Ruma 3

1Labon am tibak taw Udyu, gamatangan am te, “E sek, wa ngaro e fanambagun nu an aw sik taw Udyu. Wa ngaro e masuwad ku nafatulian.” 2Ay roro glong aw ayu te, muwag, e fanambagun tuwa. At sadi at fanambagun, sa wa antam tam Diyus nu gfon at fanlongan ebi. Sa wa antam nu gfoyung at ngay fatuyanan.

3Ay labon gafayudun am te, “Labon Diyus dewa nafatuyanan sa antam, wa gfagurungan, teway itam tiba wa tam ay nafaning at ngay foyungan.” 4Ay roro muwag, tam Diyus fagurungan wa fiya. Itam fag ngay taw, tiba ginan wa tam nafagurungan tam ngay longan, ay roro tam Diyus, fagurungan tuwa fagayu. Madyay sa sik afud tam Diyus fanlongan, e tapan tam te, “At ngay taw nu gamatangan tam Diyus longan, sumaful te tam Diyus di e asalanan. Ay dewa e lumong te tam Diyus nasalan wadi, tam Diyus mafasure way, te masine tuwa at nafagbulun.”#3:4 Danyu 51:4

5Tibak taw nu gfasad, wa unu masine tam Diyus nu gfaurianan antam. Katanya fag ngay taw iglong way te, “Masine tuwa nu gasalanan tam.” Teway nu gasalanan tam unu, igfasaful tuwa tam unu sa tam iba te, tam Diyus iglabi fiya fiya antam nu masine, madyay kanya di gasalanan. Ay roro katanya fag longan wa matuyan. Siginan ways taw amatanganan. 6Teway tam Diyus nu dway ro gfauri tagasalanan fag ngay taw, si anya ro sigon at fagbulun wa gtungul. Ay nu dway ro igtungul tam Diyus nu gfagbulun, kanya wa ban sumaful igfili, te go sinu at masine ay sinu at mauri.

7Ay labon tibak taw lumong te, “Masine tuwa nu gfanlamangan tam.” Teway nu gfanlamangan unu tam, tam iba sumaful te, tam Diyus iglabi yay fiya fiya antam nu masine, madyay di gfanlamangan. Ay nu katanya tuwa unu, tam iba kaugat tuwa nu guseganan sas Diyus. Ay Diyus, wa unu mafalong antam te, sik asalanan kanya tam nafanlamangan. Teway kanya unu tam nafanlamangan at nafaugat tibak taw nu guseganan sas Diyus. Ay roro katanya fag amatanganan igsalan way dawdaw.

8Ay dewa katanya, labon tibak taw, gelongan way katanya fag ngay elongan. Ay nu gfadiyuganan way ro tam katanya fag elongan, kata way ro nu glong tam te, “Fagbuluni mauri, ay at fungfung masine tuwa.” Ay famamut ya, tibak taw glong yay te, “Katanya wa fiya anggan Pablu fag fulan nu gelongan. Anyangay glong te, ‘Fagbuluni mauri, ay at fungfung masine.’” Ay roro ngap, yaya, wami long katanya. Ay glong aw te, nus nga sinu fag taw tagfoyung katanya, tam Diyus igfauri wa fiya. Ay masine tuwa tam Diyus nu gfauri takatanya fag taw.

Fagayu Taw e Asalanan wadi

9Ku ngay fadugsay, go mafalong tam te, tam Diyus nu kesug taw Udyu, glabi yay nu kesug taw yud Udyu? Yaya, roro ngap. Aro ginan igfayamag aw te, dewa taw Udyu ay dewa taw yud Udyu, fagayu gamagurangan way asalanan. 10Tam Diyus wa fanlongan tagfoyung antam katanya. Tam Diyus fanlongan glong antam te,

Fagayu taw e asalanan wadi. We masine nus di sadi.

11We taw igsaful at matuyan fiya fiya. Ay we taw gurunganan nangasaful sas Diyus baliwa. 12Fagayu taw inyayu wa at matuyan. Ay fagayu taw we fanambagun. We gfagbulun masine, nus di sadi.#3:12 Danyu 14:1-3; 53:1-3; Takamoyung 7:20

13At ngay taw elongan, mafurat wa dawdaw. Katvngvd wa sik fagsandigan kinkate nu mafurat. Ay kamuwagan way nu gelongan.#3:13 Danyu 5:9 At ngay elongan, katvngvd wa sik ubyanun fangkate nu mauri.#3:13 Danyu 140:3 14Ay at ngay taw, igbara way at iba. Ay nu gelongan sat iba, malimata wadi.#3:14 Danyu 10:7

15At ngay taw wa gaduwanun nanfate at iba. 16At ugali wan tagrasras at masine ay tagfalyam tibak taw fagmanabayanun. 17At fakaumsigun, garingangan tuwa gugat gugat.#3:17 Isayas 59:7-8

18At ngay taw wa gsaful kalimu Diyus.#3:18 Danyu 36:1.

19Kanya fagayu ku nalong, fagayu siginan was Diyus fanlongan. Ay galay e marirukan sa tam Diyus fanlongan, kanya at faturunanan, sa wa long ro tam Diyus at fagfonan at fanlongan. Nu katanya, mayamag fiya fiya te, kanya fag ngay longan taglong te at ngay taw mauri wadi, igtaip yangay taw Udyu sigon, madyay sanya wa fag fulan tam Diyus nu gfon at fanlongan ebi. Nu katanya, we taw at mafafalong sas Diyus te, “Aw kwe asalanan.” Tam Diyus glag way te, fagayu taw e asalanan wadi.

20Fagayu taw e asalanan wayay, nus nga setvngvd sik taw nu nangurunganan nanfaning Diyus ngay suguwan, wa mafafalyam at asalanan. Tam Diyus iglag way, te kanya fag taw e asalanan wadi. Teway fakatanyaun, tam Diyus suguwan bunwa fanfalyam asalanan. Tagfasure way baliwa asalanan sa antam.

Afanudi sa Tam Fun Isus, ay Tam Diyus Di ban Gamatangan Tam ngay Asalanan

21Roro, tam Diyus e faran yay, laman mafalong sa antam te, “Nu glag aw ayu, kata wam yud e asalanan.” Siginan ngay ebi, tam Diyus fanlongan igfoyung wa gugat ka fag faran. Ay nu katsi wan, nafaugat yay tam Diyus nu gfoyung antam ka fag faran. Kanya fag faran, bunwa te, faningi yap tam Diyus at ngay suguwan. 22Kanya fag faran, antuwa afanudi sa tam Fun Isus. Teway nus nga sinu tagafanud sa tam Fun Isus, sanya wa fag taw Diyus faglongan te, “Nu glag aw emu, kata wo yud e asalanan.” Dewa tams nganda ginan fag fulan taw, nu gafanud tam sa tam Fun Isus, tam Diyus nu glag antam, kata watam yud e asalanan.

23Fagayu tam e asalanan way tam. Wa tam kalong kalong nafasud tam Diyus at kamasinean. 24Ay dewa katanya, tam Diyus iglong yay antam te, “Nu glag aw ayu, di am e asalanan.” Ay tam Diyus nu glong antam katanya, we fagfanyaun siginan antam tam fagbulun. Teway kanya tuwa baliwa at kinfanyu antam, ay tam Fun Isus tuwa at nasali tam ngay asalanan.

25-26Tam Diyus naawat at faran laman at faurianan di mdasug sa antam. Nafatsi tam buknga tam Fun Isus, laman ro kanya fag faurianan satu ro takadasug sa antam, si way anya kabat. Ay tam Fun Isus nadalan wa fiya ka fag faurianan, ebi gina inkate. Nu katanya, katsi, tam Fun Isus at nafagbulun nafasine wa antam, nu antuwa tam gafanud sa anya.

Siginan ngay ebi ebi, sik taw nu antuwa gafanud sa tam Fun, tam Diyus di gfaurianan anya. Dewa te, kanya fag taw gasalanan wadi, tam Diyus di gfaurianan. Ay labon itam nu gamatangan tam, katanya tam Diyus fagbulun wa masine. Wa kata kalimata asalanan. Ay roro tam Diyus kalimata tuwa, madyay nasugu tam Fun Isus laman nansali taw asalanan. Ay katanya tuway, igtungul tuwa tam Diyus fagbulun, nu glong sas tagafanud sa tam Isus te, “kata wam yud e asalanan.” Teway tam Fun Isus nasali wan taw asalanan.

27Nu katanya, go mafalong watam te, “Katsi long, igfagbulun aktuway masine, Diyus guseganan wa long ro angku.” Roro yaya, di katanya. Tam Diyus nu glinggat te go insine watam, bundi si tam nafagbulun. Si tuwa tam naafanudan sa tam Isus. 28Katanya tuwa at faran, laman tam Diyus lumong antam te, “Kata wam sik ngay taw at yud e asalanan.” Antuwa nu gafanud tam. Bundi si tam nafaningan tam Diyus at ngay suguwan.

29Go sangay tam Diyus, taw Udyu way fagsadi at ke Diyus? Igdi long. Fagayu taw tuwa at ke Diyus. 30Madyay we tibak Diyus sat dayu. Ay nu katanya, fagayu taw, dewa taw Udyu ay dewa taw yud Udyu, nu gafanud tuwa sas Isus, kanya wan Diyus faglongan te, “Nu glag aw ayu, kata wam yud e asalanan.”

31Ay nu nalong watam te, “Afanudi ngay sa tam Isus,” go wa tam gfe masuwad kanya fag ngay suguwan ayuwayu at marirukan si tam Diyus fanlongan? Muwag yay long. Teway nu gafanud tam sa tam Isus, katanya wan roro nu antam gfe masuwad kanya fag ngay suguwan.

Currently Selected:

Ruma 3: TAWEAST

Highlight

Copy