Rut 3
3
Xc'uxul yo'tan Booz
1Te Noemí la yalbey te Rut:
—Cantsil-al, ¿ma bal ja'uc lec te ya jlebat mach'a ya xnujbinat soc, swenta yu'un lec me ya xc'oat a? 2Ya calbat, te Booz, te sts'umbal te animaetic cu'untic te la ajoinbey ta at'el te criadaetic yu'une, ya xbajt' yo'tic ta ajc'ubal ta bay swuyojibal spat cebada, ya xba yic'uy. 3Jich yu'un ya me apas te bila ya calbate: Poca aba, atina perfume, soc lapa bael ta bay mero lec te ac'u'-apaq'ue. Ya me xbaat tey a; ja'uc me to, ma me xawac' yilat te Booz te c'alal ma to xlaj yo'tan ta we'el-uch'el a. 4Ila me awil ta lec te bay ya xbajt' ta wayele. Baan me tey a, jolbeya te yacane, mejts'ana aba tey a. Ya me yalbat awaiy te bila ya apase —xi'.
5La sjac' te Rute:
—Ya jpas spisil te bitic la awalbone —xi'.
6Jich yu'un te Rut bajt' ta bay te swuyojibal spat cebada, jich nix la spas spisil te bit'il pasot ta mandal yu'un te yalib-me'ele. 7Te Booz we'-uch'aj, la yac' ta ilel te bin nax yo'tane. Patil bajt' ta wayel, tey bajt' ta bay busajtic te sbac' cebada. C'alal wayajtiquix ta lec a, c'unc'un nax och bael te Rut, la sjolbey te yacane, la smejts'an sba tey a. 8Wijc' sit ta olil ajc'ubal te Booz, cham nax la yaiy te ay jtul ants metsel ta yacan.
9—¿Mach'aat a? —xi' te Booz.
La sjac' te Rute:
—Jo'on Ruton, te awabatone. Te bit'il ja'at sts'umbalat te anima jmamlale, ay me ta awenta te ya awentainone. Ya jc'an te yacuc xnujbinotic —xi'.
10La yal te Booz:
—Ya me yac'bat bendición te Cajwaltique. Ta ora to la awac' ta ilel te jun awo'tan tel ta stojol te anima amamlale, melel ma ja'uc la ale te querem te jc'uleje soc ni ja'uc te me'bae. 11Lec ay jiche, ma me xiw awo'tan. Spisil ya sna' te jlumal te t'ujbil te awat'ele. 12Ja'uc me to, manchuc me sts'umbalon te anima amamlale,#Rt 2.20. ay to xan yan te mach'a mero jun sme'-stat soque. 13Lec ay, c'axuc ajc'ubal awu'un li'to. Ya xba jchajban soc pajel te bi la calbate. Teme ya sc'an swentainate, ac'a me spas. Yan teme ma sc'an spase, jo'on me ya cal ta stojol Cajwaltic te ya jpase. Jich yu'un, wayan me jiche, maliya sacub —xi'.
14Jich way te Rut ta bay yacan Booz, buen ijc' to q'uinal a jajch', jteb to nax ya xchicnaj a te q'uinale. Yu'un la yal te Booz: “Ma me mach'a ya sna' stojol te xtaluc te antse”, xi'.
15Te Booz la yalbey:
—Loq'uesa te atsotse, tulan x'atsac —xi'.
Jich yu'un, te Rut tulan la stsac te stsotse. Te Booz la sp'isbey c'axem ta cha'winic (40) kilo cebada, la slicbey moel ta snejq'uel. Bajt' ta lum te antse.
16C'alal c'ot te Rut ta bay te yalib-me'ele, jojc'obot yu'un ta ora:
—Cantsil-al, ¿bit'il bajt' te aiyej? —xi' te Noemí.
Te Rut la xcholbey yaiy spisil te bi la yal soc te Booz. 17Jich la yal:
—La yac'bon spisil in cebada to, yu'un la yalbon: “Ma me jichuc nax ya sujt'at bael ta stojol te awalib-me'ele”, la yuton —xi'.
18Jich yu'un te Noemí la yal:
—Awaiy bit'il ay, ya jmaliy caiytic bit'il ya xc'ot. Melel te winique ma scanantay te aiyej ja' to teme chajbaj yu'une —xi'.
Currently Selected:
Rut 3: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.