San Juan 6
6
Jesús la smac'lin jo'mil (5,000) ta jtul
(Mt 14.13-21; Mr 6.30-44; Lc 9.10-17)
1Patil c'ax bael ta bay jejch' mar yu'un Galilea te Jesuse, ja' nix mar yu'un Tiberias. 2Bayal ants-winiquetic la sts'aclinic bael te Jesuse, yu'un la yilic te señailetic la spasbey ta stojol te jchameletique. 3Mo bael ta wits te Jesuse. Tey la snajc'an sba soc a te jnopojeletic yu'une. 4Nopolix yorail te q'uin Pascua yu'un te judioetique. 5Te Jesús la stoy sit, la yil te bayal ants-winiquetic yacalic ta talel ta stojol. La yalbey te Felipee:
—¿Banti ya jtatic ta manel waj te ya cac'bey swe'ic in to? —xi'.
6Te bit'il jich la yal te Jesuse, swenta yu'un ya yaiybey yo'tan te Felipee, melel sna'oj stuquel te bila ya spase. 7Te Felipe la yal:
—Te ayuc lajunwinic (200) denario-taq'uin ya jmantic te waje, ma tic'uc ya swe'ic juju-jxejt'uc a —xi'.
8Ay jtul jnopojel te c'opoje, ja' te Andrés te yijts'in te Simón Pedroe. Jich la yal:
9—Ay ch'in querem li'to te yich'oj jo'pejch' cebada-waj soc cha'cojt' ch'in chay. Ja'uc me to, ¿banti c'an ts'acajuc a te bayalique? —xi'.
10Te Jesús la yalbey te jnopojeletic yu'une:
—Albeyaic spisil te ants-winiquetique, ac'a snajc'an sbaic —xi'.
Te banti ayique ay bayal aquiltic, tey la snajc'an sbaic a. Ay niwan jo'mil (5,000) te winiquetique. 11Te Jesús la stsac ta sc'ab te waje. La yalbey wocol Dios yu'un soc la spucbey te jnopojeletique, jich ba spucbeyic spisil te mach'atic najc'ajtique. Soc jich nix la spuquic uuc te ch'in chayetique, chican te jich yipal ju' yu'unic swe'ele. 12Te c'alal nojix ta lec a te xch'ujt'ique, te Jesús la yalbey te jnopojeletic yu'une:
—Tsobaic spisil te sobrail te jil yu'unique, swenta yu'un ma me xch'ay xujt'uc —xi'.
13Jich la stsobic te sobrail jo'pejch' cebada-waj te jil yu'un te mach'atic we'ique. Noj lajchayeb moch yu'unic. 14Te c'alal la yilic te ants-winiquetic te seña yu'el Jesús te la spase, jich la yalic yu'un:
—Ja'ix ta melel te j'alwanej yu'un Dios te caiyojtic stojol te ya xtal ta balumilale —xiic.
15Te bit'il la sna' stojol Jesús te puersa ya yotsesic ta muc' ajwalil ta sc'opique, jich cha'bajt' xan ta wits stuquel.
Jesús been ta ba mar
(Mt 14.22-27; Mr 6.45-52)
16C'alal yaquix ta ijc'ubel a te q'uinale, coic bael ta ti'mar te jnopojeletic yu'une. 17Ochic ta barco, yu'un ya sujt'ic bael ta lum Capernaúm. Ijc'ubix a te q'uinale, ma to ba sjoinejic a te Jesuse. 18Tal tulan ic' ta ba mar, bayal bulan yu'un te ja'e. 19Ay niwan jo'eb o waquebuc kilómetro sbeeneliquix ta barco a te la yilic Jesús te yac ta beel tel ta ba mar. Jich noptsaj tel tey a ta bay te barcoe. Xiwic yu'un. 20C'opoj te Jesuse:
—Jo'on. Ma xiwex —xi'.
21Bin nax yo'tanic la yiq'uic ochel ta barco. Ora nax c'otic loq'uel ta ti'mar ta banti stojol ya xbajt'ique.
Te ants-winiquetic la sleic te Jesuse
22Jich te ants-winiquetic te jilic ta banti ti'mare ta yan c'aal la sna'ic stojol te baemic ta jun barco te jnopojeletique. Soc sna'ojic stojol te ma ba ochem bael tey a te Jesuse. 23Jich ora tal yantic barcoetic te talic ta lum Tiberias. Julic ta loq'uel ta bay nopol la swe'ic waj te la yalbey wocol Dios yu'un te Cajwaltique. 24Te c'alal la yilic te ma ba tey a te Jesuse, ni ja'uc te jnopojeletic yu'une, jich ochic bael a te barcoetique. Ba sleic ta Capernaúm te Jesuse.
Ja' waj yu'un cuxinel te Jesuse
25Te c'alal c'otic ta bay te jejch' mare, tey c'o staic a te Jesuse:
—Maestro, ¿bi ora julat li'to? —xiic.
26Te Jesús la yalbey:
—Jamal ya calbeyex, ja' nax ya aleonic yu'un te bit'il noj ach'ujt'ic yu'un te waj la awe'ique. Ma ja'uc ya aleonic yu'un te la awilic te jayeb señail cu'el la jpase. 27Ma me ja'uc xawat'elinic sleel te awe'elic te lajel lajel aye. Ja' ya sc'an ya awat'elinic sleel te awe'elic te stalel ma xlaj sbajt'el q'uinale te ja' ya yac'beyex te Nich'anile, melel te Jtatic Diose la yaq'uix ta ilel te bin nax yo'tan yu'une —xi' te Jesuse.
28La sjojc'obeyic te Jesuse:
—¿Bit'il ya sc'an ya jc'ajtes jbajtic ta spasel yat'el te Diose? —xiic.
29Te Jesús jich la yalbey:
—Ja' in to: Ja' yat'el Dios teme ya ach'uunonic te ticunbilon tel yu'une —xi'.
30La yalic:
—¿Bi señailuc ya apas quiltic swenta yu'un jich me ya jch'uunticat? ¿Bila at'elil ya apas jiche? 31Te namey q'uinal jme'-jtatique la swe'ic te maná-waj ta bay te muc'ul jochol taquin q'uinale,#Ex 16.4,15. jich te bit'il ts'ibubil jilel ta june: “Ac'botic swe'ic waj te talem ta ch'ulchane”,#Sal 78.24. te xie —xiic.
32La yalbey te Jesuse:
—Jamal ya calbeyex, ma ja'uc Moisés te ya yac' te waj te talem ta ch'ulchane. Ja' te Jtate te ya yac'beyex te waj te talem ta ch'ulchan ta melele. 33Melel te waj yu'un Dios, ja' te coix tel ta ch'ulchan te ya yac' cuxlejal ta balumilale —xi' te Jesuse.
34La yalic:
—Cajwal, ac'botic spisil ora te waj ya awale —xiic.
35Jesús jich la yalbey:
—Jo'on wajon yu'un te cuxlejale. Te mach'a ya xtal ta jtojole xujt' ma xwi'naj yo'tan; soc te mach'a ya xch'uunone, xujt' ma xtaquej yo'tan. 36Ja'uc me to, ya calbeyex te ma x'ac'an ach'uunonic manchuc teme ya awilonique. 37Spisil mach'a ya yac'bon te Jtate ya xtal ta jtojol. Te mach'a ya xtal ta jtojole ma ba jch'oj loq'uel. 38Melel te bit'il coemon tel ta ch'ulchane, ja' tal jpasbey sc'anjel yo'tan te mach'a la sticunon tele. Ma ja'uc tal jpas te bila ya sc'an co'tan jtuquele. 39Te bila ya sc'an yo'tan te Jtat te la sticunon tele, ja' te ma ba ya xch'ay cu'un jtuluc te jayeb mach'a yac'ojbonix ta jwentae, soc ya me jcha'cuxes tel ta slajibal c'aal. 40Melel ja' sc'anjel yo'tan te Jtate te ya yich' xcuxlejal sbajt'el q'uinal spisil te mach'a ya yil te Nich'anile. Soc te mach'a ya xch'uune, ya me xcha'cuxes tel ta slajibal c'aal —xi' te Jesuse.
41Te judioetique caj smuquen-ayanic te Jesuse te bit'il jich la yale: “Te jo'one wajon te coemon tel ta ch'ulchan”, te xie. 42Jich la yalic yu'un:
—¿Ma bal ja'uc snich'an José te Jesuse, te ya jna'beytic sba te sme'-state? ¿Bit'il ay a te coem tel ta ch'ulchan ya yale? —xiic.
43La yal te Jesuse:
—¿Bistuc te ya amuquen-ayantayonique? 44Ma'yuc mach'a ya xtal jtuluc ta jtojol te manchuc ja'uc ya yic' tel te Jtat te ticunbilon tel yu'une, soc ya me jcha'cuxes tel ta slajibal c'aal. 45Jich ts'ibubil jilel yu'unic te j'alwanejetique: “Dios me ya xp'ijubtesot yu'un ta spisilic”,#Is 54.13. te xie. Spisil mach'a ya yaiybeyic stojol sc'op te Jtate soc teme tey la snop a, ya me xtal ta jtojol.
46“Ma'yuc mach'a yiloj te Jtate. Jo'on nax quiloj jtuquel te bit'il tey talemon a. 47Jamal ya calbeyex, te mach'atic ya xch'uunonique ya me xcuxinic sbajt'el q'uinal. 48Jo'on wajon yu'un te cuxlejale. 49Te namey q'uinal ame'-atatique la swe'ic te maná-waj ta bay muc'ul jochol taquin q'uinal, ja'uc me to, lajic bael. 50Yan te jo'one ya calbeyex sc'oplal te waj te coem tel ta ch'ulchane. Te mach'a ya swe'e ma ba ya xlaj stuquel. 51Jo'on te waj te cuxule te coemon tel ta ch'ulchane. Te mach'a ya swe' in waj to, ya me xcuxin sbajt'el q'uinal. Te waj te ya caq'ue, ja' te jbaq'uetale, ya me cac' ta lajel swenta yu'un jich me ay xcuxlejalic ta balumilal —xi' te Jesuse.
52Te judioetique tulan jajch'ic ta c'op yu'un te bila la yale. Jich la yalic:
—¿Bit'il ya yac'botic jwe'tic ya yal te sbaq'uetale? —xiic.
53Te Jesús jich la yalbey yaiyic:
—Jamal ya calbeyex, teme ma ba ya awe'beyic sbaq'uetal te Nich'anile soc teme ma ba ya awuch'beyic te xch'ich'ele, ma ba ya xcuxinex. 54Te mach'a ya swe'bon te jbaq'uetale soc teme ya yuch'bon te jch'ich'ele, ya me xcuxin sbajt'el q'uinal, soc ya me jcha'cuxes tel ta slajibal c'aal. 55Melel te jbaq'uetale, ja' mero we'elil soc te jch'ich'ele ja' ya sc'an ya awuch'ic stuquel. 56Te mach'a ya swe'bon te jbaq'uetale soc te ya yuch'bon te jch'ich'ele, jc'axel ayix ta jtojol soc jc'axel ayonix ta yo'tan uuc. 57Jich bit'il cuxul te Jtat te la sticunon tele, soc ja' cuxulon ta swenta te Jtate, jich nix me ya xcuxinic ta jwenta uuc spisil mach'a ya swe'bon te jbaq'uetale. 58Ja' ya calbey sc'oplal te waj coem tel ta ch'ulchane. In waj to, ma pajaluc soc te maná-waj la swe'ic te namey q'uinal me'il-tatiletic te lajic baele. Te mach'a ya swe' in waj to, ya me xcuxinic sbajt'el q'uinal —xi' te Jesuse.
59Jich la yal ta p'ijubteswanej te Jesús ta bay sinagoga te ay ta lum Capernaúm.
Te c'op swenta cuxinel sbajt'el q'uinal
60Te bit'il jich la yal ta p'ijubteswanej te Jesuse, tsobol te jnopojeletic yu'un te jich la yalique:
—Chujc'ul te sc'ope. ¿Mach'a c'an c'otuc ta yo'tan? —xiic.
61Te Jesús la sna' stojol te yacalic ta smuquen-ayanel te bila la yale. Jich la sjojc'obey yaiy:
—¿Yu'un bal amen c'ot ta awo'tanic te bila la cale? 62¿Jaxan teme ya awilic ya xmo bael ta banti ay ta neelal te Nich'anile? 63Ja' ya yac' cuxlejal stuquel te Espiritue; ma'yuc bi ya xju' yu'un stuquel te ch'ich'-baq'uete. Te jc'op te la calbeyexe, ja' yu'un te Espiritue te ya xcuxinex yu'une. 64Ja'uc me to, ay cha'oxtulex ma x'ac'anic te ya ach'uunique —xi'.
Yu'un ta xjajch'ibal to sna'oj te Jesuse te mach'atic ma xch'uunot yu'une soc te mach'a ya x'ac'ot ta c'abal yu'une. 65Jich la yalbey yaiyic:
—Ja' swentail te la calbeyex te ma'yuc mach'a ya xtal jtuluc ta jtojol te manchuc ya x'ac'ot taluc yu'un te Jtate, te xoone —xi'.
66Jich ora te ay sujt' ta spatic tsobol jnopojeletic yu'un te Jesuse. Ma la sc'anic te la sjoinic xan ta beele. 67Jich te Jesús la sjojc'obey yaiy te lajchaytule:
—¿Ya bal sujt'ex bael uuc te ja'exe? —xi'.
68Te Simón Pedro la yal:
—Cajwal, ¿mach'a yan ya xbootic ta stojol? Melel ja'at nax atuquel te ay cuxinel sbajt'el q'uinal ta swenta te ac'ope. 69Te jo'otique xch'uunej co'tantic soc jna'ojtic stojol te ja'at Cristoat te Snich'anat te cuxul Diose#Mt 16.16; Mr 8.29; Lc 9.20. —xi'.
70Jesús la yal:
—Jo'on la jtsaex te lajchaytulexe, ja'uc me to, ta alajchaytululic ay jtul pucuj tey a —xi'.
71Te bit'il jich la yale, ja' la yalbey sc'oplal te Judas te snich'an Simón Iscariote, yu'un ja' ya x'ac'ot ta c'abal yu'un, manchuc teme jun nax ay soc te lajchaytulique.
Currently Selected:
San Juan 6: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.