Tatanigaina 44

Ia Panikeni Ta Siliva Ka Zosepu

1Zosepu neke va kahe ghini irahi ia maneriva ta kenu ka ia suga manei, “Va foudu va vehari ira baiki ka ira mane ka taghe niha ghano ta boka hurerira maneri nia va fate laori ira sopai nodi rongo ka ira sopai baiki maneri, e ghua. 2Nakai va fate laoi panikeni ta siliva ini ka ara ka ia baiki ia tahidimane ta ite taremehana ia rongo malana witi ka manei.” Neke riva ghini ghu manei taghe neke kaheio Zosepu.

3Ka ia ghalaghalana meha ia fufugho, ira maneriva ka Zosepu dike va ghaheri ira tatahinamane taremehadi ira nodi dongiki ta va haghe baiki witi. 4Deo ngama gedi ke ghahe varihau ghu maneri ka malau leghaha ani, neke kahe ghua ghu iahi Zosepu ka ia nona maneriva ta kenu ka ia suga manei, “Magali ghahe leghu laori ira mane. Noto la dufuri la, notoho ghua ghidi iahi, ‘?Ne heve ghau ghe, no fihikini nga ka muko ia veha neke vanamuo ia faghina ka ara ta sikoi ini ghu ghau ia panekeni ta siliva ka manei? 5?Heve, eka ghua ghu iahi mu ia panikeni ta mala ketuhu ia faghina ka ara nia ia ta mala rivai doritohoto manei e ghua? Kaike leghutau ta muko mu noto riva ghinina ghau.’ ”

6Ka ia la dufuri maneri ia maneriva, manei neke la va kahe vanadi leghuni ngengene haro irahi la. 7Ghe maneri dike kahe ghua iahi ka manei, “?Faghina agho, heve mu fafahakanana ka agho ta ngengene ghua ini iahi? Ghai mu ira nou noniriva e deo kalasukai ghu boka riva ghinimaina kokolona leghutau iamu. 8Ghai nake hio leghu vananigho meha ghe ira rongo nake finiriro fate laodira ka ira baiki ghai sipamaina ka ia kavana Kenani. ?Heve ghu ghe, ga boka sikori nga ghai ira siliva ba golu ka suganao ia faghinau agho? 9Faghina agho, noto fini tana la hei ka ghai leghutau ianimu, manei e toraina age mala va lemei. Ghai haroharo ga age nona mane mala varituhu ghu ia faghina ka agho, e ghua.”

10“Ne veha mo ka ara ta ghuana iamu, ghe manei neke sikoio lama ia panikeni mu ta meha nogu mane mala varituhuna ara, nia ghau haroharo go kalasa ghemu ghu, e ghua.”

11Magali ma dike va hinaeri ghu ka kavao ira sopai nodi baiki, dike sopai tobeheri ghu. 12Ia maneriva ta kenu ka Zosepu neke hadu ghu, tatanigaina ka neke kusu dolio neke va nonogha ghu ka neke doli va leleghuno. La finini tuna ia panikeni ka ia baiki Benizemeni neke ghua manei. 13Ira tatahinamane dike age rekuri ira nodi poko ka ia muko hihingodi. Ianimu tuna ghe dike va hahaghe nga ka ira nodi dongiki dike leghu lao ghu ka ia malau leghaha.

14Zosepu neke au ngama ka ia sugana dike la sabara ghu Zuda nia ira tahinamane e ghua, dike la maimanihi hinae lao ghu ka kavao ka kenuna manei. 15Zosepu neke kahe ghua iahi ka maneri, “?Ne heve ghe noke riva ghini nga ghau leghutau iahi? E deo go avohi ghu ghau mu, kaike mane taghe ara e boka hadu kavei mo ka ira ghila heve noke riva ghinina ghau, ta ghuana?”

16“?Faghina agho, heveni take boka kaheina ghai?” neke ghua Zuda ungene tughuna. “?Heve ghe ga boka varituufuai nga ghai? ?Heve a ghua ghe ga boka va kalasa ghai nga taghomai? God to va podoli ta hoto ghaina puhi ghai. Ghai haroharo mu to nou mane mala varituhu agho, eka ghua ghu ma ia noke la fini tanao panikeni ani.”

17Ghe Zosepu neke kahe ghua iahi, “!E deo, ara toraina deo ga boka riva ghini ghu iamu! Ia mane ka neke auno ia panikeni lama ta age nogu mane mala varituhuna ara. Ghau haroharo mu oke leghu ghemu ka nomu mama ka bule.”

18Ianimu tuna ghe neke ghahe kenu lao nga Zuda ka manei neke la kahe ghua ghu iahi, “Faghina agho, va malumuau ta ngengene taremehauna ara. Oka haligho ghu ka ara, geta varifata taghe taghonai ia mane ginitaukela geta ghua ghu ia mana ka agho. 19Agho noke notoho ghua iahi ka ghai, faghina agho, ‘?E au mo kaike nomu mama nia kaike tahimumane e ghua ghau?’ noke ghua. 20‘Uve, ghai au nomai mama tato manekusu ghena nia kaike tahimaimane ta ite neke dolino ka ia neke to mamanekusuno manei, e ghua. Ia tahinamane manei mu to leme ghena, nia manei lama tuna mu kaikena rekaha ta dolina nga ka nona uke e ghua. Nona mama e toraina namaha ghini fuludu manei,’ nake ghua ghinigho ghu ghai.

21“Agho noke kahe ghua ghu iahi ka ghai faghina agho, ‘Hio mehai manei aiahi, a mala boka fini ghu taghogughi ka hibaguidi’ noke ghuano. 22Ghe ghai nake kahe ghua iahi ka agho, ‘Faghina agho, ia rekahamane e deo ge boka ghahe kaini ghu nona mama. Neto ghahe kaini la manei, nona mama e age leme ghatu.’ 23Ghe agho noke kahe ghua iahi, ‘Ghau e deo ke boka meha finiaunani ara, neto deo la ge meha taremehamu ghu ia tahimumane ta ite,’ noke ghua ghini ghai. 24Ka ia ke leghu laomai ka nomai mama, ghai nake la va kahe ghini heve noke kaheriro agho.

25“Ianimu tuna ghe neke va kahe ghini ghai nga nomai mama, ‘Oke leghu lao o la tabara fatada ghano laoni ghu.’ 26Ghe ghai nake ungene tughu ghua ghini iahi, ‘Ghai e deo ga boka lao ghu. E ghahe taremehamai ma tahimaimane ta ite ini ghe ga boka lao nga ghai. Ghai e deo ge kabai fini ghai ghu manei neto deo la tahimaimane ta ite ini ge ghahe taremehamai ghu,’ nake ghua ghini.

27“Ianimu tuna ghe neke kahe ghua meha nga iahi ka ghai nomai mama, ‘Ghau no avohi mo Reseli ia ghaseborogu ara neke va uraha vanaguna palu tuugumane mo. 28Kaikeu ka maneri palu neto ke kusu ghahe kaiau ara deona ke leghu mehana. Manei neto ke toraina ghani va rekurekui mamu keha tagukava mauke, vununa ara nato ke deo ga finini ghu manei taniga ianimuni. 29Noto hio tagu haro la kaikena rekaha iahi, neto la dufuri ghu manei keha leghutau ta age leme ghidi manei, ara a age boka leme mo ka muko hihingo sugha vona ghu ka tato mamanekusu ini ara.’”

30Zuda neke kahe ghua ghu iahi, “Faghina agho, ara e deo ga boka leghu lao ghu ka nogu mama to deo la ga hioi ghu rekahamane ini. Dolina ka nomai mama mu e parekete va gima lao ka ia dolina rekahamane iahi. 31Nato leghu lao la ara ka nogu mama deona ga hioi ghu rekahamane ini, manei e age leme ghena ka ia fafata finini manei ta deona rekahamane ini ge leghu taremehagu ghu ara. Nia manei mu to puina mamanekusu fuludu e age paluhamai ghu ghai ghatu mu va lemeina manei ka muko hihingo. 32Kehanani mu, ara nake naiungene ka nogu mama ta mala fini suteina rekahamane ini. Ara nake va kahe ghini ta hureina ka ia kamotona doli ara ia zutu to deo la ara ke hio leghu va dufu vananina rekahamane ini.

33“E ghua ghu iahi faghina agho, ara ta au hinaena aiahi taghe kaike nou mane mala varituhu ta ghuana holaranana rekahamane ini. Va malumi ghu agho rekahamane ini take leghu taremehadira manei tahinamane idi. 34?Vununa heve a ghua ara ghe ga boka leghu lao nga ka nogu mama neto deo la rekahamane ini ge au taremehagu ghu ara? Ara toraina deo ma ga kabai finini ghu ta age muko hihingona fuluduna nogu mama.”

Currently Selected:

Tatanigaina 44: kji

Highlight

Copy

Compare