Hechos 28
28
Pablo zue' Malta yu le de gatzj'lau'i lu nis xhën
1Kati yugute'tu chi bulátu gnëëzi'tu ki yu de gatzj'lau'i lu nis xhën ni nazi' lei' Malta. 2Bënni nakua'ke lu yu ni glake bënni tzawi len netu; len gulabekie gi' le raal giaj len rak ziaag ati gululiidze netu kuiiga'tu ra gi'a. 3Pablo ptuube tzaxunnj waag biidx len rzale lu gi'a kati tuuba bel' bua'a naxhunji'ba bë' dza'a gdi'in'ba ne'e. 4Kati bënni nakua'ke lu yu ni gulale'i'de'ba bel'a nagi'in'ba ne'e Pablo, te'e lza'a'ke: «Naadx bënni udëëdi bunach nake bënni ni, koma zala bule' lu nis xhën'a, yëla rchuug'be' kie' Dios ti rui' le' latj zue' yëdz'lyu.»
5Ati Pablo gdxiibe ne'e len bzale'ba lu gi'a, len tibi guki'de. 6Yugute'ke tabëëze kë'e gi u ka zue' ka' gatie'; san kati chi guk xhtzei len gulale'i'de ki tibi raki'de ptza' ikj'lau'ke len gulazulau'ke tanáke ki Pablo nake tue' dios.
7Ga'la'z na' nakua' xhyue' Publio tue' bënni blou ki yu ni, le' gdu laadxe'e gxhi'e netu len guk'leene netu tson dza. 8Ati xuuze Publio de' lu da'a, yu'e tuxhla len re'i'de giidz. Pablo yajyue le' len buudx be'leene diidza Dios pxua'ne'e le' len buune le'. 9Len le ni guk ni, gliide lekz'ka' bënni we' nakua'ke lu yu de gatzj lau'i lu nis ni, len gulu'ueake. 10Glak'leen'tzke netu bënni ni, len kati bugie'la'tu barku le yubl, glunne yugute' le nayaadzji'tu ki tzui'i'tu nëëz.
Pablo rdxiine Roma
11Kati guk tson beu' zua'tu lu yu de gatzj'lau'i lu nis xhën buben'tu tu barku kieke bënni Alejandría le bga'an ni' tzal gdëëd beu' bë'gi', barku ni nua' lau'rua'a'ke dios Cástor len Pólux. 12Bdxin'tu ra nis ki Siracusa, len ni' bga'an'tu tson dza, 13na' bugie'la'tu nëëz len bdxin'te'tu Regio. Bueikj dza'a gzua bë' za' dxi'il, len bueikj dza ka' bdxin'tu Pozzuoli, 14ni' yajxakak'tu'ne la'ke bënni bë'chi'ru len gluune ga bga'an'leenk'tu'ne tu seman; len chi nak'r ka' bdxin'tu Roma. 15Bënni bë'chi'ru chi nayëën'kde kietu lena'a gularooje dutzaag'ke netu latj nazi' lei' Ye'i kie' Apio len latj nazi' lei' Tson Yu'u ga tadxiine bënni dzë'ë'ke nëëz. Kati Pablo ble'i'de leke be'e yëla dexhken Dios len butip'laadxe'e. 16Kati bdxin'tu Roma gulunëëdzje lsenz zue' kieeze Pablo len tuuze bënni riije gdil gui'laadxe'e le'.
Pablo zue' Roma
17Guk tson dza bdxiine Pablo psë'le'e nu tzajliidz leke bënni blou ki Judea nakua'ke Roma. Kati chi nudzaag'ke, gudxe leke:
—Bë'cha'a, neda tibi nuuna kieke bënni Judea len lekz'ka' ki le naleeb'kde tuune xuuz'xhtau'ru guul, san Jerusalén guludëëde neda lu naa'ke bënni Roma, 18bënni ni buudx gulunaab'yuudxe neda gle'en'de lusan'ke neda koma tibi guludzëël'de nuuna le nak bach si'a yëla gut. 19San bënni Judea ti gle'en'de, ati de ki bnaaba ki bënni'a rnabe'e yëdz'lyu kchuug'be'e kia', zala keg nuuna bi gdxia'ka'ne xhgia' bënni laadza. 20Lena'a bliidza lbi'ili naar gle'i'da lbi'ili len gui'leena lbi'ili diidza; koma nak nia'a ki lëëz kieeru le nap'ru ro'u bënni Israel le nuzua neda ni len nuuga'ke neda du gia.
21Leke gulanake:
—Tibi gich rdxiini kietu le za' Judea ki le rak kiu', lez gat'ga rdxin'de bënni bë'chi'ru ze'e Judea gne' kiu' diidza le ku nak. 22San re'eni'tu gyëëni'tu bixh rza' ikj'laadxi'dau'u, koma nëëzi'tu ki gdu yëdz'lyu tanéke le ku nak kieke bënni rajta'ke nëëz kub ni.
23Na' gulabë'xhbei'de tu dza kati gliide zian bunach dujyu'ke Pablo ga le' naga'ane, len gdu dza Pablo be'leene leke diidza ki yëla rnabe' kie' Dios. Gu'un'de guune ga lazi'ke Jesús len diidza nayoj lu xhba kie' Moisés len le guluzooje bënni glui'ke diidza ulaaz kie' Dios. 24La'ke gulazi'ke diidza rue'e Pablo, san ye la'ke ti gulayajle'ke. 25Ati le ti bdzaag kieke, gulazulau'ke tuza'ke. Ati le guudx'ze leke Pablo nak:
—Blikz'de Bë' La'ay kie' Dios kati be'leene diidza xuuz'xhtau'li guul lu rue'e Isaías len gne':
26“Gyaj len yajëëdx'ke bënni yëdz ni:
Gakati gyëëni'li, ti tzajni'i'li;
gakati gyuuli, ti gle'i'li.
27Koma ikj'laadxi'dau'ke bënni yëdz ni naziid,
nusiaj'ke naag'ke,
len nadzuudi lau'ke,
naar ti gunn lale'i'de len ti layëën'de
len ti tzajni'i'kde;
naar ti lubi'i'laadxi'ke,
len neda ti un'ka'ne.”
28Lena'a rala gnëëzi'li ki na'a sulau'tu tzajua'tu yëla ruslá kie' Dios kieke bënni ti nak'ke bënni Judea, len leke ulayëën'de. 29[Kati buudx gne' ki Pablo, bënni Judea tadil'tzka'ke diidza guluza'ke.]
30Chop iz bga'ane Pablo yu'u ga rgiixhje zue', len yugute'ke bënni rajyu'ke le', rzi'e leke. 31Len yaalj'lulu rgixhjë'e yëla rnabe' kie' Dios, len rseed'de le rak kie' Xan'ru Jesucristo len nutunu rzaaga le'.
Currently Selected:
Hechos 28: PZD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Biblica de México AC
