Filemón 1
1
Pablo rliidz'tzawi'e Filemón
1Neda Pablo nadzuuna liidx'gia, nia'a kie' Cristo Jesús, dzaaga'bi bi bë'chi'ru Timoteo rliidz'tzawi'tu li' Filemón bënni nadxi'i'tu len run'ru dxin tuuz, 2lekz'ka' rliidz'tzawik'tu'ne bënni tayajle'ke Le' Cristo tudzaage liidxu, nguul zan'ru Apia len Arquipo, bënni lza'a'tu lu dxin kie' Xan'ru. 3Xuuz'ru Dios len Xan'ru Jesucristo uzalaadxe'e kieeli yëla rak'len kie' len yëla rë'dxi.
Yëla dexhken len yëla ratayu
4Kati rui'leena'ne diidza Dios rajnei'da li' len rui'a'ne yëla dexhken, 5ka nak le ryëën'da ki yëla nadxi'i kiu' len yëla rajle' kiu' le rlui'o len Xan'ru Jesús len lekz'ka' len yugute'ke bënni nakik'de ki yëdz la'ay. 6Len rnaab'da'ne Dios ki le li' ruunu lu yëla rajle' kiu' kche' li' umbe'u gdu'te le dxia'a le gunn gun'ru lu yëla nadxi'i kieeru Le' Cristo. 7Rudziiji'tzki'da len rtip laadxa'a ki yëla nadxi'i kiu', koma li' bë'cha'a bui'xhëënu laadxi'dau'ke bënni nakik'de ki yëdz la'ay.
Pablo ratayue' kie' Onésimo
8Lena'a, zala napa lsenz lu Le' Cristo gnabe'i'da li' le rala guunu, 9ratayuil'da li' lu yëla nadxi'i. Neda Pablo, chi naka bënni guul, len na'a nadzuuna liidx gia nia'a kie' Le' Cristo Jesús, 10rnaab'da li' gak'leenu'ne Onésimo, le naka ka xuuze lu yëla rajle' Dios lu liidx'gia ni.
11Zia'a Onésimo ti lzaki'de, na'a chi zaki'de kieeru grop'ru. 12Na'a rusë'la'ne kiu', zala ti rdzaan'da'ne. 13La bikida jga'an'leene neda niiz, naar gak'leene neda ulaaz kiu' tzal nadzuuna liidx'gia nia'a ki diidza la'ay. 14Ti re'en'da bi guuna xhki li' ti gunnu lsenz, naar klen le guunu kia' ti nak le gdayë'li'da li', re'en'da guunu gdu laadxu'u. 15Naxhka Onésimo pka'ane li' tuchi'i naar jga'an'leene li' tzalzu, 16tir gake ka bënni nado'u'e, gake ka bënni bë'chu'u nadxi'i'du, neda nadxi'i'tzki'da'ne, li' rala gdxi'ir'du'ne keg ka nadxi'iz lza'a'ru ro'u bunach lekz'ka' ka bënni bë'chu'u lu yëla rajle' len Xan'ru.
17Xhki ba rak'du neda ka bënni bë'chu'u lu yëla rajle', gxhi'e ka'kz ka rzi'u neda. 18Xhki bi psake'e li' le ku nak, xhki bi rale'e kiu', pkiixhj neda. 19Neda Pablo rzooja le ni rnia' ni, neda ugiixhja, zala gunn'kz gnia' kiixhju li', koma li' rala'kzu kia' yëla naban kiu'. 20Ka nak bë'cha'a rnaab'da li' guunu kia' klen lu yëla nadxi'i kiu' Xan'ru; bui'xhën laadxi'dau'a le rak bë'chi'ru len Cristo.
21Rzooja kiu' le nëëz'da rzenaagu, len nëëz'da ki guunu ye lati'r ka nak le rnaab'da. 22Len lekz'ka' bpa'a ga gdxiina, rbëëza Dios gunne latj duyua' lbi'ili, ka rnaabi'li'ne Dios.
Rzeide diidza
23Epafras bënni dzaaga'ne liidx'gia ni, nia'a kie' Cristo Jesús, rgape Dios lbi'ili, 24len lekz'ka' le' Marcos, Aristarco, Demas len Lucas bënni tak'leene neda lu dxin.
25Yëla rak'len kie' Xan'ru Jesucristo sua len lbi'ili.
Currently Selected:
Filemón 1: PZD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Biblica de México AC
