Ni Aizjih 23

Baenzrawz Zoq Hax Rawz

1Mboq jinx moakndai daenh, goj mboq jinx daj puj mbowq hoak boangx ndeu moakndai daenh. 2Mboq jinx nowngz goanzlai hoak gaenqndog. Gawz daj gawz mizsaeh, mboq jinx howj baih miz dij goanz lai nyeuz naeh, baih rawz hoj zoq hax baih rawz hoj. 3Puj luk daj daenh mizsaeh, mboq jinx cholaeng dix baenzluk ej howj dix.

4Jixzawh mawz mex dij moaz rux dij loix sowh puj daj mawz dungzhwnq naeh loang loh, mawz hoakrawz goj yauq zung maz hawj dix. 5Jixzawh mawz leztaen dij loix sowh puj hwnq mawz naeh zoah dah naek dip, mboq jinx yumq daeq ni, mawz hoakrawz goj yauq daj dix zaemh yaeuj dah.

6Pujluk daj daenh mizsaeh, mboq jinx cholaeng dix luk ej mboq tw'piang. 7Mboq jinx moakndai daenh, mboq jinx kaj sowh puj mboq hoak hoak loang gaeng naeh daj sowh puj gaemz hax mboq miz naeh, unj gux mboq rux aeu puj mbowq hoak puj ndae. 8Mboq jinx aeu jenz dungz'oat, unj aeu jenz oat rux hawj sowh puj ndaej taen naeh hoakdoi mboq ndaej taen, hawj kauq puj swh baenz kauq zaj.

9Mboq jinx vazkuz sowh puj maz haenz su ndowj naeh, daengz gaenqsu goj ndaej yuq ndaw Aizjih dih daenh ndowj, su ruxndeq yuq dih daenh ndowj ndaw zaw baenzzaqrawz.

Bi Cednoiq Daj Vaenz Cednoiq

10Choak bi ndaem naz ndaem raeh, caeu kaeujpyaek, 11gaj bi daih jiat cednoiq, hawj raehnaz mowz, mboq mbaeg mboq ndaem, hawj sowh puj luk yuq haenz su ndowj naeh goj miz jin. Gaenq paenqdix jin low naeh hawj do'bo jin. Sown maegkaeu'it daj sown maeghit goj zawh hoakzaqnaeh hoak.

12Choak vaenz hoak gaengx, gaj vaenz daih jiat cednoiq, hoakzaqnaeh hawj dij moaz mawz daj dij loix mawz ndaej cednoiq, hawj sowh lug zaiz yah mez koij mawz naeh daj sowh puj maz haenz mawz ndowj naeh ndaej cednoiq ixux.

13Suq gux daj su hax naeh, su gaj yowngh gaj caqsiq biak, mboq jinx vanz dij sen ndai, daengz minxzwh paenqdix naengz laek laemh, laek koanx.

Sam Mbaed Jeng Baenz Gaem Naeh

14Bi ux gaem sam mbaed jeng biangz gux. 15Gaem Jeng Mboq Miz Fahfaenx naeh, ndown Yaqbih,#23:15 Yaqbih zawh minxzwh ndown, zawh rownzsaeq ndown sam ndown siq zoq zawh ndown gux lingz su daeq Aizjih og daeuj naeh, hoakzaq gaenq gux yaix naeh, jin binx mboq miz fahfaenx jiat vaenz, mboq jinx mungz byaeuq maz biangz gux. 16Baeuh daengz bi, sowh zwz kaeujpyaek hiamq baenz caeu naeh gaem Jeng Kaeuj Mawq, caeu kaeujpyaek ndae yaq zoq gaem Jeng Aeu Nyaengx.#23:16 Jeng naeh laeng maz rongx hoak: "Jeng Ndowj Zangjpungh." 17Sam mbaed jeng naeh, puj zaiz gaj goanz gaj mwz biangz zaeuj Yez'hoahhuah.

18Mboq jinx aeu sowh lowd doihdo aeu mbud gux naeh daj sowh binx miz fahfaenx naeh zaemh mbud gux, goj mboq jinx hawj sowh yuz doihdo aeu mbud gux naeh leux taeng nawlaeng.

19Ndaw naz ndaw raeh mawz, sowh kaeujpyaek hiamq baenz naeh ijrawz yawz nyeuz aeu ijrawz mwz ndaw rownz Yez'hoahhuah dij Sen mawz.

Tung dij mbej ix gaurawz, mboq jinx aeu naemx zuj meh dix tung.

Bin Dij Sen Lingz Dij Goanz Yixsowhleh Mwz Zaznanh

20Gux haxdoq su, gux yaix bin gux bae doqnaj su, yuq ka loh yaz su, lingz su mwz dih gux aeu nyaengxtaj su naeh. 21Dix zawh biak kauq gux bae, baenzzaqnaeh gaenqsu yuq doqnaj dix yauq caqsiq hem, biak kauq dix, nowngz dix hoak, jixzawh su mboq biak kauq dix, mboq nowngz dix, dix zoq mboq yangq su.

22Jixzawh su biak kauq dix, hoakzaq gux yaix naeh, gux zoq saeuh sowh puj maz saeuh su naeh, dix sowh puj dix su naeh.

23Bin gux yuq doqnaj su daeq, lingz su mwz dih puj Yaqmoahliq, puj Howx, puj Bixliqcix, puj Zaznanh, puj Cizvaeq, puj Yezbuqsez yuq naeh, gux ndaep paenqdix. 24Mboq jinx gvih dij sen paenqdix, mboq jinx mbud dij sen paenqdix, mboq jinx nowngz paenqdix hoak, lid sowh gaenq kaeuz dij sen paenqdix naeh vaih, duaiq sowh saeu kaeuz dij sen paenqdix naeh nownz. 25Gaenqsu mbud daj biangz Yez'hoahhuah dij Sen su, dix zoq hawj su miz kaeuj miz naemx, dix goj hawj aen chaej ni su. 26Dih su yuq naeh, gux hawj puj nyingz gaj goanz gaj rux rungj lug, gux mboq hawj lug gawz tai ndaw dongx, gux hawj to'bi su daem. 27Su mwz taeng dih rawz, gux zoq hawj dij goanz dih rawz mbu, hawj sowh puj daj su hoak dangqbaih naeh ueqlaeng lenh ni, lenh daengz mbaedyamq mboq aeu nauq. 28Gux yuq doqnaj su yaix dij doqgvax daem puj Cizvaeq, puj Zaznanh, puj Howx lenh ni. 29Gux hawj paenqdix goq ban ban, gaj bi doag gux mboq hawj paenqdix ni dih gux aeu nyaengx hawj su naeh nauq, yaj dih naeh baenz doanghmowz, miz do'bo lai gvaq, haiq zoah su. 30Gux hoj sanq hoj daem paenqdix ni, taj taeng dij goanz su lai zwzrawz, dihnaeh daengzle zoq byenqbaenz dih su nauq. 31Goh su zawh daeq Haijndiang mwz taeng haij Faezliqseq, daeq ndaw doanghmowz mwz taeng ka dah Yaeuqfahlazdix. Gux aeu dij goanz dih naeh nyaengx maz dawj mungz su, su daem paenqdix ni. 32Mboq jinx daj paenqdix, daj dij sen paenqdix dungzdingq gaeng. 33Mboq jinx paenqdix yuq dih su ndowj, yaj paenqdix hawj su hoak loang gux. Jixzawh su mbud dij sen paenqdix, su zoq gaj laeng gaj loang ndaek.

Currently Selected:

Ni Aizjih 23: ZHN

Highlight

Copy