Daniel 3
3
La xch'uunic loc'omba pasbil ta oro
1Te muc' ajwalil Nabucodonosor, la yac' ta pasel muc'ul loc'omba ta oro, ay lajuneb xcha'winic (30) metro snajt'il soc ay oxeb metro sjamalul. Te muc' ajwalil la yal mandal te la yich' aq'uel ta spamlej yu'un Dura, ta sq'uinal Babilonia. 2Ta patil la sticun ta iq'uel ta spisilic te ajwaliletic yu'un juju-jpam lum, capitanetic yu'un soldadoetic, ajwaliletic yu'un juju-jsejp q'uinal, jtojteswanejetic, tesoreroetic, juecetic, mach'atic tulan yat'elic, soc yantic mach'atic yich'oj yat'elic ta jsejpelsejp q'uinal, swenta yu'un ya me xc'otic ta yorail spasbeyel sq'uin te loc'omba la yac' ta pasel te muc' ajwalile. 3Ta spisil te mach'atic muc' sc'oplalic yu'un te nación, la stsob sbaic ta stojol te loc'ombae, swenta yu'un ya spasbeyic sq'uin swenta te loc'ombae. 4Te mach'a ay ta swenta yalel te bi ora ya xjajch' te q'uine, jich la yal ta tulan:
—Winiquetic te talemex ta juju-jpam lumetic, ta spisil ta jpam nacionetic soc ta spisil ta jchajp c'opiletic, aiybon awaiyic jc'op: 5Te c'alal ya awaiyic te ya x'oq'uesinot te oq'ues, amay, cítara, lira, salterio, gaita, soc ta spisil at'ejibaletic yu'un música, ya me aquejan abaic ta ora ta stojol ta xch'uunel te loc'omba pasbil ta oro, te ja' la yac' ta pasel te muc' ajwalil Nabucodonosor. 6Spisil te mach'atic ma ba ya sc'an ya squejan sbaic ta xch'uunel te loc'ombae, ora me ya yich'ic ch'ojel ochel ta horno yu'un c'ajc' te yaquix ta tilele —xi'.
7Jich nix la spasic a, te c'alal la yaiyic ta spisilic te mach'atic stsoboj sbaic te c'opojix te at'ejibaletic yu'un música, la squejan sbaic, la xch'uunic te loc'omba pasbil ta oro.
8Pero ay caldeoetic tey ayic a. La slebeyic smul ta stojol muc' ajwalil Nabucodonosor te judioetique, 9jich c'o yalic:
—¡Muc' ajwalil, sbajt'el q'uinal cuxulat! Soc spisiluc me ora ay ta na'el te abiile. 10Te ja'at muc' ajwalilat cu'untic, la awalix mandal te spisil ants-winiquetic ya squejan sbaic ta xch'uunel te loc'omba pasbil ta oro te c'alal bi ora ya xchicnaj sc'op te at'ejibaletic yu'un música. 11Te mach'a ma ba ya spase, ya me yich' ch'ojel ochel ta horno te banti tulan yac ta tilel te c'ajq'ue. 12Pero ta ora in to, ay me judioetic te ay yat'elic ta banti jsejp q'uinal Babilonia sbiile, te mero ma xyich'at ta muc' te ja'at te muc' ajwalilat cu'untique, te ma sc'an xch'uunic te diosetic, ni yacuc sc'anic ya xch'uunic te loc'omba pasbil ta oro te la awac' ta pasel, ja'at te muc' ajwalilat cu'untique. Ja' te mach'atic la awac'bey yat'elic ta administrador yu'un te jsejp q'uinal yu'un Babilonia, ja'ic te Sadrac, Mesac, soc Abed-nego —xiic c'oel.
13Te Nabucodonosor bayal jajch' slab yo'tan yu'un. La yal mandal te ya x'ic'ot tel ta stojol te Sadrac, Mesac soc Abed-nego. Te c'alal ayiquix ta stojol ae, 14jich la yalbey:
—¿Melel bal te ma x'ac'an ya ach'uunbon te diosetic cu'une, soc ni ma x'ac'an ya ach'uunbonic te loc'omba pasbil ta oro te jo'on la cac' ta pasele? 15¿Jun bal awo'tanic ya atinan abaic ta stojol, soc ya ach'uunic te loc'omba te jo'on cac'oj ta pasele, te c'alal ya awaiyic te ya xc'opoj te at'ejibaletic yu'un música? Melel teme ma x'ac'an ya awich'ic ta muq'ue, yo'tic nix ya awich'ic ch'ojel ochel ta horno te banti tulan yac ta tilel te c'ajq'ue. Teme jich c'ote, ¿mach'a diosil ya xju' ya scoltayex? —xi'.
16Te oxeb queremetic jich la yalic:
—Ma puersauc ya jsujt'estic te bila ya awale. 17Melel te jo'otique, ay Dios cu'untic te ch'uunbil cu'untique. Te Dios cu'untic ja' me ya scoltayotic ta c'ajc' ta horno, soc ta spisil te bitic amen ya ac'an ya apas ta jtojoltique. Ya me scoltayotic stuquel. 18Manchuc teme ma scoltayotic te Diose, pero na'a me, muc' ajwalil, te ma'yuc bi ora ya jch'uuntic te diosetic awu'une, soc ni ma'yuc bi ora ya jquejan jbajtic ta stojol te loc'omba pasbil ta oro —xiic.
Ma ba lajic ta c'ajc' ta horno te oxeb queremetic
19Te c'alal la yaiy te Nabucodonosor te bila la yalique, tsajub yelaw yu'un slab yo'tan ta stojol te oxeb queremetique. Ja' yu'un la yal xan tulan mandal te ya yich' xan toyesel juqueb buelta yip te c'ajc' ta hornoe. 20Ora la yal mandal ta xchajbal te soldadoetic yu'une te ac'a yich' tsael soldadoetic te mero ay yipique, swenta yu'un ya sc'olic te Sadrac, Mesac soc Abed-nego, soc ac'a xch'ojic ochel ta horno te banti yac ta tilel te c'ajq'ue. 21Ta yoxebal te queremetic ja' to slapojic a te sc'u'ic swenta tulan yat'elique, la yich'ic c'olel, soc la yich'ic ch'ojel ochel ta horno te banti yac ta tilel te c'ajq'ue. 22Melel la yal te muc' ajwalil te ora ya sc'an ya yich' pasel te bila la yale. Ja' yu'un yac ta buen tilel te c'ajc' ta horno, jich taotic ta c'ajc' uuc te soldadoetic la xch'ojic ochel ta c'ajc' te oxeb queremetic, jich lajic te soldadoetique. 23Ta yoxebal te queremetique, buen c'olajtic a c'otic ta yolil c'ajc' stuquelic.
24Te Nabucodonosor ora tejc'aj jajch'el, jchajp nax la yil a, jich la yalbey te yantic j'at'eletic yu'une:
—¿Ma bal oxtuluc te winiquetic c'olol la jch'ojtic ochel ta c'ajq'ue? —xi'.
—Jich, oxebic —xiic.
25—Pero yacon ta yilel chaneb winiquetic, colemiquix, yacalic ta beel ta yolil te c'ajq'ue, ni xujt'uc ya xchic'otic yu'un te c'ajq'ue. Te xchanebale, pajal soc ch'ul abat yilel —xi'.
26Te c'alal jich yac ta yalel a te Nabucodonosor, noptsaj bael ta sti'il te horno, jajch' ta aw, jich la yal:
—¡Sadrac, Mesac, Abed-nego, abatetic yu'un Dios ta mero Toyol, la', loc'anic tel, la'ic li' ta banti ayoni! —xi'.
Ta yoxebalic loq'uic tel ta yolil te c'ajc' yac ta tilele. 27Ta spisilic te mach'atic yich'oj yat'elic yu'un te nacione, te jayebic tey ayic ae, talic noptsajic tel ta stojolic te oxeb winiquetique. La yilic ta lec te mero ma'yuc chic'bot sbaq'uetalic yu'un te c'ajq'ue, ni jxujt'uc tsacbot ta c'ajc' te stsotsil sjolique, soc ni ayuc bila la spas jxujt'uc te sc'u'-spaq'ue, soc ni ayuc chican ta aiyel yic' bila c'ajq'uem yu'unic.
28Te Nabucodonosor c'opoj ta ora, jich la yal ta tulan:
—Bin nax yutsil yu'el stuquel te Dios yu'un Sadrac, Mesac, Abed-nego, te la sticun tel ch'ul abat yu'un ta scoltayel te abatetic yu'un te jun yo'tanic ta stojole, te ja'ic te ma ba la xch'uunbonic jmandal jo'on te muc' ajwalilone, te la spas ta yo'tanic te manchuc me ya xlajic ta milel yu'un, pero ma ba la squejan sbaic ta xch'uunel yan dios te ma ja'uc te Dios yu'unique. 29Yo'tic jo'on ya cal mandal, mach'auc a te ya yal amen c'op ta stojol te Dios yu'unic te winiquetic in to, ac'a yich'ic milel ta jyalel. Te snae, jc'axel ac'a yich' busanel ta jinel, ta bayuc lumil talem, bayuc nacionil soc biluc c'opil ya xc'opojic a. Melel, ma'yuc yan dios jich ya xju' yu'un coltaywanej te bit'il te Dios yu'unique —xi'.
30Te oxeb queremetic ac'botic xan mero muc' yat'elic yu'un te muc' ajwalil, ac'bot swentainic te bitic bayal xan sc'oplal tey ta jsejp q'uinal ta Babilonia.
Currently Selected:
Daniel 3: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.