᤏᤢ ᤜᤷᤔᤣᤛ ᤔᤧᤵᤔᤏᤠᤒᤠᤴ ᤀᤡᤱᤃᤧᤛᤠᤒᤠ ᤔᤠᤱ ᤘᤕᤧᤖᤥ॥) 13ᤕᤧᤰᤕᤰᤁᤡᤸᤗᤧ ᤁᤢᤒᤣᤛᤠᤱ ᤈᤡᤀᤢᤛ ᤔᤠᤱᤅᤡᤸᤗᤧᤴ ᤔᤠᤱᤜᤡᤶ ᤏᤧᤛ᤻ᤛᤧ॥ ᤈᤡᤀᤢᤛ ᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤐᤡᤳᤜᤠ᤹ ᤏᤢ ᤑᤢᤱᤜᤠ᤹ ᤋᤠ᤺ᤵᤔᤠ ᤐᤠᤱᤄᤢᤛᤡᤀᤠᤱ ᤕᤧᤰᤕᤰᤁᤡᤸᤗᤧᤴ ᤐᤕᤶ ᤗᤠᤶᤎᤣ᤺ᤵᤐᤥ ᤋᤩᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤏᤢ ᤔᤏᤠᤜᤠ᤹ᤖᤧ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤔᤧᤘᤕᤧᤖᤥ॥

14ᤒᤖᤏᤠᤒᤠᤛ ᤏᤢ ᤐᤠᤘᤗᤖᤧ ᤂᤧᤴ ᤂᤧᤵᤛᤧᤳᤇᤢᤀᤠᤱ ᤔᤠᤱ ᤆᤧ᤹ᤕᤠᤐᤠᤴ ᤐᤥᤱᤔᤠ ᤀᤡ᤺ᤳᤋᤧ ᤑᤠ᤹ᤀᤠᤱ ᤏᤧᤵᤔᤠᤱᤗᤧ ᤂᤢᤴᤇᤡ᤹ ᤋᤣ᤺ᤳᤋᤡᤴ ᤌᤧ᤺ᤰᤂᤧᤳᤇᤢ#᥇᥊:᥇᥊ ᤂᤢᤴᤇᤡ᤹ ᤋᤣ᤺ᤳᤋᤡᤴ ᤌᤧ᤺ᤰᤂᤧᤳᤇᤢ—ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤧᤘᤠ ᤔᤧᤔᤧᤳᤋᤢᤛᤡᤒᤠᤀᤥ ᤂᤢᤴᤇᤡ᤹ ᤛᤡᤰᤂᤧᤅᤧᤒᤠ ᤏᤡᤍᤧᤳᤗᤥ॥ ᤜᤧᤰᤁᤩᤠᤱ ᤔᤏᤠᤗᤢᤶᤔᤥ ᤗᤥ᤺ᤰᤋᤧᤳᤇᤡᤖ ᤀᤰᤂᤣᤗ᤹ᤖᤡᤰ ᤀ᤺ᤰᤋᤧᤳᤇᤡ. 15“ᤀᤠᤍᤠᤱᤒᤠᤛᤣ. ᤁᤴ ᤌᤣ ᤆᤥ᤺ᤰᤔᤠ ᤁᤧᤀᤡ᤺ᤳᤋᤢᤶᤒᤠᤒᤣ᥅ ᤀᤠᤴᤇᤡᤃᤣᤃ ᤒᤠ ᤂᤡᤏᤡ᤹ ᤜᤧᤰᤁᤣ ᤔᤧᤴᤇᤠᤶᤃᤧᤴ ᤕᤠᤵᤔᤡᤛᤡᤃᤧᤖᤥ᥄ ᤂᤡᤏᤡ᤹ ᤁᤴ ᤜᤏᤧᤒᤠ ᤏᤠᤘᤠᤀᤡᤳᤗᤠᤴ ᤛᤧᤘᤠ ᤆᤥ᤺ᤰᤔᤠ ᤗᤧᤖᤧᤶᤔᤧ᤹ᤀᤠᤱ ᤋᤠᤱᤛᤠᤰᤐᤧᤴ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ. ᤘᤠᤜᤱᤜᤠ᤹ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤏᤧᤒᤠ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤥ ᤏᤢ᤺ᤰᤂᤧᤶᤔᤧ᤹ ᤑᤠ᤹ᤀᤠᤱ ᤛᤢᤏᤠᤀᤡᤱ ᤀᤡᤱᤓᤴ ᤆᤥ᤺ᤰᤛᤧ ᤀᤠᤴᤇᤡᤃᤣ ᤁᤵᤔᤥ ᤋᤩᤧᤳᤇᤡᤃᤧᤒᤠᤖᤥ॥ 16ᤁᤴ ᤐᤣᤒᤠ ᤕᤧᤶᤔᤥᤃ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤀᤠᤒᤠᤅᤣ ᤛᤠᤰᤌᤡᤶ ᤁᤢᤀᤡᤛᤡᤰ ᤂᤢᤏᤡ᤹ ᤔᤠᤱᤜᤠ᤹ ᤛᤧᤘᤠ ᤆᤥ᤺ᤰᤛᤧ ᤗᤧᤖᤢᤍᤣᤛᤢᤛᤡ. 17ᤁᤖ ᤀᤠᤸᤗᤥᤃ ᤂᤢᤏᤧ᤹ᤃ ᤀᤠᤒᤠᤅᤣ ᤋᤥ᤺ᤴᤍᤡ ᤔᤧ᤺ᤴᤏᤣᤃ ᤜᤥᤵᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤐᤠᤱᤃᤧᤴᤍᤡᤱ ᤘᤠᤜᤡᤳ ᤌᤠᤛᤢ ᤁᤧᤒᤡᤖᤡᤀᤠᤱ ᤆᤠᤔᤠ ᤌᤢᤱᤔᤠᤖᤧ ᤂᤡᤏᤡ᤹ ᤏᤡᤱᤘᤠ᤹ ᤁᤧᤍᤠᤛᤡ ᤁᤧᤒᤡᤖᤡᤀᤠᤱ ᤛᤡᤰᤛᤶᤔᤠᤸᤗᤧ ᤁᤢᤎᤡᤶ ᤁᤧᤈᤥᤃᤡᤀᤠᤱ ᤁᤧᤘᤕᤡᤖᤥ॥” 18ᤁᤴ ᤐᤠ᤺ᤴᤜᤠ᤹ ᤐᤠ᤺ᤳᤋᤧᤳᤇᤢᤖ ᤐᤠᤘᤗ ᤏᤢ ᤒᤷᤏᤠᤒᤠᤛᤖᤧ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤔᤧᤀᤡ᤺ᤳᤋᤢᤒᤠᤴ ᤐᤸᤗᤡᤔᤠᤸᤗᤧ ᤛᤠᤰᤔᤠ ᤛᤢᤰᤋᤧᤳᤇᤢᤖᤥ॥

19ᤜᤧᤰᤁᤩᤠᤱ ᤁᤢᤓᤠ ᤕᤜᤢᤍᤡᤜᤠ᤹ ᤀᤣᤴᤋᤡᤀᤥᤁ ᤏᤢ ᤀᤠᤀᤡᤁᤥᤏᤡᤕᤶᤗᤠᤶ ᤔᤧᤍᤩᤧᤀᤠᤱ ᤂᤧᤱᤜᤠ᤹ᤖᤧ ᤔᤏᤠᤜᤠ᤹ ᤔᤧᤜᤢᤛᤢᤛᤡᤀᤠᤱ ᤂᤢᤏᤡ᤹ ᤗᤧᤵᤔᤠᤱ ᤔᤧᤈᤥᤃᤢᤛᤡᤀᤠᤱ ᤐᤠᤘᤗᤧᤴ ᤗᤢᤱᤅᤡᤸᤗᤧ ᤔᤧᤗᤧᤵᤋᤢ. ᤜᤧᤰᤁᤩᤠᤱ ᤐᤠᤱᤈᤢᤶ ᤗᤠ᤺ᤰᤁᤠᤳ ᤔᤧᤀᤢ᤺ᤰᤂᤢ ᤔᤧᤍᤣ᤹ᤖᤢᤀᤠᤱ ᤂᤢᤏᤧ᤹ ᤛᤩᤧ ᤑᤠ᤹ᤀᤠᤱ ᤗᤠᤵᤔᤧᤓᤢᤛᤢ॥ 20ᤁᤖ ᤏᤛᤠᤏᤡᤒᤠᤜᤠ᤹ ᤔᤧᤈᤢᤵᤛᤧᤀᤠᤱ ᤁᤢᤄᤡᤖᤡ ᤔᤧᤕᤧᤶᤛᤡᤱᤅᤠᤱ ᤔᤧᤕᤧᤒᤧᤸᤗᤧ ᤂᤧᤴ ᤕᤧᤶᤔᤥ ᤏᤡᤱᤘᤠ᤹ ᤔᤕᤧᤖ ᤐᤠᤘᤗᤧᤴ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤕᤠᤱᤏᤠ ᤕᤧᤰᤕᤰᤁᤥ ᤐᤣᤖᤥ॥ ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰ ᤒᤖᤏᤠᤒᤠᤛᤧᤴᤏᤢ ᤍᤷᤒᤡᤀᤥ ᤐᤣᤛᤧᤳᤇᤡᤖᤥ॥

ᤛᤡᤖᤡᤕᤠᤒᤠ ᤀᤣᤴᤋᤡᤀᤥᤰᤁᤥ ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴ

21ᤐᤠᤘᤗ ᤏᤢ ᤒᤷᤏᤠᤒᤠᤛᤖᤧ ᤍᤷᤒᤡᤀᤥ ᤛᤢᤏᤠᤀᤡᤱ ᤀᤡᤱᤓᤴ ᤆᤥᤃᤧᤳᤇᤢᤀᤠᤱ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ ᤜᤢ᤹ᤛᤠᤶᤒᤠ ᤔᤧᤒᤥ᤺ᤰᤂᤧᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤢᤛ᤻ᤋᤪᤠ. ᤀᤠᤀᤡᤁᤥᤏᤡᤕᤔ ᤏᤢ ᤀᤣᤴᤋᤡᤀᤥᤰᤁᤥ ᤏᤢ᤺ᤰᤂᤧᤳᤇᤡᤀᤠᤱ 22ᤂᤧᤵᤔᤥ ᤂᤧᤱᤜᤠ᤹ᤖᤧ ᤜᤢ᤹ᤛᤠᤶᤒᤠᤜᤠ᤹ ᤏᤛᤠ᤺ᤴᤏᤥ ᤆᤰᤔᤧᤸᤗ᤹ᤀᤣ ᤘᤕᤧᤶᤔᤧ᤹ ᤔᤧᤳᤋᤧᤇᤢᤛᤡᤖ ᤜᤠᤱᤜᤠᤱ ᤆᤥᤃᤧᤳᤇᤢᤛᤡ. ᤜᤧᤰᤁᤩᤠᤱ ᤕᤖᤡᤰ ᤀᤡᤏᤥᤃᤧᤴ ᤋᤢᤰᤂᤣ ᤁᤧᤍᤢᤔᤢᤶᤛᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠᤀᤣ ᤐᤥᤱᤗᤥ ᤑᤠ᤹ᤀᤠᤱ ᤀᤠ᤺ᤴᤇᤡᤱᤔᤠ ᤐᤡᤖᤧᤳᤇᤢᤛᤡᤖᤥ॥ 23ᤜᤧᤰᤁᤩᤠᤱ ᤐᤠᤘᤗ ᤏᤢ ᤒᤷᤏᤠᤒᤠᤛᤖᤧ ᤂᤧᤴ ᤛᤣᤛᤣᤜᤢᤵᤗᤰᤜᤠ᤹ᤀᤥ ᤋᤢᤶᤗᤠᤶᤗᤥᤒᤠᤜᤠ᤹ ᤛᤣ᤺ᤰᤕᤢᤰ ᤆᤥᤃᤧᤳᤇᤢᤀᤠᤱ ᤋᤢᤘᤠ ᤏᤢ ᤆᤠᤏᤧᤳᤋᤥ ᤔᤧᤕᤢᤅᤧᤀᤠᤱ ᤂᤧᤱᤜᤠ᤹ᤖᤧ ᤏᤛᤠᤴ ᤔᤧᤈᤥᤃᤢᤒᤠ ᤍᤠᤱᤒᤠᤸᤗᤧ ᤁᤢᤃᤶᤒᤪᤠᤱᤅᤥ ᤂᤧᤱᤜᤠ᤹ ᤕᤢᤰᤂᤧᤳᤇᤢᤛᤡᤖᤥ॥ 24ᤕᤠᤱᤛᤡ ᤂᤧᤱᤜᤠ᤹ ᤐᤡᤛᤡᤍᤡᤕᤠ ᤌᤢᤶᤔᤥ ᤐᤥ᤺ᤰᤂᤧᤳᤇᤡᤖ ᤐᤠᤶᤑᤡᤗᤡᤕᤠ ᤌᤢᤶᤔᤥ ᤌᤩᤧᤛᤡ॥ 25ᤂᤧᤱᤜᤠ᤹ᤖᤧ ᤕᤠᤶᤔᤥ ᤐᤷᤃᤠᤀᤥ ᤀᤡᤱᤓᤴ ᤆᤥᤃᤧᤳᤇᤢ. ᤜᤧᤰᤁᤩᤠᤱ ᤀᤋᤠᤗᤡᤕᤠ ᤕᤧᤰᤕᤰᤁᤥ ᤐᤣᤛᤡᤖᤥ॥

26ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤂᤧᤱᤜᤠ᤹ᤖᤧ ᤛᤡᤖᤡᤕᤠᤛᤔᤠ ᤀᤣᤴᤋᤡᤀᤥᤰᤁᤥ ᤕᤠᤱᤏᤠ ᤘᤠᤗᤠᤶᤍᤡᤰ ᤆᤥᤃᤧᤳᤇᤢᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤥ ᤂᤢᤴᤇᤡ᤹ ᤜᤣ᤺ᤰᤋᤧᤳᤇᤢᤒᤠ ᤔᤠᤱᤛᤧᤘᤠ ᤕᤠ᤺ᤶᤒᤰᤁᤡᤴ ᤀᤠᤸᤗᤥ ᤂᤧᤵᤔᤥᤀᤣ ᤆᤥ᤺ᤰᤔᤠ ᤛᤢᤖᤧᤳᤇᤢᤖᤥ॥ 27ᤂᤧᤱᤜᤠ᤹ ᤀᤣᤴᤋᤡᤀᤥᤰᤁᤥ ᤁᤧᤖᤧᤳᤇᤡᤀᤠᤱ ᤂᤧᤵᤔᤥᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤏᤛᤠᤏᤡᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤴᤇᤡ᤹ᤗᤠᤶ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧᤀᤠᤱ ᤛᤧᤴᤗᤵ ᤂᤥᤔᤠ ᤔᤧᤛᤢᤰᤋᤢᤖ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤶᤎᤣ᤺ᤵᤐᤧᤴ ᤜᤴᤍᤢᤒᤠ ᤐᤠ᤺ᤴᤏᤡᤴ ᤆᤧᤰᤂᤧᤳᤇᤢᤖᤥ॥ 28ᤜᤧᤰᤁᤩᤠᤱ ᤂᤧᤵᤔᤥ ᤏᤛᤠᤏᤡᤒᤠᤜᤠ᤹ᤏᤢ ᤕᤖᤡᤰ ᤕᤧᤶ ᤌᤠᤖᤡᤰ ᤘᤕᤧᤳᤇᤡᤖᤥ॥

Currently Selected:

ᤛᤣ᤺ᤰᤕᤢᤰᤔᤡᤒᤠᤜᤠ᤹ 14: LIFOTNT

Highlight

Copy