Tatanigaina 45

Zosepu Ne Va Podoli Hei Mu Taghonaina

1Zosepu neke to deo ge boka posi va gimai ghu ia hihingona ka kenudi ira nona noniriva, neke va kahe ghidi ghu maneri haroharo ta kave kainina ia ringifota. E deo heini neke au taremehanana Zosepu ka ia fafata va kahe ghidi manei ira tahinamane hei mu taghonaina. 2Ianimu tuna ghe neke toraina nakele va fafaa ghena nga manei dike nomohi ghu ira noni Izipi, dike la turi ghini ghu nonomoho iahi ka ira noni ta au ka ia tolima ia mane ginitaukela.

3Zosepu neke va kahe ghidi ira tahinamane, “Ara mu Zosepu. ?Heve, ne doli nga nogu mama?” Ghe ira tahinamane deo gedi ke boka ungene tughui ghu, vununa maneri dike puina maughedi ka kenuna manei.

4Kahe ghua tuna iahi ka ira tahinamane neke ghua Zosepu, “Namo meha ka ara.” Namo lao tuna maneri, ge kahe ghua ghu iahi neke ghua manei, “Ara mu Zosepu ia tahimumane noke tatabara ghinagu mehano Izipi. 5Ghe oka anga ghemu ghu nia oka varihahala ghu varitaghomughi ghinina noke tatabara ghinagu mehao aiahi. Vununa torai taghonai God neke kusu va ghahe kenu mehauna ara aiahi, mala hio va dolirira ira noni. 6Iahi mu va paluna komuhuna songe ngama ka malau ini. Keha gaha komuhuni ta aura nga ka songe iahi, ta age deo hei ta boka numana nia haharui ghanona ka ira nunuma. 7Ghe God neke kusu va kenu mehau ara kenumu ghau mala hio va doli ghauna ka ghaghahena ta toraina fefereana iahi, mala toraina kopu ghini ghauna ghau nia ira pagusu ka ghau ta mala dolina.

8“Eka toraina ghau la ghu noke va ghahe mehauna ara aiahi, nga God. Manei neke nakaiau ara mala meha nona maneriva ta torai mana fuludu laona ia mane ginitaukela, ka ia tolima kamoto manei, nia mala mane gavanana ka ia kamotona Izipi, e ghua. 9Lao, ke magali leghu ka nogu mama o la va kahe ghini ghu iahi, ‘Iahi mu ne kaheina ia tuumane Zosepu: God neto faeteau ara ta mala kopuna ka ia kamotona Izipi. O mamagali meha dufu ghu ka ara. 10Agho o boka au mo ka ia hori Goseni ka ia ta boka au namoau ara agho, ira nou rekaha, ira rekaha ka ira tuu, ira nou sipisipi, ira nou gouti, ira nou bulumakau, nia ira keha leghutau haroharo ta kuruigho agho, e ghua. 11Noto au la agho Goseni, ara a boka kopu ghinigho mo agho, vununa gaha komuhuna songeni ta la mehara nga. Nia ara e deo ga kabai ghini ghu ta lemei mahaina agho, ia fototatamana ka agho nia ira sipisipi, gouti nia ira nou bulumakau, e ghua.’

12“!Mato mehau! Ghau haroharo nia agho tahigumane Benizemeni haro e ghua, o boka finiau mo ta toraina Zosepu na ara. 13Va kahe ghini nogu mama ta toraina varangana ara aiahi Izipi nia va kahe ghini vahina leghutau tato finiri idi ghau e ghua. Nia magali hio mehai tuna aiahi nogu mama, e ghua.”

14Ianimu tuna ghe neke abai nga manei Benizemeni ia tahinamane neke tatanigai nakele ghena ghu. Benizemeni neke nakele ghena molamo ka ia abai manei. 15Manei neke nakele ghena ma neke angohori ghu ira leghu tahinamane nga. Leghuna ianimu ghe dike tatanigai turi taremehana nga manei ira tahinamane.

16Ka ia dufuna ka ia tolima ginitau ia nonomohodi ira tahinamane Zosepu dike meha maneri ta ghuana, ia mane ginitaukela nia ira nona maneriva dike veha vanadi. 17Manei neke kahe ghua iahi ka Zosepu, “Va kahe ghidi tahiumane nira ta va hahaghena ka nodi dongiki nira ta leghu laona ghu ka ia kavana Kenani, 18nia la hio leghu mehai tuna ka ara nomu mama nia ira fototatamana ka ghau, e ghua. Ara a age vanamu ia kava ta toraina veha aiahi Izipi, o mala boka mahairi ghu ghau ira ghano ta toraina veha fuludu ta kodolo ka ia kavana Izipi.

19“Va kahe ghidi haro molamo ta hiorira ira leghutau mala haghe ta korohori ka dongiki aiahi Izipi maladira ira ghaseborodi nia ira nodi rekaha teri nia ta hio taremehadi mehana nodi mama, e ghua. 20Oka hagala ghini ghu ta mala hiorira ira nomu leghutau taghomu, vununa ira leghutau ta toraina veha ka giliona Izipi mu edi age nomu ghau.”

21Ira tuunamane Zekopu dike riva ghini ghu heve neke va kahe ghidiro. Zosepu neke vanadi leghutau mala haghe ta korohori ka dongiki taghe neke kaheio ia mane ginitaukela nia neke vanadi ghano haro malana ghaghahe ani, e ghua. 22Ka ira keha tahinamane mu, manei neke sopai vanadi foforudi poko, nga ka Benizemeni mu, manei neke vanani lito ghobi kunegeledi siliva nia gaha foforudi poko e ghua. 23Manei neke va ghahe vanani lao molamo nona mama tazo dongiki ta va haghe ghidi leghutau ta toraina veha tanidi Izipi nia tazo dongiki ta va haghe ghidi witi, bereti, nia keha ghano malana ghaghahe lao ani ka nona mama ani Izipi, e ghua. 24Ianimu tuna ghe neke va ghaheri nga Zosepu ira tahinamane neke kahe ghua ghu iahi manei ka ia ghahedi, “!Oka varihahala ghu ka ghahe ta lao nia ghu ghau!” neke ghua ghidi.

25Maneri dike ghahe kaini ghu Izipi dike leghu lao ghu ka nodi mama ka ia kavana Kenani. 26Ka ia ke la sabara leghudi, maneri dike la va kahe ghini nodi mama, “!Zosepu deo ge leme ghu! Manei lamu ne mane kopuna ka ia kamotona Izipi.” Zekopu neke kakazara ghena nomoho laoina, deona geke va hohoghonari ghu. 27Ghe di va kahe ghini ghu ira leghu neke va kahe ghidiro nga Zosepu nia ka ia finiri manei ira mala haghe ta korohori ka dongiki neke va ghahe laorio Zosepu mala hio laoina Zekopu ani Izipi, manei neke age veha leghu ia nganganana. 28“!Iamu tuna ghe na va hohoghona nga! !Ia tuugumane Zosepu ne doli nga!. Ara a la finini ghena, ghe ga leme ghegu nga,” neke ghua.

Currently Selected:

Tatanigaina 45: kji

Highlight

Copy

Compare