Ruma 2

Pablu Foyungan sa sik Taw Tagamatangan te, “Masine Aktuwa”

1Labon aro ginan nu gtap am ku rirukan, am tiba, gamatangan wam te, “Kin ngaro, tam Diyus faurii wa fiya ka fag ngay tagfagbulun mauri.” Ay roro ngap, o wan at sadi tagfagbulun katanya. Ay nu glong o te faurii wan tagfagbulun mauri, kata wo glong te faurii wemu.

2Mangamam, mangenam, tam Diyus iglong te, “Igfauri kwa ban fiya tagfagbulun mauri.” Ay nasaful watam te, katanya Diyus at fasadan, igtungul wa fiya. 3Nu katanya, dewas nga sinu fag taw lag gamatangan te, “Yaya, Diyus di ban igfauri angku. At fagfauriun, fagayu way tagfagbulun mauri.” Roro Diyus fauri wa fiya emu, teway anggan o igfagbulun way o katanya.

4Ay lag yangay gamatangan te, “Igdi, madyay ebi ginan nu gfagbulun aw, katatuy wa gugat, ay Diyus di nafauri angku.” Roro Diyus fagyudun nafauri emu, Diyus kafanyu yay dawdaw emu. Dewa te, am fagbulun malimata dawdaw sa anya, Diyus igfabarisun yay. Igfon yay emu sik lungud, laman mamatangan yay o te, “Wa ngaro masine ku fagbulun.” Katanya Diyus at fagyudun sigad igfauri emu.

5Ay roro nu dway gugat kabali am amatanganan, anway o igfaugatan Diyus faurianan ban sa emu. Kaugat yay baliwa, teway wo gugat kalimata am ngay fagbulun at mauri. Ay gina ban indasug Diyus at filian fag menit, tam Diyus faurianan wa fiya emu. Ay di ban igsalan nu gfili at ngay fagfauriun.

6Tam Diyus ban nu gfadasug at faurianan ay at famanyun sa sangay taw, igfalungud sat ngay taw at nafagbulun. 7Amatangani te, e sik taw nangus at yud katuwas nu gfagbulun masine, laman ro Diyus igfauseganan ban dawdaw anya ay laman igfon yangay anya leleg at yud katabu. Satu ro, nu e taw di katanya, Diyus long ban mon wa fiya leleg at yud katabu sanya fag taw. 8Ay roro ngap, sik taw nu igfaning way at fasadan mandi, Diyus ban igfaurianan way kanya fag taw. Teway kanya fag taw wa nafaning at matuyan fag foyungan. Nafaning way sat mauri.

9Ay tam Diyus nu gfagbulun sas fagayu fulan taw, sudan tuwa. Fagayu tagfagbulun mauri, mason ban Diyus nu gfauri. Dewa o sik taw Udyu, ay dewa o sik taw yud Udyu, nu mauri way am fagbulun, Diyus ban igfauri wa fiya. 10Ay satu ro, nu e taw di long tagugalian masine, tam Diyus long ban igfauseganan dawdaw kanya fag taw. Diyus long ban igfanabayan fiya fiya ka fag taw. Dewa taw Udyu ay dewa yud Udyu fag taw, nu masine di at ugali, Diyus igfanabayan tuwa. 11Teway tam Diyus nu glinggat taw, bundi te, go daginan fag fulan taw. Fagayu sudan tuwa.

12Ay satu ro, fagayu fulan taw, wa masine at fakadasugan. At yud saful Diyus suguwan fag ngay taw, umkate wa ban yud e fagsegun, teway gasalanan wayay. Tam Diyus wa ban nanfandewan, te, “Tepngawan, wam nasaful ku ngay suguwan.” Ay at nasaful Diyus suguwan fag ngay taw, umfaurianan yangay ban, teway wa nafaning at nasaful. 13Teway tam Diyus fagsarapun, bundi sik taw at nasaful fagtvngvd. Tam Diyus iglag te takatanya fag taw e asalanan way. Tam Diyus fagsarapun antuwa sik taw at nafafaning at suguwan fagayu. Satu ro, nu e taw di katanya, sanya wan tam Diyus faglongan te “Di o e asalanan.”

14-15Sik taw deyud igsaful tam Diyus suguwan, roro ngap igsaful way te, e mauri ay e masine. Madyay deyud igsaful tam Diyus suguwan, tiba ginan at ngay taw yud Udyu igfaning wa fiya tam Diyus at fakaumsigun. Kanya tagfasaful antam te, kanya fag ngay taw igsaful wa te, e masine ay e mauri. Ay katanya at nasaful, kata wa sik ngay suguwan sit amatanganan, tagfoyung anya at tagtungul fag ngay fagbulun. Sit amatanganan, ka fag ngay taw igsaful fiya fiya te, “Katsi ku fagbulun masine,” ay “Katsi ku fagbulun mauri.”

16Ay katanya yangay ban si tam Diyus at filian fag menit. Tam Diyus ban sumarap at ngay taw suksukan, te go mauri way. Ay tam Fun Isus wa ban taglong te go sinu at fagfauriun, ay sinu at fagfalangfeun. Katanya wan sik afud ku foyungan, nu gfoyung aw gugat at Masine fag Barita.

Pablu Foyungan sas Taw Udyu Tagamatangan te Taw Udyu way at Masine

17Katsi e fagalongun aw sa ku ngay iba, sas taw Udyu. Labon igdaragangan am te, “Ami tuwa Diyus at filian fag ngay taw. Diyus guseganan tuwa iglinggat emi, teway sa wa emi nu gfon at suguwan ayuwayu. Ami tuwa at nesugan fiya fiya. 18Ay ami yangay at nasaful at fakaumsigun. Ay igsaful yangay ami igfili at masine, teway at suguwan wan tagfoyung emi.” 19Labon igdaragangan yangay am te, “Tibak taw, katvngvdan nu gyud e nasafulan sa tam Diyus baliwa, kata wa nu gyud glag. Ay dewa katvngvd anya fag ngay taw, mafafoyung yay ami. Ay tibak taw dewa igbanwan sad marum, ami wan takata sik salung, tagdamlag sanya fag ngay taw. 20Ay ami yangay at mafafoyung sik ngay taw at yud e nasafulan sa tam Diyus baliwa. Teway fakatanyaun, tam Diyus suguwan wan at nafayamag emi, ay kanya wa long tagfoyung fiya fiya at matuyan.”

21Ay roro ngap, dewa am kamoyung, am oma, wam igfaning ay foyungan. Igfoyung am te “Lag kamul,” ay roro am tiba, kamul way am. 22Ay igfoyung am te “Lag kamayun,” ay roro am tiba, kamayun way am. Ay kalimata tuwam iglag at ngay taw nu gseg way sas tawtawan. Roro am tiba, igfangkamul way am tibak taw at nafon sat ngay tawtawan.

23Ay dewa am kadaragang, te sa wa ayu tam Diyus nu gfon at ngay suguwan, roro wam igfaning kanya fag ngay suguwan. Ay nu katanya, tibak taw at nalag ayu, igfalingun way tam Diyus, te, “Diyus at taw katanya way.” 24Ay katanya ay fagbulun, kata way at nalong sa sik afud tam Diyus fanlongan. Iglong te, “Tibak fulan taw gelongan mauri sa tam Diyus baliwa, teway nalag wayay ay fagbulun at mauri.”#2:24 Isayas 52:5; Esikyel 36:20-22

25Labon gamatangan am te, “Muwag, tam Diyus kaumsig wa fiya emi, teway nafaning tuwami ay at suguwan, te, fatulii.” Ay kin, satu ro. Nu gfaning di am tam Diyus at ngay suguwan, tam Diyus guseganan wa long ro fiya ayu. Ay roro wamay igfaning tiba at suguwan, we fanambagun ay nafatulian. Diyus wa guseganan ayu.

26-27Ay katanya yangay sat yud matulian fag ngay taw. Kanya fag ngay taw nu gfaning di tam Diyus suguwan, tam Diyus guseganan tuwa. Ay nu e taw di long at yud matulian, ay nafafaning tuwa tam Diyus at ngay suguwan, kanya wa long ro at mafafalong sa tam Diyus, te, “Faurii wan at matulian. Teway kanya wa fag ngay matulian tagsaful am suguwan, ay wa ngap nafaning. Nu katanya, faurii wan.”

28-29Roro ngap, tam Diyus faglinggatun te go itam wa fiya at taw, bundi si tam nafaningan taw Udyu at ngay ugali. Tam Diyus nu glinggat, si tuwa tam amatanganan. Nu katanya, tam nayudanan, bunwa te, nanfatulii yap, ay nanfafaninguni dawdaw at ngay suguwan ayuwayu at marirukan. Tam nayudanan, ani way fabayani Masine fag Falad nu gfabali tam amatanganan. Nu katanya tuwa, bundi taw taguseganan antam. Diyus tuwa.

Currently Selected:

Ruma 2: TAWEAST

Highlight

Copy