Colosenses 2
2
Ay ta yo'tan Pablo te colosaetique
1Ya jc'an te ya ana'ic stojol te bit'il tulan yacon ta at'el ta jcoltaybelex ja'ex soc uuc te quermanotactic te ayic ta lum Laodicea,#Ap 3.14-22. soc spisil te quermanotactic te ma ba yilojbonic jsite. 2Yu'un ya jc'an te ya yich' yip awo'tanic, soc te jc'axel jun awo'tan abaic ya xc'oex yu'un te c'ux ya awaiy abaique. Jich me ya ataic te smuc'ul awo'tanic te bit'il ts'acal ya ana'iquix te bit'il ay te muquen c'op yu'un te Jtatic Diose, te ja' nix te sc'oplal te Cristoe. 3Stuquel ay ta swenta spisil p'ijil-o'tanil soc spisil te bila ya sc'an ya jna'tic stojol te q'uejbil yu'un ta spisile. 4Spisil in to ya calbeyex awaiyic swenta yu'un ma me ayuc mach'a ya slo'layex ta swenta nax sp'ijil sc'op. 5Manchuc teme q'uejel ayone, ja'uc me to, joinejex ta co'tan. Jich ay bayal sbujts' co'tan yu'un te lamal ayex ya caiye, soc te pajal ay xch'uunjel awo'tanic ta stojol te Cristoe.
6Jich yu'un, te bit'il la ach'uuniquix te Cajwaltic Jesucristoe, ya sc'an te jich ya xcuxinex ta stojole. 7Ismajemuquex me ta lec ta stojol Cristo, soc ipajemuquex me ta lec ta swenta. Jc'axeluc me ay xch'uunjel awo'tanic jich nix te bit'il ac'botex anopique. Albeyaic bayal wocol spisil ora te Diose.
Quich'ojtic jcuxlejaltic soc te Cristoe
8Tsajtaya me abaic jiche, ma me xawac' slo'layex ta swenta sp'ijil sc'op nax ants-winiquetic soc te bila tojol c'op aiyejetic naxe. Ja' nax yich'ojic ta muc' te costumbre yu'un te ants-winiquetique soc te bila jowil nax snopojic ta balumilale, te ma ja'uc ta swenta te Cristoe.#Gá 4.3,9.
9Melel te Cristoe ts'acal yich'ojbey stalel te Diose. 10Soc ts'acal awich'ojiquix acuxlejalic te bit'il jun ayex soc te Cristoe. In te Cristoe ja' jolol yu'un spisil te yantic te ay yat'elic soc te ay yu'elique. 11Soc te bit'il jun ayex soc te Cristoe jich la awich'ic circuncisión. Ja'uc me to, ma ja'uc te circuncisión te pasbil ta sc'ab ants-winiquetic. Ja'ix te circuncisión te la awich'ic ta swenta Dios te bit'il la ach'uunic te Cristoe. Jich colex ta libre yu'un te amulawil-baq'uetalique. 12Yu'un la awich'ic muquel soc Cristo te bit'il ac'botex awich'ic ja'e. Soc la awich'ic cha'cuxesel soc te Cristoe,#Ro 6.4. yu'un ach'uunejic te bit'il Dios la xcha'cuses tel ta yu'el ta bay animaetic te Cristoe. 13Te ja'exe lajemex yu'un te mulile soc ma ba awich'ojic circuncisión te abaq'uetalique. Ja'uc me to, Dios la yac'beyexix acuxlejalic soc Cristo#Ef 2.1-5. te bit'il la spasbeyex perdón yu'un spisil te amulique. 14Dios la stup'botiquix ta jun spisil te jayeb jbetic te quechel ta jwentatic stojele. Tey laj sc'oplal a te c'alal la yich' bajel ta lawux ta cruz.#Ef 2.15. 15C'alal laj ta cruz te Cristoe, tey la slajinbey yat'elic a te mach'atic ich'bilic ta muq'ue soc te mach'atic ay yu'elique. Soc la yac' ta ilel ta comonsitil te bit'il peq'uel a jilic ta spisilic te c'alal la yaiy tsalaw te Cristoe.
Lea te bitic swenta te ch'ulchane
16Jich yu'un, ma me ayuc mach'a ya yich'ex ta c'op yu'un te bila ya awe'elinic soc te bila ya awuch'ique, soc te bit'il ay sc'oplal te sc'aalelal te q'uinetique, soc yuninal te ue, soc te sc'aalelal cux-o'tane.#Ro 14.1-6. 17Spisil in to, squeawil to nax te bila ya xtale, yan te smelelile ja'ix te Cristoe. 18Ma me xawaq'uic ta pojel te amajt'anic yu'un te mach'atic te jowil nax peq'uel ya yac' sbaic ta c'axem to xan, soc te ya slajin sbaic ta stojol te ch'ul abatetique. Scuyoj sbaic te ay bila ac'botix yil ta swaichic ta sc'opique. Muc' yac'oj sbaic yu'un te bila snopojic ta swenta nax te sbaq'uetalique. 19Ma junuc ay soc te Cristoe, te ja' jolol cu'untique. Ja' ya yac' te ya xmuc'ub spisil te sbaq'uetale, ta swenta bit'il jun ayotic ta mac'linel yu'un soc te jun nax ya yac' te ya snit sbaic te juju-jchajbe, jich te bit'il chapal yu'un stuquel te Diose.#Ef 1.22; 4.15-16.
20Te ja'exe lajemex soc te Cristoe.#Ro 6.6-11; Gá 2.19-20. Jich ma ba ya ach'uuniquix te jowil nax nopjibal yu'un te balumilale. ¿Bistuc jiche te jich ya x'ainex te bit'il mach'atic ayic nax ta swenta te balumilale? ¿Bistuc ya ach'uunic te bila mandalil snopojic naxe? 21Jich bit'il te ay ta alele: “Ma me x'apic in to. Ma me xawe'elin in to. Ma me x'atsaquic ta ac'abic in to”, te xiique. 22Spisil in to, ja' nax nopjibal yu'un te ants-winiquetique soc ja' sc'oplal te bila ya xlaj ta tuuntesel ta orae. 23Jich yaiyel te ya xp'ijubotic yu'un te p'ijil c'op ya yalique. Soc ya sujawanic ta xch'uunel Dios yilel te bit'il mero peq'uel ya yac' sbaic a, soc te ya yac' c'axuc swocol ta sbaq'uetalique. Ja'uc me to, tojol nax, ma xju' yu'unic scomel te bila ya smulan te jbaq'uetaltique.
Currently Selected:
Colosenses 2: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.