Ni Aizjih 21

Hoakrawz Doiq Puj koij

1"Mawz yuq doqnaj dij goanz Yixsowhleh haxdoq suq goizdingq inxnaeh: 2Jixzawh mawz swx dij goanz Cizboahlaiz maz hoak puj koij, dix kvej hawj mawz choak bi. Taeng bi daih jiat dix zoq ndaej og bae daengzhwx, mboq yungq aeu gaeng boiz mawz. 3Jixzawh dix zawh goanzdoag maz, zoq hawj dix goanzdoag og bae, jixzawh dix miz mijmez, zoq hawj mijmez dix daj dix zaemh bae. 4Jixzawh zaeuj dix aeu mez hawj dix, mijmez dix zowngx lug, hoakkoij mowd zwzrawz, dix goanzdoag haeggaj ni, mezlug dix zawh gaenq zaeuj dix. 5Jixzawh goanz puj koij naeh hax: ‘Gux ngaiq zaeuj gux daj mezlug gux, mboq venq ni,’ 6zaeuj dix zoq yauq zowz dix mwz dih puj saeq naeh, hawj dix yuq haenz du rux yuq haenz saeu baegdu in, aeu maegnix mboangq chu dix ruz ux, goanz puj koij naeh zoq kvej zaeuj dix daengz zohgoanz.

7"Jixzawh miz goanz kai lug nyingz hawj daenh hoak puj koij, goanz puj koij nyingz naeh zoq mboq daj puj koij zaiz dungzlumj ndaej og bae. 8Jixzawh zaeuj dix aeu dix hoak puj nyingz hoakri, gaj doaklaeng mboq ngaiq dix, zoq hawj rownz puj koij nyingz naeh aeu jenz maz taeq dix dauh bae. Zaeuj dix haeuz mboq hoak sownq hoakri, baenzzaqnaeh mboq hawj zaeuj dix aeu dix kai hawj puj yowngh ndai. 9Jixzawh gawz swx puj koij nyingz zawh swx maz hoak puj nyingz lug zaiz hoakri, dix zoq baenz hoakzaq doiq lug nyingz hoakri naeh doiq dix. 10Jixzawh goanz ux raep puj koij nyingz hoakri, gaj doaklaeng dix daeuq raep goanz mawq, mwznaj dix goj naengz baenz aeu gaenqjin, gaenqnungh hawj goanz nyingz naeh, mboq jinx cauz, goj naengz baenz daj goanz nyingz naeh zaemhnoanz. 11Jixzawh goanz zaiz naeh mboq hoak sam yowngh naeh, goanz puj koij nyingz naeh zoq ndaej og bae daengzhwx, mboq yungq aeu gaeng boiz.

Kaj Goanz Rux Dup Goanz Hoj Hoakrawz Hoak

12"Jixzawh gawz dup dij goanz dup daengz tai saw, gaenqsu zoq hoakrawz goj hawj goanz kaj goanz naeh tai. 13Gajlej jixzawh dix mboq zawh biab taj, mboq zawh dajndij kaj goanz, zawh dij Sen hawj goanz tai naeh tai dawj mungz dix, goanz kaj goanz naeh zoq hawj gowx mwz dih gux aeu hoak dih gowx naeh. 14Jixzawh goanz ux dix zawh daz ndae'ndowq kaj goanz, daengz dix lenh gowx mwz dih aen kuq aeu mbud gux naeh goj laeg dix daeuj kaj.

15"Gawz dup bohmeh, gaenqsu zoq hoakrawz goj hawj dix tai.

16"Gawz longx dij goanz, gaenqsu zoq hoakrawz goj hawj dix tai, mboqgvanx sowh dij goanz dix longx naeh kai yaq rux naengzbaeq aeu kai.

17"Gawz mang bohmeh, gaenqsu zoq hoakrawz goj hawj dix tai.

18"Jixzawh miz dij goanz dungzdup, goanz ux aeu tin rux aeu gvenz saeuh goanz ux, naengz mboq tai, gaj chaej naek noanz ndaw tanj, 19doaklaeng jixzawh goanz ndaej chaej naeh dwnq baenz, luz maexdaeux yuq baihnog daeq baenz, goanz dup naeh zoq mboq miz gaeng saeh, gaj aeu jenz hawj goanz ndaej chaej naeh hoak vaenzriangz, yaq ya goanz ndaej chaej naeh ndae sawrik.

20"Jixzawh gawz aeu maex saeuh puj koij zaiz rux puj koij nyingz, hawj puj koij daengz tai dawj mungz dix saw, hoanx naeh dix goj zoah chaenxfah mboqyaq. 21Gaj jixzawh goanz puj koij naeh naengz zaeu saek vaenz song vaenz, zaeuj dix zoq mboq miz raeng saeh. Unj, goanz puj koij naeh zawh dix aeu jenz swx maz.

22"Jixzawh gawz daj gawz dungzsaeuh, bog zoah puj bazlug, hawj lug ndaw dongx goanz bazlug naeh zowngx daeuj, gaj doaklaeng mboq baenz rawz, goanz bog naeh zoq boiz jenz. Po goanz bazlug naeh daj puj saeq dungzlaemh yaq, aeu gajrawz jenz, goanz bog naeh zoq aeu jenz hawj po goanz bazlug naeh. 23Jixzawh baenz rawz, goanz bog zoah daenh naeh zoq aeu mingh lwh mingh, 24aeu ta boiz ta, aeu faenz boiz faenz, aeu mungz boiz mungz, aeu ka boiz ka, 25byoaz boiz byoaz, chaej boiz chaej, dup boiz dup.

26"Jixzawh miz goanz saeuh puj koij zaiz dix ta ux, rux saeuh puj koij nyingz dix ta ux, hawj ta'mbud, zoq zoangq goanz puj koij naeh hoak gaenq boiz ta dix. 27Jixzawh gawz dup faenz puj koij zaiz dix doak saek saenj, rux dup faenz puj koij nyingz dix doak saek saenj, zoq zoangq goanz puj koij naeh hoak gaenq boiz saenj faenz dix.

Doihdo Haeuj Dij Goanz Tai Hoakrawz Hoak

28"Jixzawh dij moaz haeuj puj zaiz rux puj nyingz tai, gaenqsu zoq hoakrawz goj aeu tin saeuh do moaz naeh tai, mboq hawj jin nowx do moaz naeh, gaj zaeujmoaz mboq miz raeng saeh. 29Jixzawh do moaz naeh koax daekgoanq kwnz haeuj zoah dij goanz, daenh goj haeuz ndaej daj zaeuj do moaz naeh hax yaq, gaj zaeuj moaz naeh naengz mboq caqsiq puk, hawj do moaz naeh haeuj zoah puj zaiz rux puj nyingz tai, zoq aeu tin saeuh do moaz naeh tai, goj aeu tin saeuh zaeuj moaz naeh tai. 30Jixzawh yaix zaeuj moaz aeu jenz maz lwh mingh dix, aeu gajrawz dix zoq hawj gajrawz. 31Jixzawh dij moaz haeuj zoah lug zaiz daenh, rux haeuj zoah lug nyingz daenh, goj zawh hoakzaqnaeh hoak. 32Jixzawh dij moaz haeuj zoah puj koij zaiz daenh tai, rux haeuj zoah puj koij nyingz daenh tai, zaeuj moaz zoq aeu samsip cowxkowhlowh#21:32 Cowxkowhlowh ux naek song jenz lai. ngaenz hawj zaeuj puj koij, goj aeu tin saeuh do moaz naeh tai.

Doihdo Dungzhaeuj Tai Hoakrawz Hoak

33"Jixzawh gawz aj baeg mboq, rux mbut mboq yaq mboq dingz baeg mboq, yaq hawj dij moaz rux dij loix daenh doak bae ndaw dix, 34zaeuj aen mboq aeu ngaenz boiz hawj zaeuj moaz rux zaeuj dij loix, do tai naeh hawj hoakri dix.

35"Jixzawh dij moaz gawz haeuj zoah dij moaz daenh, hawj dij moaz daenh tai, song baih zoq aeu do moaz naengz zaeu naeh kai, dungzbaen ngaenz, do tai naeh goj dungzbaen. 36Jixzawh koax daekgoanq gawz ruxndeq dij moaz hoakri ngaiq dungzhaeuj, gaj zaeuj moaz mboq caqsiq lamh, zaeuj moaz zoq baenz aeu dij moaz boiz dij moaz, do tai naeh zoq aeu hawj hoakri dix."

Currently Selected:

Ni Aizjih 21: ZHN

Highlight

Copy