Daniel 2
2
Swaich muc' ajwalil Nabucodonosor
1Xchebal ja'wil yochel ta ajwalil a te Nabucodonosor, bayal buelta waichej. Ta scaj te swaichiletic, jajch' snopilay ta yo'tan, asta ma ba och swayel yu'un sna'ulayel. 2Jich la sticun ta iq'uel te mach'atic ay sp'ijilic, soc te mach'atic ya sna'ic syoljoltayel, soc j'ac'-chameletic, soc te mach'atic bayal bitic ya sna'ique, swenta yu'un ya me x'albot yu'un te bila swentail te swaiche. Te mach'atic c'otic ta iq'uel tele, c'o stejc'an sbaic ta stojol te muc' ajwalile. 3Te muc' ajwalil c'opoj, jich albotic:
—Ay jwaich, te jwaiche mero bayal ya xc'opoj co'tan ya caiy, co'tanuc ya jna'bey swentail —xi'.
4Te mach'atic bayal bi sna'ojique, c'opojic, jich la yalbeyic te muc' ajwalile:
—¡Muc' ajwalil, sbajt'el q'uinal cuxulat! Ala caiytic te awaiche, jo'otic te abatotic awu'une, ya me caltic awaiy te bi swentaile —xiic.
5Te muc' ajwalil jich la yal:
—Te bila jnopoj ya jpase jich ay: Teme ma ba ya awalbonic te bila a te la jwaichine, soc teme ma ba la awalbonic te bila swentaile, ya me awich'ic milel, te anaic ya me yich' jinel soc ya yich' busanel sts'ubil. 6Pero teme ya awalbonic te bila la jwaichine, soc teme ya awalbonic te bila swentaile, ya me cac'beyex amajt'anic, ya me awich'ic c'uxtayel soc muc' me ac'oplalic ya xc'oex. Ja' yu'un albonic me jiche te bila la jwaichine, soc te bila swentaile, ya me awalbonic caiy —xi'.
7Te mach'atic bayal bila sna'ojique, la sjojc'oyic swenta xchebal buelta:
—Albotic caiytic te bila la awaichine, muc' ajwalil cu'untic, ya me caltic awaiy te bila swentail te awaiche —xiic.
8La yal te muc' ajwalil:
—Ya jna' te ja' nax ya aleic te bit'il ya xc'ax te orae, yu'un awaiyojic te bila chapalix cu'une. 9Ja' yu'un, teme ma ba ya awalbonic te bila la jwaichine, ta apisilic pajal ya xc'ot ta awentaic te lajele, melel te ja'exe achapojiquix te ya awac'bonic lotil sujt'ib te jc'ope ta swenta lo'laywanej, yu'un ya acuyic te jich ya xyanaj sc'oplal a te bila chapalixe. Albonic caiy jiche te bila la jwaichine, jich me ya jna' a te ya xju' awu'unic te ya awalbonic caiy te bila swentaile —xi'.
10La sjaq'uic te mach'atic bayal bila sna'ojique, jich la yalic:
—Ma'yuc mach'a ay ta balumilal te ya xju' ya yac'bat sujt'ib te bila ya ajojc'oe, muc' ajwalil cu'untic. Soc ma'yuc ni jtuluc muc' ajwalil te ya sc'an te bi ya ac'ane, ma'yuc, manchuc me mero muc' o mero bayal yip. 11Mero chujc'ul, ma'yuc mach'a ya xju' yu'un jtuluc te ya yalbate, muc' ajwalil cu'untic, ja' nax stuquel te diosetique, pero te diosetic ma ba sjoinejic te winiquetique —xiic.
12C'alal la yaiy te muc' ajwalil te jich la yalique, til jajch'el slab yo'tan yu'un. Jich la yal mandal ta milel ta spisilic te mach'atic bayal bitic sna'ojic te ayic ta Babilonia. 13Te c'alal pujq'uemix ta alel a te mandale, la sticunic ta leel te Daniel soc te sjo'taque,#Dn 1.20. swenta yu'un ya yich'ic milel uuc.
Daniel la yalbey sc'oplal swaich muc' ajwalil
14Te Daniel ba yutsil-c'opon soc sp'ijil yo'tan te Arioc, ja' capitán yu'un te soldadoetic ayic ta scanantayel te muc' ajwalile, te ja'ic te chapaliquix yu'un ya smilic te mach'atic bayal bila sna'ojique. 15Jich c'o yalbey:
—¿Bi yu'un te mero jc'axel tulan te mandal ya yac' te muc' ajwalile? —la yut.
Albot yaiy yu'un te Arioc te bila swentaile. 16Jich te Daniel bajt' ta stojol te muc' ajwalile, c'o yalbey wocol te yacuc x'ac'bot jtebuc tiempo, swenta yu'un jich me ya xju' yu'un ya yalbey a te bila la swaichine, soc nix te bila swentaile. 17Bajt' ta sna te Daniel, c'o yalbey yaiyic spisil sjo'tac te aiyeje, ja'ic te Ananías, Misael soc te Azaríase. 18Jich yu'un jajch'ic ta sc'anel coltayel yu'un Dios ta ch'ulchan ta sna'beyel sc'oplal te bila wocol ta na'ele, soc swenta yu'un jich ma ba ya yich'ic milel soc a te mach'atic ay sp'ijilic te ayic ta Babilonia. 19Te c'alal och ajc'ubale, ac'bot yil la yaiy te Daniel. Ja' yu'un te Daniel la yalbey yutsil sc'oplal te Dios ta ch'ulchane, 20jich la yal:
—Bayaluc me yutsil sbajt'el q'uinal te sbiil te Diose,
melel ja' yu'un stuquel te p'ijil-o'tanile,
soc ja' yu'un stuquel te yip yu'ele.#Job 12.13; Pr 2.6.
21Ja' ya sjelbey sc'aalelal,
soc yajtalul.
Ya xju' yu'un ya sloq'ues ajwaliletic,
soc ya yac' ochel ajwaliletic.
Ya xju' ya yac'bey sp'ijil yo'tan te mach'a ay sp'ijile;
ya xju' ya yac'bey snopjibal yu'un te mach'a ay bila sna'oje.
22Ya yac' ta na'el te bila wocol ta na'ele;
soc ya yac' chicnajuc te bila muquen aye.
Ya sna'bey sba te bila ay ta ijc' q'uinale;
melel ja' yich'oj stuquel te saquil q'uinale.#Job 12.22; Sal 139.11-12.
23Ja'at, Diosat yu'un te jme'-jtate,
ya me calbat wocol soc ya me calbat yutsil ac'oplal.
Melel la awac'bon sp'ijil co'tan soc awac'ojbon quip.
Yo'tic la awac'bonix jna' te bila la jc'anbate;
la awaq'uix jna'tic te bila bayal sc'oplal ta yo'tan te muc' ajwalile
—xi' te Daniele.
24Ta patil, te Daniel ba yil te Arioc, ja' te yich'oj mandal yu'un muc' ajwalil te ya smil te mach'atic bayal bila sna'ojic te ayic ta Babilonia, jich la yalbey:
—Ma xamil te mach'atic bayal bila sna'ojique. Ic'awon bael ta stojol te muc' ajwalile, jo'on me ya calbey spisil te bila swentail te swaiche —la yut.
25Te Arioc ora la yic' bael ta stojol muc' ajwalil Nabucodonosor te Daniel. Jich c'o yalbey:
—Ta yolil te judioetic te ic'otic loq'uel tele, la jta jtul winic te ya xju' yu'un te ya yalbat awaiy te bila swentail te awaiche —xi' c'oel ta stojol te muc' ajwalile.
26Te muc' ajwalile, jich la yalbey te Daniel, ja' te Beltsasar yan sbiil yu'unique:
—¿Ya bal xju' awu'un ya awalbon te bila la jwaichine, soc ya bal xju' awu'un sna'el te bila swentail te jwaiche? —la yut.
27La sjac' te Daniel, jich la yal:
—Ma'yuc ni jtuluc te mach'a ay bila sna'oj, soc ni ayuc mach'a ya sna' syoljoltayel soc j'ac'-chamel, ni ja'uc te mach'a ay bila ya sna' ta swenta te c'aal, u, eq'uetic te ya xju' yu'un sna'beyel swentail te bila wocol ta na'el te ya ac'an ya ana'bey swentaile, muc' ajwalil. 28Pero ay jun nax Dios ta ch'ulchan te ya sna' te bila wocol ta na'ele, ja' la yac'bat ana' te bila ya xc'ot ta pasel ta patil baele. Ya me calbat awaiy, muc' ajwalil cu'untic, te bila swentail te awaiche, soc te bitic la awil la awaiy te c'alal wayalate: 29Te ja'ate, ayat ta awayib, jajch'at ta sna'el te bitic ya xc'ot ta pasel ta patil baele. Pero te mach'a ya xju' yu'un ya yac' chicnajuc te bila wocol ta na'ele, la yac'batix ana'. 30Ja' nix jichon la quich'ix ac'beyel jna' te bila wocol ta na'ele. Pero ma me yu'unuc jo'on c'ax bayal bitic jna'oj a te bit'il spisil te yantic winiquetique, ja' nax me yu'un te jich ya ana'bey swentail a te awaiche, soc swenta yu'un jich ya ana' te bila ya snop te awo'tane.
31“Te awaich, muc' ajwalil, tey la awil chicnaj ta atojol te mero muc'ul loc'omba te mero xlemet naxe. Te loc'omba mero xiweltic sba ta ilel. 32Te sjol te loc'omba, puro oro yich'oj pasel a. Te stan soc te sc'abe, pasbil ta plata. Te xch'ujt' soc te ya'e, pasbil ta bronce. 33Te yacan, pasbil ta hierro. Te snuc' yacan coele, pasbil ta hierro soc ajch'al. 34Te c'alal yacat ta yilel ae, tojch tel jun ton; te tone ma'yuc mach'a tojchot tel yu'un, ta stuquel nax tojch tel. Te tone, jul smaj sba ta yacan te loc'ombae, toj wuyel yu'un. 35Ta ora nax, mero ts'ubiltic jil ta jc'axel te hierro, ajch'al, bronce, plata, soc te oro. Jich ts'ubiltic te bit'il ya quiltic ts'ubil lum ta yorail verano te c'alal ya yich' wuyel te trigoe. Jc'axel jujch'iyot bael yu'un te iq'ue, ma'yuc bila chican jilel. Pero te ton jul ta stojol te loc'ombae, c'atp'uj ta jun mero muc'ul wits. Te witse la smac spisil te lumq'uinale.
36“Ja' me la awaichin in to. Yo'tic ya me calbat awaiy te bila swentail te awaiche, muc' ajwalil. 37Te ja'ate, ja'at mero muc'at ta stojol te yantic muc' ajwaliletique, melel ja' nix te Dios ay ta ch'ulchan te la yac' ochan ta muc' ajwalile. La yac'bat awu'el, la yac'bat awip, la yac'at ta ich'el ta muc', 38la yac'bat awu'unin ta spisil q'uinaletic te ay mach'atic nainemic tey ae, soc te ay chambalametic, mutetic. Ja' stuquel la yac'bat awu'unin spisil, ja'at me sjolat te oroe, muc' ajwalil. 39Te c'alal ya xlaj yip te ajwaliletic awu'unic te ayic ta swenta Babilonia, ya me xchicnaj jchajp xan ajwaliletic te peq'uel yipe. Soc ta patil ya me xchicnaj jchajp xan te pajal yipic soc bronce. 40Soc ta patil xan bael ay me ya xchicnaj jchajp xan ajwaliletic te pajal yip soc te hierro, ja' me xchanebal abi. Te bit'il pajal soc hierro, ya me sjin soc ya me slajin spisil, jich me te jchajp ajwaliletique, ya me sjin soc ya me slajin ta spisil te yantique.
41“Te la awil te yacan soc te yalatac yacan, pasbil ta ajch'al soc ta hierro, ja' ya yac' ta na'el te cha'chajp me ya yac' sba te ajwaliletique, manchuc me yich'ojbey jtebuc yip hierro. Te ja'at muc' ajwalil, ya awil te capal soc ajch'al te taq'uine. 42Te yalatac yacane, hierro soc ajch'al. Ja' in to, ya yac' ta na'el te ay banti ay yip, soc te ay banti ma'yuc yipe. 43Jich te bit'il la awil te hierro capal ta ajch'ale, jichic me te mach'atic ya yich' yat'elic ta ajwalil. Jun me ya xc'otic ta swenta nujbinel, pero ma me xju' te mero jun nax ya xc'otique, jich te bit'il te hierro, ma xju' ya scap sba soc te ajch'ale. 44Te c'alal ay yat'elic ta muc' ajwalil ae, te Dios ta ch'ulchan ya me yac' ochel jtul jmandalteswanej te sbajt'el q'uinal ma ba ya xlaje, soc te ma'yuc bi ora ya x'u'uninot yu'un yan nación. Ja' me ya slajin ta jyalel te yantic ajwaliletique, ja' nax me muc' ajwalil ya xjil ta sbajt'el q'uinal stuquel. 45Ja' me ya yac' ta na'el te ton la awil jajch' tel ta witse, te stuquel nax tale, te ma'yuc mach'a tselot bael yu'une. Ja' te ton te la sts'ubiltay te hierro, bronce, ajch'al, plata, soc te oro. Ja' me stuquel te mero muc' Dios te la yac'bat awil te bi ya xc'ot ta pasel bael ta patile. Te bi la awaichine mero melel, soc te sc'oplal la calbate mero melel me —xi'.
46Te muc' ajwalil Nabucodonosor la squejan sba ta stojol Daniel, la stinan coel sjol c'alal ta lum, soc la yal mandal te ya yac'beyic milbil smajt'ane, soc ya xchic'beyic pom. 47Patil jich la yalbey te Daniel:
—Ta mero melel, Daniel, te Dios awu'unic ja' mero toyol yu'un yantic diosetic. Ja' Ajwalil yu'un ajwaliletic, ja' ya xchicnantes te bitic wocol ta na'ele, melel ju' awu'un xchicnantesel te bila wocol ta na'ele —xi'.
48Te muc' ajwalil la stoyesbey xan yat'el te Daniel, la yac'bey bayal yutsil smajt'an. Soc la yac'bey yat'el ta ajwalil ta jsejp q'uinal te Babilonia sbiile. Ja' mero muc' jwentainwanej c'ot yu'un spisil te mach'atic bayal bi sna'ojic te tey ayic ta nación yu'unique.
49Ta scaj te c'opoj te Daniel ta stojol muc' ajwalil, yu'un te Sadrac, Mesac, soc te Abed-nego, ac'bot tulan yat'elic ta sejpel ta sq'uinal Babilonia. Te Daniel ja' la sjoin jilel ta banti ay ta at'el te muc' ajwalile.
Currently Selected:
Daniel 2: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.