Rom 11
11
Anggum i Ɗufal i Isar'ila
1I mati lul, DeeƁwe nggwes ti ɗufal ames ndai haa? Wayou! Yin ti haisun a maɗufal i Isar'ila, wash i Ibirai, ta gung i Benjamen. 2DeeƁwe nggwes ti ɗufal ames ima ben tasi bya' kwa. Ahun hu shang aɗeng ima worong lak si Iliya hai kwa waak? Ima ni, Iliya wa ti kawa ta kyel i DeeƁwe si Isar'ila hai, ni, 3“A Deembai, si fwar som i shit amai ya, si nggwal kikyal i nyesh ti mal amai ya. Ayin andek je i kat na, si farsun ɓa si forun ya.”#11:3 Ɗing huni hwak: 1Ka 19:10-14. 4DeeƁwe nyus amiya? “I ɓwaf haisun ɗufal nggal pyoron na (7,000), ima si shu i mafwaran ta wei i Ba'al kwa.”#11:4 Ɗing huni hwak: 1Ka 19:18. 5Andi hwak, mwashi kati ɗufal ndyong ima si kat na, ima DeeƁwe ben ɓurti mal maɗesi ames. 6Na a ti mal maɗesi, unai hum mute ii ta kyel i ro kwa. Na andi, mal maɗesi hum mute ii mal maɗesi kwa.
7Ami ndai ya? Isar'ila si dun aɗeng ima si fari shishat mandu' si wisi kwa, anggum ima DeeƁwe ben si wisi, shini si njeng na hihai. 8Fota ngga' ima si worong,
“DeeƁwe kinus rin i maɓing hai,
fas shishat ima ka si ɗing ti kyel kwa,
hu mwal ima ka si hal ti findel kwa,
yes kwai.”#11:8 Ɗing huni hwak: Muh 29:4; Ish 29:10.
9Devid hwak ni,
“Ɓa got ames u te ii hum,
hu munggi' ima u sanggalus,
hu afung ti bukat, hu ɓur wa kyel ames.
10Naɗin shishat ames u tehus ti maɓing
ɓa si mba ɗing ti kyel wet,
Manggiring ames u lwish
yes myan hu myan.”#11:10 Ɗing huni hwak: Nak 69:22-23.
Yit tima si Sok sinin Hai
11I ti lul ii hai, Isar'ila si bukat si fur ɓa si katus ta a vit haa? Wayou! Fo i mandi, a ɓurti mafwashi ames, bum yes kyel i Ramam ɓa Isar'ila si mas nadon ti sin. 12Na mafwashi ames kol naya ramwayat, ɗak to ames kol Ramam ramwayat hwak, mbe' hun mute hyang i ramwayati ma wa mute atini na si humkyel ya!
13I ma findelsu a hun Ramam. Yin a mamuro wa kyel i Ramam, i pati ajin ti ro amen a mai. 14Ti masi ati i kintiɓwi nyai, ɓa som amen Isar'ila si mas nadon ti shini, ɓa si wis bum. 15Myan ima DeeƁwe nggwetus, fisel matɓu ɓa ɗufal i naya si shwai hu DeeƁwe. Na DeeƁwe mat som Ju hee? A wisti mupwet ta mot ndai kwa waak? 16Na ɓwai i han ima si fa fota i bya' yis ti sapa, kof ndai hani shak mati sapa. Na sisyar i yit yis ti sapa, andi hwak shak rai mati sapa.
17Hun Ramam, hu ma fota ra i fati i ya ima si sok tasi fati ti wur. Hu zan kyel i ra ima si tyal ya tasi yiti hai. A ɓurti mai, hu wo ham tasi sisyar i yiti hai. 18Kan hu pa ajin nyai, hu ɓin ra ima si tyal ya ani kwa. Na hu pati ajin mbe' hun, a hun hu ɓweng ti sisyari kwa, a sisyari ma ɓweng su. 19Ha wa nyai, “Ai si tyal rai ya ɓa si sokun tasi gungi.” 20Andi hwak, si tyalus ya tasi gungi hai a ɓurti si fa mwawei kwa, ha, ha mangra si gungi hai a ɓurti fati mulut ama. Ɓurti andi, kan ha pa ajin kwa, Teha ii ma myanat. 21Ɓurti na DeeƁwe hon ra mundyasi si gungi hai kwa, ma wa honsa ha kwa hwak.
22Ɗinga maɗesi i DeeƁwe hu mute kpesheshesh ames. Te kpesheshesh si som ima si fur, kof maɗesi ames yes kyel ama, na ha cu wei ta maɗesi ames wi. Na andi kwa, si wa telsa ya hwak tasi gungi hai. 23Na Isra'ila si cu wei ti fati mwawei, si wa soksus tasi gungi, ɓurti DeeƁwe ndok u humtus tasi gungi hai. 24Andi hwak, hun Ramam ima si telu ya tasi yit ti fati ti ya hai, ɗak si soku tasi fati ti wur hai, ma wa mute ti mbwesh ɓa u hum sok ti yit ti fati mundyasi tasi gung asut hai hwak.
Si wa Bum ti Isar'ila Shak
25A shunun, i ɓweti hu shang aɗeng ima mata mufot wi, a ɓurti kan hu ngye na hihai. Isar'ila si njeng na hihai ti ɓwayaiyi, ɗak hya i Ramam ima si wa mulang ta hya shak. 26Andi Isar'ila shak si wa wis ti bum. Fota ngga' ima si worong,
“Ma abum ma wa yes ta Zayon,
ma wa zan ti mafwashi ya ta kyel i Jakop!
27A mai mii dakwa amen tikul hu sin
myan ima i zan mafwashi ames ya.”
28Ɗufal i Isar'ila hyang mwashi a som i ha' ti wei ti Muro Maɗesi, a yis kin Ramam si cu mwaiyi. Shak ta andi, sin a ɗufal ima DeeƁwe ɓwetus ɓurti ben washash mbayai ames Ibirai, hu Aizik, hu Jakop.#11:28 Ɗing huni hwak: Ish 59:20-21; Ish 27:9; Irm 31:33-34. 29Ɓurti DeeƁwe dwal mal hu lai ames ya kwa. 30Ai hun Ramam hu nggyu i hal ti DeeƁwe, myan ima Isar'ila si nggwes i hali, mwashi hun hu wis gu'ti ashur ɓurti munggwya i hali ames. 31Andi sin hwak si nggwes i hali, ɓa sin hwak si mat gu'ti ashur, ɓurti gu'ti ashur i DeeƁwe yes kyel amu. 32Ɓurti DeeƁwe no' ɗufal shak tasi munggwya i hali ames, ɓa u gu'us ashur shak.
Nakwai wa kyel i DeeƁwe
33Awinoo! Kinggyongat i ramwayat,
hu piris, hu shangi i DeeƁwe!
Ɓur ames ɓin njeng ɓa maɗufal u bene,
fiselal i masti ɗamam ames
si ɓin njeng i shangi!
34“Awe shang ambe' i Deembai ya?
Ahun, awe mii mwes i taɓak ya?”#11:34 Ɗing huni hwak: Ish 40:13.
35“Awe fa DeeƁwe ahof i ɗama
ima ma ɓweti DeeƁwe
u humus ti kyel ya?”#11:35 Ɗing huni hwak: Ayu 41:11.
36Shak ɗamam si yes ii ta kyel i Deembai,
si mas shak ɗamam a ɓursus,
si wa muhumkyel ta kyel ames.
Cinjangat i myan hu myan wa kyel ames! Aandi.
Currently Selected:
Rom 11: AlisIRonNT
Highlight
Share
Compare
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
