Proverbios 3
3
Bit'il ay ta tael p'ijil-o'tanil
1Jnich'an, ma me xch'ay ta awo'tan te p'ijubtesel cu'une;
q'ueja me ta ajol, q'ueja me ta awo'tan te mandaliletic cu'une,
2jich me najt' aworail ya xcuxinat
soc bin nax me awo'tan ya xc'axat ta q'uinal.
3Ma me xawijq'uitay te c'uxul-o'tanil
soc ma me xch'ay ta awo'tan te bila smelelile;
chuca me ta anuc' jichuc ualil spisil ora,
ts'ibuya me ta yolil awo'tan.
4Jich me lec ac'oplal ya xc'oat yu'un,
soc ya me yich'at ta wenta te Diose soc te ants-winiquetique.#Lc 2.52.
5Ja' me ac'a smuc'ulin awo'tan ta lec te Cajwaltique,
ma me ja'uc x'awich' aba ta muc' te sp'ijil ajole.#Ro 12.16.
6Ta spisil te bitic ya apase,
ja'uc me ay ta awo'tan te Cajwaltique,
ja' me ya yic'at bael ta tojil be stuquel.
7Ma me jc'axeluc lom p'ij ya acuy aba;
ich'a me ta muc' te Cajwaltique,
ma me xawac' aba a te bila amene.
8Ja' mero lequil poxil c'oem awu'un,
swenta yu'un ja' me ya yac'bey yich' yip te abaq'uetale.
9Ich'a me ta muc' Cajwaltic soc te ac'ulejale,
ich'a ta muc' soc te sba sit awawal-ats'unub te ya xloc' awu'une;
10jich me mero nojel ya xjil a te stsobjibal
soc te yawil te vino awu'une.
11Jnich'an, ma me xach'ay te tojtesel yu'un te Cajwaltique,
soc ma me x'ilinat yu'un te ya stac'uyate;#Job 5.17; Heb 12.5-6.
12melel te Cajwaltic ya stojtes te mach'a c'ux ta yo'tane,#Ap 3.19.
jich bit'il te tatil ya stojtes te snich'an
te buen lec yo'tan yu'une.#Dt 8.5; 2 S 7.14; Heb 12.5-6.
13Bin nax me yutsil te ants-winic te ya sta sp'ijil yo'tane,
soc te ya x'ac'bot sp'ijil sjole;
14melel c'ax me jich ya xtuun a te bit'il plata,
soc c'axem jich ya xtuun a te bit'il oro.
15Te p'ijil-o'tanil c'axem jich yutsil a te bit'il yutsil te perlaetique;
ni ja'uc pajal soc te bila mero c'ax t'ujbil te awo'tanuc ay awu'une.
16Ta swa'el sc'ab ya yac' najt' jcuxlejaltic,
soc ta xq'uexen sc'ab ya yac' jc'ulejaltic,
soc ya yac' lecubuc jc'oplaltic.
17Mero c'ax bujts'an ta t'unel te sbe;
teme tey yacat ta beel a, ayat me ta swenta lamal-o'tanil.
18Te p'ijil-o'tanil ja' cuxlejal ta stojol te mach'a ya yich'e;
bin nax me yutsilic te mach'atic ya sna' sq'uejel ta yo'tanique.
19Te Cajwaltic ta swenta sp'ijil yo'tan la yac'bey yiptajib te balumilale;
soc ta swenta sp'ijil sjol la yac' chicnajuc te ch'ulchan.
20Ta swenta sp'ijil parte la yac' te mare,
soc la yac' loc'uc tel ta tocaletic te ts'ujule.
21Jnich'an, spisiluc me ora tsajtaybil ya xc'opojat,
ma me xch'ay awu'un te nacal-o'tanile,
22melel ja' me sloq'uibja' c'oem te ya yac'bat acuxlejal
soc ja' me ach'alil jichuc ualil.
23Jich me jun awo'tan ya xju' ya xbeenat ta be,
ma me ayuc bi ora ya ac'ojch'in awacan.
24Te bi ora ya acux awo'tane, ma ba ya xiwat;
jun me awo'tan ya xwayat.#Sal 3.5; 4.8.
25Ma me xiwat yu'un te lajel te ora nax ya xtale,
soc ni ja'uc te jinel ya xtal ta stojolic te mach'atic amen yo'tanique;
26melel ja' me ya yac'bat smuc'ul awo'tan te Cajwaltic,
ma me xyac'at te ya x'ochat ta pejts'e.
27Teme ay mach'a ya yal: “Na'a yo'bolil jbajtic”, teme xi' ta atojole,
na'beya me yo'bolil sba,#Mt 5.42. melel ya me xju' awu'un spasel.
28“Pajel to ya jcoltayat”, ma me x'awut,
melel ya xju' awu'un te ya apas yo'tic nixe.
29Ma me ayuc bitic amen xachap ta stojol
te mach'a jun yo'tan ta atojole.
30Ma me ayuc mach'a xapas c'op soc
te ma'yuc swentaile.
31Ma me xbic'taj awo'tan yu'un spasel te bila ya spas
te mach'a ma tojuc yo'tane,
soc ma me xanopbey te yat'elique.
32Melel ilaybilic yu'un Cajwaltic stuquelic te mach'atic amen yo'tanique;
pero te mach'atic lec yo'tane,
ya yac'bey smuc'ul yo'tan stuquelic.
33Amen sc'oplal yu'un Cajwaltic te sna te mach'a amen yo'tane,
yan te sna te mach'a toj yo'tane,
lec sc'oplal yu'un Cajwaltic stuquel.
34Ya me xlabanotic yu'un Cajwaltic te mach'atic jlabanwanejetique;
pero bayal me yutsil yo'tan ta stojol stuquelic
te mach'atic peq'uel ya yac' sbaique.#Stg 4.6; 1 P 5.5.
35Te mach'atic ay sp'ijilique,
ja' me smajt'an ya xc'otic te lec-o'tanil ta stojolique;
yan te mach'atic ma sna'ic q'uinale,
ja' nix me ya x'ac'otic ta na'el yu'un te amen yat'elique.
Currently Selected:
Proverbios 3: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.