Rom 8

Mupwet ta Fisel ti Rin

1Ɓurti andi, mwashi som ima si ta saa ti Yeso Kristi wi si wa kpa kwa. 2Ɓurti ii ta fisel ti Yeso Kristi, anggut i Rin i mupwet cat tun ii ra ta anggut mafwashi hu i mot. 3Anggut ti mati andok i masti mai kwa, ɓurti gwel i ɓweti hai kin anggut ti to, ayis nai DeeƁwe catun ii ra myan ima fa Al ames andek ɗwyat, te fota kan ima ka mati mafwashi, ɓa u te ii kuna ɓurti mafwashi amukan. Ati andi nggul mafwashani i maɗufal mafwashi ya. 4Mas mai, ɓa ka mas aɗeng ima anggut manderei lak, kan ima ka mati mupwet saa ti koltifai i lo' i maɗufal ma masti mafwashi kwa, ii Rin.

5Som ima si mas mute i lo' i maɗufal ma masti mafwashi, si mbe'i ti a aɗeng ima lo' ma gweli. Shak som ima si mute i Rin Masapai, si mbe'i ti a aɗeng ima Rin ma gweli. 6Ambe' i maɗufal ma mafwashi a mot, ɗak ambe' tima a Rin mati a mupwet hu cala. 7Ambe' mafwashi zan wei ti DeeƁwe, ɓurti nggwes ti ro i anggut i DeeƁwe, si ndok si masi andi kwa. 8Sin ima a lo' i maɗufal ma masti mafwashi ma zulsus cwang, si ndok si kin DeeƁwe jakak kwa.

9Shak ta andi, hun, a ro i lo' i maɗufal ma masti mafwashi ma zulsu cwang kwa, ii Rin, na a awei Rin i DeeƁwe mata wii yuti. Na ɗeng yis ti Rin i Kristi kwa, yis ii Kristi kwa. 10Na Kristi yis na wii yuti, lo' amu motus ɓurti mafwashi, ɗak rin amu mati mupwet ɓurti mute manderei. 11Na Rin i yis ima zan Yeso fit ta mot wi, ma mute na wii yuti, andi hwak yis ima zan Kristi fit ta moti ma wa fati lo' amu ma mot mupwet ta Rin ames, ima ma mute ta wii yuti.

12Ɓurti andi, a shunun, ka mati wufer i masti aɗeng ima lo' i maɗufal ma masti mafwashi ma gwel ti masi kwa. 13Ɓurti na hu mas mute musuti i lo' i maɗufal ma masti mafwashi, hu wa mot. Na hu for ro i lo' ya saa ti Rin, hu wa mupwet. 14Ɓurti som ima Rin i DeeƁwe ma zulsus cwang, a fe i DeeƁwe. 15Ɓurti hu mat a rin ima u kinu hu hum mute ii yarai ima si ti myanat kwa. Fo i mandi, hu mat a Rin ima hat tu ii fe i DeeƁwe, ɓa ka laiyus ii “Abba, Dee!” 16Rin i DeeƁwe ti haisus hu rin amukan ma kofi rasman nyai, kan a fe i DeeƁwe. 17Na kan a fe, ka wa cwai ti kop i DeeƁwe ndai, a awei, ka wa cwai ti kop i cinjangat i DeeƁwe akul hu Kristi. Na kan wa mat ti cinjangat ames, a kpak ka wo shum ima yis wo hwak.

Cinjangat Muwei

18I shangi nyai, shum amukan na naya ti kwai moti ndok ka kaanus hu cinjangat ima si wa kofi na hai kan ti yes wei kwa. 19Shak lan si cwai ti ra ya shwaiti matkof i fe i DeeƁwe. 20Ɓurti lan i DeeƁwe si mata saa ti shum wi, a ti ɓweti ames kwa, a masi i DeeƁwe a saa i kintiɓwi, 21ɓa lan ti haisus si wis mulangya ta tirim i murut, si kolus ta cinjangat i cati ii ra i mute ii fe i DeeƁwe.

22Ka shangi nyai shak ɗama ima DeeƁwe lan sima ndus fota mbor tya ti hal ti hanat i al yes myan mai. 23Andi kyek kwa, kan hai sikan, ima kati ma'al i bya' i Rin, kama ndus na wii, kan cwai ti ra ya ɓurti mute ii fe i wur, ima a dumi ya i lo' amukan. 24A ɓurti kintiɓwi mai ka wis bum. Kintiɓwi ima ka ɗyangi ya, a kintiɓwi kwa fweng. Awe kyan ɓwi si aɗeng ima mati ya? 25Na kan kintiɓwi si aɗeng ima kati kwa, ka wa ka'ti agung yes myan ima ka wa wisi.

26Andi hwak, Rin bum kan saa ti to amukan. Ka shang ngga' ima ɗat ka fwal DeeƁwe ta kwa, ɗak Rin ti haisus ma fwal ti DeeƁwe ɓur sikan ti ndus ima findelal si ndok si lak kwa. 27DeeƁwe ima benya mulwat amukan shang ambe' i Rin, ɓurti Rin ma fwal ɓurti som i sapai ta ngga' ima DeeƁwe ma ɓweti ta.

Ka Ɓin Som i Cwaiti Uges

28Hu ka shangi nyai, saa ti shak ɗamam, DeeƁwe mas ro ɓurti maɗesi si som ima si ɓwetus, ima laiyus ta ngga' ima ma ɓweti ta. 29Som ima ai DeeƁwe ben, a sin ɗak tus ɓa si zan matɗing i Al ames, ɓa u te ii Al i bya' na saa ti shunus muhyangi. 30Hu som ima DeeƁwe benusi, a sin laiyus hwak, som ima laiyusi, a sin kinus mute manderei, som ima kinus mute manderei yi, a sin fas cinjangat ames hwak.

31Ami ka wa laki si aɗeng mai hai ya? Na DeeƁwe a amukan, awe ndok u zan wei ti kan ya? 32Yis ima sha Al ames kwa, fa ɓur sikan shak. Unai yis DeeƁwe ima fa kan Al amesi, ma wa fasikan mal i ɗamam shak gilik kwa haa? 33Awe ma wa yes ti puɓwar nin si som ima DeeƁwe beni ya? A DeeƁwe ma fati mute manderei. 34Awe ma wa lef sikan ɓur ya? A Yeso Kristi ima mot, ima ɓin ani luk fit ti mupwet, ma mute ta ra i ucwa i DeeƁwe, yis fwal ti DeeƁwe ɓur sikan hwak. 35Awe ma wa ɓel sikan ya tasi matɓwet i Kristi ya? A shaal, ahun a shum ya? A tirim, ahun a hwem ya? A mute ambwiriti, ahun a mute mujuwi fo, ahun a bakam ya? 36Fota ngga' ima si worong,

“A ɓursa ni ta fo i mot wi ngang,

si zan nin fota tutwai i wa lefi.”#8:36 Ɗing huni hwak: Nak 44:22.

37Wayou, saa ti mii ɗamami shak, ka ɓin som i cwai ti uges saa ti yis ima ɓwet kan. 38I ɓwet nyai, a mot hu apwet, ahun a som lu' i DeeƁwe hu rinan mufwashani, ahun a mwashi hu yes wei, ahun a nin andoki, 39ahun a sisyat hu kinggyongat, ahun a ɗama nin akat na saa ti ɗamam ima DeeƁwe lan shak, si ndok ɓa si ɓel kan ya tasi matɓwet ima DeeƁwe mati ɓur sikan ta wii i Yeso Kristi Deembai amukan kwa.

Currently Selected:

Rom 8: AlisIRonNT

Highlight

Compare

Copy