San Juan 7
7
Ma ba ch'uunot yu'un yijts'inab te Jesuse
1Patil been xan Jesús ta sq'uinal Galilea, yu'un ma la sc'an te ya xbajt' ta sq'uinal Judea scaj te chajbanbil yu'unic te judioetic te ya smilic tey a. 2Nopolix yorail q'uin yu'un te judioetic te ya snainic nailwamale.#Lv 23.34; Dt 16.13. 3Te yijts'inabe jich caj yalbeyic te Jesuse:
—Loc'an bael li'to. Baan ta sq'uinal Judea. Jich me ya yil te jnopojeletic awu'un te bila ya apase. 4Ma'yuc mach'a muquen te ya x'at'ej teme ya sc'an ya xna'bot sba ta bayuque. Te bila ya xju' ta pasel awu'une, pasa ta comonsitil ta stojol spisil te lume —xiic.
5Yu'un ma ba xch'uunejic Jesús uuc te yijts'inabe. 6Te Jesús jich la yalbey yaiyic:
—Ma to sta yorail cu'un. Yan te ja'exe biluc ora ya stac' xbaex atuquelic. 7Te mach'a ayic ta balumilal ma ba ya sp'ajex. Yan te jo'one ya sp'ajonic scaj te ya calbey ta jamal te amen te yat'elique. 8Baanic ta yilel q'uin te ja'exe. Yan te jo'one, ma ba ya xboon, yu'un ma to sta yorail cu'un —xi'.
9Te bit'il jich la yalbey yaiyic in to, tey nix jil xan ta sq'uinal Galilea.
Te bi la spas ta yorail q'uin nailwamal te Jesuse
10Te c'alal bajt'iquix a te yijts'inab te Jesuse, patil bajt' ta q'uin uuc. Swenta muquen te bit'il bajt'e, ma la yac' sba ta ilel ta comonsitil. 11Te judioetique yacalic ta sleel ta yolil te q'uine:
—¿Banti ay te winique? —xiic.
12Ta bay yolil te ants-winiquetique ay tsobol mach'atic yacalic yaanel. Ay la yalic: “Mero lec yo'tan te winique”, xiic. Ay yantic la yalic: “Ban c'an lecuc yo'tan, melel ya slo'lay te lume”, xiic.
13Ja'uc me to, muquen yacalic ta yalel, scaj te ya xi'ic te judioetique.
14Te q'uine col oliluc ayix a te och bael ta templo te Jesuse. Tey jajch' ta p'ijubteswanej a. 15Te judioetique jchajp nax la yaiybeyic a te sc'ope. Jich la yalic:
—¿Bit'il ay a te ya sna' ta lec aiyej te winique? Melel ma'yuc bay p'ijubtesbil —xiic.
16Te Jesús jich la yalbey:
—Te bila ya cal ta p'ijubteswanej, ma jo'ocon jc'op te ya cale. Ja' sc'op te mach'a la sticunon tele. 17Te mach'a yo'tan ya spas te bila ya sc'an yo'tan te Diose, tey me ya sna' stojol a teme ja' nopjibal yu'un Dios te ya cac' ta nopele, o teme jo'on nax jc'op jtuquele. 18Te mach'a sc'op nax stuquel te ya yac' ta nopele, ja' ya spas yu'un te yacuc x'ich'ot ta muc' yu'une. Yan teme ja' ya sc'an ya yac' ta ich'el ta muc' te mach'a ticunbil tel yu'une, ja' ya yac' ta nopel te bila melele soc ma'yuc lo'laywanej ta yo'tan.
19“¿Ma bal ja'uc Moisés te la yac'beyex te mandalile? Ja'uc me to, ma jtuluquex te awat'elinejic xch'uunele. ¿Bi yu'un ya ac'an amilonic? —xi'.
20Te ants-winiquetic jich la yalic:
—Ay pucuj ta awo'tan. ¿Mach'a a te ya smilate? —xiic.
21Te Jesús jich la yalbey yaiyic:
—Jun nax at'elil la jpas ta sc'aalelal cux-o'tan te bayal ya x'ayan awo'tanic cu'une. 22Te Moisés la spasex ta mandal te ya awac'bey yich'ic circuncisión#Lv 12.3. te aquerem-nich'anique. (Manchuc teme ma ja'uc jajch' ta pasel ta swenta te Moisese; melel ja' jajch' ta pasel yu'un te namey q'uinal tatiletique.)#Gn 17.10. Jich ya awac'beyic yich' circuncisión ta sc'aalelal cux-o'tan te anich'ane. 23Jich yu'un teme ya awac'beyic yich' circuncisión jtuluc alal ta sc'aalelal te cux-o'tane swenta yu'un ma xyich' c'axintayel smandal te Moisese, ¿bistuc ya awilintayonic yu'un te la jcoltaybey scojt'ol sbaq'uetal jtul winic ta sc'aalelal te cux-o'tane?#Jn 5.9. 24Ma me jowiluc nax ya aleic ta c'op te mach'a bi yilel ya awilique. Tojuc me xawaiy chajbanwanej —xi' te Jesuse.
Jesús la yal te banti taleme
25Ay la sjojc'obey sbaic te mach'atic ja' nix yajwal te lum Jerusalene:
—¿Ma bal ja'uc in winic to te yacal ta leel yu'un ya smilique? 26Ilawil, jamal nax yac ta c'op, pero ma'yuc jtuluc mach'a bi ya yalbey. ¿Yu'un bal c'ot ta yo'tanic te jwolwanejetic cu'untic te ja' Cristo in winic to? 27Ja'uc me to, ya jna'tic te banti taleme. Yan te c'alal ya xtal te Cristoe, jtul ma'yuc mach'a ya sna' te banti ya xtale —xiic.
28Te c'alal yac ta p'ijubteswanej ta templo te Jesuse, tulan caj ta c'op:
—¿Melel bal te ya ana'bon jba soc te ya ana' te banti talemone? Ja'uc me to, ma jtuquel-o'tanuc te talemone. Ja' ticunbilon tel yu'un te mach'a smelelil ya xc'opoje te ma x'ana'beyic sbae. 29Te jo'one ya jna'bey sba, te melel talemon ta stojol soc ja' la sticunon tel —xi' te Jesuse.
30Yo'tan c'an stsaquic ta ora, ja'uc me to, ma'yuc mach'a yal sc'ab, yu'un ma to xc'ot te yoraile. 31Ja'uc me to, ay tsobol mach'atic la xch'uunic soc la yalic:
—Te c'alal ya xtal te Cristoe ¿c'ax to bal jich yipal señailetic ya yac' ta ilel te bit'il in winic to? —xiic yu'un.
Te fariseoetique la snopic te ya sticunic ta tsaquel te Jesuse
32Te fariseoetique la yaiyic stojol te jich yacalic ta smuquen-ayanel Jesús te lume. Jich te jwolwanej-sacerdoteetic soc te fariseoetic la sticunic policiaetic ta tsaquel te Jesuse. 33Jich la yal te Jesuse:
—Ma ba jalix c'aal te ya joinexe. Jich me ya xboon ta stojol te mach'a la sticunon tele. 34Ya aleonic ts'iin, ja'uc me to, ma ba ya ataonic ta leel. Te banti ya x'ainon te jo'one, ma xju' ya xc'oex tey a —xi'.
35Te judioetique caj sjojc'obey sbaic:
—¿Banti ya xbajt' te winic te ma jtatic ta leel ya yale? ¿Yu'un bal ya xbajt' ta banti pujq'uemic te jlumaltic ta bay yolil te griegoetique yu'un ja' ya sp'ijubtes te griegoetique? 36¿Bi ya sc'an ya yal te “Ya aleonic, ja'uc me to, ma ba ya ataonic ta leel, te melel ma xju' awu'unic ya xc'oex tey a te banti ya x'ainone”, te xie? —xiic.
Te ja' te cuxule
37Ja' bayal sc'oplal yu'unic te slajibal c'aal yu'un te q'uine.#Lv 23.36; Nm 29.35. Jich ora te tejc'aj jajch'el te Jesuse. Tulan la yal:
—Te mach'a ay ta taquinti'ile, ac'a taluc ta jtojol, ac'a yuch' te ja'e.#Jn 4.10-14. 38Melel ya yal te Sjun Diose te mach'a ya xch'uunone ya me x'oquin loq'uel ja' ta yo'tan te cuxule#Ez 47.1; Zac 14.8. —xi' te Jesuse.
39Te bit'il jich la yale, ja' la yalbey sc'oplal te Ch'ul Espíritu te ya x'ac'botic te mach'atic ya xch'uunic te Jesuse. Melel ma to xtal a te Ch'ul Espiritue, yu'un ma to x'ac'ot ta ilel yutsilal te Jesuse.
La xat sbaic te lume
40C'alal la yaiyic stojol te lume te bila la yal te Jesuse, ay la yalic:
—Yu'un ja'ix te j'alwanej yu'un te Diose —xiic.
41Te yantique la yalic:
—Ja'ix in to te Cristoe —xiic.
Ja'uc me to, yan la yalic:
—¡Bay xtal! ¿Ya bal c'an taluc ta sq'uinal Galilea te Cristoe? 42Melel ts'ibubil ta Sjun Dios te ja' sts'umbal muc' ajwalil David#2 S 7.12-13; Sal 89.3-4; 132.11-12. te Cristoe soc ta lum Belén#Mi 5.2. ya xtal te ja' slumal te Davide —xiic yu'un.
43Jich ma junuc yo'tan sbaic yu'un te Jesuse. 44Ay mach'atic c'an stsaquic bael te Jesuse, ja'uc me to, ma'yuc mach'a yal sc'ab jtuluc.
Te jwolwanejetic yu'un te lume ma ba la xch'uunic te Jesuse
45Te policiaetic yu'un te temploe sujt'ic bael ta banti ay te fariseoetic soc te jwolwanej-sacerdoteetique. Jich la sjojc'obeyic te policiaetique:
—¿Bi yu'un ma la awiq'uic tel? —xiic.
46La yalic te policiaetique:
—Xujt' ma'yuc mach'a jich ya xc'opoj a te bit'il te winique —xiic.
47Te fariseoetic la yalic:
—¿Yu'un bal la slo'layex uuc te ja'exe? 48¿Yu'un bal ay la xch'uuniquix uuc te jwolwanejetic cu'untique soc te fariseoetique? 49Yan in ants-winiquetic to te ma sna'ic te mandalile, ya xbajt'ic ta ch'ayel —xi' sc'oplal yu'unic.
50Te jtul fariseo te Nicodemo sbiil te tal sc'opon ta ajc'ubal te Jesuse,#Jn 3.1-2. jich la yal:
51—Te mandalil cu'untique, ma xyac' te ya cac'beytic castigo jtuluc winic teme ma neeluc ya quich'beytic sc'op te tey ya jna'tic a te bila spasoje —xi'.
52La yalbeyic:
—¿Ja'at bal Galileaat uuc? Nopa ta lec te Sjun Diose. Tey me ya awil a te ma'yuc jtuluc j'alwanej ya xtal ta Galilea —la yutic. 53Jich bajt'ic ta snaic juju-jtul.
Currently Selected:
San Juan 7: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.