Matiyu 24

Umrasras ban Diyus Bale

(Mar. 13:1-2; Lukas 21:5-6)

1Ay Isus nalaklo siginans Diyus bale. Ay at ngay tagadal inkakbang anya laman nanfalag Diyus bale ay anggan tiba yak afud bale. 2Ay Isus nalong sat ngay tagadal te, “Nalag wam ngaro sanya fag ngay afud. Matuyan iglong aw ayu te, wa ban e batu gtudtungudan. Fagayu umrufa wan.”

Umdasug ban sik ngay Mataka

(Mar. 13:3-13; Lukas 21:7-19)

3Ay gina Isus malunggung sis Bugsul Ulibu, at ngay tagadal nanginto sas Isus sat dayu te, “Foyungi emi te, seduge ban nu msure aro am ngay nafoyung emi? Ay tain ban em fagsafulan te, gadasugun o ay anggan gadasugun wan at fakatabuwan fag ngay menit?” 4Ay Isus nabalus te, “Tagaki tuwa laman di am malukan dewa nus nga sinu fag taw. 5Anway ngayu bank taw at kumdasug ay lumong ban te, ‘Aw wan Fun Isus.’ Ay roro kanya gfanluk way ngayuk taw.” 6Ay dewa ban am e dungganan gbarangyan sat dayu, ay dewa sat ngayayu, lag kalimu. Dewa ban katanya, bunya ginanya at fakatabuwan fag ngay menit. 7Anway tibak talun ban at ngay taw at fagfabarangyanun tibak talun yangay at ngay taw. Ay sik fun at ngay taw at fagfabarangyanun sik fun yangay at ngay taw. Ay sa ban tibak talun e faleleg ban. Ay sa tibak talun at taw kalunus ban dawdaw. 8Katanya at fagsigadan yay at ngay mataka. Kata sik mangena nu gafasalugun at ngenge ay gamatang yay ayu daw.

9“Ginanya ban e gumamat ayu, ay nanfauri ay nanfate ayu. Ay fagayu talun at ngay taw kalimata ayu, teway gafanud tuwam sa angku. 10Ay ginanya ban, ngayuk taw malyam wan at fagafanudun sa angku. Ay nanfodfoyungan ban at ngay iba sat mauri fag ngay taw, ay kadkalimatan. 11Ay umsure ban ayuwayu at yud matuyan fag taglong, ay kanya nanfalyam ngayuk taw at fagafanudun. 12Ngayu bank taw umlukme wan nu kesug angku, anway umkayu wa ban at mauri. 13Ay roro nus nga sinu at nasungatan anggan sas fakatabuwan fag ngay menit, umlangfe wa fiya. 14Ay e moyung ban sas fagdaul daga at Masine fag Barita sa baliwas Diyus nu gmagurang taw, laman fagayu talun at ngay taw sumaful. Ay nu katanya wan, makbang wan at fakatabuwan.”

Mason fag Mafurat

(Mar. 13:14-23; Lukas 21:20-24)

15Lumag wa ban am sik tagfafurat nu namalindug sis Diyus bale, kata ebi Diyus at taglong Danyel at longan. (At tagtap, asafuli tuwa at masuwad.) 16Ginanya ban, fagayu taw tagsis talun Udiya, lagyui sa sangay muyud. 17Sik taw nut siwas tungud ugun bale, lag gsakbo sad bale laman nanbul nus nge wain sanya. 18Ay sik taw nut siwas gamasun, lag guli sat bale laman nanbul at balukas. 19Ay mafanyu ban dawdaw ngay tagfafiyon ay ngay tagfasusu ginanya fag ngay menit! 20Ay darangini tuwa te, laman nu glagyu am bundi gina sis fanmoyanun fag buknga, ay anggan bundi sis Fakamatoun fag Menit. 21Anway ginanya ban, mason wa ban dawdaw at ngay mataka. Ya batang e katvngvd anya nu mataka siginan ngay ebi bagu kafasigad tam fagdaul daga, ay anggan katsi. Ay bandi ban wa ban gdog takatvngvd anya. 22Ay tam Fun nu dway ban fafungkuk ginanya fag ngay menit, fagayu tagleleg we sawad nus di sadi. Ay roro muwag. Tam Fun mafafafungkuk tuwa daw ka fag ngay menit, laman at ngay filian fag taw e fanambagun tuwa.

23“Ay ginanya ban, dewa e lumong ayu te, ‘Iste wan tam Fun Isus!’ ay ate ‘Sanya wan!’ lag gafanud, 24anway umsure wa ban ginanya at yud matuyan fag ngay fun ay at yud matuyan fag ngay taglong. Ay kanya ban gfasure at madulawan ay at madaragang fag ngay fagbulun, laman nanfanluk taw, dewa ro te, Diyus at ngay filian fag taw. 25Tagaki tuwa! Gfaguna akwa gfoyung ayu katsi at kumdasug ban.

26“Nu katanya, dewa tibak taw lumong ayu te, ‘Sanya wan tam Fun Isus sa sik talun at yud e taw,’ lag nanlag sanya. Ay dewa e lumong ayu te, ‘Tam Fun Isus sanya daw sad bale,’ lag gafanud. 27Anway nu kadasug aw kata way ban sik fangkilat nu kasure sas fakamenitan baliwa ay gdamlag anggan sas fakayabian baliwa. Ay katanya ban, Taw at Baguwama nu kadasug fagayu glag tuwa. 28E sik longan te, ‘Nus nganday nu e matean, sanya yangay ngay uwak nu kaful.’ ”

Taw at Baguwama nu Kadasug ban

(Mar. 13:24-27; Lukas 21:25-28)

29“Ay bandi tv, nu mlangfe wa ban ka fag mataka dawdaw, tam menit umkarum ban, ay magdanun sigon wa ban gdamlag. Ay manga galeme umtong wan siginans banwa. Ay nus nga setaw sis banwa muwigan wa ban dawdaw.#24:29 Isayas 13:10. 30Ay rodi sis banwa umsure sik fagsafulan nu kadasug aw, Taw at Baguwama, ay fagayu taw sas fagdaul daga umbalu ban. Ay lumag ban nu kadasug aw sis ngay linyabu. Ay e fagmadaragangun aw dawdaw ay anggan e fagmasineun. 31Ay gina ban e gbudyung dawdaw, sumugu akwa ku ngay tagfabarita, laman nanfaful wa ku filian fag ngay taw siginans fagdaul daga, nus ngandaginan baliwa fag fungfung daga.”

Isus At Fafaskudanan sa sik Alibas

(Mar. 13:28-31; Lukas 21:29-33)

32“Amatangani at fafaskudanan sa sik alibas. At don nu karabas wan, ay at sanga nu malumak yay, nasaful wam te, gakasudyangun wan. 33Katanya yangay ban nu lumag am ku longan nu kagurungan. Sumaful wam te, gadasugun kwa dawdaw. 34Ay matuyan iglong aw ayu te, katsi fag ngay taw ya mkate yap ngay umgurungan fagayu ku longan. 35Tam banwa ay tam daga e fakatabuwan way ban. Ay roro ku ngay longan fagayu wa ban e fakatabuwan faggugat.”

We Taw Sumaful te, Ginanya ban Isus nu Kadasug

(Mar. 13:32-37; Lukas 17:26-30,34-36)

36“We taw gsaful te, ginanya ban fag menit ay ate fag lungud nu kadasug aw. Ay anggan at ngay tagfabarita sigon sas banwa wa gsaful. Ay anggan aw oma, Diyus at Baguwama, kwa gsaful, ku Mama way sesadi at tagsaful. 37Aw, taw at Baguwama, nu mdasug kban, ngay taw at fagbulun kata ebi gina Nuwe fag buknga. 38Anway ginanya, gina gadasugun ka fag lino daul, at ngay taw mabayan yay nu kon ay nu ginum, ay nu gdaduwaan, anggan wa Nuwe nasakbo wa sat basad balutu. 39Ay ka fag ngay taw wa nasaful te, e mdasug ban, anggan wa ndasug ka fag lino daul ay taba wa nkafuy ka fag ngay taw. Ay katanya yangay ban fiya fiya nu kadasug aw, Taw at Baguwama. 40Ginanya ban fag menit e duwak mangama sis gamasun. Ay e tumaban wan at sadi, ay at sadi maubunan wan. 41Ay e duwak mangena glubuk, ay e tumaban wan at sadi, ay at sadi maubunan wan. 42Ay katanya yangay anggan am, matagakani tuwa faggugat, ginanya ay Fun nu kadasug. 43Amatangani, sik tagbilug bale nu nasaful di ro te, go ginain fag buknga yabi at takamul nu kadasug, kanya matagakan wa fiya, ay wa ro gfabayan nu gsakbo sat bale. 44Katanyai yangay anggan am. Mafamasadani tuwa gugat, anway nu kadasug aw, Taw at Baguwama, gina way ban am yud matagakan fag lungud.”

Sik Fanuguwan at Matuyan

(Lukas 12:41-48)

45“Katai at matuyan ay at mamatanganan fag fanuguwan. At fun nasugu anya te, ‘Tanudi ku ngay fanuguwan ay fafangoni tuwa anya gina sis fanfangonan.’ 46Ay ka fag fanuguwan guseganan tuwa nu ndasug at fun ay nalag te, kanya fag fanuguwan gfaning tuwa at longan fagayu. 47Matuyan iglong aw ayu te, ka fag fun nanfatvngvdun wa sa ka fag fanuguwan fagayu si anya. 48Ay roro sik fanuguwan nu gamatangan way te, ‘Yaya, glugo yay ku fun nu kadasug.’ 49Ay kanya nafalang at ngay ufud fag ngay fanuguwan. Ay manga kon ay ginum gfasfuwan takaranug fag ngay taw. 50Ay roro at fun ban umdasug gina at fanuguwan yud gtagak. 51Ay at fun gfauri ban dawdaw ka fag fanuguwan ay nanfaful wa ban sa sangay tagfanluk, sas faguywayan ay fagfaringgitan at bagang.

Currently Selected:

Matiyu 24: TAWEAST

Highlight

Copy