Ipisus 1

Salam di Poulus

1Kumaa si di kosusuladanku, i songonuvon di Kinoringan sino Bandar Ipisus, iri tongotulun di rumalan maja di Koristus Yisus.

Itino surat mantad dogo, i Poulus, i nopili di Kinoringan maja do kouvanganJo supaya sumiliu do susuuon di Koristus Yisus.

2Mokianu oku di Kinoringan i Tama tokou om i Tuhan Yisus Koristus supaya opuavang#1:2 opuavang: aandai ginavo, obintaak om obintulung mamarakat dikovu om poposondod dino ginavo muju.

Onuan Tokou di Koristus do Barakat mantad di Tatod do Kinoringan

3Rojoon#1:3 Rojoon: Ompodon tokouno i Kinoringan, iAmoJo#1:3 iAmo: iApa di Yisus Koristus i Tuhan tokou, do opuavang manaak daton#1:3 daton: ditokou pointikid-tikid di barakat mantad di TatodJo Tolidang si suruga sabap do nokopiiso tokou di Koristus. 4-5Sabap iri aupo novorun#1:4-5 novorun: navaal iti vonuvo om nopili tokouno laaid do Kinoringan do piisoon tokou di Koristus, supaya olidang tokou om auso sala si gotuvang Disido.

Om kinoponontuan nopo do Kinoringan do mananganak daton saralom di Yisus Koristus sabap do au Isido kojuu daton. Om irino kouvanganJo do aandai, 6supaya arajou i kogojoo Disido sabap opuavang toomod Isido daton do kopiiso tokou di TanakJo. Om au Isido kojuu diri TanakJo. 7-8Sabap kopiiso tokou di Koristus om mantad di raaJo nga nolukat tokou, irino noompunan i duso tokou sabap okonko naalang-alang Isido opuavang marong daton do auso gosob. Om maja diri kopintaro om pongorotian do Kinoringan 9nga nokointalangno Disido si daton i kouvanganJo iri aupo nivantang si di tongotulun di pogulu, do irino tinantu Disido mantad di pogulupo sabap kaandaioJo do salasaion di Koristus. 10Do kouvangan nopo di Kinoringan di natantuJo laaid nga irad diti, sombia do orikot i maso iri tinantuJo nga piisoon Disido kasangkat i silo suruga om i siti vonuvo, om i Koristusno kapala monguasa kasangkat diri.

11Irad diri, tinantu do Kinoringan pogulupo do pinili tokou sumiliu do tulunJo sabap kopiiso tokou di Koristus. Kasangkat dino nga tinumanJo maja diri kouvangan di natantu Disido laaid, 12supaya ikoi nopo tongotulun Joudi di nokopogulu mangaarap di Koristus nga mangarajou#1:12 mangarajou: mongompod diri kagajaan do Kinoringan.

13Om ikovu nga irad nogi dino, do korongou kou nopo di tinangaran do oinomod, om aparsaya kou nogi di Koristus, do tinangaran do oinomod diri nga irino Abar do Aandai do mongovit do kovijaan si dikovu. Om saapai kou dii di Kinoringan diri TatodJo Tolidang, irino i Tatod Tolidang di najanji Disido di pogulupo, do pongilaan do tulun kou Disido. 14Om irino Tatod Tolidang mangajamin daton do kaanu tokou kasangkat di nijanji do Kinoringan do insan tadau, om lukaton tokou di Kinoringan mantad do tongoraraat om osiliu tokou di sanganuJo om mangarajou tokou nogi di kagajaan Disido.

Sambayang di Poulus

15Sabap do onuan tokou di nijanji do Kinoringan, ontok do nokorongou oku do aparsaya kou di Tuhan Yisus om au kou kojuu di tulun di songonuvon di Kinoringan, 16om auno otingkod-tingkod oku monorimakasi si di Kinoringan sabap dikovu, om au oolinganku ikovu mangarait tikid-tikid do sumambayang oku. 17Om pokionuonku ikovu si di Kinoringan di Yisus Koristus i Tuhan tokou, irino Tama do kikagajaan supaya onuan kou marong di Tatod Disido. Tatod nopo Tolidang diri nga manaak dikovu do kopintaran om popointalang Isido di Kinoringan si dikovu supaya kotutun kou marong Disido. 18Om pokionuonku nogi do Kinoringan ikovu supaya poingkalaton Disido ino mato do ginavo muju gosob do koilo kou diri onuu nopo mantad di Kinoringan iri arapon tokou do insan tadau, irino pinangalaavan Disido daton,#1:18 daton: ditokou om koilo kou nong songkuro kosukupo diri kagajaan do barakat di nijanji Disido do ipasanganu di tongotulun songonuvonJo. 19Om koilo kou komuro ginirot di kuasa do Kinoringan i kumaraja si kovijaan tokou diri naparsaya Disido. Om ginirot nopo do kuasa Disido i si daton om miinong ginirot do kuasa 20i nivijauJo di Koristus mantad si kapatajon, om poogom si ponong vanan Disido, iri pantok di agajo kuasa silo suruga. 21Do asavat marong i Koristus mantad di kasangkat diri monguasa silo savat si vinavang,#1:21 vinavang: vanavang, irino silo savat lombus do tavan, ko langit om iri kikuasa, om iri kisinundu, om iri kipangkat, om pointikid-tikid diri kingaran siti vonuvo maino om nogi si vonuvo koduvo. 22Om kasangkat do onuu nopo nga nipokuut do Kinoringan di Koristus, om pinataak Disido i Koristus si poiuuntunan diri tulun naparsaya do sumiliu irad do tulu do kumotua Isido kasaangkat do onuu nopo kumaa siri poiuuntunan diri tongotulun di aparsaya. 23Om iri nopo i poiuuntunan diri tulun aparsaya nga irad do kojuvan#1:23 kojuvan: tinan di Koristus i niposukup Disido, om Isido kondiri monukup kasaangkat diri onuu nopo do sombo-sombo nopo.

Currently Selected:

Ipisus 1: LabukPKV

Highlight

Copy