Rom 9
9
DeeƁwe Ben Isar'ila
1I lak ti a mwawei saa ti Kristi, a fyarat kwa, ambe' amen ɓwet hwak saa ti Rin Masapai. 2I mati kikyawat na mulut hyang hu tirim ngang na wii yunti. 3Naɗin ɓweti a wisi na yin ti haisun si le' un ya, si kaar tun hu Kristi ɓurti shunun, sin ima si mii gung amen. 4A sin a ɗufal i Isar'ila, ima DeeƁwe matus ii fe ames. DeeƁwe kofus cinjangat ames. DeeƁwe no'us dakwa akul hu sin, fas anggut ames. Fas fiselal i cwaisus afut ta wur ames ta kintiɓwi hwak. 5Si yes ii ta kyel i washash mbayai. Kristi hwak yes ta kyel ames saa ti lo', ima a DeeƁwe i shak, asum asus ti ta fit yes myan hu myan. Aandi.
6Ka wa nyai findelal i DeeƁwe fur kwa, ɓurti a shak ɗufal ima si mii gung i Isar'ila, a fe i Isar'ila mwawei kwa. 7Andi hwak, a shak ɗufal ima si mii fe i Ibirai a fe ames i mwawei kwa. DeeƁwe lak Ibirai ni, “Ii ta kyel i Aizik si wa mbe' ti washash ama.”#9:7 Ɗing huni hwak: Bya 21:12. 8Aɗeng ima i laki mai, a fe ima si al i lo' si mii fe DeeƁwe kwa, a fe i kintiɓwi a sin si mbe'sus i fe Ibirai i mwawei. 9Angga' ima DeeƁwe fa kintiɓwi ta mai nyai, “Na myan si ndok ima yis ma wa muhumkyel, Usara yit ti ali ta mas.”#9:9 Ɗing huni hwak: Bya 18:10-14.
10Andi kyek kwa, fe i Ubeka si mati dee andek, a demukan Aizik. 11Shak ta andi, kaciwa' ti ti al njanani ahun si ngye si ndok masti ɗama maɗesi ahun a mafwashi kwa, ɓa ambe' i DeeƁwe si aben ames hai u hya. 12Ii ta fisel ti ro i ali kwa, ii ta fisel ti yis ima lai, si lakut nyai, “Manbaiyi ma wa mute ii yere i mavaati.”#9:12 Ɗing huni hwak: Bya 25:23. 13Fota ngga' ima si worong ta, “I ɓwet Jakop, i nggwen ti Eso.”#9:13 Ɗing huni hwak: Mal 1:2-3.
14Ka wa nyai ami ndai ya? DeeƁwe a ma ɓweti hai ani? Wayou! 15Ɓurti DeeƁwe lak Mosis ni,
“I wa gu'ti ashur si ɗufal ima i ben,
i wa ɗing ti shum i ɗufal
ima i ɗing ti shum asussi.”#9:15 Ɗing huni hwak: Mul 33:19.
16Ɓurti andi, mai a gwel ahun a muni gbuk i maɗufal kwa, a gu'ti ashur i DeeƁwe je. 17Ɓurti Worong lak Fero makai i Masar ni, “I ha'a fit a ɓurti mai aɗengi, ɓa i kof andok amen si ha hai, ɓa si but asum amen na naya shak.”#9:17 Ɗing huni hwak: Mul 9:16. 18Ɓurti andi, DeeƁwe gwa' ashur si maɗufal ima ma ɓweti gu'sus ashur, u kin njeng na hai si maɗufal ima ma ɓweti u njeng na hai.
19Ɗeng amu ma wa nyai, “Ami kin DeeƁwe ma shum sikan ya? Ɗeng ndok u nggwes ti ɓweti i DeeƁwe haa?” 20Ha, anggi musut i maɗufali ɓa ha mas uɓet hu DeeƁwe ya? “Ahun aɗeng ima si ta' ndok u lak ma ta' sussi nyai, ‘Ami kin ha ta' un ati ya haa?’ ”#9:20 Ɗing huni hwak: Ish 29:16; Ish 45:9. 21Ma ta' ti lungai i ta' mas aɗeng ima ɗatus ti ta'i, u mas lungai i fati ngye, u mas shini ɓurti ro ma faalai kwa waak?
22DeeƁwe ɓwet ɓa u kof futut hu andok ames wa kyel i shak som ima si masus ɓurti fori ya, shak ta andi, ka' agung ti sin. 23Mas mai ɓa u kof ramwayat i cinjangat ames ta kweneng wi wa kyel i som ima gu'us ashur, ima tuu sinzam hwer ɓurti cinjangat. 24Kan ima lai mii, ii ta Ju kyek kwa, ii ta saa ti Ramam hwak. 25Fota ngga' ima lak ta kaada i Hosiya nyai,
“Sin ima a ɗufal amen kwa,
i wa laisus ii ‘ɗufal amen,’
yit tima i kofut matɓwet kwa,
i wa nyai I ɓwetsut.”#9:25 Ɗing huni hwak: Hos 2:23.
26Hu,
“Ma wa mufur kiga' ta kyel ima si lakus si ni,
‘Hun a ɗufal amen kwa,’
a ta kyeli si wa laisus ii
‘fe i DeeƁwe mapweti.’ ”#9:26 Ɗing huni hwak: Hos 1:10.
27Ishaya kawa si Isar'ila hai ni,
“Shak ta ngga' ima som i Isar'ila si hyang
fota njor ta fo i yiir,
ii ma si kat ta saa yusti je si wa mupwet.
28Ɓurti Deembai ma wa hya ti
lefti ɓur ames kaang si naya hai fweng.”#9:28 Ɗing huni hwak: Ish 10:22-23.
29Fota ngga' ima mashit Ishaya ai lak ta,
“Naɗin wa' Deembai Mambaitat
hon kan gung na kwa,
naɗin ka te fota Sodom,
si hat ti kan fota Gomora.”#9:29 Ɗing huni hwak: Ish 1:9.
Munggwya i Fati Mwawei i Som Isar'ila
30Ka wa nyai amiya? Ramam si nggwes i far ti mute manderei, si wisi, a mute manderei ima ii tasi fati mulut. 31Ɗak Isar'ila ima si far anggut i mute manderei, si wisi kwa. 32Ami kin ya? A ɓurti si far kaciwa' fati mulut, si far fota ati masti ro. Unai si bukat si “afung ma kinti bukat hai.” 33Fota ngga' ima si worong ta,
“Ɗing huni, i kin afung
tima ti wa kinti ɗufal bukat ta Zayon,
hu rem ima ma wa kinsus mufur,
shak maɗufal ima fa mwawei si yis hai
ma wa woti shusho kwa.”#9:33 Ɗing huni hwak: Ish 8:14; Ish 28:16.
Currently Selected:
Rom 9: AlisIRonNT
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
