Rut 2
2
Rut ta sq'uinal Booz
1Te Elimelec te anima smamlal Noemí ay yermano, Booz sbiil. Buen jc'ulej a soc ich'bil ta muc' yu'un te slumale. 2Te Rut la yalbey te Noemí:
—Ac'awon bael te banti yacalic ta set'el cebada. Ya xba quil teme ay mach'a ya xc'uxtayone, teme ya yac'bon jtam ta bay yacal ta jilel yu'un te mach'atic ya set'ic loq'uel te cebadae#Lv 19.9-10; Dt 24.19. —xi'.
—Baan jiche —xi' te yalib-me'ele.
3Bajt' te Rut, c'ot tey a ta bay yac ta set'el cebada. Jajch' ta stamel te bay jileme. Ja'uc me to, tey c'ot ta bay sq'uinal Booz te yermano sba soc te anima Elimelec.
4Te Booz jich nix yorail loc' tel ta Belén, tal yil te cebadail. La spatbey yo'tanic te abatetic yu'une:
—Ac'a sjoinex te Cajwaltique —xi' ta spatbeyel yo'tanic.
La sjaq'uic:
—Ac'a yac'bat bendición te Cajwaltique —xiic ta spisilic.
5Te Booz la sjojc'obey te mayordomo yu'un te j'at'eletique:
—¿Bay talem me ants to? —xi'.
6La sjac' te mayordomo:
—Moab-ants te loc' tel ta Moab soc te Noemí. 7La yalbon wocol te yacuc cac'bey stam bael ta bay ya xch'ay jilel te cebadae. Jich yu'un sab jajch' ta at'el, ma'yuc bay ya stejc'an sba xujt'uc —xi'.
8Jich yu'un te Booz la yalbey te Rut:
—Ants, aiya awaiy stojol, ma me q'uejeluc ya xba atam cebada ta yan q'uinal, ja' me xajoin te criadaetic cu'une. 9Joina me bael te bay ya xbajt'ic ta at'el ya awil te jset'-cebadaetique. La calbeyix jilel mandal te winiquetic te ma'yuc mach'a ya yuts'inate. Te c'alal ya awaiy taquinti'il, baan me, uch'a ta yawil ja' te sloq'uesejic te abatetique —xi'.
10Te Rut la squejan sba, la stinan sba coel c'alal ta lum, la yalbey te Booz:
—¿Bit'il ay a te ya atojlinon ta c'uxtayel, soc te bayal yutsil awo'tan ta jtojol te bit'il jyanlumone? —xi'.
11Te Booz la sjac':
—Yu'un caiyoj stojol spisil te bit'il ay awo'tan soc te awalib-me'el, te sjayebalix c'aal slajel bael te amamlale. Melel ma'yuc sc'oplal ta awo'tan la awijq'uitay jilel te alumal soc te ame'-atat, te bit'il talat ta cuxinel ta bay ayotic, te ma'yuc bay awiloj ta neelale. 12Dios me ya stojat. Te Cajwaltic Dios yu'un Israel te tal ale coltayel yu'une, ya me xc'uxtayat, ya me scanantayat. Ya me smajt'antesat yu'un spisil te bitic t'ujbil apasoj tele —xi'.
13La sjac' te Rut:
—Tatic, bayal yutsil awo'tan ta jtojol, ya xmuc'ub q'uinal ya caiy yu'un te ac'ope. Lamal nax ya caiy te ac'ope, manchuc me ma abatucon awu'un —xi'.
14C'alal ochic ta we'el, te Booz la yic' tel te Rut, jich la yalbey:
—La' li'to, we'a jtebuc waj, mula ta vinagre —xi'.
Te Rut la snajc'an sba sjoin ta we'el te j'at'eletique. Te Booz la yac'bey trigo te ch'ilbil ta samet. Te Rut we' ta lec ja' to c'alal noj xch'ujt', ay to jil sobrail yu'un. 15C'alal bajt' xan ta stamel cebada te bay jilemic xane, te Booz la spas ta mandal te abatetic yu'une:
—Ac'beya stam ta bay tomajtic jilel awu'unic te cebada, ma me x'acomic. 16Soc ch'ayaic coel jtebuc te atomojiquix ta ac'abique, ja' me ya stam bael. Ma me xaq'uexlaltesic —xi'.
17Te Rut la stsob xan ta lec cebada, ja' to c'alal mal te c'aale. La smaj ta te'. Te jayeb loq'ue, c'axem jtebuc ta jtab kilo. 18Sujt' bael ta lum, scuchoj bael te cebada, c'o yac'bey yil te yalib-me'ele. Ta patil la yac'bey yil te sobra we'elil te jil yu'une.
19La sjojc'obey te Noemí:
—¿Banti at'ejat nax? ¿Banti la ata bayal cebada? Wocol me la yal te mach'a la scoltayat tele —xi' yu'un.
Te Rut la yalbey yaiy te yalib-me'el te mach'a la sjoin ta at'ele:
—Te winic at'ejon ta swenta, Booz sbiil —xi'.
20Te Noemí la sjac':
—Te Cajwaltic ac'a yac'bey bendición ta stojol. Melel te Cajwaltic la xc'uxtayotiquixe, jich nix bit'il la spasbon soc te animaetic cu'untique. Te winique ja' quermanotic nix a,#Lv 25.25. ay me ta swenta te ya scoltayotique —xi'.
21Te Rut la yal:
—La yalbon te tey nix ya xboon ta stsobel a te cebada, ja' to laj c'alal ya xju' ta loq'uesel ta spisil —xi'.
22Jich yu'un te Noemí la sjac'bey sc'op te yalib:
—Lec ay ya caiy. Ya me xju' xba ajoin ta at'el te criadaetic yu'une. Ma me xbaat ta yan q'uinal, jich me ma'yuc mach'a ya yuts'inat —xi'.
23Te Rut och xan ta stsobel cebada, ba sjoin te abatetic yu'un te Booz, ja' to chican laj ta loq'uel te cebada soc nix te trigo. Ja'uc me to, sjoinej sba ta nainel soc te yalib-me'ele.
Currently Selected:
Rut 2: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.