Yezsuzyaq 3
3
Dij Goanz Yixsowhleh Kamj Ka dah Yezdanq
1Nawlaeng zaeux, Yezsuzyaq dwnq maz, lingz daengzle dij goanz Yixsowhleh ni Sehtinh, maz taeng ka dah Yezdanq, zoq yuq dih naeh ndowj, zunxbiq kamj dah. 2Gvaq ndaej sam vaenz, puj saeq daeq daengz dih dij goanz Yixsowhleh ndowj naeh nauq, 3paenqdix saengq dij goanz Yixsowhleh: "Gaenqsu leztaen ngah Liqvaeq boangx puj mbud dij Sen naeh tam aen gvih Yez'hoahhuah dij Sen su daeq mwz naj zwzrawz, gaenqsu goj zaemh ni dih su ndowj naeh, nowngz aen gvih dij Sen mwz. 4Ka loh naeh gaenqsu mboq sanz ndaej daeq, baenzzaqnaeh gaenqsu daeq nowngzlaeng aen gvih dij Sen, gaj laek daj aen gvih liq dungzzawj lai, dungzliq teq song liz ux naeh. Hoakzaqnaeh zux ruxndeq hoj daeq ka rawz."
5 Yezsuzyaq daj dij goanz Yixsowhleh hax: "Vaenzbig Yez'hoahhuah hoak sowh saeh mboq sanz taen naeh hawj su lez, baenzzaqnaeh, gaenqsu hawj hoakri saw oj." 6Vaenzlaeng Yezsuzyaq daeuq nemz puj mbud dij Sen: "Gaenqsu tam aen gvih dij Sen daeq daekgoanq daengzle." Yaq paenqdix zoq tam aen gvih dij Sen daeq daekgoanq daengzle. 7Yez'hoahhuah daj Yezsuzyaq hax: "Daeq vaenznaeh mwz, gux hawj mawz yuq doqnaj dij goanz Yixsowhleh zawh goanz ux, hawj paenqdix aeu mawz hoak dwx, hoakzaqnaeh paenqdix zoq ruxndeq gux hoakzaqrawz daj Moahciz zaemh yuq, gux goj hoakzaqrawz daj mawz zaemh yuq. 8Mawz hoakzaqnaeh saengq puj mbud dij Sen sowh puj tam aen gvih naeh: ‘Gaenqsu bae taeng haenz dah Yezdanq gaurawz, yamq bae ndaw dah Yezdanq in.’" 9Yezsuzyaq daj dij goanz Yixsowhleh hax: "Gaenqsu daeq maz zawj, biak kauq Yez'hoahhuah dij Sen su. 10-11Zaeuj now ndin naeh, aen gvih dix daeq daekgoanq su, kamj ka dah Yezdanq gaurawz, gaenqsu zoq ruxndeq dij Sen jing naeh daj su zaemh yuq, goj ruxndeq dix toj daem dij goanz puj Zaznanh, dij goanz puj Howx, dij goanz puj Cizvaeq, dij goanz puj Bixliqcix, dij goanz puj Gowhzazsax, dij goanz puj Yaqmoahliq, dij goanz puj Yezbuqsez, daem paenqdix ni doqnaj su. 12Gannaeh gaenqsu lowg sipngih ngah Yixsowhleh, ngah ux goanz ux. 13Puj mbud dij Sen tam aen gvih Yez'hoahhuah Zaeuj now ndin naeh, din paenqdix daeh yamq bae ndaw dah Yezdanq gaurawz, naemx zoq yuq koax baihnow aengj baenz zaq bowng'jingz naeh, naemx koax baihdawj zoq laenj nauq."
14Zwz dij goanz Yixsowhleh ni dih paenqdix daengj zangjpungh naeh, bae kamj dah Yezdanq naeh, puj mbud dij Sen tam aen gvih dij Sen daeq daekgoanq daengzle. 15Zwz naeh zawh zwz caeu kaeujpyaek, naemx dah Yezdanq laij maz song haenz. Puj mbud dij Sen tam aen gvih dij Sen, din paenqdix daeh yamq bae ndaw dah, 16naemx ndaw dah zoq kawq nauq, naemx yuq baihnow dih Yaqdangz chaenh naeh aengj baenz zaq bowng'jingz naeh, Yaqdangz chaenh yuq haenz Saxlazdanq chaenh, liq dih paenqdix kamj dah naeh gvae yaengh gvae. Sowh naemx lae bae aen haij Yaqlazbaz naeh zoq laenj nauq, aen haij Yaqlazbaz goj rongx hoak Haijgow. Yaq dij goanz Yixsowhleh zoq yuq dih doiqfaeg Yezliqgoz chaenh naeh kamj dah. 17Naemx ndaw dah kawq nauq, puj mbud dij Sen tam aen gvih Yez'hoahhuah in zang dah. Paenqdix in zang dah taj daengzle dij goanz Yixsowhleh gvaq dah nauq.
Currently Selected:
Yezsuzyaq 3: ZHN
Highlight
Share
Copy
Want to have your highlights saved across all your devices? Sign up or sign in
© 2023, Peace Publishing Co. All rights reserved.
