Colosenses 3
3
Te bila ya yantay bael te mach'a xch'uunej te Cristoe
1Jich yu'un te bit'il cha'cuxemexix soc te Cristoe,#Ro 6.4-11; Col 2.12. ja' me ac'a bajt'uc ta awo'tanic sleel te bila swenta te ch'ulchane, ta banti ay te Cristo te nacal ta swa'el sc'ab Diose.#Sal 110.1; Heb 1.3. 2Ja' me xawil spisil ora te bitic swenta te ch'ulchane, ma me ja'uc te bitic swenta te balumilale. 3Melel lajemex, soc muquen ay acuxlejalic yu'un Dios, ta swenta te Cristoe. 4Ja' acuxlejalic te Cristoe.#Gá 2.20; Fil 1.21. Jich te c'alal ya xchicnaj tele, tey me ya xchicnajex soc a. Jich me ya ajoinic tey a ta bay nojel te yutsilale.
Te pocol cuxlejale soc te yach'il cuxlejale
5Jich yu'un, ac'aic ta lajel spisil te bitic ya ana'ic spasel ta swenta nax in balumilal to: Ja' te yalel ta mulile, te chijil-o'tanile, te sbic'tal asit ta mulanwaneje, soc spisil te bic'tal-o'tanile, soc teme yu'uninejbeyex awo'tanic te c'ulejalile te ja' pajal soc te xch'uunel loc'ombaetique. 6Ja' ta swenta in muliletic to te ya x'ac'bot yich'ic tulan castigo yu'un Dios te mach'atic te jch'ay-mandale.#Ef 2.3. 7Te ja'exe jich nix la apasic ta neelal uuc te c'alal tey cuxulex ae. 8Yan ta ora to ijq'uitayaic spisil in to: Ja' te ilimbae, te c'ajc'ubele, te bila amene, te toybac'optaywaneje, soc te bol utaw te ya xloc' ta awee. 9Ma me xapas abaic ta lot juju-jtulex. Ijq'uitaya me te apocol acuxlejalique#Ef 4.22. soc spisil te bila c'aemex ta spasel ta swentae. 10C'u'inaic me te yach'il acuxlejalic#Ef 4.24. te yanyan ta ach'ubele, ja' to teme pajal c'oex soc te Jpaswaneje,#Gn 1.26; Ef 2.10. yu'un jich me ya ana'beyic sba ta lec. 11Ma'yuquix sc'oplal teme jyanlum o judio, te mach'a yich'oj circuncisión o te mach'a ma ba yich'oj circuncisión, soc lajix sc'oplal teme jyanlum soc teme bol winic, soc teme abate o teme libre aye. Te melel ja' nax ay sc'oplal te Cristoe, te ja' yu'un ta spisil soc ay ta swenta spisil.
12C'u'inaic me te yach'il cuxlejal te bit'il tsabilex yu'un te Diose, te ch'ultesbilex yu'un te Diose, soc te c'uxex ta yo'tane. Jich yu'un ac'aic me ta ilel te ya ana'ic c'uxtaywanej. Ayuc me yutsil awo'tanic. Peq'uel me xawac' abaic soc manso me xawac' abaic. Ac'a cujch'uc awu'unic teme ay bila ma lecuc ya awaiy ta awo'tanique.#Ef 4.2. 13Talel c'axel ts'icbeya abaic, soc pasbeya abaic perdón teme ay ma lecuc te bila ya apasbey abaique. Jich nix te bit'il la spasbeyex perdón te Cristoe, ja' nanix me jich ya sc'an te ya apasbey abaic perdón uuc te ja'exe.#Ef 4.32. 14Ja' bayal sc'oplal te ya awaq'uic ta ilel te bit'il ac'u'inejic te xc'uxul awo'tanique, yu'un ja' syomoj spisil te bila lec ta pasele. 15Te lamal q'uinal yu'un te Diose ac'a swentainbeyex awo'tanic. Melel la yic'otic te Diose te jun nax ya xc'ootic ta jpisiltique, jich te bit'il jun nax ay te jbaq'uetaltique. Soc albeyaic wocol Dios yu'un spisil.
16Ja'uc me nojel ta awo'tanic spisil ora te sc'op te Cristoe. Ayuc me sp'ijil awo'tanic te ya ap'ijubtes abaic soc te ya atac'uy abaique. C'ajintayaic soc awo'tanic ta yalel wocol Dios ta salmoetic, c'ayojetic yu'un te Diose, soc c'ayojetic ta swenta Espíritu. 17Spisil te bila ya apasique soc te bila ya awalique, pasaic spisil ta swenta sbiil te Cajwaltic Jesuse. Soc albeyaic wocol te Jtatic Dios yu'un spisil te bila yac'ojbeyexe.#Ef 5.19-20.
Te bila ya sc'an ya spas te mach'atic xch'uunej Cristoe
18Antsetic te nujbinemexe, ich'aic ta muc' te amamlalique,#Ef 5.22; 1 P 3.1. jich te bit'il ya sc'an te Cajwaltique. 19Winiquetic te nujbinemexe, c'ux me x'awaiy ta awo'tanic te awinamique.#Ef 5.25; 1 P 3.7. Ma me ayuc slab awo'tanic ta stojol. 20Alnich'anetic, ch'uunbeyaic spisil smandal te ame'-atatique. Melel ja' lec yo'tan yu'un te Cajwaltique.#Ef 6.1. 21Me'il-tatiletic, ma me xawac' ilinuc yo'tanic te awal-anich'anique,#Ef 6.4. swenta yu'un ma xchebaj yo'tanic ta awentaic. 22Abatetic, ch'uunbeyaic spisil smandal te awajwalic te ayex ta abatinel yu'un li'to ta balumilal. Soc awo'tan at'ejanic ta swenta te awajwalique. Ma ja'uc nax te c'alal ya yilex te lec ya x'at'ejex ta stojol. Junuc nax me awo'tanic ta stojolic. Ja' me x'axi'ic te Diose. 23Spisil te bila ya apasique, soc awo'tan xapasic. Jichuc me ta awo'tanic te ja' yaquex ta at'el yu'un te Cajwaltique, ma ja'uc te ants-winiquetique. 24Yu'un ya ana'ic te ya yac'beyex amajt'anic juju-jtulex ta patilal te Diose. Melel ayex ta abatinel yu'un te Cristoe te ja' mero Awajwalique. 25Yan te mach'a amen te bila la spase, jich nix amen te stojol te ya x'ac'bot ta swentae.#Ef 6.5-8. Soc ma'yuc mach'a tsabil nax yu'un te Diose.#Dt 10.17; Ef 6.9.
Currently Selected:
Colosenses 3: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.