ᤛᤣ᤺ᤰᤕᤢᤰᤔᤡᤒᤠᤜᤠ᤹ 13

1ᤀᤣᤴᤋᤡᤀᤥᤁᤛᤔᤠ ᤛᤣᤛᤣᤜᤢᤵᤗᤰᤁᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤛᤡᤰᤛᤠᤶᤒᤠᤜᤠ᤹ ᤔᤧᤘᤕᤧ—ᤒᤖᤏᤠᤒᤠᤛ. ᤔᤠᤰᤗᤠ ᤔᤧᤵᤔᤏᤠᤒᤠ ᤛᤡᤔᤡᤕᤥᤏ. ᤛᤠᤀᤡᤖᤣᤏᤡᤗᤠᤶ ᤁᤧᤍᤠᤒᤠ ᤗᤢᤛᤡᤕᤛ. ᤛᤢᤜᤠᤱᤃᤧᤶᤒᤠ ᤜᤧᤖᤥᤍᤧᤴᤏᤢ ᤁᤧᤒᤥᤒᤠ ᤔᤠᤏᤧᤏ ᤜᤧᤰᤁᤩᤠᤱ ᤛᤠᤘᤗ ᤘᤕᤧᤖᤥ॥ 2ᤌᤡᤰᤕᤧᤴ ᤂᤧᤱᤜᤠ᤹ᤖᤧ ᤆᤠᤏᤧᤳᤋᤥ ᤔᤧᤕᤢᤅᤧᤖ ᤍᤠᤱᤒᤠᤸᤗᤧᤴ ᤛᤧᤘᤠ ᤔᤧᤈᤥᤃᤢᤖ ᤔᤧᤘᤕᤧᤸᤗᤧ ᤛᤣᤛᤣᤔᤠᤱᤅᤡᤴ ᤂᤧᤱᤜᤠ᤹ᤀᤥ ᤀᤰᤂᤣᤗ᤹ᤖᤡᤰ ᤐᤠᤖᤧ. “ᤒᤖᤏᤠᤒᤠᤛ ᤏᤢ ᤛᤠᤘᤗᤧᤴ ᤀᤡᤱᤃᤠ᤹ ᤀᤠᤗᤠᤃᤡ ᤛᤧᤴᤍᤧᤶᤛᤡᤶᤔᤧ᤹ᤀᤥ. ᤂᤧᤱᤜᤠ᤹ᤃ ᤀᤡᤱᤃᤠ᤹ ᤀᤠᤕᤠ᤺ᤶᤒᤰ ᤆᤥ᤺ᤰᤛᤧ ᤀᤢ᤺ᤳᤋᤢᤱᤛᤡᤱᤅᤠᤱ ᤘᤠ᤹ᤛᤡᤖᤥ॥” 3ᤜᤧᤰᤁᤣ᤺ᤸᤗᤧ ᤕᤠᤶᤔᤥ ᤂᤧᤱᤜᤠ᤹ᤖᤧ ᤆᤠᤏᤧᤳᤋᤥ ᤔᤧᤕᤢᤅᤧᤀᤠᤱ ᤋᤢᤘᤠ ᤔᤧᤈᤥᤃᤢ. ᤜᤧᤰᤁᤩᤠᤱ ᤂᤢᤏᤡ᤹ ᤜᤢᤰᤜᤠ᤹ ᤒᤖᤏᤠᤒᤠᤛ ᤏᤢ ᤐᤠᤘᤗᤖᤧ ᤂᤢᤴᤇᤡ᤹ ᤛᤶᤍᤠᤱ ᤔᤧᤏᤧᤛ᤻ᤛᤢᤀᤠᤱ ᤋᤢᤘᤠ ᤔᤧᤈᤥᤃᤢ ᤜᤧᤰᤁᤩᤠᤱ ᤔᤧᤒᤠᤱᤄᤢ ᤔᤧᤍᤣᤛᤢᤛᤡᤖᤥ॥

ᤐᤠᤘᤗᤖᤧ ᤌᤡᤰᤛᤡᤃᤣ᤺ᤰᤛᤔᤠ ᤔᤠᤱᤛᤧᤘᤠ ᤁᤢᤗᤠᤶᤍᤡᤁ

4ᤒᤖᤏᤠᤒᤠᤛ ᤏᤢ ᤛᤠᤘᤗᤧᤴ ᤛᤣᤛᤣᤔᤠᤱᤅᤡᤸᤗᤧ ᤐᤠᤱᤄᤢᤛᤡᤀᤠᤱ ᤛᤡᤗᤢᤁᤡᤕᤠ ᤕᤧᤰᤕᤰᤁᤥ ᤐᤣᤛᤡ॥ ᤂᤧᤵᤔᤥᤏᤢ ᤘᤠᤗᤠᤎᤠᤗᤠᤶ ᤛᤤᤐᤪᤛ ᤘᤠᤃᤵᤗᤠᤈᤣ᤹ᤀᤥ ᤐᤣᤛᤡᤖᤥ॥ 5ᤜᤧᤰᤁᤩᤠᤱ ᤛᤠᤗᤠᤔᤡᤛ ᤐᤠᤱᤈᤢᤶᤔᤥ ᤁᤧᤖᤧᤳᤇᤡᤀᤠᤱ ᤂᤧᤵᤔᤥ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤜᤠ᤹ᤀᤥ ᤀᤡᤱᤓᤴ ᤆᤥᤃᤧᤛᤢᤖᤥ॥ ᤂᤧᤱᤜᤠ᤹ᤏᤢ ᤁᤢᤓᤠ᤹ ᤁᤧᤒᤡᤒᤠ ᤕᤢᤜᤢᤴᤏᤠ ᤔᤷᤁᤢᤛᤧᤴᤏᤠᤱ ᤘᤕᤧᤖᤥ॥

6ᤂᤧᤱᤜᤠ᤹ ᤐᤠᤑᤥᤛ ᤕᤧᤰᤕᤰᤁᤥ ᤔᤧᤱᤃᤧᤳᤋᤣ ᤌᤠᤖᤡᤰ ᤘᤠᤃᤵᤗᤠᤈᤣ᤹ ᤂᤠᤖᤠᤰ ᤗᤠᤶᤍᤡᤰ ᤔᤧᤈᤥᤃᤧ॥ ᤂᤧᤵᤔᤥ ᤂᤧᤱᤜᤠ᤹ᤖᤧ ᤌᤡᤰ ᤕᤜᤢᤍᤡ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤒᤠᤖ-ᤕᤧᤛᤢ ᤔᤧᤵᤔᤏᤠᤒᤠ ᤁᤡᤆ᤻ᤆᤠᤰᤁᤡᤴ ᤔᤧᤍᤢᤔᤢ॥ 7ᤂᤧᤸᤗᤧ ᤁᤢᤴᤍᤣ᤺ᤱᤒᤠᤴ ᤂᤧᤴ ᤘᤠᤃᤵᤗᤠᤈᤣ᤹ᤀᤥᤒᤠ ᤛᤢᤜᤠᤱᤃᤧᤶᤒᤠ ᤛᤷᤃᤡᤕᤛ ᤐᤦᤗᤢᤛᤧᤴ ᤘᤕᤧᤀᤠᤱ ᤛᤥᤖᤡᤰ ᤂᤧᤴ ᤂᤢᤏᤧ᤹ᤏᤢ ᤋᤠᤰᤁᤴᤍᤧᤖᤥ॥ ᤛᤷᤃᤡᤕᤛ ᤐᤦᤗᤢᤛᤧᤴ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤛᤠᤒᤠ ᤘᤕᤧ॥ ᤂᤧᤸᤗᤧ ᤒᤖᤏᤠᤒᤠᤛ ᤏᤢ ᤛᤠᤘᤗᤧᤴ ᤀᤢ᤺ᤳᤋᤢᤛᤡ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤂᤧᤶᤔᤠ ᤏᤡᤱᤘᤠ᤹ ᤆᤥᤃᤢᤖᤥ॥ 8ᤁᤖ ᤂᤧᤴ ᤁᤡᤳᤆᤠᤰ ᤀᤡᤗᤢᤔᤠᤛᤧᤴ (ᤃᤪᤡᤁ ᤐᤠ᤺ᤴᤍᤠᤱᤅᤥ ᤂᤧᤸᤗᤧ ᤁᤢᤔᤡᤱᤅᤡᤸᤗᤧ ᤁᤢᤒᤣᤴ ᤁᤡᤳᤆᤠᤰ ᤐᤥᤱᤗᤥ) ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤐᤥᤃᤧᤀᤠᤱ ᤛᤢᤜᤠᤱᤃᤧᤶᤒᤠ ᤛᤷᤃᤡᤕᤛ ᤐᤦᤗᤢᤛᤧᤴ ᤕᤧᤛᤢᤴ ᤏᤛᤠᤴ ᤆᤥᤰ ᤔᤧᤶᤒᤠᤱᤔᤠ ᤋᤶᤛᤡᤱ ᤆᤥᤃᤢᤀᤠᤱ ᤂᤧᤱᤜᤠ᤹ ᤀᤳᤋᤢᤛᤡᤖᤥ॥ 9ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤢᤀᤠᤱ ᤛᤠᤘᤗᤖᤧ (ᤂᤧᤸᤗᤧ ᤁᤢᤔᤡᤱ ᤐᤠᤘᤗᤀᤠᤱ ᤘᤕᤧᤖᤥ) ᤂᤧᤴ ᤀᤡᤗᤢᤔᤠᤛᤧᤴ ᤀᤍᤰᤋᤰᤁᤠᤱ ᤀᤥᤔᤧᤳᤋᤢᤖ ᤔᤧᤳᤋᤢ. 10“ᤂᤧᤏᤧ᤹ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤛ᤻ᤛᤠ. ᤁᤠᤰ ᤛᤠᤶᤕᤥᤏᤡᤔᤠᤸᤗᤧ ᤁᤢᤏᤡᤱᤔᤡ. ᤂᤧᤏᤧ᤹ᤃ ᤁᤠᤰ ᤀᤡᤱᤗᤧᤰ ᤏᤢ ᤑᤧᤴ ᤕᤠ᤺ᤶᤒᤰᤗᤧ ᤁᤢᤎᤡᤶ ᤁᤧᤘᤠ᤹ᤖᤥ॥ ᤂᤧᤏᤧ᤹ ᤍᤠᤱᤒᤠᤸᤗᤧ ᤋᤥ᤺ᤴᤍᤥᤶᤒᤠ ᤁᤢᤗᤠᤶᤔᤡᤴ ᤐᤧᤃᤧᤰ-ᤘᤃᤧᤰ ᤆᤥ᤺ᤰᤔᤠ ᤗᤧᤖᤧ᤹᥄ 11ᤍᤠᤱᤒᤠᤸᤗᤧ ᤂᤢᤶᤍᤡᤱ ᤁᤧᤒᤡ᤹ᤀᤠᤱ ᤀᤠᤸᤗ ᤂᤠᤏᤡᤔᤠ ᤔᤧᤴᤇᤢᤰᤔᤏᤠᤒᤠ ᤁᤧᤒᤥᤱᤅᤠᤱ ᤁᤢᤓᤠ ᤕᤧᤶ ᤌᤠᤖᤡᤰ ᤂᤧᤏᤧ᤹ᤃ ᤏᤠᤶᤔᤡᤴᤏᤠᤱ ᤏᤡᤔᤠ ᤁᤧᤴᤇᤢᤰᤋᤢᤴᤗᤥ॥” ᤂᤡᤔᤥ ᤀᤡᤗᤢᤔᤠᤛᤖᤧ ᤁᤢᤔᤡᤰᤁᤥ ᤂᤠᤶᤍ᤺ᤶᤒᤠᤸᤗᤧ ᤋᤧᤵᤋᤢᤒᤠ ᤁᤢᤀᤡᤛᤡᤰ ᤐᤥ᤺ᤰᤂᤧᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤌᤣᤀᤠᤱ ᤏᤡᤔᤠ ᤔᤧᤛᤢᤰᤋᤢᤴᤗᤥ॥ ᤂᤢᤏᤧ᤹ᤃ ᤁᤢᤓᤠᤖᤧ ᤔᤧᤍᤧᤶᤔᤠᤀᤠᤱ ᤔᤧᤀᤢ᤺ᤱᤅᤠᤏᤡ ᤑᤠ᤹ᤀᤠᤱ ᤛᤵᤛᤢᤖ ᤗᤠᤱᤄᤣ᤺ᤰᤔᤠ ᤜᤣ᤺ᤰᤋᤧᤖᤥ॥ 12ᤛᤢᤜᤠᤱᤃᤧᤶᤒᤠᤸᤗᤧ ᤁᤴ ᤜᤡᤴᤍᤥᤰᤁᤡᤴ ᤏᤡᤛᤢᤀᤠᤱ ᤕᤧᤛᤢᤴ ᤏᤛᤠᤴ ᤆᤥᤃᤢ. ᤌᤣᤀᤠᤱᤓᤧᤸᤗᤧ ᤍᤠᤱᤒᤧᤸᤗᤧ ᤁᤢᤏᤡᤛᤠᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤢᤏᤡᤱᤘᤠ᤹ ᤔᤕᤧᤖᤥ॥

ᤐᤡᤛᤡᤍᤡᤕᤠᤛ᤻ᤔᤠ ᤀᤣᤴᤋᤡᤀᤥᤰᤁᤥ

13ᤂᤧᤴ ᤕᤠᤱᤛᤡ ᤐᤠᤘᤗ ᤏᤢ ᤁᤢᤴᤈᤢᤶᤜᤠ᤹ ᤐᤠᤑᤥᤛᤗᤠᤶ ᤐᤠᤶᤑᤡᤗᤡᤕᤠ ᤌᤢᤶᤔᤥᤒᤠ ᤐᤷᤃᤠᤀᤥ ᤘᤠᤗᤠᤶᤍᤡᤰ ᤔᤧᤈᤥᤃᤢ. ᤁᤖ ᤕᤢᤜᤢᤴᤏᤠ ᤔᤷᤁᤢᤛᤖᤧ ᤂᤧᤱᤜᤠ᤹ ᤂᤧᤵᤔᤥ ᤐᤰᤌᤛᤡᤀᤠᤱ ᤕᤖᤢᤛᤗᤧᤶᤔᤥ ᤏᤢ᤺ᤰᤂᤧ ᤐᤣᤖᤥ॥ 14ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴ ᤐᤷᤃᤠᤗᤠᤶ ᤐᤡᤛᤡᤍᤡᤕᤠ ᤌᤢᤶᤔᤥᤒᤠ ᤀᤣᤴᤋᤡᤀᤥᤁ ᤕᤧᤰᤕᤰᤁᤥ ᤐᤣᤛᤡ॥ ᤜᤧᤰᤁᤩᤠᤱ ᤏᤠ᤺ᤶᤛᤡᤱ ᤕᤧᤴᤏᤥ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤂᤧᤱᤜᤠ᤹ ᤐᤣᤛᤡᤀᤠᤱ ᤕᤢᤱᤏᤧᤇᤡᤖᤥ॥ 15ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤛᤠᤵᤋᤢᤒᤠ ᤛᤠᤵᤐᤴᤗᤠᤶ ᤔᤧᤏᤡ᤺ᤖᤢ ᤔᤧᤛᤢᤖᤢᤀᤠᤱ ᤗᤠᤶᤗᤥᤒᤠᤜᤠ᤹ᤖᤧ ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡ. “ᤑᤢ᤹ᤏᤢᤛᤠ᤹ᤛᤣ. ᤀᤠᤏᤡᤃᤣ ᤔᤏᤠᤜᤠ᤹ ᤜᤠᤱᤜᤠᤱ ᤔᤧᤵᤔᤠᤛᤡ ᤀᤡᤱᤄᤱ ᤁᤧᤃᤳᤇᤢᤏᤧ ᤑᤠ᤹ᤃᤪ ᤐᤠ᤺ᤳᤋᤧᤛᤧ᤹ᤀᤥ॥”

16ᤐᤠᤘᤗᤧᤴ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤜᤢᤰᤆᤠ᤺ᤸᤁᤡ ᤆᤥᤃᤢᤖ ᤐᤠ᤺ᤵᤔᤠ ᤜᤣ᤺ᤰᤋᤧ. “ᤀᤡᤛᤪᤠᤀᤡᤗᤡ ᤑᤢ᤹ᤏᤢᤛᤠ᤹ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤘᤠ ᤁᤧᤈᤥ᤺ᤰᤐᤠ ᤌᤡᤶᤔᤧᤴᤍᤱ ᤛᤢᤘᤠᤱᤛᤠᤛᤣ. ᤀᤠᤄᤧᤵᤛᤧᤶᤔᤧ᤹ᤀᤥ᥄ 17ᤁᤴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤧᤘᤠ ᤔᤧᤈᤥᤃᤢᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤐᤠᤎᤧᤒᤠ ᤛᤢᤎᤧᤒᤠᤜᤠ᤹ ᤛᤣᤃᤢᤛᤡᤀᤠᤱ ᤔᤡᤛᤪ ᤗᤠᤈᤣ᤹ᤀᤥ ᤔᤠ᤺ᤱᤄᤠᤒᤠ ᤗᤠᤈᤣ᤹ᤛᤠᤒᤠ ᤜᤧᤰᤁᤣ ᤔᤧᤘᤕᤧᤸᤗᤧ ᤕᤶᤒᤠ ᤛᤢᤘᤠᤱ ᤆᤥᤃᤢᤛᤡᤖᤥ॥ ᤜᤧᤰᤁᤩᤠᤱ ᤐᤕᤶ ᤔᤢᤰᤛᤠᤶᤏᤢ ᤂᤧᤴ ᤗᤠᤈᤣ᤹ᤀᤥᤏᤢ ᤗᤠ᤺ᤰᤁᤠᤳ ᤗ᤺ᤳᤋᤢᤛᤡᤀᤠᤱ 18ᤀᤣ᤺ᤰᤛᤠᤍᤧᤴᤏᤥ ᤋᤱᤒᤣ ᤗᤡᤒᤥᤱ ᤌᤠᤖᤡᤰ ᤂᤧᤱᤜᤠ᤹ ᤁᤶᤒᤪᤠᤱ ᤔᤧᤳᤋᤢᤛᤡᤖᤥ॥ 19ᤜᤧᤰᤁᤩᤠᤱ ᤂᤢᤏᤧ᤹ᤃ ᤁᤏᤠᤏ ᤗᤠᤈᤣ᤹ᤛᤔᤠ ᤏᤢᤛᤡ ᤛᤢᤘᤠᤱᤜᤠ᤹ ᤔᤧᤰᤂᤢᤛᤡᤀᤠᤱ ᤂᤧᤴ ᤗᤠᤈᤣ᤹ᤀᤥ ᤁᤢᤔᤏᤠᤜᤠ᤹ ᤕᤢᤰᤍᤠᤱᤒᤠ ᤆᤥᤃᤢᤛᤡᤀᤠᤱ 20ᤋᤱᤒᤣ ᤁᤢᤃᤡᤵ ᤗᤡᤛᤡᤀᤠᤱ ᤁᤢᤓᤪᤧ᤺ᤱ (᥊᥋᥆) ᤌᤠᤖᤡᤰ ᤂᤧᤱᤜᤠ᤹ᤖᤧ ᤂᤧᤴ ᤗᤠᤈᤣ᤹ᤀᤡᤴ ᤔᤧᤕᤢᤰᤋᤢᤖᤥ॥

“ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤛᤠᤔᤢᤀᤧᤗ ᤌᤠᤖᤡᤰ ᤂᤠᤛᤧᤴᤕᤢᤰᤐᤠᤜᤠ᤹ ᤐᤡᤖᤢᤛᤡᤖᤥ॥ 21ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤜᤠᤱ ᤔᤧᤏᤠ᤺ᤰᤋᤢᤸᤗᤧ ᤂᤢᤏᤧ᤹ ᤒᤧᤴᤈᤠᤔᤡᤏ ᤛᤢᤘᤠᤱᤛᤔᤠ ᤁᤡᤛᤖᤧ ᤁᤢᤛ᤻ᤛᤠ ᤛᤠᤘᤗᤧᤴ ᤐᤡᤖᤢᤛᤡᤀᤠᤱ ᤂᤧᤸᤗᤧ ᤋᤱᤒᤣ ᤗᤡᤒᤥᤱ (᥊᥆) ᤌᤠᤖᤡᤰ ᤜᤠᤱ ᤆᤥᤃᤢᤖᤥ॥ 22ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤜᤠᤱᤕᤢᤰᤗᤠᤶ ᤂᤧᤳᤋᤢᤀᤠᤱ ᤍᤠᤀᤢᤍᤧᤴ ᤜᤠᤱ ᤆᤥᤃᤢᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ. ‘ᤕᤡᤛᤤᤖᤧ ᤁᤢᤛ᤻ᤛᤠ ᤍᤠᤀᤢᤍᤧᤱᤃ ᤀᤠᤏᤡᤱᤘᤠ᤹ ᤜᤧᤰᤁᤣ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤀᤠᤛᤡᤖᤠ᤹ ᤁᤧᤎᤠᤱᤒᤠ ᤔᤏᤠᤖᤥ॥’#᥇ ᤛᤠᤔᤢ ᥇᥉:᥇᥊

23“ᤒᤠ ᤁᤴ ᤔᤧᤴᤇᤠᤶ ᤌᤠ᤺ᤰᤁᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤧᤰ ᤆᤥᤃᤢᤛᤡᤒᤠ ᤁᤢᤀᤡᤛᤡᤰ ᤛᤧᤴᤗᤵᤍᤠᤱᤒᤠ ᤕᤧᤛᤢᤴ ᤀᤠᤏᤡ᤹ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤐᤠᤱᤄᤢᤖᤥ॥ 24ᤕᤧᤛᤢᤖᤧ ᤁᤢᤔᤠᤱᤛᤣᤘᤠ ᤕᤠ᤺ᤶᤒᤰᤁᤡᤴ ᤜᤣ᤺ᤰᤔᤠᤏᤢ᤺ᤸᤗᤧ ᤋᤃᤡ ᤕᤢᤜᤢᤴᤏᤠᤖᤧ ᤀᤡᤛᤪᤠᤀᤡᤗᤛᤔᤠ ᤁᤠᤰ ᤔᤏᤠᤜᤠ᤹ ᤂᤢᤏᤡ᤹ ᤗᤠᤕᤥᤗᤠᤶ ᤔᤧᤜᤡᤴᤏᤠᤱ ᤒᤵᤋᤡᤛ᤻ᤔᤠ ᤔᤧᤒᤥᤱᤗ ᤑᤠ᤹ᤀᤠᤱ ᤀᤡᤱᤓᤥᤛᤢᤛᤡᤖᤥ॥ 25ᤜᤧᤰᤁᤩᤠᤱ ᤕᤢᤜᤢᤴᤏᤠᤖᤧ ᤂᤢᤏᤧ᤹ ᤁᤢᤔᤠᤱᤛᤣᤘᤠ ᤕᤠ᤺ᤶᤒᤰᤁᤡᤴ ᤛᤢ᤺ᤵᤔᤠ ᤀᤡ᤺ᤳᤋᤢᤸᤗᤧ ᤔᤏᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. ‘ᤀᤡᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤕᤠᤵᤔᤡ ᤁᤧᤀᤡ᤺ᤳᤋᤡᤒᤣ᥅ ᤀᤡᤱᤃᤠ᤹ᤃ ᤂᤡᤏᤡ᤹ ᤁᤧᤜᤠᤱᤄᤢᤶᤒᤠ ᤔᤏᤠ᤺ᤱᤃ ᤔᤧ᤺ᤴᤏᤠᤖᤥ. ᤂᤢᤏᤧ᤹ᤃ ᤀᤡᤱᤃᤠ᤹ᤏᤢ᤺ᤸᤗᤧ ᤕᤠᤱᤛᤡ ᤋᤠᤖᤥ॥ ᤂᤢᤏᤧ᤹ ᤁᤢᤗᤠᤱᤛᤢ᤺ᤵᤐᤡᤸᤗᤧ ᤁᤢᤏᤠᤶᤜᤠ᤹ᤀᤠᤱ ᤑᤠ᤺ᤱᤔᤠ ᤔᤧᤗᤠ᤹ᤀᤠᤴᤗᤥ॥’

26“ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤀᤡᤛᤪᤠᤀᤡᤗᤡ ᤑᤢ᤹ᤏᤢᤛᤠ᤹ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠ ᤁᤧᤈᤥ᤺ᤰᤐᤠ ᤌᤡᤶᤔᤧᤴᤍᤱ ᤛᤢᤘᤠᤱᤛᤠᤛᤣ. ᤀᤠᤏᤡ᤹ᤀᤥᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴ ᤛᤧᤴᤗᤵᤐᤡᤸᤗᤧᤴ ᤛᤢᤏᤠᤀᤡᤱᤄᤱᤅᤡᤴ ᤐᤠᤱᤄᤢᤀᤠᤱ ᤘᤠ᤹ᤖᤥ॥ 27ᤁᤴ ᤕᤖᤢᤛᤗᤧᤶᤔᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤏᤢ ᤂᤢᤏᤡ᤹ ᤗᤠᤶᤗᤥᤒᤠᤜᤠ᤹ᤖᤧ ᤕᤧᤛᤢᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ. ᤁᤖ ᤀᤠᤵᤋᤡᤰ ᤔᤧᤃᤢ᤺ᤳᤋᤢᤸᤗᤧ ᤏᤠ᤺ᤶᤛᤡᤱ ᤕᤧᤴ ᤌᤵᤔᤣ ᤔᤧᤏᤡᤖᤢᤒᤠ ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤁᤧᤖᤧᤒᤠᤖᤥ॥ 28ᤜᤧᤰᤁᤩᤠᤱ ᤂᤢᤏᤧ᤹ᤃ ᤛᤡᤔᤧᤸᤗᤧᤴ ᤂᤢᤶᤍᤡᤱ ᤐᤡᤔᤠ ᤌᤧᤔᤠ ᤀᤠᤵᤋᤡᤰᤁᤠᤱ ᤔᤧᤱᤄᤥᤛᤢᤴᤇᤠᤱ ᤐᤡᤗᤠᤋᤛᤧᤴ ᤂᤧᤴ ᤛᤧᤵᤔᤠᤀᤣ ᤐᤥᤱ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤸᤗᤧ ᤋᤧᤴᤍᤧᤖᤥ॥ 29ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤐᤠ᤺ᤴᤜᤠ᤹ ᤔᤧᤈᤥᤃᤢ ᤔᤧᤛᤢᤖᤢᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱᤗᤠᤶ ᤁᤢᤴᤈᤢᤶᤜᤠ᤹ᤖᤧ ᤔᤧᤎᤠᤛᤢᤀᤠᤱ ᤀᤡ᤺ᤵᤐᤢᤱᤅᤥ ᤔᤧᤏᤧᤛ᤻ᤛᤢᤖᤥ॥ 30ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ᤃ ᤛᤡᤔᤧᤴᤗᤠᤶ ᤁᤢᤜᤡᤱᤘᤧᤳ ᤆᤥᤃᤢᤖᤥ॥ 31ᤜᤧᤰᤁᤩᤠᤱ ᤕᤖᤡᤰ ᤕᤧᤴ ᤌᤠᤖᤡᤰ ᤂᤢᤏᤧ᤹ᤏᤢ ᤃᤠᤗᤡᤗᤗᤠᤶ ᤕᤖᤢᤛᤗᤧᤔ ᤌᤠᤖᤡᤰ ᤗᤠᤶᤍᤡᤰ ᤁᤧᤈᤥ᤺ᤰᤐᤠᤜᤠ᤹ᤖᤥ ᤀᤥᤛᤣ᤺ᤴᤎᤠᤰᤛᤡᤱᤗ ᤘᤕᤧᤖᤥ॥ ᤀᤠᤸᤗ ᤂᤧᤱᤜᤠ᤹ ᤀᤡᤛᤪᤠᤀᤡᤗᤛᤔᤠ ᤔᤏᤠᤜᤠ᤹ᤖᤧ ᤗᤠᤃᤡ ᤋᤥ᤺ᤴᤍᤡ ᤔᤧᤘᤠ᤹ᤖᤥ॥

32“ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ ᤐᤡᤖᤢᤛᤡᤒᤠ ᤔᤠᤱᤜᤧᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤴ ᤛᤢᤏᤠᤀᤡᤱ ᤀᤡᤱᤓᤥᤛᤧ ᤀᤠᤏᤡᤃᤣ ᤂᤡᤏᤡ᤹ᤀᤥ ᤋᤩᤧ᤹ᤀᤡᤃᤧᤀᤠᤱ ᤘᤕᤡᤃᤧᤖᤥ— 33ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤧᤛᤢᤴ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤄᤢᤀᤠᤱ ᤔᤠᤱᤜᤧᤰᤁᤡᤴ ᤀᤠᤏᤡ᤹ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤥ ᤁᤧᤳᤋᤢᤖᤥ॥ ᤁᤴ ᤏᤡᤛᤡᤃᤣᤰᤐᤠ ᤏᤡᤱᤘᤠ᤹ᤑᤢ ᤛᤠᤶᤗᤥᤛᤢᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤧᤛᤢᤴ ᤀᤰᤂᤣ ᤔᤧᤳᤋᤢᤀᤠᤱ ᤘᤠ᤹ᤖᤥ.

“‘ᤂᤧᤏᤧ᤹ᤃ ᤀᤠᤛ᤻ᤛᤠᤏᤧᤖᤥ.

ᤀᤡᤱᤃᤠ᤹ ᤛᤧᤰᤂᤠᤀᤣ ᤁᤧᤶᤒᤠᤀᤠ ᤑᤠ᤹ᤀᤠᤱ ᤀᤥᤛᤣ᤺ᤴᤍᤠᤱ ᤆᤥᤃᤢᤱᤅᤠᤱ ᤘᤠ᤹ᤖᤥ॥’#ᤏᤡᤱ ᤛᤢᤶ ᥈:᥍

34“ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤡᤔᤧᤴᤗᤠᤶ ᤑᤥ᤺ᤰᤂᤢᤸᤗᤧ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤛᤡᤔᤠ ᤔᤧᤒᤥᤱᤏᤧᤴᤗ ᤑᤠ᤹ᤀᤠᤱ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤘᤠ᤹—

“‘ᤀᤠᤀᤡᤴ ᤂᤡᤏᤡ᤹ᤃ ᤀᤡᤱᤃᤠ᤹ ᤛᤣᤛᤣ ᤏᤢ ᤏᤡᤛ᤻ᤛᤣᤀᤣ ᤍᤠᤀᤢᤍᤧᤴᤏᤢ ᤔᤠᤱᤜᤢᤵ ᤆᤥᤃᤢᤱᤒᤠ ᤔᤢ᤹ᤀᤡᤛᤠᤶᤔᤡᤴ ᤐᤡᤏᤡᤱᤅᤠᤱ ᤘᤠ᤹ᤀᤠᤖᤥ॥’#ᤕᤛᤤ ᥋᥋:᥉

35ᤜᤧᤰᤁᤩᤠᤱ ᤘᤣ᤹ᤛᤔᤠ ᤋᤧᤴᤏᤥᤀᤠᤱ ᤂᤢᤏᤧ᤹ ᤐᤠ᤺ᤳᤋᤢᤀᤠᤱ ᤘᤠ᤹.

‘ᤂᤧᤏᤧ᤹ᤃ ᤛᤣᤛᤣ ᤁᤧᤛᤧᤘᤠᤖᤥᤒᤠᤸᤗᤧ ᤁᤢᤎᤰᤁᤡᤴ ᤁᤡᤔᤠ ᤕ᤺ᤵᤔᤠ ᤁᤧᤶᤒᤠᤱᤄᤢᤴᤗᤥ॥’#ᤏᤡᤱ ᤛᤢᤶ ᥇᥌:᥇᥆

36ᤍᤠᤀᤢᤍᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤁᤢᤜᤡᤱᤔᤴ ᤂᤠᤖᤠᤰ ᤛᤧᤘᤠ ᤆᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ ᤛᤩᤧᤖᤥ॥ ᤜᤧᤰᤁᤩᤠᤱ ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ᤏᤢᤀᤣ ᤔᤧᤜᤢᤶᤛᤢᤀᤠᤱ ᤁᤡᤖᤧ ᤐᤣᤖᤥ॥ 37ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤡᤔᤧᤴᤗᤠᤶ ᤜᤡᤱᤄᤢᤒᤠᤸᤗᤧ ᤁᤢᤎᤰᤁᤡᤴ ᤔᤧᤃᤡᤖᤧᤴᤗᤥ॥

38“ᤂᤧᤸᤗᤧᤆᤥᤃᤢᤸᤗᤧ ᤑᤢ᤹ᤏᤢᤛᤠ᤹ᤛᤣ. ᤒᤠ ᤁᤴ ᤕᤧᤛᤢᤖᤧ ᤆᤥᤃᤢᤒᤠᤗᤠᤶᤔᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤗᤠᤕᤥᤜᤠ᤹ᤖᤧᤴ ᤗᤧᤵᤔᤡ ᤀᤠᤒᤡ᤹ ᤑᤠ᤹ᤀᤠᤱ ᤁᤴ ᤀᤡᤱᤄᤱᤅᤡᤴ ᤂᤡᤏᤡ᤹ᤀᤥ ᤀᤡᤱᤓᤥᤛᤧᤀᤠᤱ ᤘᤠ᤹ᤒᤠᤴ ᤀᤠᤸᤗ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥ 39ᤂᤢᤏᤧ᤹ᤀᤥ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤢ᤺ᤴᤍᤢᤐᤡᤖᤢᤛᤡ᤹ᤖᤥ॥ ᤁᤧᤖᤧᤰᤗᤧ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶ ᤀᤡ᤺ᤵᤔᤠ ᤏᤠ᤺ᤵᤔᤠᤗᤠᤶ ᤂᤥᤔᤠ ᤁᤧᤴᤇᤢᤰᤋᤢᤶᤔᤡᤶᤒᤠ ᤗᤠᤕᤥᤗᤠᤶ ᤆᤥ᤺ᤰᤕᤢᤶᤓᤥᤴ ᤂᤡᤏᤡ᤹ ᤁᤧᤄᤥᤛᤢᤶᤔᤠᤱ ᤁᤧᤘᤕᤡ᤹ᤖᤥ॥ 40ᤜᤧᤰᤁᤩᤠᤱ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤔᤣ᤺ᤴᤏᤣ ᤑᤠ᤹ᤃᤪ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤛᤠᤵᤋᤢᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤂᤡᤏᤡ᤹ ᤛᤶᤍᤠᤱ ᤁᤧᤳᤗᤥ॥

41“‘ᤀᤥᤔᤧᤳᤋᤧᤶᤔᤧ᤹. ᤂᤡᤏᤡ᤹ ᤁᤡᤏᤠ᤺ᤴᤍᤡ ᤁᤧᤔᤧᤵᤐᤠᤛᤣ.

ᤂᤡᤏᤡ᤹ ᤏᤡᤱᤘᤠ᤹ ᤔᤕᤧᤶᤔᤧ᤹ᤀᤠᤱ ᤛᤧᤶᤔᤧ᤹॥

ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤕᤧᤶᤜᤠ᤹ᤀᤥ ᤔᤏᤠᤜᤠ᤹ᤖᤧ ᤐᤥᤎᤰ ᤁᤧᤶᤈᤥᤃᤡᤛᤠᤱ ᤀᤠᤵᤑᤠᤸᤗᤧᤀᤠᤱ ᤏᤛᤠᤴ ᤁᤧᤴᤈᤥᤃᤢᤶᤔᤡᤶᤒᤠ ᤕᤠ᤺ᤶᤒᤰ ᤀᤡᤱᤃᤠ᤹ ᤆᤥᤃᤢᤱᤗᤥ॥’”#ᤜᤒ ᥇:᥋

42ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤗᤠᤶ ᤗ᤺ᤴᤍᤧᤛᤡᤀᤠᤱ ᤐᤣᤛᤡᤸᤗᤧ ᤔᤏᤠᤜᤠ᤹ᤖᤧ ᤂᤧᤱᤜᤠ᤹. ᤕᤠᤶᤔᤥ ᤁᤧᤍᤠᤒᤠ ᤏᤠ᤺ᤶᤛᤡᤱ ᤕᤧᤴᤏᤥ ᤋᤩᤧᤛᤧ᤹ᤀᤠᤱ ᤁᤴ ᤐᤠ᤺ᤴᤏᤡᤴ ᤆᤧᤰᤂᤧᤛᤧ᤹ᤀᤥ ᤑᤠ᤹ᤀᤠᤱ ᤔᤧᤀᤢ᤺ᤳᤋᤢᤛᤡᤖᤥ॥ 43ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤡᤴ ᤔᤧᤗᤧᤖᤢᤀᤠᤱ ᤕᤖᤡᤰ ᤕᤜᤢᤍᤡᤜᤠ᤹ ᤏᤢ ᤕᤜᤢᤍᤡ ᤛᤠᤶᤕᤥᤀᤥ ᤁᤧᤍᤠᤒᤠᤜᤠ᤹ᤖᤧ ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴ ᤔᤧᤍᤡᤶᤍᤢᤛᤡᤖᤥ॥ ᤜᤧᤰᤁᤩᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤂᤧᤱᤜᤠ᤹ ᤏᤡᤱᤘᤠ᤹ᤑᤢ ᤗᤢᤱᤃᤢᤶᤔᤥ ᤆᤰᤔᤧᤸᤗ᤹ᤀᤣ ᤏᤛᤠᤴ ᤆᤥᤃᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤧᤇᤢᤖᤥ॥

44ᤜᤧᤰᤁᤩᤠᤱ ᤁᤧᤍᤠᤒᤠ ᤏᤠ᤺ᤶᤛᤡᤱ ᤕᤧᤴᤏᤥ ᤂᤵᤔᤧᤴ ᤂᤧᤴ ᤕᤧᤰᤕᤰᤁᤥᤒᤠ ᤁᤠᤰ ᤔᤏᤠᤜᤠ᤹ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰ ᤂᤧᤶᤛᤧ ᤔᤧᤍᤩᤧᤖᤥ॥ 45ᤁᤖ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ᤖᤧ ᤂᤧᤴ ᤔᤏᤠᤜᤠ᤹ ᤔᤧᤏᤡᤛᤢᤛᤡᤀᤠᤱ ᤛᤠ᤹ᤖᤡᤰ ᤏᤠᤔᤧᤜᤧᤳᤋᤢᤛᤡ. ᤜᤧᤰᤁᤩᤠᤱ ᤐᤠᤘᤗᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤔᤧᤒᤠᤖᤧᤖ ᤔᤧᤍᤖᤢᤖᤥ॥

46ᤁᤖ ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴ ᤔᤧᤱᤃᤡᤀᤣ ᤀᤰᤂᤣᤗ᤹ᤖᤡᤰ ᤐᤠᤖᤧᤳᤇᤡ. “ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤱᤃ ᤁᤠᤰᤏᤢ ᤋᤃᤡ ᤂᤡᤏᤡ᤹ ᤕᤜᤢᤍᤡᤜᤠ᤹ᤏᤢ ᤐᤠ᤺ᤵᤔᤠ ᤁᤧᤒᤥᤱᤒᤠ ᤘᤕᤧ. ᤁᤖ ᤂᤡᤏᤡ᤹ᤀᤣ ᤁᤴ ᤁᤧᤏᤠ᤹ᤖᤢᤶᤗᤥ॥ ᤜᤧᤰᤁᤩᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥᤔᤠ ᤛᤢᤶᤒᤥᤎᤠᤛᤠᤒᤠ ᤔᤧᤶᤒᤥᤱᤔᤠ ᤑᤠ᤹ᤀᤠᤱ ᤂᤡᤏᤡ᤹ ᤀᤥᤛᤣ᤺ᤴᤃᤧᤎᤠᤰᤋᤢᤶᤗᤥ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤀᤠᤏᤡᤃᤣ ᤂᤡᤏᤡ᤹ᤗᤠᤶ ᤗ᤺ᤴᤍᤡᤃᤧᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤥ ᤐᤣᤃᤡᤃᤧ᤹ᤖᤥ॥ 47ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤀᤰᤂᤣᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤀᤡᤱᤈᤠᤱ ᤕᤠᤵᤔᤡ ᤐᤡᤖᤡᤃᤧᤀᤠᤱ ᤘᤠ᤹ᤖᤥ.

“‘ᤂᤡᤏᤡ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤥ ᤌᤠᤖᤡᤰ ᤛᤧᤴᤗᤵᤐᤡᤸᤗᤧᤴ ᤛᤢᤏᤠᤀᤡᤱᤅᤡᤴ ᤋᤣ᤹ᤔᤠ ᤑᤠ᤹ᤀᤠᤱ

ᤀᤡᤱᤃᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤀᤥ᤺ᤳᤋᤡ ᤁᤢᤀᤡᤛᤡᤰ ᤆᤥ᤺ᤰᤏᤡᤱᤅᤠᤱ ᤘᤠ᤹ᤀᤠᤖᤥ॥’”

48ᤁᤴ ᤐᤠ᤺ᤴᤏᤡᤴ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤛᤠ᤹ᤖᤡᤰ ᤔᤧᤛ᤺ᤳᤋᤧᤖ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤀᤡᤱᤎᤠᤱ ᤔᤧᤒᤡᤖᤢ॥ ᤜᤧᤰᤁᤩᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤧ ᤗᤠᤃᤡ ᤛᤣ᤺ᤰᤕᤢᤰ ᤁᤧᤒᤥᤱᤒᤠᤜᤠ᤹ᤖᤧ ᤏᤛᤠᤴ ᤔᤧᤈᤥᤃᤢᤖᤥ॥ 49ᤜᤧᤰᤁᤩᤠᤱ ᤏᤛᤠᤏᤡᤒᤠᤜᤠ᤹ᤖᤧ ᤍᤠᤱᤒᤠᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤂᤧᤴ ᤌᤢᤶᤔᤥ ᤁᤠᤰ ᤐᤡᤛᤠᤱ ᤔᤧᤛᤧᤛᤢᤖᤥ॥ 50ᤁᤖ ᤕᤜᤢᤍᤡᤜᤠ᤹ᤖᤧ ᤕᤧᤰᤕᤠᤔᤠ ᤛᤠᤶᤕᤥᤔᤠ ᤔᤧᤴᤇᤢᤔᤠᤜᤠ᤹ ᤏᤢ ᤂᤧᤴ ᤕᤧᤰᤕᤰᤁᤥᤒᤠ ᤔᤡᤱᤛᤥᤍᤠᤱᤒᤠ ᤔᤏᤠᤜᤠ᤹ ᤔᤧᤜᤢᤛᤢᤛᤡ ᤔᤧᤒᤰᤛᤢᤛᤡᤖᤥ॥ ᤂᤧᤱᤜᤠ᤹ᤖᤧ ᤐᤠᤘᤗ ᤏᤢ ᤒᤖᤏᤠᤒᤠᤛᤧᤴ ᤋᤢᤰᤂᤣ ᤆᤠ᤺ᤵᤔᤠ ᤔᤧᤜᤣ᤺ᤰᤋᤢᤛᤡᤀᤠᤱ ᤂᤧᤴ ᤌᤢᤶᤔᤥᤗᤠᤶ ᤗᤠ᤺ᤰᤁᤠᤳ ᤔᤧᤏᤠ᤺ᤳᤋᤢ ᤔᤧᤍᤣᤛᤢᤛᤡᤖᤥ॥ 51ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤠ᤹ᤖᤢᤛᤡᤒᤠᤴ ᤀᤥᤛᤣ᤺ᤴᤎᤠᤰᤔᤠᤛᤡ ᤑᤠ᤹ᤀᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧᤀᤠᤱ ᤂᤢᤏᤡ᤹ ᤗᤠᤱᤓᤥᤀᤥᤒᤠ ᤂᤠᤶᤜᤡ᤺ᤰᤁᤡᤴ ᤂᤧᤱᤜᤠ᤹ᤖᤧ ᤔᤧᤎᤠᤵᤛᤢ ᤔᤧᤎᤀᤠᤱ#᥇᥉:᥋᥇ ᤂᤢᤏᤡ᤹ ᤗᤠᤱᤓᤥᤀᤥᤒᤠ ᤂᤠᤶᤜᤡ᤺ᤰᤁᤡᤴ ᤂᤧᤱᤜᤠ᤹ᤖᤧ ᤔᤧᤎᤠᤵᤛᤢ ᤔᤧᤎ—ᤂᤧᤵᤔᤥ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤂᤧᤶᤔᤩᤠᤰᤁᤠᤱ ᤌᤥ ᤆᤥ᤺ᤰᤔᤠ ᤁᤧᤒᤥᤱᤒᤠ ᤐᤠᤴ ᤌᤣᤀᤠᤱ ᤜᤥᤵᤗᤥ ᤁᤧᤗ᤹ᤒᤠ ᤔᤡᤰᤛᤣ᤺ᤴᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤈᤥᤃᤢᤒᤠᤖᤥ॥ ᤀᤠᤀᤡᤁᤥᤏᤡᤕᤔ ᤕᤧᤰᤕᤰ ᤗᤧᤵᤔᤠᤱ ᤔᤧᤎᤠᤛᤡᤱᤗᤥ॥ 52ᤒᤠ ᤂᤧᤴ ᤕᤧᤶᤔᤥ ᤀᤣᤴᤋᤡᤀᤥᤁᤛᤔᤠ ᤜᤢ᤹ᤛᤠᤶᤒᤠᤜᤠ᤹ᤀᤠᤱ ᤛᤣᤛᤣᤔᤠᤱᤅᤡᤴ ᤏᤢ ᤀᤥᤔᤢᤗ᤹ᤔᤠᤸᤗᤧ ᤁᤢᤎᤡᤶ ᤔᤧᤒᤥ᤺ᤰᤂᤧᤖᤥ॥

Currently Selected:

ᤛᤣ᤺ᤰᤕᤢᤰᤔᤡᤒᤠᤜᤠ᤹ 13: LIFOTNT

Highlight

Copy