Rom 10
10
1A shunun, aɗeng ima mulut amen ma gweli hu fwal amen wa kyel i DeeƁwe, a ɓurti ɓa Isar'ila si wis bum. 2I shangi nyai, si mati nadon si DeeƁwe hai, ɗak nadoni mayus kaciwa' shangi. 3Ɓurti si nggwes i shang ti mute manderei ima yes ta kyel i DeeƁwe, si kin hai masti ii haisus, si fa hai si mute manderei i DeeƁwe kwa. 4Kristi a dala i anggut, ɓa shak maɗufal ima fa mwawei u wis mute manderei.
5Mosis worong fisel i mute manderei ima mii ta kyel i anggut ni, “Shak maɗufal ima mas ɗamam mii, ma wa mupwet ɓursus.”#10:5 Ɗing huni hwak: Koc 18:5. 6Ɗak mute manderei ima mii ta saa ti fati mulut ni, “Kan ha lak ta mulut ama nyai, ‘Awe ma wa muɗu ta fit ya?’#10:6 Ɗing huni hwak: Muh 30:13. ” U ɗor ti Kristi ya 7“ahun, ‘Awe ma wa muɗor ta hum manggyongi ya?’#10:7 Ɗing huni hwak: Muh 30:13. ” U ɗu ti Kristi ya ta mot kwa. 8Unai ma nyai amiya, “Findel i DeeƁwe ma anggasi ti ha, mata fo ama, hu mulut ama.”#10:8 Ɗing huni hwak: Muh 30:14. Ayis a findel i fati mulut ima ni buti. 9Na ha lak ti fo ama nyai, “Yeso a Deembai,” ha fa mwawei ta mulut ama nyai, DeeƁwe luktus fit ta mot, ha wa wis ti bum. 10A ti mulut si fai mwawei si wis mute manderei, a ti fo si lak si wis bum. 11Fota ngga' ima Worong ni, “Shak maɗufal ima fa mwawei wa kyel ames ma wa woti shusho kwa.”#10:11 Ɗing huni hwak: Ish 28:16. 12Ɓurti Ju ma akat hu Ramam kwa. Andi Deembai a Deembai i shak hu ma kinti maɗesi hyang wa kyel shak ima si laiyus. 13Ɓurti, “Shak maɗufal ima lai asum i Deembai ma wa wis ti bum.”#10:13 Ɗing huni hwak: Jwo 2:32.
14Si wa masi atini si lai ima wa' si fa mwawei si yis hai ya? Si wa masi atini si fa mwawei si ima wa' si halus ya? Si wa masi atini si hali kaciwa' ɗeng lakus ya? 15Si wa masi atini si wa si but kaciwa' ɗeng rohus ya? Fota ngga' ima si worong ta, “Sisai i som ima si yes ti Muro Maɗesi mati ɗat fwet!”#10:15 Ɗing huni hwak: Ish 52:7.
16A shak som i Isar'ila si mat Muro Maɗesi mai kwa. Fota ngga' ima Ishaya ni, “A Deembai, awe fa mwawei nasi muro aminin ya?”#10:16 Ɗing huni hwak: Ish 53:1. 17Ɓurti andi, fati mulut ii tasi hal ti muro, ɗak hal ti muroi ii ta findel i Kristi. 18I mati lul, a awei si hali kwa haa? Hei si hali.
“La ames at na naya shak,
findelal ames ru ta nggwe' i naya.”#10:18 Ɗing huni hwak: Nak 19:4.
19I ti lul hwak ii hai, Isar'ila si shangi kwani? Ti bya' Mosis ni,
“I wa kinsu nadon si som
ima si mii ɗama kwa,
i wa kinsu futut ta kyel i ramam
ima si mii halyang.”#10:19 Ɗing huni hwak: Muh 32:21.
20Ishaya lak kaciwa' myanat ni, DeeƁwe ni,
“Som ima wa' si farun a sin si wisun.
I kof haisun wa kyel i som
ima wa' si lulun.”#10:20 Ɗing huni hwak: Ish 65:1.
21Shak ta andi, tasi Isar'ila hai,
DeeƁwe ni,
“I fi ti' ti ra amen wa kyel i som
ima si nggwes i hal ti findel
hu ima si njeng na hihai.”#10:21 Ɗing huni hwak: Ish 65:2.
Currently Selected:
Rom 10: AlisIRonNT
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
